الجزء ( 45 ) : للحب عنوان
=-=-=-=-=
ملخص الجزء السابق: عرفت ـأم عارف بموضوع عم منى.. ردة بوسعيد وهند وعلي بالسلامه.. اللقاء الي صار بين علي وآمنه.. وتحمس إبراهيم لخطبه غزلان.. وانتظار عبدالله الإجابه من مريم..
=-=-=-=-=-=-=
في بيت بوسعيد..
الكل كان متميع في الصاله يسولف ومستانسين لردة بوسعيد وهله من السفر.. ناصر من رد من المدرسه على طول سار بيت عمه عشان ما يفوت هالقعده الحلوه.. دش البيت وشاف الكل قاعد وابراهيم من بينهم.. استغرب من وجود ابراهيم بس تدارك الموضوع..
ناصر: السلام عليكم
الكل: وعليكم السلام..
غزلان: ويييييو .. مساكين الي داوموا اليوم
ناصر:جب انتي.. على الأقل انا طالب مجتهد مب مثلج..
غزلان: هههه يقول مجتهد اونه..
ناصر: اشحالك عمي؟؟ اشحالج هند.؟؟ اشحالك علي؟؟ ..
بوسعيد: بخير ربي يخليك.. انت اشحالك؟؟ شو علوم الدراسه معاك..
ناصر: الحمدلله.. والله تولهنا عليكم زين يوم رديتوا.. موووول مب شي من دونكم..
بوسعيد: وحليلك يا ناصر..
ابراهيم طول الوقت كان يستغل أي فرصه يقدر يشوف فيها غزلان.. يتم يتأملها وهي تضحك وترمس.. وكان مستانس من خاطره.. الود وده يصرخ ويقول لها احبج.. احبـــــــج.. بس مب قادر.. وده يرمس ابو غزلان بس المشكله ان الوقت مايسمح له انه يرمس في الموضوع.. ولازم يتريا هله.. وتموا يسولفون.. وابراهيم روح عنهم لأنه ماقدر يطول زود عندهم.. وظهر ...
وتموا الباقي يكملون سوالفهم
غزلان: تدرون.. هالقعده ناقصها اثنين..
هند: سعيد.. وأحمد..
وداد: لهم وحشه الصراحه.. متى يخلصون يفتكون..
هند: سعيد هانت هالسنه بيخلص الدبلوم.. وبيرد..
غزلان وهي فاجه ثمها: تخبل هذا؟؟
هند: ليش.. ؟؟
غزلان: شو دبلوم.. ليش ما يكمل بكالوريوس..
هند: يا هبله.. دبلوم جامعتهم يعادل الدبلوم العالي هني.. فهمتي..
غزلان: خلاص عيل انا بسير ادرس هناك..
بو سعيد: لا لا لا لا.. كافي علينا فراق سعيد.. تبين انتي بعد تروحين.. تبين تذبحيني..
غزلان: بسم الله عليك.. بعد عمر طويل ..
=-=-=-=-=-=
في بيت منى.. أم عارف تعمدت اتطرش منى بيت بوسعيد عشان تزور هند وتتحمد لها بالسلامه.. عشان اذا ياها بوعمر عمها مايلقاها..
منى: بس مب حلوه اليوم رادين من السفر واليوم اسير لهم.. خلهم يرتاحون يومين عقب بسير لهم
أم عارف: يا منى.. تراج هب غريبه عنهم.. انتي وحده منهم وفيهم.. روحي يا بنتي ..
منى: بس امي..
قاطعتها ام عارف: يلا عاد. سيري تلبسي وزوريهم مب حلوه عقب يقولون نستنا خلاص..
منى ابتسمت لها: خلاص ان شاء الله..
وظهرت منى من الميلس وصعدت غرفتها عشان تتلبس وتروح بيت بوسعيد.. في خاطرها كانت مستغربه من مرت ابوها.. أول مره تصر عليها بالطريقة هذي انها تظهر من البيت.. بس خذت الموضوع عساس انه واجب عليها تزور بيت بوسعيد عشان تتحمد لهم بالسلامه.. وتلبست وطلبت من عارف يوصلها من بعد ماتصلت في هند وقالت لها انها يايه عندهم..
وفي هالوقت كانت ام عارف مرتبكه.. تفكر طول الوقت في الرمسه الي بتزهبها لبو عمر عشان ترده وتخليه يهون عن الموضوع.. وقطع حبل افكارها صوت الجرس.. فزت من مكانها .. _ اكيد هذا بوعمر.. يارب ساعدني عليه.. خله يرد خايب ويغير رايه.. مستحيل اعطيه بنتي.. مستحيل اعطيها لإنسان بيعذبها في حياتها.. منى بنتي ظلمتها وايد.. ومستحيل ارد اظلمها زود ماظلمتها.. .. نشت من مكانها ودشت غرفتها ولبست لها شيله ويتها الخدامه: ماما في واحد يقول يريد انتي..
أم عارف: منو هالواحد؟؟ ووينه؟؟
الخدامه: مافي معلوم ماما.. هذا في قول اسم مال هو.. صبر انا في انسى.. هذا.. هذا.. هيه.. بو عمر..
أم عارف: وينه دخلتيه الميلس؟؟
الخدامه: هي ماما.. ثنينه رجال في داخل مجلس..
أم عارف: خلاص انتي سيري جهزي العصير والفواله وهاتيهم انزين..
الخدامه: جين ماما..
ظهرت ام عارف من غرفتها وطول الوقت ياسه تقرا المعوذات وايه الكرسي.. والخوف ممتلكها.. من زمان ماشافت بوعمر.. واليوم ياينهم في موضوع حساس وايد.. بيحدد مصير منى.. كانت خايفه ومرعوبه من الخاطر.. مشت واول ماوصلت عند باب الميلس تنهدت.. وفتحت الباب.. ِشافت بوعمر يالس وحذاله ولده عمر..
ام عارف: السلام عليكم..
بوعمر: وعليج السلام.. اشحالج ام عارف؟؟ عساج بخير..
ام عارف: بخير ربي يعافيك.. اشحالك ولدي عمر؟؟
عمر: بخير عمتي..
ام عارف: حياك اقعد ارتاح.. شو هالزياره المفاجأة؟؟ توك تذكرت وين بيت اخوك؟؟
بو عمر عصب من رمستها بس يود عمره.. لأنه ياي لغرض في نفسه ويروح.. مايبا يخرب على عمره: والله تدرين مشاغل الدنيا وايد.. والشركه.. وغير جي عندي مسؤوليه اكبر احين شركه المرحون تحت ايدي..
ام عارف: الله يعينك.. واشحال ام عمر..ليش ما يبتها وياكم؟؟
بو عمر: ماعليه المرات اليايه ان شاء الله.. كان عندها حريم وماتقدر اتيي اليوم...
ام عارف: هيه..
ودشت الخدامه وضيفتهم العصير وظهرت..
عمر كان طول الوقت ساكت ومنزل راسه ومب عارف شو السالفه.. في خاطره يظهر من هالمكان بس ابوه ساحبنه غصب.. الود وده يشرد..
بو عمر: عيل وينها بنت اخوي مايت هي اتضيفني.. عنبو عمها انا؟؟
ام عارف: والله يابوعمر منى هب في البيت.. راحت بيت ربيعتها ولدي عارف راح يوصلها..
بوعمر وهو معصب: نعـــــــــم؟؟.. ونحن من متى عندنا بنات يظهرن من البيت من غير شور وليهم؟؟
أم عارف: ومنو قال انها ماخذت الشور.. تراها شاورتني وانا رخصتها..
بوعمر ونفسه في خشمه..: والله يام عارف.. مايحتاي اذكرج منو ولي أمرها احين.. اعتقد اني انا الوصي عليها.. ومنى في ذمتي.. ومنو هاي ربيعتها.. وكيف تخلين البنت تروح روحها.. هاي الأمانه الي سلمناها لج.. تضيعين البنت بهالطريقه.. ولا صح نسيت مايهمج اصلا.. هالي تبينه.. لأنج مب امها..
أم عارف كانت صدق معصبه من رمسته.. كل شوي تتعوذ من ابليس في خاطرها.. احتراما لشيبته..: والله انا اعرف ربيعتها.. وماكنت بخليها تروح لو ان هالبيت عليه رمسه ولا شي.. وبعدين منو قالك انها راحت روحها.. تراني قلت ولدي عارف سار يوصلها..
بو عمر: شوفي يابنت الناس.. اذا تميتي على هالحال مع منى ترا ماخليها تبات في هالبيت ليله وحده فاهمه.. مالها طلعه من هالبيت لين ما تعرس ويا ولدي..
عمر في هاللحظه صد اطالع ابوه.. كيف ابوه يقرر والبنت ماشاوروها.. وفوق هذا كله ماشافها عمر للحين..شو الي قاعد يقوله ابوي.. من صدقه يباني اخذ وحده ماشفتها في حياتي غير يوم صغيره.. ..
أم عارف: نعم.. شو قلت.. تعرس ويا ولدك؟؟ .. بشور منو؟؟ .. وكيف تقرر والبنت ماشاورتها..
بو عمر: سمعيني يا شيخه.. البنت مالها شور عندها.. منقووود.. البنت شورها عند وليها.. وانا وليها.. ومثل ماقلت لج.. الخميس ملجتهم.. وان سمعت ان ريلها طبت برع البيت تراها مالها قعده هني ولا دقيقه.. فااااااهمه..
أم عارف ماقدرت اتيود عمرها زود.. انفجرت في ويهه.. : اسمعني يا بو عمر.. أولا البنت مالها طلعه من هالبيت .. وثاني شي مب مينونه ايوز بنتي ريال شرات ولدك .. بطالي لا شغله ولا مشغله.. وما يعرف راسه من ريوله.. آنا بنتي ماياخذها غير ريال يعرف جيتمها وقدرها.. وبعدين أنت طووووول هالسنين ما تسأل عنا حتى أيام المرحوم لما كان عايش.. احين بس تذكرت أن عندك بنت أخو يوم عرفت إن في واحد خاطبنها؟؟
عمر كان معصب من رمسه مرت عمه..شوقاعده اتخربط هذا.. جي شو ناقصني .. والله ابوي عنده خير.. اشله الشغل بعد.. تتحديني .. بنتج باخذها باخذها.. مب انا الي ينقال.. .. تم يطالعها بإحتقار والود وده ياكلها بعيونه... كان ميود عمره بس احتراما لأبوه...
بو عمر: اخبرج.. اتصلي في منى ألحين قولي لها ترد البيت..
ام عارف: انا آسفه بو عمر.. ماقدر اخرب على البنت وناستها... يوم بتخلص هي روحها بترد البيت..
بوعمر وبكل عصبيته... وبصوت عالي يرج البيت كله..: أخبرج يا شيييييييييييييخه.. قولي لمنى ترد البيت قبل لا انا اسير وأيرها من شعرها واطلعها..
أم عارف خافت ان بوعمر فعلا يسويها بسرعه راحت صوب التليفون واتصلت في منى..
ام عارف: السلام عليكم
منى:هلا والله أمي اشحالج؟؟
ام عارف: بخير فديتج..
منى: ياريتج ويانا.. اسمينا مستانسين.. والكل ينشد عنج هني..
أم عارف تلومت من سمعت رمسة منى.. حست بضميرها يأنبها.. ماتدري منى المسكينة شو الي ينتظرها عندي في البيت.. والله ماودي اخرب وناستج.. حاولت الي اقدر عليه اني ابعدج عن هالمشاكل لين ماحلها..: منى حبيبتي.. ممكن تردين البيت بغيتج..
منى: بس انا بعدني ماصار لي ساعه ياسه عندهم..
في هالوقت تلومت ام عارف زياده.. ماعرفت شو اتسوي.. قلبها عورها.. تدري منى وحيده.. وتستانس يوم تقعد ويا حد من عمرها.. : مب مشكله تراج بتروحين عندهم بعد.. بس تعالي انا اباج احين...
منى: خلاص امي.. دزي عارف خل ايي يمر علي..
أم عارف وهي تتنهد.. : خلاص امي. احين بقول له..
بندت ام عارف عن منى واتصلت في عارف وقالت له اييب منى من بيت بوسعيد.. عارف استغرب ليش بهالسرعه.. بس طنش الموضوع..
في الميلس..
كان بوعمر في قمه غيضه وقهره.. وكان معصب من الخاطر.. يتريا لحظه وصول منى البيت..
عمر: أبوي.. انا ماشفت البنت بعدني..
بوعمر: بتشوفها.. لا تستعيل.. وبتعيبك صدقني. منى من صغرها كانت حلوه.. فأكيد أحين احلوت بزياده..
عمر في قلبه ما يهمه عن منى أي شي غير انه يحرق قلب ام عارف من بعد ما سمع منها الرمسه الي قالتها عنه.. والله لا أراويج منو عمر هذا الي قاعده تتحدينه عشان خاطر هالي اسمها منى.. مادي شو من الزود الي فيها ..
بو عمر: اسمعني يا ولدي يا عمر.. البنت لازم ناخذها.. قبل لا ايي حد ثاني ويمتلك كل شي.. فاهم.. الحلال لازم مايظهر من العايله..
عمر: اكيد ابوي.. افا عليك وانا اروم اكسر كلمتك.. انت تامر..
وفي هالوقت دخلت عليهم ام عارف وهي مرعوبه وخايفه.. ماتعرف شو الي ينتظر منى.. شو الي بيصير.. منى شو بيصير فيها؟؟ .. لا حرام.. بنتي ماتهون علي.. انا مالي ذنب.. مابا تشك في لحظه ان ممكن يكون لي أيد في الموضوع .. الله يشهد اني اعز منى كنها بنتي صدق.. وعمري ما طمعت في فلس من فلوسها شرات عمها.. الله يستر بس..
في هالوقت وصلت منى البيت.. شافت موتر عند باب بيتهم.. سألت عارف بس هم بعد ما يعرف شي عن الموتر مستغرب حاله حال منى.. حست منى بدقات قلبها تدق بسرعه.. تحس برجفه في ايديها وريولها.. قلبها يقول لها ان في شي جايد مستوي.. كانت خايفه بالقعل .. وماتدري بالمصير الي يترياها داخل.. دشت الميلس شافت مرت ابوها ياسه سلمت.. وماعرفت منو الي قاعدين في الميلس لأنها من زماااااان ماشافت لا عمها ولا عيال عمها..
منى: السلام عليكم..بصوت واطي.. امي منو هاييل؟؟
وكان عارف واقف وياها..
ام عارف: ها عمج علي.. وهذا ولده عمر..
في هاللحظه تفاجئت صدق منى من الي سمعته.. وحست بدقات قلبها تزيد.. والخوف والرعب زاد فيها.. صدت تتطالع والتقت عينها في عين عمر في نفس اللحظه.. كانت تتطالع عمها وكانت نظراته كلها غضب ولؤم.. خافت زود.. ضمت ايدها وتمت اترص على ايدها بالقو وهي خايفه بالفعل..
عمر من شاف منى اعجب فيها.. خصوصا عيونها.. منى الشي الي فعلا يبرز شكلها عيونها الي تلمح للبراءه والطفوله .. كانت بالفعل خايفه وهو لاحظ هالشي من نظراتها وهي تتطالعهم بإستغراب وفي بالها ميت سؤال.. بس عمره ماهمه شي غير انه ينتقم وبس.. وقتها تذكر رمسه مرت عمه..والله لا أكسر راسج.. ..
بو عمر: مرحبا بمنى.. بنت اخوي المرحوم.. اقربي يا بنتي..
منى لطيبتها ماحطت شي في بالها.. ومن سمعت رمسته ابتسمت له بكل براءة.. وقربت منه تسلم عليه.. كانت تشوف في ويهه صورة ابوها المرحوم الي ماقدرت تشوفه قبل لا يموت.. راحت صوبه وسلمت عليه وباست راسه.. ونفس الشي سواه عارف.. بس كان مب مرتاح لهالزياره ابد.. كل شوي يسأل امه بس ماكانت ترد عليه.. ويلست منى حذال عمها..
منى: اشحالك عمر؟؟ .. عنبو ولد عمي وتوني اشوفك واعرفك.. وانت بعد يا عمي انا عتبانه عليك.. جي ما تسأل عن بنتك ولا تنشد عن احوالها..
بو عمر وهو يضحك بكل خبث: لا يابنتي لا تقولين هالرمسه.. تراج دوم عالبال.. تدرين المشاغل كيف.. خصوصا المسؤوليه الي توليتها اداره مكتب عقارات ابوج.. والمقاولات.. وخصوصا عمر المسكين الي يكد ليل ونهار على شغل ابوج..
في هالوقت فجت ام عارف عيونها.. والله انك هب هين يا بو عمر.. وعرفت كيف اتفر راسه.. الله يستر بس.. .. حتى عمر استغرب من رمسه ابوه.. وخصوصا يوم رمس عنه.. بس مابين هالشي عشان مايظهر ابوه جذاب.. وتم يبتسم كأنه يأيد كلام ابوه..
عمر: والله يا منى انا ماسويت غير الواجب... وعمي الله يرحمه..
بو عمر: الله يرحمه..
عمر: كان دوم في الدوام يوم يشوفني يقول لي.. ماوصيك على بنتي.. منى ومنى.. كان دوم يطريج الظاهر عمي وايد كان يعزج..
منى فجت عيونها.. استغربت.. معقوله ابوها كان يذكرها وهي ماتحس بهالشي.. كانت دوم من الي تشوفه من مرت عمها اتحس ان ابوها ناسيها.. وناسي وجودها اصلا.. بس استانست في خاطرها.. فديته ابوي والله .. الله يرحمك.. مفتقدتك وايد..
منى: تسلم يا عمر.. والله وتعبناك معانا..
عمر: افا يا بنت العم.. لا تقولين هالرمسه.. تراج بنت عمي ومن لحمي ودمي.. والي يهمج يهمني.. والي يضرج يضرني.. والله يرحمه عمي هو الي وصاني عليج.. ولو مانج غاليه جان ماسويت ها كله..
نزلت راسها منى واستحت من رمسته.. جان يصد عمر صوب ابوه ويطالعه بنظره بادلها فيها ابوه ذات النظره.. نظره خبث ونصر.. من شاف عارف هالنظره زاغ.. فهم ان هالكلام كله تأليف وقتها حس بخوف على اخته.. لا بس منى تعذبت وايد.. حرام والله حرام
بو عمر: اقول ام عارف ممكن تخليني ايلس ويا بنت اخوي روحي شوي.
فجت عيونها ام عارف.. وماقدرت تنطق بأي كلمه.. وظهرت من الميلس وسحبت معاها ولدها عارف..
عارف: امي شو السالفه.. تراني هب مرتاح بالمره
ام عارف: ولا انا مرتاحه .. عارف انا خايفه على اختك وايد
عارف: ليش خير امي.. خايفه عليها من عمها؟؟؟؟
أم عارف: اقول.. هات التليفون بتصل في عمك راشد.. ماشي غير عمك راشد هو الي بيساعدني..
عارف: ممكن تفهميني الموضوع
أم عارف وبعصبيه..: انت هات التليفون اقول لك وبعدين بتعرف السالفه كلها..
=-=-=
في الميلس كان بوعمر وعمر ياسين ويا منى..
منى: وشخبار مرت عمي.. خاطري اشوفها..
بوعمر: بتشوفينها ان شاء الله.. وبتشوفين باقي عيال عمومتج كلهم.. ولا ماتبين..
منى: شقايل مابا.. بالعكس..
بوعمر وهو يتظاهر الحزن.. والكآبه..: منى.. ودي أعوضج عن كل الحرمان.. كل السنين الي أهملتج فيها .. ولا سألت عنج فيها.. ودي انج تكونين قريبه مني.. ترا مهما يكون فيج من ريحه المرحوم .. كل ليله انام فيها اتخيل نفسي ما بنش اليوم الثاني وانا بعدني ما يبتج عندي.. واحس بقلبي ينقبض..
منى والدمعه في عينها.. وتلوي على عمها.. : فديتك عمي.. لا تعور قلبك.. انا مب متضايقه ابد.. وترا انت ييت.. وخلاص من اليوم وساير دوم بطيح عندكم..
بوعمر وهو يقبض ايد منى.. ويطالع في عيونها..: منى يا بنتي.. انا في خاطري شي قبل لا أموت..
منى: شو هو هالشي عمي؟؟ وبعد عمر طويل لا تقول هالرمسه..
بو عمر: أشوفج عروس.. وأطمن عليج.. وإن الريال الي بياخذج بيصونج وبيحطج في عيونه..
منى في قلبلها استانست.. تذكرت أحمد.. آآآه يا عمي.. لو تدري بأحمد.. الي يموت علي.. جان تطمنت .. نزلت راسها وهي مستحيه من عمها وكلامه..
بوعمر: منى يا بنتي.. أنا اليوم ياينج لين عندج .. أطلب إيدج لولدي عمر.. وأنا ماعندي أغلى من ولدي أعطيه لبنتي الغاليه..
منى في هالوقت حست بماي ينصب على ويهها.. انصدمت من الخاطر بالكلام الي سمعته.. لا عمي دخيلك.. لا تحرجني بهالكلام.. عمر مابااااااه.. ابا أحمد.. عمي دخيلك.. لا تهدم حياتي..
بوعمر وهو بدت عليه ملامح العصبيه..: ممكن اعرف ليش السكوت؟؟
عمر وبكل خبث: يقولون السكوت علامه الرضا..
منى حست ان لسانها انبلع ماتروم تقول اي كلمه.. شو تقول.. تقوله انها تحب أحمد وتباه ويباهاز. تقول له انها ماتتخيل حياتها من دون أحمد.. تقول له انها موافقه على أحمد وماتتمنى غيره في هالدنيا.. حست براسها يدور.. حست بدوامه من الأفكار تدور في راسها.. مب عارفه شو تسوي.. بين نارين.. أهلها.. وقلبها وحبها..
عمر: ولاتنسين يا منى.. إن أبوج هو الي وصاني عليج.. ومأمنج علي.. وكان دوم يقول لي الله يرحمه.. بنتي أمانه في رقبتك يا عمر..وماقدر أمن بنتي على إنسان كثر ما أمنها لك.. صد صوب أبوه.. أبوي.. شو رايك إنخلي منى تفكر كم يوم.. وترد علينا خبر.. بس ها يا منى لا تتحيرين علي.. تراني اتريا على نار..
بو عمر: هيه صدقك يا عمر .. البنت من حقها تفكر وتقرر.. وعاد منى بقولج شي.. لا تخيبين ظني فيج.. وياريت لو ماتكسرين بكلمتي..
منى رفعت راسها وتتطالعهم.. والود ودها تقول لهم قرارها.. لا.. ماباه.. بس في شي في داخلها يمنعها من البوح.. الخجل.. والخوف.. والحيره..
بو عمر: منى يا بنتي لا تتحريني مادريت بهذا الي خطبج.. عمج راشد رمسني.. وقال لي عنه.. والريال يا منى ما يصلح لج.. عليه رمسه ماتسر.. وانا مابا لج المضره.. وخصوصا ان اخوي المرحوم موصيني عليج.. وأنا يوم رمست مرت ابوج عن سالفه عمر.. عارضت.. ويمكن تقول لج بعد مانسير عن معارضتها.. منى يابنتي انتي اتعرفين ان مافي انسان ممكن يخاف عليج ويداريج كثري.. أنا الي من لحمج ودمج.. حتى اخوانج الي من ابوج ما بيحبونج ولا بيحرصون عليج كثري.. مرت ابوج انتي ادرى بها.. ماهمها غير نفسها.. يوم توفى أبوج.. بدت تتقرب منج عشان بيزاتج.. بس مب أنا الي بخلي بنت اخوي فريسه بين ايديها.. مستحيل.. ويابنتي يا منى انا ريال مشيب راسي ويا الناس واعرفهم.. ومرت ابوج أكثر وحده اعرفها..كافي انها كانت السبب في فراق امج وابوج.. وداشه على طمع.. وألحين تبا اتيوزج لأي شخص وتبا في النهايه انها تسلبج وتسلب حلالج كله.. انتي مب ياهل يا منى.. إنتي غديتي حرمه.. والله شاهد كم أتمناج لولدي عمر.. يلا يا عمر خلنا نروح.. نخليها تفكر جم يوم.. وترد علينا..
عمر: إن شاء الله ..
ظهر بوعمر من بعد ماسلمت عليه منى.. بس عمر تعمد إنه يتأخر شوي عشان يرمس منى بروحها.. وحست منى ان عمر في شي يبا يقوله لها..
عمر: منى..
منى رفعت راسها تتطالعه.. : هلا..
عمر: انا يوم ييت وخطبتج.. مب بس عشان المرحوم عمي.. لا يا منى.. عشانج انتي منى .. منى الي ماعرف قلبي غيرها.. بتستغربين من كلامي بتقولين كيف وانا طول السنين هذي ما شفتج فيها.. وأنا بقول لج غلطانه.. شايف صورتج في درج مكتب عمي.. وغير هذا كنت اشوفج ساعات عند باب بيتكم يوم تردين من المدرسه.. منى.. فكري عدل.. ولا تظلميني.. مع السلامه
ظهر عمر وترك منى مع افكارها المتضاربه في راسها.. مب عارفه شو تسوي.. تحس انه راسها بدا يدور.. ولاهي قادره انها تتصرف ولا تقرر.. ظهرت من الميلس شافت امها توها مبنده من التليفون..
أم عارف: منى .. ها .. شو بغا منج عمج؟؟ ووينه في الميلس بعده؟؟
منى: لا روح..
ماردت عليها زود.. كملت طريقها وصعدت الدري عشان تروح غرفتها.. وملامح الحزن والكآبه باينه عليها.. أأأأأأه.. يوم اني حبيت..حبيت غلط.. ماكان مفروض أحب.. ليش ياربي خليتني احبه.. ليش.. ؟؟ كيف اتخيل نفسي اعيش مع شخص غيره.. ومب أي شخص.. عمر.. الي في حياتي ماشفته ولا عرفت عنه شي.. كيف بقدر اعيش بهالطريقه.. يارب.. شو اسوي.. ليش حظي جي.. لا افرح بطفولتي ولا يوم اني كبرت.. يوم اني حسيت ان كل شي تغير في حياتي.. وابتسمت للحياة.. وتعلقت بأمل.. كل شي انمحى في لحظه.. لييييييييييش؟؟ .. وأمي.. لا مستحيل انها تكون مثل ما وصفها عمي.. تغيرت.. هيه تغيرت.. تحبني.. آآآآه ماعرف اصدق منو ولا منو.. شو اسوي .. شوووووو ياربي.. أبوي.. الله يسامحك يابوي.. ليش وصيتني عليه.. ؟؟.. ليش انحط في هالموقف ليييش؟؟
ام عارف من شافت ملامح منى زاد خوفها.. حست بإن منى ماتباه.. وحست بحزنها.. ونفس الشي عارف الي كان حاس بحب إخته.. كل ما طروا اسم احمد تفز من مكانها.. تصرفاتها .. حركاتها.. وحت له بهالشي بس سكت وكان مستانس لأن أحمد إنسان طيب.. ويستاهل منى..
أم عارف شلت التليفون بسرعه تتصل في راشد..
راشد: هلا أم عارف.. خير..شو صار؟؟
ام عارف: والله مادري ياراشد.. مادري شو قال لها.. من ظهرت منى من عنده والحزن في ويهها .. دخلت غرفتها وماتفتح الباب ولا ترمسني.. خايفه عليها ياراشد.. مابا يصيبها شي..
راشد: لا اطمني .. ان شاء الله مابيستوي الا كل خير.. بس انا هاليومين مشغول واااايد حدي يا ام عارف.. بس اتريا هالأشغالي الي على راسي اتخلص وبحل الموضوع كله بإذن الله..
أم عارف: دخيلك ياراشد.. اخاف اخوك يسويها وياخذ بنتي..
راشد: قلت لج لا تحاتين.. ومابيصير الا كل خير.. يلا طمنيني اول بأول.. اوكي
أم عارف: ان شاء الله.. السموحه تعبناك معانا..
راشد: لا افا عليج.. لا تقولين هالرمسه.. تراها مب غريبه.. بنت اخوي.. ومصلحتها تهمني.. يلا مع السلامه
أم عارف بندت عن راشد.. وحست بإرتياح شوي يوم عرفت ان راشد بيتولى الموضوع .. وراحت فوق عند منى دقت عليها الباب كذا مره بس منى ما ردت عليها.. ولا فتحت الباب.. قالت بتخليها وباجر بترمسها..
=-=-=-=-=-=
في بيت بوسعيد..
غزلان طبعا ماكانت مفارقه ابوها ولا دقيقه غير يوم رقد.. كله ياسه حذاله وتلوي عليه وتبوس راسه.. وهادف كل شوي يعلق عليها ويغايض فيها..
هادف: والله الي يشوفج يقول نونو.. استحي على ويهج.. غديتي حرمه..
غزلان: كيييييييييفي.. ادلع على ابوي.. وبعدين ولهانه عليه .. فديته من زماااان ماشفته..
هادف: انزين كلنا ولهانين عليه.. عاد ماسوينا سواتج..
غزلان: أدريبك غيران احين ليش ان ابوي مسوي لي سالفه وانت لا..
هادف: هههههههه.. شوقلتي.. غيران؟؟ منو.. انا اغار.. مينونه انتي..
في هالوقت رن التليفون نشت غزلان تربع تشل التليفون..
غزلان: ألوووووو
أحمد: مرحبااا الساااع..
غزلان: هـــــــلا والله بهالصوت وراعيه.. وينك يالقاطع..
أحمد: توني من يومين كنت عندكم كيف قاطع..
غزلان: شو نسوي.. تولهنا عليك.. اشحالك.. شخبارك.. شو علومك.. شو مسوي.. شو الدراسه.. شو الجو.. شو الكليه.. شو..
قاطعها أحمد: بس بس.. عنبو .. بالعه رادو.. المهم يالشيخه تراني ماروم ارمس وايد عن يزخوني وانحبس.. عطيني عمي وهندوو اسلم عليهم..
غزلان: لحظه بشوف دفتر المواعيد اذا ابوي فاضي بعطيك..
أحمد: شو عينوج سكرتيره عمي..عطيني يلا بلا هذربه زايده..
غزلان: هههههه.. كشخه كشخه يوم اتعصب ولد عمي.. يلا مع السلامه..
أحمد : لحظه لحظه.. بتخبرج يا سي ان ان.. ماقلتي لي.. ماشي اخبار مني مناك؟؟
غزلان وهي فاهمه شو يطري.. : مثل شو يعني؟
أحمد: انتي فاهمه انا شو اطري.. يلا قولي..
غزلان: لا لا لا.. مافهم فهمني..
أحمد: اوهوووو.. مابا شي خلاص..
غزلان: ههههه.. اليوم كانو عندنا..
احمد: إحلفي.. ماقالو شي.. هي.. لا .. شي حلو جي يفتح النفس ..
غزلان: لا ماقالو..
أحمد: افاااا.. عيل عطيني ابوج.. سديتي نفسي..
غزلان: هههههه.. ها ويهي جان قلت لك اخبار بعد..
أحمد: والله انتي اخبارج تسد النفس شو تبيني اسوي..
غزلان: والله شو اسوي يوم ..
قاطعها أحمد..: بس بس.. عطيني عمي وخلاص..
ودت غزلان التليفون لأبوها عشان يرمس أحمد.. وكانت تضحك على أحمد.. مسكين حالك يا أحمد.. وحليلك متعني.. وتحاتي سالفه منى.. ربي يتممها لك على خير.. ويوفقك.. ويوفقني ياااااااااااااااااااااااااارب..
هادف: يارب على شو؟؟ .. شو تقولين؟؟
غزلان: مشكله الفضوليين .. انت اشعليك..
هادف: كيفي ابا اعرف.. شو السالفه؟؟
غزلان: ماشي.. اقول يارب انجح واييب نسبه ترفع الراس..
هادف: هههههه.. اشك..
غزلان: نعم نعم نعم..
هادف: ها.. لا ماشي.. اقول بسير اذاكر عندي امتحان..
غزلان: احسن..
=-=-=-=-=-=
في بيت عادل..
كانت أميره قاعده متفيزره جدام الكمبيوتر تقرا قصه ومندمجه فيها عالآخر.. دشت عندها امها وشافتها ياسه مجابله اللابتوب ومندمجه..
أم عادل: بسج يا بنت الناس.. إرحمي عيونج شوي.. شو ها مب حاله هاي..
أميره : امي انتي لو تقرين القصه بتحسين فيني.. والله حلوه..
أم عادل: لا ويه.. ماتخبلت.. شو تبين في هالخرابيط.. هدي شوي هاللابتوب وجابليني خليني ارمسج شوي..
أميره: وهذا اللابتوب وبندناه. .. آمري يا أحلى أم في الدنيا..
أم عادل: ههههه عاد أحلى أم ماصدق..
أميره افااااا ليش ماتصدقين؟؟.. احين انا جذابه.. لا قولي قولي اني جذابه...
أم عادل: ماقلنا شي انزين.. المهم تعالي ابا اكلمج في موضوع..
أميره حست ان الموضوع فيه سالفه زواج.. السالفه الي قالته لها حصه..
أم عادل: أميره ... اليوم أم حصه متصله فيني رمستني في سالفه.. ولازم اكلمج فيها..
أميره وتغير لون ويهها لأنها عرفت الموضوع..: خير امي شو الموضوع..
أم عادل: أميره تراج بنت كبيره وعاقله.. وأبا الي صار تنسينه.. ولاتردين تذكرينه حتى.. ومابا هالشي يأثر على حياتج.. ترا في واحد خاطبنج.. وماباج تتـــ..
ماعطت مجال امها تكمل رمستها وقاطعتها..: امي.. انا حصه رمستني في هالسالفه وقلت لها رايي.. اني مب موافقه وخلاص.. وماعندي غير هالرمسه..
أم عادل تضايقت من حاله بنتها.. لين متى بتم على هالحاله.. : أميره.. حرام الي تسوينه بعمرج وفيني.. يعني انا ماودي اشوفج عروس.. وبدت تدمع عيونها.. .. كافي والله دنياي متعبتني.. خلوني أروح من هالدنيا وأنا مرتاحه ومطنمه عليج وعلى اخوج..
أميره حزنت لحاله أمها.. راحت عندها ولوت على امها.. : أمي .. دخيلج إفهميني.. انا بخير ليش هالرمسه كلها.. وعادل موجود.. مابيتخلى عني.. وأنا قايله لج من قبل الزواج ماباه.. عايفتنه.. دخيلج يامي افهمي الي في خاطري.. ولا تجبريني على شي ماباه..
أم عادل: لا حول ولا قوة إلا بالله .. حرام والله حرام يا أميره الي تسوينه بعمرج.. لو أبوج الله يرحمه كان حي جان مارضى بالي تسوينه..
أميره: ..
أم عادل: حاولي تفكرين هالمره.. مايصير تردين كل من يخطبج.. عشاني..
اميره وهي منزله راسها..: أمي ماقدر اجذب عليج واقول لج بفكر وانا مابفكر.. ريحي نفسج من أحين وردي عليهم.. لااااا.. هذا جوابي..
أم عادل ما رامت تتحمل أكثر نشت من مكانها وهي تصيح وظهرت من الغرفه .. ودشت غرفتها.. وشافها عادل وهي في هالحاله.. استغرب.. بسرعه سار عند أميره عشان يسألها..
عادل: أميره....!!.. شو فيها أمي..!!..
أميره تمت ساكته.. شو تقول له.. أمي تصيح بسببي.. امي تصيح عشاني.. أنا السبب في حزنها.. آه بس لو تحسون بالي احسه..
عادل وبعصبيه..: أميره ارمسج.. أمي شو فيها؟؟؟.. منو ضايق بها..
أميره: ماشي.. في واحد خاطبني وقلت لها ماباه.. وانت تعرف امي..
عادل زادت عصبيته.. : وليش لا.. ليش ماتفكرين.. انا حصه قالت لي عن الريال.. ونشدت عنه عند إبراهيم.. والي اعرفهم.. محد عاب الريال بشي.. ليش ترفضين؟؟.. حرام عليج الي تسوينه بعمرج وبأمج.. أرحميهم.. كل هذا عشان إنسان ميت..
اميره عصبت.. : لاااااااااااا.. لا تقول عن سيف ميت.. سيف مامات.. مامات.. وتمت اتصيح..
عادل: لا حول ولا قوة إلا بالله..
ظهر من غرفتها وهو معصب من خاطره.. وراح عند أمه عشان يطمن عليها..
أميره كانت من الصغر محيرينها لولد خالتها.. وكانت تموووووت عليه.. وهو نفس الشي.. الكل كان يعرف ان أميره لسيف وسيف لأميره.. وأميره تعلقت فيه بصوره غير طبيعيه.. خصوصا من بعد ما توفى أبوها.. لقت عنده كل الحب الي كانت تتمناه.. وملا الفراغ الي كان في قلبها من بعد وفاة أبوها.. توفى سيف في حادث وهو ساير يشتري لها الشبكه الي كان راح يلبسها اياها في يوم ملجتهم.. بس توفى قبل لا يسوي هذا كله.. ومن يومها أميره عايفه الدنيا بما فيها.. ودوم تحس انها هي السبب في وفاته .. وهي رافضه الزواج لأنها ما تتخيل حياته بليا سيف..
=-=-=-=-=
في بيت بو مريم..
مريم ياسه تقرا مجله في الصاله .. دش عليها ابوها مع امها..
بو مريم.. : اشحالج يا بنتي؟؟ عساج بخير..
رفعت راسها مريم تبتسم لأبوها ومستغربه .. شو بلاه ابوي اليوم يسأل علي.. غريبه.. : بخير الله يعافيك ابوي.. انت اشحالك.. شو صحتك؟؟ عساك مرتاح..
بو مريم: مرتاح.. بس برتاح زود يوم بتطمن على عيالي انهم بخير وفي أمان..
مريم: الله يخليك لنا ويطول بعمرك..
بو مريم: مريم يا بنتي نحن سألنا عن الريل.. وماشاء الله عليه ماعليه كلام.. كل حد يمدح فيه وفي أخلاقه.. وأهله ناس والنعم فيهم.. ريال شايل مسؤولية هله على أكمل وجه.. مريم يا بنتي الي اباه منج اتفكرين عدل وتردين علينا.. وماتردين علينا الا وانتي مقتنعه من قرارج..
مريم نزلت راسها.. وحطت المجلة على الطاوله.. كانت محمره من الخاطر مستحيه من ابوها..
أم مريم..: مريم يا بنتي.. ترا ابوج يبا مصلحتج.. ونحن نبا راحتج.. ولو كان هالإنسان ما يناسبج جان ابوج ما وافق عليه.. شو رايج؟؟
مريم ابتسمت واتطالعتهم بمستحى وظهرت بسرعه من الصاله ودخلت غرفتها... ابتسمت ام مريم.. حست ان مريم موافقه .. : محمد.. انا في رايي ان مريم شكلها موافقه..
محمد: وانا بعد احس جي.. بس لازم نعرف رايها النهائي.. هذا زواج مب لعبه..
ام مريم: كلها شوي وبتعرف كل شي.. بدخل عندها وبسألها..
بو مريم: زين تسوين..
نشت ام مريم ودشت غرفه مريم شافتها ياسه على طرف السرير وسرحانه وتفكر في الموضوع.. تذكرت سلطان.. ابتسمت.. والله انج كنتي هبله يا مريووم..
أم مريم: مريوووووم .. وين وصلتي.. من ساعه ازقرج ما تسمعين..
مريم: اوه.. هههه.. اسفه امي مانتبهت..
أم مريم: ماعلينا.. مريم.. نبا نعرف رايج.. شو قلتي..
مريم وهي منزله راسها..: الي تشوفونه..
أم مريم وهي تيلس عند بنتها.. : فديتج يا بنتي.. ابا رايج وانتي مقتنعه منه ..
مريم: مقتنعه يامي.. والي تشوفونه زين سووه..
أم مريم والدمعه في عينها.. وتبوس بنتها..: الله يوفقج ويهنيج يابنتي يامريم..
مريم وهي تبوس راس امها..: الله لا يحرمني منكم..
نشت ام مريم.. : بسير اخبر ابوج.. وارد لأهل الولد الخبر..
مريم ابتسمت لأمها..
=-=-=-=-=-=
في بيت غزلان..
هند وعلي ووداد وغزلان ياسين سوى يسولفون..
علي: اخبرج انتي ماوراج مدرسه باجر..
غزلان: شو حارنك.. ولهانه على اختي وابا اقعد وياها..
علي: احم احم.. ونحن مالنا رب تشتاقين لنا يعني؟؟
غزلان: لا.. دامك ماتباني اقعد وياك.. خلاص مب مشتاقه لك..
علي: ههههههه.. وحليلج يا غزلان.. والله وولهنا على سوالفج.. انزين يا هند.. باجر نشي من وقت عشان امر عليج واوديج وياي المستشفى..
هند وهي مستغربه: ليش عاد؟؟
علي: شو ليش بعد؟؟ .. شو اتقفنا.. من نرد البلاد تسوين فحوصات كامله ونتطمن على صحتج..
هند: مايحتاي..
علي: لا يحتاي.. عاد لا ترديني..
غزلان وهي تقاطعه: ماعاش من يردك.. وانا بعد بيي وياها اساعدها..
وداد: تمي تمي.. انتي عاد ماصدقتي تلقين حجه تغيبين فيها عن المدرسه..
غزلان: اففففف لازم اتخربون يعني..
علي: خلاص عيل يا هند.. مثل ماقلت لج باجر اوكي..
هند: اوكي
علي: شطوره.. وأحين بخليكم برد البيت ارقد عشان انش من وقت.. يلا تامروني على شي؟؟
الكل: سلامتك..
علي: مع السلامه.. اشوفكم باجر..
غزلان: افففف.. لازم يعني..
علي: خلاص مابيي..
غزلان:هههههه اسولف تعال ويا ويهك.. وهات الدب وياك.
علي وهو مستغرب: منو الدب؟؟
غزلان: اقصد محمد..
علي: حرام عليج.. محمد ماعاد دب شرات قبل انتي ذوبتيه..
غزلان: ههههههه.. اسولف عنبووو.. انزين قوله ايي تولهت عليه..
وداد وهي تتطالع غزلان بنص عين..: قولي تولهتي على الخساير الي خسرتيه المسكين..
غزلان: هههههه.. انتوا اليوم فيكم شي.. كلكم ضدي..
وداد: محد ضدج ياماما..
علي: اقول.. شكلي بسهر للصبح وياكم.. خل اسير البيت..
غزلان: احسن.. عندي اسرار ابا ارمس فيها ويه ماروم ارمس في وجودك..
علي: اخ منج ام لسان..
وظهر علي من بيتهم.. والكل تم سهران يسولف..
=-=-=-=-=
في بيت عبدالله..
ام عبدالله ياسه ويا بناتها وفاء ومها وريم..
وفا: مساكين معورين قلبي.. ماباقي شي على امتحانات نص السنه وانا امتحاناتي مب محسوبه يعني عادي..
ريم: بدت ترمس احين هاي.. اففف.. اسكتي اسكتي الله يخليج..
مها: اقول امي .. متى بتقولين حق عبدالله؟؟
نفس الوقت دش عبدالله وسمع مها تطريه..
عبدالله:خير شو السالفه؟؟ اتحشون فيني؟؟
ريم: بسم الله.. يني بو سبع ارواح..
أم عبدالله: بسم الله على ولدي.. لا تقولين عنه يني..
عبدالله وهو يحب راسها: فديتج والله.. أنقذيني يا أماه من أيديهن.. الشريرات الثلاث..
وفاء: أرجووك يا عبدالله.. لا تضم إسمي معهن.. فإني لا يخصني بشي..
عبدالله: الله على العربي.. لا يخصني.. ههههههههه
مها: اقول ريموووو.. في نااااس عندي لهم خبر يسوى الدنيا.. بس مابقوله لهم خلاص..
ريم: هي.. احسن.. عيل نحن شريرات ها..
عبدالله: افااااا.. مهوووي انتي اختي حبيبتي.. اصلا انا راد البيت بس عشانج لأني تولهت عليج.. اسولف وياج.. وانتي ريماني.. انتي ماروم على فراقج..
ام عبدالله وهي تضحك على سوالفهم..: ربي لا يحرمني منكم ومن هاللمه الحلوه.. وبسكم لا تلعوزون اخوكم..
مها: هيييييييييه .. أحين نحن نلعوزه.. ولا جنه هو الي مشيب راسنا في البيت..
عبدالله: جب انتي.. خلاص ماحبج.. والخبر الي عندكم اكيد امي بتقوله لي..
ام عبدالله: انا.. ماعندي شي.. اي شي عندهن.. اسألهن..
عبدالله: احين انتي امي تتفقين وياهم.. فليسامحك الله يا أماه..
وفاء: انا سايره ارقد .. وراي دوام باجر من الصبح.. تصبحون على خير..
ونشت وفاء وسارت غرفتها..
ريم: امي بنتج هاي دوم جي خقاقه.. عفان الله نحن اخوانها وخواتها ماتحب تقعد ويانا شوي.. وهي تقلد وفاء.. انا سايره ارقد.. روحي الله معاج..
ام عبدالله: عيب ياريم.. هاي اختج لا ترمسين عنها بهالطريقه مب زين..
مها: صدقها ريماني.. عمرنا ماحسينا انها اختنا..كله في غرفتها.. واذا ظهرت للغدى ولا عشا.. ولا اذا بغت شي منا..
وفاء سمعت رمسه خواتها لأنها كانت ياسه عالدري.. تضايقت في خاطرها.. وتلومت.. بس تجاهلت وكملت دربها ودخلت غرفتها ترقد
عبدالله: بسكن .. يلا شو السالفه.. ترا بزعل وما بوديكم السينما باجر..
ريم: ها.. شو.. سينما.. خلاص بقول بقول..
الكل: ههههههههه
مها: انا بقول انتي جب..
ريم: لا انا بقول.. انتي الي جب..
مها: انا..
ريم: لا انا..
عبدالله: اوهوووووو لين الصبح بتيلسون على هالحاله ترا انا بعد بنش ولا بوديكن..
مها: خلاص خلاص.. شوف.. السالفه ومافيها ان مريم وافقت عليك..
عبدالله وهو مب مستوعب: شو.. شوقلتي.. ماسمعت..
ريم: اوهوووو.. شو بلاك ماقمت تسمع.. اقول لك مريم وافقت عليك..
عبدالله: أمي.. صدق الي يقولونه ولا يلعوزوني بس..
أم عبدالله: ههههه.. صدق يا ولدي.. صدق.. ألف ألف مبروك.. ربي يبلغني في عيالك..
عبدالله: آمين.. وانتوا الثنتين يلا جدامي على الفراش وقت الرقاد..
ريم + مها: والسينما؟
عبدالله: اي سينما.. ماشي يلا.. ماعندنا بنات يروحن السينما..
مها: لا والله.. عيل مابحضر عرسك..
ريم: لا انا بحضر بس ما برقص..
عبدالله: هههههه.. عاد الله والتهديد.. بوديكن افا عليكن انتو بس..
استانسوا من الخاطر .. وعبدالله كان مستانس من خااااااااااطره.. الفرحه ماكانت شايلته.. معقووووله خلاص .. بتتحقق امنيتي.. وباخذ الإنسانه الي اباها.. اشكرك يارب..
ونش من مكانه عشان يروح غرفته يتوضى ويصلي ركعتين شكر لربه..

اممم.. شو تتوقعون بيصير مع منى المسكينه؟؟
وأحمد.. شو موقفه يوم بيعرف؟؟
مريم وعبدالله.. وغزلان وإبراهيم.. أحلام جريب بتتحقق؟؟
هند.. شو بتكون النتايج؟؟
أميره.. لين متى بتم على هالحال؟؟ بتغير رايها؟؟
وفاء.. شو سبب عزلتها؟؟
تحياتي..