الجزء (47 ) : للحب عنوان

ملخص الجزء السابق: روحة هند المستشفى وانتظارها للنتايج.. خطبه ابراهيم لغزلان وتحديد موعد الخطبه الرسميه .. وذات الشي لعبدالله ومريم.. تفكير سعيد بالزواج.. قرار منى
=-=-=-=-=-=
ظهرت ام عارف من الغرفه وكان عارف برع الغرفه يشوف الي صار بين منى وأمه..
عارف: ها شو فيها؟؟
أم عارف: مادري .. معصبه علي.. ماقلت لها شي غلط انا..
عارف: خل ننزل تحت وبنعرف كل شي منها..
أم عارف : اتصلت في عمك راشد؟؟
عارف: هي امي.. اتصلت فيه وقال ياي في الدرب..
أم عارف: الله يستر بس.. خل ننزل امي..
نزلت ام عارف ويا ولدها يشوفون شو السالفه .. ويتريون منى تنزل.. منى كانت واقفه في غرفتها مجابله المنظره.. من بعد ما ظهرت عنها ام عارف ردت قعدت على السرير وبدت اتصيح.. ااااااااه.. يارب ليش خليتني بهالموقف.. ليييييش؟؟ .. ليش الكل يكرهني ومايبا لي السعاده.. أحمد.. وينك يا أحمد تشوف الي يصير فيني..
نشت من مكانها ومسحت دموعها ومشت صوب الباب وخذت لها نفس عميق وفتحت الباب وظهرت.. وفي هالوقت كان عمها راشد توه واصل..
بو عمر: راشد؟؟.. شو الي يابك هني؟؟
راشد ..: هني بيت اخوي المرحوم.. ماظني محروم علي ادخله.. ولا شو رايج يا ام عارف
ام عارف: البيت بيتك يا راشد
بو عمر: وينها منى؟؟ .. بتتأخر؟؟
ام عارف: لا نازله..
وفي هالوقت دخلت عليهم منى.. ومشت صوب اعمامها وسلمت عليهم ويلست مجابل عمها بوعمر..
بو عمر: اشحالج منى بنتي؟؟ عساج بخير؟؟
منى: بخير عمي.. انت اشحالك؟؟ وشو علومك.. ؟؟
بوعمر: الحمد لله .. ها طلبتيني اليوم؟؟ خير يا بنتي؟
راشد في خاطره.. اااخ يالعيار ياخوي.. انت ولدك.. بنتي وبنتي.. وينك عنها مانشدت عنها طول هالسنين..
منى وهي منزله راسها.. والدمعه تحرق خدها.. وذابحتها.. : أ.. أأأنننا..
عمر وبعصبيه: انتي شوو ارمسي؟؟
نش راشد وهو معصب: شو رايك تروح تكفخها بعد؟؟
عمر: انا اسف..
منى والرجفه باينه في ايدها.. والعبرات تخنقها.. ياربي ليش اسوي جي.. هذا كله بسببك انت يابوي.. الله يرحمك ويغفر لك.. ليييييش.. أحمد.. أحمد.. ااااااااه..
بو عمر: يامنى يا بنتي ترانا نتريا نسمع الي بتقولينه...
منى وبكل خوف.. وبصوت يملئه الحزن..: انا .. مو.. موافقه على.... ع ع .. ع .. ع .. عمر
في هاللحظه استااااانس بوعمر وعمر من الخااطر.. ونش بوعمر يبارك لولده..: مبروك ياولدي ألف ألف مبروك..
عمر: الله يبارك فيك يابوي.. شو عمي راشد مايبا يبارك لي..
راشد وبصوت حاد..: منى.. انتي مقتنعه من قرارج؟
منى.. والدموع تذرف منها.. تمت ساكته مب عارفه شوتقول.. شو اقول.. اقول اني انجبرت.. اقول اني اتحاشى المشاكل.. اقول اني ابا انفذ وصية أبوي على حساب سعادتي.. وظهرت من الميلس بدون ماتقول لهم أي كلمه ثانيه.. في هالوقت كانت ام عارف مصدومه من الي سمعته وفي نفس الوقت متضايقه من الخاطر.. ماكان ودها تسمع هالخبر.. ماكانت متوقعه ان منى توافق على عمر.. كانت حاسه بفرحه منى يوم سمعت خبر احمد يوم خطبها.. نشت من مكانها وهي معصبه..: استانست يوم بوعمر احين.. حرمت البنت من سعادتها مع انسان مثل عمر.. قصيت عليها ولفيت راسها.. سويت عمرك زايغ عليها.. وتحاتيها.. اذا صدق قلبك عليها وعلى مصلحتها وينك عنها من زمان.. مانشدت عنها.. تذكرتها ..
منى في هالوقت كانت في الصاله تصيح وتسمع رمستهم الي يقولونها في الميلس لأن صوت مرت ابوها كان عالي
بوعمر:جـــــــــب.. ولا كلمه.. بنت اخوي وانا اعرف مصلحتها وين.. وبعدييييين لا تنسين ياشيخه كل ما كنا نبي انيي عندكم ولا حتى نتقرب منكم كنتي تروغينا وتمنعينا .. وكيف تبينا نوصل لها ونسأل عليها؟؟
ام عارف: صح اني غلطت..بس ندمت.. وطلبت السماح من منى.. والله الشاهد ان منى مثل بنتي وزوود .. وابا لها الخير.. بس وين الخير دام عمر الي وافقت عليه
عمر وهو معصب: شووووووفي انتي.. تراني ساكت ومحترمنج لأبعد حد.. وايد قمتي تخورينها وتغلطين علي.. ليش انا شو الي ناقصني.. ريال والزين كله فيني..
قاطعه عارف: عـــــــــــــــمر... الي جدامك هاي امي.. فاهم.. ماقدر اسكت على غلطك عليها..
راشد وهو يحاول يهدي الوضع: بس.. عيب عليكم.. تتضاربون؟؟ .. مب حاله هذي..
بوعمر وهو يصرخ: منى.. منى
منى من سمعت صوت عمها زاغت.. نشت من مكانها وغسلت ويهها وسارت له: نعم عمي..
بو عمر: مالج قعده عند مرت ابوج لو دقيقه.. شلي ثيابج وتعالي وياي.. ولا اقول.. ليش اتشلين ثيابج.. انا باخذ لج كل الي تبينه.. بس تعالي وياي..
منى تمت امنزله راسها.. حست بالندم لأول مره من القرار الي خذته.. ماتبا تفارق مرت ابوها حتى لو كانت ظالمه في حقها.. بيت ابوها.. ريحة ابوها فيه.. كيف تروح بيت ناس لأول مره تشوفهم: بس انا مرتاحه هني..
راشد: يابوعمر الله يهديك.. مــ...
قاطعه بوعمر وهو في قمه عصبيته: اسكت ياراشد.. انت ماتتدخل.. يلا جدامي.. انا وليج والوصي عليج.. اتيين غصبن عنج.. اذا مب بالطيب بالغصب.. تبين اخليج اهني مرت ابوج اتلف راسج.. ماعليج منها حيه..
منى ماحبت المشاكل اتزيد.. تمت تذرف دموع بصمت.. وكل الي قالته: بلبس عباتي وبييك..
وظهرت من الميلس سايره صوب غرفتها.. لحقتها مرت ابوها.. : منى.. منى..
منى تمت اتكمل دربها والدموع تذرف منها.. ماتذكرت لحظتها غير أحمد.. آآآآآه لو تدري بالي يستوي بي يا احمد..
ام عارف: منى.. بنتي.. حبيبتي.. كيف بتودرين امج يا منى..
منى صدت صوبها وهي تصيح.. وماحست بعمرها غير تحضن مرت ابوها وتصيح بحرقه.. دخل عليهم راشد وسار صوب منى.. وحضنها وتم يلعب بشعرها..: منى يابنتي.. جان ماتبينه ترى والله عمج مايروم يغصبج عليه.. وانا بساعدج صدقيني.. منى.. عمر مايصلح لج..
منى: عمي انا مابا مشاكل والله مابا.. كافي وصيه ابوي.. بس خلاص.. انا وافقت.. وخلاص..
ام عارف: لاتودريني يامنى.. تمي عندي
منى: انا مابودرج.. بزورج تراني..
ام عارف ماقدرت تتحمل اكثر نشت من عند منى وسارت غرفتها تمت اتصيح وصكت الباب على روحها.. ومنى دشت غرفتها شلت عباتها وبعض الأغراض الضروريه.. وشافت على طاولتها صورة.. هالصورة وقفتها في مكانها.. تمت تتأملها..وتصيح من الخاطر.. شلت الصوره وحضنتها بكل قوة.. وباست الصوره وحطتها ويا اغراضها.. وتمت جريب النص ساعه اتلملم ضرورياتها.. ونزلت تحت.. وعمها راشد ماتحمل الوضع ظهر من البيت.. ويوم نزلت شافت اخوها عارف يترياها في الصاله..
عارف: منى؟؟ ..
منى صدت صوب عارف وعيونها منتفخات من الصياح..
عارف: منى.. لا تروحين.. عشاني.. انتي الي دوم اتسانديني.. ماعرف شو بيستوي بي من دونج..
منى سكتت ونزلت راسها.. جرب منها عارف.. : منى.. أحمد بيموت لا درى انج بتاخذين غيره..
منى استغربت من كلامه ونفس الوقت تذكرت أحمد.. واحترق قلبها زود عليه.. وتمت اتصيح زود.. حضنت اخوها.. عارف ماقدر يتحمل.. نزلت الدمعه منه غصبا عنه.. وتموا دقايق على هالحال ومافترقوا غير يوم سمعوا صوت عمهم بوعمر..
بوعمر: مسوين لنا فلم هندي.. يلا يامنى يابنتي.. تأخرنا..
فز عمر من مكانه وبسرعه شل اغراض منى وسبقها للسياره... وتمت منى ماشيه ويا عمها ومنزله راسها وهي تصيح.. تصيح بكل حرقه.. بتفارق سعادتها لحياة مجهولة.. ماتعرف حد في هالعالم.. وماتعرف شو القدر مخبي لها.. قبل لا تركب الموتر صدت تتطالع بيت ابوها.. حست كأنها اخر مره تشوف فيها هالبيت.. بيت ابوها الله يرحمه ويغمد روحه الجنه..
وركبت الموتر وحرك فيه عمر لبيتهم..
=-=-=-=-=-=-=
هاليوم هو يوم الأربعاء..
طبعا في هاليوم كان أحمد راد من الكليه.. ويالس ويا اهله في بيت عمه .. كل سوالفهم كانت عن موضوع خطبه ابراهيم وغزلان..
أحمد: مابغت ترحم الريال.. اخيرا وافقت عليه.. وبصوت واطي.. عقبال البشاره لنا..
ناصر كان حذاله وسمعه: ههههههه.. صح امي ماردوا اهل ليلى خبر عن موضوع قيسويأشر على أحمد..
شافه احمد وضربه على راسه: قيس الي يشل رقبتك..
ام سلطان: ويه.. بسم الله على ولدي.. لا تفاول عليه..
فدوى: لازم بتدافعين.. مب اخر العنقود.. قام حظك يا ناصر..
ناصر: امبوني محظوظ يوم ان عندي اهل شراتكم..
أحمد يوم حس ان الكل تأثر وبيصيح..: انزين .. احين روميو بياخذ جولييت.. وانا ؟؟ شو مصيري؟؟
غزلان: ياويلي على الي مستعيلين..
هند: شرات بعض الناس ..
الكل: ههههههههه
ام سلطان: والله يا أحمد ياولدي ماردوا لنا خبر .. ترا بيشاورون اعمام منى وبيردون علينا خبر ان شاء الله..
غزلان: اصلا لو يدورون الدنيا احسن عن أحمدوو مابيلقون
أحمد: وجااااان اصدق عمري..
في هالوقت رن تليفون فدوى.. استغربت شافت رقم ام عارف.. نشت من مكانها بس من غير لا تقول لهم ان ام عارف الي متصله وراحت شوي بعيد عنهم وردت: الووو
ام عارف وصوتها المخنوق:هلا فدوى.. اشحالج ؟؟
فدوى من سمعت صوت ام عارف ماارتاحت.. حست ان في شي صاير.. : بخير.. خير يا أم عارف.. شو مستوي؟؟ صوتج مب على بعضه؟؟.. منى فيها شي؟؟
ام عارف وبدت تصيح: شو اقول.. ولا من وين ابدأ .. بس الله يسامح الي كان السبب..
لحظتها تغير لون فدوى.. وداد يوم شافتها حست ان في شي خطير.. تمت اتراقب فدوى عل وعسى اتعرف منها ترمس منو
فدوى: خوفتيني تراج.. فهميني شو الموضوع؟؟
وبدت ام عارف تقول السالفه لفدوى.. وفدوى تمت طول الوقت منزله راسها ومغمضه عيونها.. جاسم ريلها تم يطالعها وحاس ان في موضوع كبير مستوي.. وهي يالسه جربت لطوف الصغيره بنت فدوى.. : ماما.. ماما شوفي عمووور شل عني الحواوه..
فدوى ماحست بنتها من صدمتها من الي سمعته.. كيف تقول لأحمد.. أحمد مجرد انه ارتبك من تأخيرهم في الرد وشو استوى في حالته.. كيف تقول له الي سمعته احين.. شو بيستوي به؟؟
فدوى: بس دخيلج طلبتج يا ام عارف..
ام عارف: تفضلي؟
فدوى: ماباج تقولين الموضوع هذا لحد من اهلي.. لأن باجر خطبه غزلان وابراهيم.. قولي لمنى اذا تقدر تحضر.. بس دخيلج لا تقولين .. لأن احمد لا عرف مادري شو بيستوي به
ام عارف: ياويلي عليج يامنى..
فدوى: انتي هدي عمرج.. بس من نخلص من موضوع الخطبه والمشاغل هاي راح نحاول نحل الموضوع ماعليج لا تشلين هم..
ام عارف: اسمحي لي دقيت لج هالوقت.. بس والله ماكنت عارفه شو اسوي.. فقلت ادق لج..
فدوى: لا زين سويتي يوم قلتي لي عشان اعرف اتصرف..
وبندت فدوى عن ام عارف.. وتمت تفكر في الموضوع.. نشت وداد وجربت منها.. عشان تشوف شو السالفه منها..
وداد: خير يا فدوى.. منو الي كان على الخط..
فدوى رفعت راسها وتمت تتطالع وداد: شو اقول لج يا وداد.. الله يستر بس..
وداد حست بخوف.. وزادت دقات قلبها .. : شو السالفه فهميني..لا تخرعيني جي..
فدوى: قومي نسير بعيد عنهم لأني مابا احمد يعرف بشي..
وداد: منى؟؟ منى فيها شي؟؟
فدوى:نشي خل نرمس مكان ثاني اقول لج..
في هالوقت الكل شك بالسالفه يوم شافو وداد وفدوى يرمسون بصوت واطي وعلامات الربكه والحزن والخوف باينه على ويوهم..
غزلان: هندوو.. شوفيهم هالثنتين؟؟ ومنو الي اتصل في فدوى؟؟
هند: علمي علمج.. بس مخوفيني..
غزلان: حتى انا..
أم سلطان: فدوى يابنتي..شو صاير؟؟ ماسكه بنت عمج وتتصاصرون بعيد عنا..
سلطان: لو سمحتي امي.. وداد مرت اخوها.. قولي لها مرت اخوج.. جي احس وداد مب مرتي بعدها..
الكل تم يضحك.. وأولهم وداد.. اسميك فايج يا سلطان..
فدوى:مافيني شي لعلني افداج يمي.. بس ربيعتي مستويه لها سالفه وماعرف كيف اساعدها فقلت برمس وداد يمكن تقدر لأنها تشتغل وانا .. تتطالع جاسم ريلها بنص عين.. محرومه من الشغل..
جاسم من سمعها .. مسك الجريده الي جدامه وسوى عمره يقراها.. جان تمشي فدوى حذاله.. ومن جربت صوبه سحبت الجريده وعدلتها لأنها كانت مجلوبه..: يامثقف.. مايقرون الجريده بالجلب..
جاسم تم يضحك عليها.. جاسم حرم فدوى من الشغل مب لأنه مايحب انها تشتغل.. لأنه يشتغل في شركه بترول وماشاء الله راتبه حلو ويسده ويسد عياله وبيته.. ومب قاصره شي أبد.. فكان يبا فدوى تتفرغ لبيتها وعيالها.. ومامنعها من الدراسه لو حبت اتكمل.. وفدوى مستانسه على هالوضع وراضيه فيه..
وراحت فدوى مع وداد لغرفه وداد فوق..
=-=-=-=-=-=
في بيت عبدالله..
عبدالله كان عايش حياته ومستانس عالآخر .. ويخطط لمستقبله.. وحاشر الكل على هالزواج..
فغرفه مها وريم
مها: وصل المعرس وصل..
ريم: كلولولولولووووووووش..
تموا يترقصون.. وشلت ريم فايل كبير حاطه فيه اوراقها وادق عليه.. يغنون..
مها: يامعيرييييييييس.. عين الله تراكم.. القمر والنجوم تمشي وراكم..
ريم: كلولولولووووش.. عاشوو..
وعبدالله كملها وياهم تم يمشي وسطهم ويحرك عمره يمين ويسار.. دشت عليهم وفاء ومن شافتهم تغير لون ويهها.. لأنها من النوع الي وااااايد هاديه وماتحب الحشره والإحتكاك بالناس.. عايشه عالمها الخاص مابين الدراسه والبيت وبس.. والمكان الوحيد الي ممكن تشوفها في البيت هو غرفتها فقـــــــط.. وبالنادر يظهر..
مها من شافت وفاء صدت عالصوب الثاني وتمت تتأفف.. وريم على طول شلت فايلها ويلست عالسرير.. وعبدالله بطبعه الحنون راح صوب وفاء وهو يبتسم لها بس هي كانت جامده مكانها وتتطالعهم بصورة حادة..
عبدالله: تعالي شوفي الخبايل خواتج.. يزفوني اونهم.. خبلوني وياهم..
وفاء: هييييه.. انزين ريم انتي خذتي قميصي الأزرق..
ريم وهي مغيضه: مب عندي انا حجرتج مادشها .. كيف تبيني اشل قميصج..
وفاء: خلاص خلاص فكينا من لسانج حشى كلتني
وظهرت وفاء من عندهم .. تمت مها اتقلدها..: كلتني.. روحي.. واللـــــــــه
عبدالله: شو سالفتكم انتوا ويا اختكم؟؟ ابا اعرف؟؟ .. وهي ماقالت شي عشان تردين عليها جي .. سألتج سؤال..
ريم: انت ماتعرفها كثرنا.. ماندانيها..
عبدالله ماعيبه هالكلام.. سار وقبضهم ويلسهم: انا منو؟؟
ريم نشت وحطت ايدها على خصرها: نعم نعم.. ميلسنا عشان تسأل هالسؤال السخيف..
عبدالله وهو يمطها من شعرها.. ويقعدها: ريمووو عن طوله اللسان.. يلا ردن علي؟
ريم: والله اني اتذكر يوم كنا صغار وابوي الله يرحمه كان يمسكنا ويعلمنا... يلا خل نساااااااير.. انت احلى واغلى واعز اخو في العااااااااالم
هدى: لا لا لا في الكون
ريم: حتى اكثر من المجرات والكواكب والفضاء..
عبدالله: ويت ويت.. وين وصلتوا.. انزين.. يعني نحن في هالبيت كلنا خوات واخوان لبعض صح؟؟
ريم: ايوه صح يا معلــــــم..
عبدالله وهو يضربها على راسها: توبي عن هالحركات خليني ارمس ولا ترى بظهر..
ريم تمت ياسه وحاطه ايدها على ثمها اونها سكتت يعني..
عبدالله: حتى وفاء اختكم حتى لو كانت بعيده عنكم.. انتوا جربوا منها.. وشوفو شو فيها؟؟ شو الي مضايجها.. ترى والله هي تحبكم.. بس يوم حست انكم بعاد عنها ابتعدت.. تراها تحتاج لكم.. خصوصا انتوا.. لأنكم خوااااتها وانا ريال يعني مابكون قريب منها كثركم..
مها تمت منزله راسها وساكته.. فهمت كلام اخوها اكثر من ريم لأنها اكبر عن ريم.. ويمكن اقرب لوفاء بما انها البنت الي انولدت بعد وفاء..
مها: انزين مفروض جواهر اتكون اقرب لها بما انها انولدت قبلها..
عبدالله: ماعليه.. بس انتوا بعد خواتها ترا.. مايسد جواهر.. وجواهر مشغوله اكثر.. تدرون هي في العين ماتيينا الا على الويك اند .. مانشوفها وايد.. عشان دراستها .. فمعذوره اذا بعدت عنها وفاء..
ريم: بس انا اتذكر يوم جواهر كانت هني.. كانت دووووم مع وفووي.. حتى نحن كانوا يروغونا دوم..
مها: هي صح..
عبدالله: اممم.. ويمكن يكون بعد جواهر عنها ولأنها ماتعودت عليكم الي خلاها تنطوي على نفسها.. بس بعد عشاني حاولو..
مها: ان شاء الله..
ريم : انا مابا..
عبدالله مسكها من اذنها وتم يمطه: شوقلتي ماسمعت..
ريم وهي صاكه عين ولاويه راسها: اي اي.. خلاص توبه .. ابا ابا..
عبدالله : هي اتحرى بعد..
نش عشان يظهر من غرفتهم .. قبل لا يظهر تذكر شي.. : الله يخسكن من بنيات.. نسيت انا ليش داخل عندكن..
مها: عشان انزفك طبعا..
عبدالله: يااااااربي من هالإنسانه.. ترفع الضغط.. بس بس.. عورتي راسي
مها وهي تضحك بخبث.. : كي كي كي ..
عبدالله: انتوا اتحبوني صح..
ريم + مها: أكييييييييد..
عبدالله: واذا طلبت منكم طلب مابتردوني فيه.. ؟؟ !!
ريم:لا ..
مها: وشو نوع الطلب؟؟ اذا يكلف.. مدت ايدها.. عطنا البيزات..
عبدالله: ريم.. عندج تيب ولا حبل ولا اي شي اربطها فيه.. رفعت ظغطي.. ترا والله بظهر..
ريم : مهوووي بس ..
مها: اف .. ان سكتنا.. قالو ارمسي.. وان رمسنا قالو سكتي.. خلاص خلاص.. اففففف
عبدالله: انتوا خواتي حبايبي مابتردوني ادري.. بغيت.. اخذ غرفتكم تدرون يعني اكبر.. واوسع.. احسن لمرتي.. فإنتوا خذوا غرفتي اتسد..
ريم : احييييين حبابي ومادري شو.. عشان تحتل أرضنا.. لالالالالالالالالا.. مهو.. هجوم..
مها: هياااا..
مشوا اثنيناتهم وتموا يدزونه برع الغرفه.
مها: يلا برع.. ويحك.. تريد اخذ موقعنا الجغرافي..
ريم: هيا أخرج.. جتك نيله..
عبدالله: افففف..
وصكوا الباب في ويهه..ابتسم من حركتهم.. بس تم يسوي عمره زعلان.. : اقووول انا مارمسكن.. ولا تطلبن مني اظهركن مكان .. خلالاص.. يحرم عليكن..
ريم بصوت واطي: سمعتي.. بيسويها.. حظر تجول..
مها: خل نلحق عليه..
بسرعه ظهروا وشافوه توه بيدخل غرفته.. جان تمسك كل وحده فيهم ايد وتسحبه لغرفتهم.. ودخلوه.. وشلوا فراشهم..
ريم: خلاص وافقنا..
مها: حلال عليك..
عبدالله مات من الضحك عليهم.. : بناااااات.. ماين الا بالعين الحمرا..
=-=-=-=-=-=-=-=
منى أول ماوصلت بيت عمها كانت منهاره من الصياح خلاص.. وقف عمر الموتر داخل البيت.. رفعت راسها تتطالع البيت.. كان البيت في غايه الضخامه... كبير.. ودزاينه حلو.. انبهرت فيه.. عكس بيتهم الي يتسم بالبساطه.. نزلت من الموتر وياها عمها ومسكها من ايدها..
بو عمر: حياج يابنتي.. البيت بيتج.. واتنقي الغرفه الي تعيبج ومن باجر تنزلين محل المفروشات وتفرشينها بالطريقه الي تعيبج.. وتسيرين تتشرين الي في خاطرج من الثياب..
منى: تسلم عمي..
بو عمر دخل قبلها البيت عشان يزقر ام عمر وعياله ..
نبذه عن عايله بوعمر..
بو عمر _علي_ عنده عمر ووليد وإيمان ونوره .. بوعمر.. انسان طيب القلب.. بس الطمع وحبه للأموال والثروه هو الي طغى على طيبه قلبه وعصبي.. ويحب ان كلمته هي الي تمشي على الكل.. أم عمر.. انسانه على قد حالها .. طيبه وحنونه على عيالها وتحبهم.. وكانت تحب منى وتعطف عليها من صغرها لولا ام عارف كانت اتفرق بينهم وماتسمح انها تزورهم.. .. عمر 26 سنه.. مايشتغل طبعا..مستهتر.. وليد عمره 24 سنه ماخذ بنت عمه عبيد عهود.. بنت في غايه الرقه والهدوء والطيبه والجمال.. الكل يحبها في بيت بوعمر.. وخصوصا وليد .. الي يكن لها كل الحب والإحترام.. ولا يقدر يعيش من دونها.. إيمان عمرها 21 سنه في نفس عمر منى تقريبا في البيت ماكملت دراستها لأنها ماتحب الدراسه وهذا كله بسبب الترف الي عايشين فيه حست ان مالها حاجه بالدراسه .. عصبيه.. ومغروره شوي بجمالها.. وفيها روح النرجسيه.. يعني تحب نفسها وايد.. نوره 17سنه بنت في غايه الجمال والطيبه.. وقلبها أبيض.. وأقرب وحده من بين البنات لعهود وهذا لطيبتها.. نوره بنت معاقه على الكرسي المتحرك اصيبت بشلل الأطفال يوم كانت صغيره وبسبب جهل أمها بهالأمور ماخذت التطعيم قبل عشان ماتصاب به.. وشاء الله ماقدر وفعل..
منى كانت في هالوقت بعدها برع مستحيه انها تدخل.. تتريا مرت عمها وعمها..
عمر: ياحيا الله بنت العم.. تفضلي..
منى وهي منزله راسها..: الله يحييك..
عمر: منى.. ماتتصورين شكثر انا مستانس والفرحه مب شايلتني من المكان الي انا فيه.. اخيرا بتستوين من نصيبي..
منى كانت مرتاحه لأسلوبها.. بس تذكرت أحمد.. يوم قال لها انه يحبها.. ونزلت دمعتها.. شوقها وحنينها له يزيد يوم عن يوم.. بس تحاول تقبض نفسها عشان ماتخرب العلاقات بعد ماردت..
ظهرت ام عمر وهي متلهفه انها تشوف منى.. ماشافت منى من اكثر من 15 سنه.. اخر مره شافتها كان عمر منى في ذاك الوقت 7 سنوات... وذاك في المستشفى يوم كان ابو منى بيسوي عمليه ..
أم عمر: منى حبيبتي.. بنتي.. الغاليه.. تو مانور البيت.. حياج حياج..
منى يوم شافت البسمه في ويه ام عمر استانست ونست كل شي.. وشافت الشوق والحنان في عيونها.. حست بإحساس غريب.. كأن الي جدامها امها.. لوت عليها ام عمر وحضنتها وتمت اتبوسها.. : فديتج والله وكبرتي واحلويتي.. ولا بعد بشرني عمج بتستوين مرت ولدي.. والله وعرف ينقي بوعمر..
منى: تسلمين عموو..
ام عمر: لا .. لا تزقريني عموو.. من يوم ماكنتي صغيره كنتي تناديني أمي.. أبا نفس الشي الحين..
منى استانست زود.. للحظه حست انها مب ندمانه على قرارها.. حست بالفرحه تسري في ضلوعها يوم ان ام عمر حضنتها .. وخصوصا يوم حست بدمعه ام عمر على كتفها.. تذكرت امها تمت اتصيح بحرقه.. بوعمر رغم طيبته .. استانس لهالشي.. صح انه جبر منى بطريقته.. بس ما يبا يأذيها.. ويوم قرر يزوجها لعمر ماكان مخطط لآي شي ممكن يضر منى.. بالعكس يبا راحتها.. بس الطمع ان اموال منى تروح للغريب هو الي دفعه يسوي الي سواه..
بوعمر: يلا عاد.. انتوا يالحريم كل شغلكن صياح.. دخلن داخل.. عايبنكن الحر هني..
ام عمر: شو اسوي.. ماحسيت بشي غير شوقي لبنتي.. من بعد هالسنين فجأة أشوفها كبرت جدامي..
منى: تسلمين وانا بعد مستانسه اني شفت امي من يديد..
ام عمر: فديتج..
قبضتها ام عمر من جتفها ودخلتها البيت.. وفي الصاله كانت نوره قاعده على كرسيها وتتطالع تلفزيون.. من شافتها منى تأثرت من منظر نوره انها بنت في هالعمر والجمال تكون بهالحاله.. وكانت عهود مرت وليد توها نازله من الدري عشان ترحب بمنى من سمعت انها يايه
عهود: هلا وغلا ببنت عمي الي ماشفتها في عمري..
في هاللحظه صدت نوره عشان تشوف منى.. ابتسمت لها وردت لها منى الإبتسامها.. وتمت اتحرك عجلات كرسيها عشان توصل لمنى وتسلم عليها..
منى: مرحبا..
عهود: اكيد ماتعرفين انا منو.. بعرفج علي.. انا عهود مرت ولد عمج وليد.. اكيد ماتعرفينه بعد.. يوم بيرد من الدوام بتعرفينه.. وهاي نواري .. نور هالبيت كله..
وإيمان بعد كانت نازله من الدري عشان تشوف منى.. ومن شافت منى من بعيد تمت تتطالعها بكل كبر.. وتعالي.. : السلام عليكم..
عهود صدت صوب ايمان: وهااااااي ايمان..
ايمان وهي تتطالع عهود بطريقه لا مباليه: نوره .. استوت نور البيت.. وانا؟؟
عهود: انتي شيخه هالبيت.. تفضلي يا منى حياج اقربي..
أم عمر: لحظه.. بالأول خل تروح وتتنقى لها غرفه عشان نحط أغراضها فيه.. ويمكن تبا تغير ولا شي..
عهود: خلاص انا بسير وياها..
إيمان انصدمت يوم سمعت ان منى بتحط اغراضها.. يعني منى بتعيش عندنا: شوووو.. غرفه..؟؟ ليش منى بتعيش ويانا؟؟
انصدمت منى من رمستها وحز في خاطرها هالكلام.. جرب منها ابوها وقف عراسها: هي.. ليش الشيخه عندها مانع؟؟ ومنى من اليوم وساير خطيبه اخوكن لازم تحترمونها فاهمين.. وان وصل لي ان منى تضايقت من حد فيكن ماتلومن غير اعماركن..
إيمان مسكت الريموت من عند نوره وتمت اتجلب القنوات ولا معبره أبوها بالمره.. ومنى نزلت راسها.. جربت منها ام عمر: لا يهمج منها يا بنتي.. هاي تلقينها معصبه من شي تعق حرتها,..
عهود: ها نواري بتيين ويانا..
نوره من بعد ما سلمت على منى.. : هي..
منى: مب مشكله اي غرفه مب لازم اتنقى..
عمر: لا لازم.. عندنا قسم كامل في البيت فاضي فيه 3 غرف اختاري الي يعيبج منهم بس اتريي لين مانفرشهم.. وحاليا ارقدي في اي غرفه ثانيه..
نوره: ارقدي وياي شو رايج؟؟
منى:ماعندي مانع بالمره..
ومشت عهود الي حشرت منى وهي تسولف مع نوره وركبوا اللفت عشان يصعدون الطابق الثاني..
=-=-=-=-=-=-=
في بيت بوسعيد..
سلطان وهله راحوا بيتهم .. وتموا هند و وداد وغزلان قاعدين في غرفه غزلان ويسولفون ويخططون لليوم الثاني.. وداد حاولت تشغل نفسها معاهم عشان تنسى سالفه منى الي كانت مكدرتنها شوي وماتحسسهم بشي وتكدر عليهم فرحتهم بخطبه غزلان.. ومريم ..
هند:ايه.. صج تذكرت.. هاتي تليفوني غزووول..
غزلان: بسم الله شوفيج..
هند: بتصل في علي.. هو امس قال لي انه اليوم بيسير اييب نتايج الفحوصات ومادق لي يقول لي اي شي ولا يانا اليوم.. أبا اعرف شو السالفه؟؟.. وانشغلت انا وياكم ونسيت..
وداد: هي دخيلج اتصلي خل يطمنا..
غزلان: مب معقوله.. اصلا لو راح اكيد كان بيقول لج.. اكيد ما راح..
وداد: مب مشكله خل تتصل وبنتأكد
هند اتصلت على علي وبعد عدة رنات رد عليها..
علي: هلا والله بهالصوت.. ياحي هالصوت والله..
هند: هههه.. شوفيك.. اشحالك؟؟
علي: بخير من بعد ما سمعت صوتج.. وانا اليوم اسعد انسان بالكون.. اتحداج تلقين اي احد يوصل لربع سعادتي..
هند: هههههه.. اسميك مب صاحي..
علي: اكيد يوم اني بسمع صوتج كيف تبيني اكون صاحي..
هند: ههههههههه.. انزين لا تنسيني .. ماقلت لي سرت يبت النتايج اليوم؟
علي: هيه .. عيل ليش انا مستانس هالكثر..
هند: انزين وليش مادقيت اتخبرني؟؟
علي: جيكي تليفونج كم مسد كول..
هند: شو تتمصخر.. اصلا انت دقيت عشان يكون عندي مسد كول؟
علي: لا والله.. هيييييه صح انا مادقيت.. السموحه..
هند:يلا خبرني..
وداد: يلا عاد حرقتوا اعصابي..
غزلان: وانا بعد..
علي: ماشاء الله العصابه كلهن وياج..
هند: هيه بتقول ولا ترا بنرتكب في حقك جريمه..
علي: بقول بقول.. بس مب اليوم..ولا باجر.. ولا هالإسبوع.. يوم بييب هلي عندكم..
هند: كيف؟؟ .. شو معناة كلامك فهمني..
علي: احيدج ذكيه يا هند.. مافهمتي للحين؟؟
هند: لا دوخت براسي..
سحبت وداد عنها التليفون: الوووووو
علي: اعوذ بالله .. شو هالصوت.. توني كنت اسمع صوت رقيق..
وداد: احلى من صوتك.. انا وداد.. بتقول النتيجه شو طلعت ولا شو..
علي: لا شكلي اذا ماقلت بتطلعون لي من التليفون وبتاكلوني بقول.. بس حطي على الإسبيكر..
وداد وهي حاطه التليفون على الإسبيكر: يلا كلنا نسمعك..
علي: هند.. النتايج الي ظهرت .. لحظه قبل لا أقول هالنتايج.. خل اقولج شي جدام خواتج.. عشان يعرفون.. النتايج كلها كلها.. كلها.. ماتمنعج من الزواج والإنجاب أبدا أبدا.. يعني هالحاجز الي خليتيه مابيني وبينج شليه.. انصدم الكل يوم سمع هالرمسه وابتسم.. حس ان النتايج اتبشر بالخير.. واولهم هند الي كانت طايره من الفرحه.. هند.. حتى الدكتور المشرف على حالتج روحه متعجب من المعجزه الربانيه الي صارت لج.. كل هالعمليات والتعب الي تعبتيه ماياب نتيجه كثر دعائج ودعائي..ودعاء الكل.. الصادق لج.. هند.. الثقب الي عندج صغر بحيث ماقام يأثر على الوظائف الحيويه عندج أبد.. ودام ربج قدر على هالشي.. يقدر انه يمحي هالثقب ويزوله ويحفظج من اي شر.. ربج كريم يا هند.. وانتي تستاهلين.. وانا استاهل استوي ريلج.. ولا شو رايج..
هند احمرت من سمعت هالرمسه.. ونزلت راسها ودموع الفرح تهل من عيونها .. مب مصدقه الخبر الي تسمعه.. لا اكيد انا احلم.. لا .. ماصدق.. مستحيل.. مستحيــــــل..
ونشت من مكانها وربعت ظهرت من الغرفه.. وداد كانت اتصيح من الفرحه ونفس الشي غزلان الي حطت راسها على الأرض ساجده لربها وتصيح وتحمد ربها وتشكره..
وداد: علي.. قول اني انا واعيه مب راقده.. دخيلك .. قول ان الي تقوله صدق مب حلم..
علي: والله انه صدق يا وداد.. وينها هند..
وداد: من الحيا والفرحه سارت غرفتها...
علي: لعلني ماخلا منها.. لولا باجر خطوبه هالجيكره غزووول جان انا ييت وخطبت.. بس مايستوي ناخذ فرصتهم..
غزلان تنش من سجودها وتصرخ: محد جيكر غيرك.. ويا هالويه..
علي: خيبه خيبه.. كلتني.. خلاص انا اسفه.. عروس مايستوي نزعلج.. عقبال ما اتهنى بعروسي انا بعد..
وداد وغزلان: هههههههه
وبندوا عن علي وساروا عند هند الي كانت تصلي لربها وتشكره تموا يتريونها اتخلص صلاتها.. ومن خلصت صلاتها ربعوا حضنوها وتموا يصيحون من الفرحه.. ويحمدون ربهم



منى كيف بتكون حياتها؟؟
وعمر.. معقوله بيحب منى؟؟
أحمد اذا درى شو بيستوي به؟؟ بيصمد شرات ماعرف عن حصه؟؟
الخطوبه المنتظره؟؟
وفاء وعلاقتها مع خواتها .. شو الي خلاها جي؟؟