الجزء ( 44 ) : للحب عنوان

=-=-=-=-=
ملخص الجزء السابق: قرار هنادي بالعلاج.. ندم أحمد على تعامله مع اهله .. رفض أميره فكرة الزواج.. والمعارضه بشده.. الموقف الي صار بين إبراهيم وغزلان.. ومقابله غزلان لخالد في صحارى.. سعيد وتفكيره في أفنان.. معارضه العم علي لموضوع خطبة منى والخوف من فقدان الثروة.. بو مريم وتحقيقه عن عبدالله..
=-=-=-=
في المطعم..
غزلان: الله كشخه باجر ابوي وهندووو الي تولهت عليها بيردون من السفر..
محمد: وعلي المسكين.. ماتولهتي عليه ولا نسيتيه..
غزلان: لااااا بالعكس.. ها اكثر واحد متشوقه ردته بس تعرف ليش.. !!؟؟
محمد:ليش؟
غزلان: ابا اشوف الموقف بينه وبين آمنه كيف بيكون من بعد هالسنين كلها..
محمد: هي والله صدقج انا بعد متشوق لهاللحظه..
غزلان: اقول انا خلصت أكل.. وإنت؟
محمد: كنت اترياج انا بعد مخلص..
غزلان: عيل لا قم حاسب خلنا نسير..
محمد نادى على الجرسون عشان اييب الحساب وحاسب معاهم ونش مع غزلان عشان يظهرون من المركز.. فكانوا مجبورين يخطفون حذال خالد ومرته.. وخالد من مرت غزلان تم موخي راسه خاف مرته تشك في السالفه او شي.. والود وده ينش من مكانه ويوقف لها.. بس نوف ومكانتها في قلبه مانعه خالد يسوي هالشي.. وهالشي الي بيساعده انه ينسى ايامه مع غزلان..
وردت غزلان البيت وكانت هلكااااانه من الخاطر.. فرت اجياس الأغراض الي شرتهم على الأرض.. وبدلت ورقدت على طول.. ووداد دخلت عندها الغرفه شافتها نايمه .. فراحت عنها وسارت غرفتها تنام عشان ينشون للدوامات اليوم الثاني ويسيرون المطار الصبح..
=-=-=-=
ابراهيم كان ميت ومتحرقص كل شوي يطل من الجامه يشوف اذا غزلان ردت البيت ولا بعدها لين ما شاف محمد موقف الموتر ونزلت غزلان من الموتر ودخلت البيت ومعاها كوم الأجياس.. انغاض زود .. وظهر من الغرفه وصك الباب بقو.. حصه في هالوقت كانت ترمس عادل.. من سمعت صوت الباب تخرعت.. بندت عن عادل وبسرعه ظهرت من غرفتها.. شافت ابراهيم يالس عالكنبه في الحجره.. ومبين عليه معصب ومتضايق.. سارت يلست حذاله وساندت ايدها على جتفه..
حصه: والحلو ليش معصب؟ .. بيستوي معرس جريب.. مب زين له يعصب..
ابراهيم: لا خلاص ما بستوي معرس..
حصه مستغربه نشت من مكانها وقفت جدامه: وليش ان شاااااء الله؟؟ شو المانع؟؟ شو الي غير رايك بعد..؟؟
ابراهيم: ماشي خوزي من يدامي..
حصه: مب متحركه لين ما تقول لي شو السالفه..؟؟
ابراهيم:ربيعتج قاهرتني.. اونها تباني.. وتوني اشوفها ظاهره مع ولد خالتها ولا بعد روحها محد وياهم..
حصه: أي واحد فيهم؟؟
ابراهيم: محمد.. وايد مهتمه فيه اشوف.. في البدايه على الريجيم واحين طلعات ماشاء الله
حصه ميته من الضحك على ابراهيم..: فديتك اخوي.. تغاااااار... ومن محمد الي غزلان تعتبره اخوها العود وهو نفس الشي..
ابراهيم وبإرتباك: لا.. منو قال اغار.. عادي كيفها خل تظهر
حصه: برهووووم عاد.. من بعد ما تصالحتوا وردت المياه لمجاريها تبا اتخرب كل شي.. ولا تخلي هالأمور التافهه اتفرق بينكم..
ابراهيم تم ساكت.. ويعرف ان الي تقوله حصه هو الصح.. بس شو يسوي من القهر الي فيه.. الغيره الي يحس فيها مب بيده..
=-=-=-=-=
مرت الليله هذي على خير.. على الكل الا عمر ولد عم منى.. الي ما يعرف شو يسوي.. ومنى وأحمد يبنون آمالهم على بعض وهم مب عارفين شو الي يصير من وراهم..
=--=-=-=-=
يوم السبت الساعه 8.00
غزلان ماطاعت تنش من وقت.. وردت رقدت.. جان يدش عليها هادف يحرج عليها..
هادف: غزووووول نشي عاد بتتأخرين على المدرسه
غزلان وهي تفرك عيونها ومعصبه: اوهوووووووو.. شو هالبيت ياربي.. تراني ابا اسير المطار يعني اليوم مب سايره المدرسه انا قايله هالكلام لوداد..
هادف: بس وداد ماقالت لنا شي؟؟
غزلان: وانت ليش للحين مب ساير قاعد تصارخ علي بس..
هادف: لأني شراتج ابا اسير المطار.. واليوم اصلا مافي دروس مهمه ولا امتحانات
وغزلان: وانا بعد نفس الشي مافي عندي دروس مهمه ولا شي.. خلاص.. يلا فارج ابا ارقد
هادف: ما تستحي صايمه وتقول لأخوها فارج..
غزلان: شو اسوي بك مزيغني.. مقومني من الرقاد بهالطريقه.. خلك رقيق شوي.. تعلم عشان مستقبلك؟
هادف: ليش قالو لج بشتغل في المستقبل سنطور اقوم الناس من الرقاد..
غزلان: يجوز.. هههههههه
هادف: اقول ابرك لج تنامين .. نامي نامي احسن
غزلان: اقول انا جي بعد.. صك الليت لو سمحت.. هيييييه جي اوكي ظلام.. صح قبل لا تظهر.. الساعه 10 يوم بتقوموني لا تقومني انت.. خل وداد ولا أي حد ثاني يقومني لو سمحت..
هادف: حاضر برنسيسه غزلان.. اوامر ثانيه
غزلان: لا شكرا.. اذا بغيت شي بزقرك.. يلا برع
هادف: ماعليه:.. انا اراويج.. مابعديها لج
وظهر من الغرفه وهي ميته من الضحك.. وردت راسها على المخده ورقدت..
اما في بيت بو جاسم فكان جاسم ماخذ اجازه عشان يروح المطار ويستقبل علي وريل خالته.. وفي قلبه يترقب اللحظه الي راح تتلاقى فيها آمنه مع علي في المطار.. ومحمد من شوقه لأخوه راح بنفسه فتح باب غرفه علي من بعد هالفتره كلها الي كانوا قافلين فيها الباب .. وتم يرتبها وينظفها من خاطره.. وسار محد الورود وطلب باقه جوري حمرا وحطها على التسريحة في غرفته.. وطلب من الخدامه تولع الفحم عشان يحط المبخرة في الغرفه ويبخر له غرفته..
آمنه: جاسم.. شو هالنشاط اليوم .. ولا بعد ماخذ اجازه.. شو السالفه.. ؟؟ .. كل هذا عشان ريل خالتك بيي من العمره ولا شو؟؟
جاسم: ولا تنسين هند .. والشخص الثالث بعد..
آمنه: هههههه.. والله انكم اليوم كلكم مب طبيعيين في البيت.. عمتي ناشه من الصبح ومستانسه ونفس الشي عمي..
جاسم: وحتى محمد.. هههههه
آمنه: محمد عاد هذا الي مختفي من الصبح وماشفته للحين.. مادري وين مختفي..
جاسم: بتحصلينه في القسم ماله..
آمنه: بسير أصبح عليه عيل.. بشوف هو بعد في أي حاله من النشاط..
ظهرت آمنه من الغرفه وسارت القسم الي فيه غرفه محمد.. دقت عليه الباب بس محد فتح.. شمت ريحه بخور حلوة ظاهره من القسم.. جان تفتح الباب وشافت محمد فاتح الجامه وحاط المبخره برع.. ويالس يرتب.. بس الي استغربت منه.. وخلاها تحتار.. ان محمد مب في غرفته.. في غرفة علي..
آمنه: صباح الخير..
محمد بعد ما انتبه لوجودها...: صباح النور هلا..
آمنه: مب جنك صايم؟.كيف تعطر الغرفه بهالطريقه
محمد: شو اسوي من زمااااان ما فاتحين هالغرفه واحس مادري كيف مستويه كئيبة.. أقول خل نظهر من الغرفه عشا نريحة العطور.. وبخلي باب القسم مفتوح عشان الريحه تنتشر برع بعد شوي وتخف هني..
انتبهت آمنه على باقه الورد الي موجوده.. قربت صوبها وشافت في بطاقه على طرفها.. ومحمد كان منشغل.. استغلت انشغاله وقرت البطاقه عمرة مقبولة إن شاء الله.. أخوك محمد
...
في هاللحظه ساد الصمت وتغيرت تعابير ويه آمنه من قرت عبارة اخوك.. يعني علي الي ياي وياهم هو علي اخو ريلها.. وليش خشوا عنها هالشي.. وليش جذبوا عليها وماقالو لها من البداية.. صدت صوب محمد.. وبصوت عالي.. : لييييييش جذبتوا علي؟؟.. ليش قلتوا لي ان علي هذا ولد عم هند؟؟
محمد انصدم.. رفع راسه وشاف الدموع كيف انحبست في عيونها.. ماعرف شو يسوي.. احتار وتغيرت ملامحه.. ماعرف كيف يتصرف..
محمد: تعالي برع الغرفه وبقولج كل شي..
ظهرت آمنه من الغرفه بسرعه.. وسارت صوب غرفتها.. وفتحت الباب وكان جاسم يالس على الكرسي يقرا قرآن.. : ليييييش ماقلت لي ان علي رد.. ليييييش خشيت عني هالشي؟؟
انصدم جاسم.. رفع راسه يطالعها.. كيف عرفت؟؟..: انتي شو تقولين..
آمنه: خلاص .. عرفت كل شي.. محمد من الصبح يرتب وينظف في غرفه علي.. وشفت باقة الورد الي شاريها له.. عمرة مقبوله.. أخوك محمد.. ليش خليتوني اتعذب طول هالفتره وماقلتوا لي ان علي رد لنا بالسلامه..
جاسم: حبينا انخليها لج مفاجئة.. بغينا انفاجئج فيها.. وعلي يدري انج رجعتي لي.. وعلي كان وياي من ايام مشاكلنا.. وهو مسامحنج ومب حاط شي في خاطره عليج.. فقلنا بنفاجئج يوم بتشوفين علي يسلم عليج بنفسه .. قبل ما انتي اتعرفينه
آمنه حست بإنهيار.. حست شريط الذكريات والألم الي سببته له هو بالذات.. والغربه الي عاشها.. وتذكرت كل شي.. يلست على السرير وغطت ويها بإيدها وتمت اتصيح من الخاطر.. جرب منها جاسم ولوى عليها وتم يطبطب على ظهرها ويخفف عنها..
جاسم: بس حبيبتي.. الي فات مات.. واباج تنسين كل شي استوى من قبل وتعتبرينه كابوس ونشيتي منه.. مايحتاي هالدموع كلها.. يلا عااااد ابا اشوف ابتسامه مرتي ام عيالي..
امنه رفعت راسه تمت تناظر عيونه.. ابتسمت له ابتسامه خفيفه.. فديتك والله.. بس مادري انا حاسه ان علي بعده مب مسامحني ..
جاسم: لا تقولين هالكلام.. تذكرين يوم انا سويت حادث وطحت في المستشفى.. هو أول واحد شجعني اني اردج لي.. وقالي صح زعل من الي صار بس عمره ماكرهج.. وهو من عرف انج تغيرتي قال انه ماحاط شي في خاطره خلاص.. أهم شي الحين والي قبل شي ومضى..
آمنه: اكيييييد
جاسم: شو اتحيديني اجذب عليج
آمنه: هههههه .. لا
جاسم يقاطعها: فديييييت هالضحكه.. هيه هاي اموون مرتي
جان اتنزل راسها مستحيه من رمسته..
=-=-=-=-=
واستوت الساعه 10.00 كان سلطان ويا امه وأبوه في بيت بوسعيد .. يتريون الكل يجهز عشان يروحون المطار..
هادف: عمي .. ليش ناصر مب وياكم؟؟
بوسلطان: ناصر في المدرسه..
هادف: هيييييه نسيت ان ناصر ولد علمي.. عشان جي.. زلمه لازم مايغيب
غزلان كانت في هالوقت نازله من عالدري.. وسمعت رمسة هادف..: لا والله كل من يدخل علمي زلمه يعني.. على الأقل احسن من الأدبي.. والمشكله انهم مايعرفون الأدب..
هادف: هههه.. مشكله الي يتفلسفون..مادري شو بتستوي عالمة ذرة..
غزلان: هههه.. وليش لا..
هادف: ليش لا اونه.. انزين يا غزوووول جان ماشفتي هذا الي يدامج راعي الأدبي اعلى عنج انا اراويج..
سلطان: اعوذ بالله منكم انتوا الإثنين .. بسكم وانتوا تتناقرون.. كبرتوا على هالسوالف..
أم سعيد: خلهم يا سلطان.. ترا هم الي محلين البيت.. واناماذابحني غير غياب سعيد عن البيت..
سلطان: الله يرده لكم سالم ان شاء الله..
أم سعيد: آميييين يارب..
سلطان: انزين شو جاهزين احين ولا شو السالفه.. ؟؟
الكل: هيه..
سلطان: يلا عيل ركبوا الموتر لأن باقي على الطياره نص ساعه وتوصل.. ويبالنا نص ساعه في هالزحمه..
غزلان: يلا ..
والكل سار صوب الموتر وركبوا الموتر عشان يروحون المطار..
=-=-=-=-=-=
عبدالله في الدوام..
كان يالس عبدالله في المكتب وهو يفكر في مريم وشو ممكن ترد عليه.. ياترى بتوافق ولا لا.. ودخل عليه ربيعه حامد الي معاه في الدوام..
حامد: شفيك ياريال شايل الدنيا على راسك..
عبدالله: ههههه.. ماشي
حامد: كل هالسرحان وماشي.. على مييييين؟؟
عبدالله: ياخي خاطب وحده واتريا الرد.. وعاد انت ادرى بهالحال.. مريت فيه من قبلي..
حامد: وحليلك.. عيل الله يعينك.. ومن بنته.. ؟؟
عبدالله: بنت محمد صالح..
حامد تم ساكت شوي يفكر في الإسم.. : لحظه.. هالإسم مب غريب علي.. تم ساكت شوي.. جني عرفته
عبدالله: منو؟؟؟
حامد: اتعرف سلطان ضاعن ؟؟
عبدالله: هيه الي يشتغل في قسم مكافحة المخدرات صح..
حامد: هيييييه.. محمد هذا يستوي ريل خالته..
عبدالله: ياربي انا ليش بهالغباء.. اختي طلعت البنت معاها في الدوام.. وأحين ظهر انها تستوي بنت خاله سلطان.. ولا بعد ازيدك من الشعر بيت اني اعرف بيت عمومة سلطان.. وعيال خالتهم ربعي.. ماشي غير علووو يتوسط لي..
حامد: تراك انت اكيد استعيلت في كل شي..
عبدالله: هي والله صدقك.. بس علو مسافر العمره اول مايرد بستلمه بخليه يحل في مشكلتي.. وخل اتصل في اختي اشوف شو سوت..
حامد: الله يوفقك.. بس عاد عن تنشغل بهالسالفه وتهمل شغلك..
عبدالله: ههههه.. ان شاء الله
من بعد ما ظهر حامد من عنده في المكتب شل تليفونه واتصل في اخته هدى عشان يسألها شو سوت في موضوع مريم..
عبدالله: السلام عليكم..
هدى: وعليكم السلام هلا والله..شو سر هالإتصال الغريب.. انت عمرك ما تتصل فيه الصبح...
عبدالله: شو اسوي مشتاق لج مب رايم افترق عنج..
هدى: هههههههه.. عاد انا الي مره صدقت.. كيف مشتاق وماتروم تفترق عني هاي.. ماصدق.. عطي من الآخر شو السالفه
عبدالله: السالفه ومافيها.. اني ابا اعرف شو سويتي في موضوع مريم..
هدى: يوم قلت ان في شي تحت راسك.. انزيييييين تبا تعرف شسويت؟؟ .. ماسويت شي..
عبدالله: لا والله.. إحلفي انتي بس..
هدى: والله.. خلاص اليوم برمسها..
عبدالله: خل اخبرج..في شي ثاني اكتشفته اليوم..
هدى: شو بعد..
عبدالله: طلعت اعرف ولد خالتها.. واعرف واحد ثاني من معارفهم بعد
هدى: قول والله.. حلاته عيل.. مايحتاي ارمسها..
عبدالله: لا والله يحتاي.. بتروحين..
هدى: انزين.. ههههه حشرتنا
عبدالله: يلا باي سيري رمسيها..
هدى: هههههه.. والله انك مب صاحي.. الله يهنيك وتعقل على ايدها..
عبدالله: امييييين بس خل اوصل لإيدها بالأول..
هدى: ان شاء الله.. يلا معطلني عن شغلي .. ماوراك شغل انت؟
عبدالله: بلا وراي.. يلا مع السلامه .. اتريا منج الرد اليوم اكيد اوكي..
هدى: اوكي.. يلا مع السلامه..
بند عبدالله عن هدى.. تم مبتسم.. يحس بإرتياح كبير ما يعرف سببه.. بس الي يعرفه انه مستانس من خاطره ومرتاح..
=-=-=-=-=
في المطار..
الكل كان ينتظر لحظه ظهور بوسعيد وهند وعلي من البوابه.. وأكثر وحده كانت تنتظرهم هي آمنه.. ودها تشوف علي.. ماتعرف شو بيصير فيها لحظتها..
جاسم: خلج عادية آمنه.. ترا والله الإرتباك باين عليج..
آمنه: خايفه من رده فعل علي .. والله خايفه..
جاسم: لا تخافين .. قلت لج ان علي مسامحنج ..
غزلان ووداد عرفوا من محمد إن آمنه عرفت عن حقيقه علي.. ومنو هو.. فهم كانوا كل شوي يصدون صوبها ويلاحظون الخوف والربكه على تصرفاتها..
غزلان: وحليلها الله يعينها.. بس ماعتقد علي بيقول شي جارح.. علي وايد متسامح..
وداد: وانا بعد اقول نفس الشي..
هادف: هذوم وصلوا..
الكل صد صوب البوابه.. شاف بوسعيد طالع من البوابه.. وبعده هند.. الي من شافتهم غزلان ربعت وحضنت ابوها ولوت عليه ومن بعدها سلمت على هند.. بس الي استغرب منه الكل ان علي بعده ماظهر..
محمد: الحمد لله على السلامه.. الا وين علي؟
هند: اييب الشنط.. ياي ورانا..
ولحظتها طلع علي.. الي على طول راح له محمد وحضنه وسلم عليه.. اما آمنه فمن شافت علي.. انهارت.. وبدت تدمع.. صدت وعطته ظهرها.. وجاسم تم يهديها بس ماشي فايده.. وسار يسلم على اخوه..
جاسم: هلا والله.. اشتقنالك..
علي: اهلين.. والله انا زود.. بصوت واطي.. هاي امنه صح..
جاسم: هيه.. بس اقول.. تراها عرفت انت منو تكون.. يعني اتعرف انك اخوي..
علي فاج عيونه..: يعني عرفت خلاص..
جاسم: هيه..
علي: عيل بسير اسلم عليها..
وتوه علي بيسير صوب آمنه نادت عليه غزلان: وبعدين يعني ليش خقاق.. ماتبا تسلم علي..
علي صد صوبها: اوه.. اسمحي لي.. بس شفتج مشغوله مع هند.. اشحالج..
غزلان: مب مشكله..
ومن بعدها رد علي يمشي صوب آمنه الي كانت معطته ظهرها.. وماتدري ان علي ياي صوبها.. وهي ميته من الخوف.. وقلبها يدق بقو.. متردده انه تصد وتسلم عليه.. لين ماسمعت صوت علي..
علي: يعني ماتبين اتسلمين على عم عيالج؟؟
آمنه جمدت مكانها يوم سمعت صوت علي.. ارتبكت زود ماعرفت شو تسوي..
علي مشى وجابلها.. : اشحالج امنه؟؟..
آمنه وهي منزله راسها: بخير.. الحمد لله على السلامه.. وتقبل الله..
علي: الله يسلمج.. ومنا ومنج صالح الأعمال.. بس ممكن ترفعين راسج وتتطالعيني ولا ماتولهتي على اخوج الصغير..
آمنه وقتها انهارت من الصياح.. تمت اتصيح من خاطرها.. وياها جاسم وحضنها.. رفعت عينها لأول مره تتطالع علي في عينه.. كانت صدق خايفه.. بس الي خلا هالخوف كله يروح عنها هو ابتسامه علي الي ماكانت تفارق شفاته..
علي: آمنه.. الماضي شي وانتهى.. ماعاد لازم نذكره.. وخل عنج هالسوالف.. ترا انا والله بزعل..
آمنه : ابتسمت له.. وتمت تمسح دموعها..
الكل كان محوط حولهم ومستانسين من هاللمه الي كانوا يتريونها من زمان.. وداد مارامت تتحمل دمعت عينها من الموقف.. ومن غير لا تحس حطت راسها على جتف سلطان.. الي خلاها تنحرج وتحمر من لاحظت الي سوته.. وقتها سلطان حس بحب وداد واحتياجها الكبير له.. وابتسم لها..
غزلان قطعت هالجو بحشرتها: اقول فضحتونا مسوين مسلسل تراجيدي في المطار.. يلا خل نرد البيت ..
محمد: هي والله صدق.. خلنا نروح البيت..
ام سعيد: بما ان 2 من المسافرين من عندنا عيل كلكم معزومين اليوم عندي..
ام جاسم: لا لا لا.. عندي انا..
ام سعيد: مايصيييير.. عندي انا..
ام جاسم: خل المره اليايه عندج هالمره عندي..
جاسم: وبعدين يعني بتموت تتعازمون.. يلا عاد دام ان خالوو عزمت بالأول فاليوم عند خالو وامي انتي حددي يوم ثاني لج..
محمد: صح خالو.. قرت عينج لردة عمي
ام سعيد استحت ونزلت راسها... والكل تم يضحك عليها .. وظهروا من المطار عشان يروحون بيت بوسعيد هناك بيجتمعون كلهم.. في هالوقت كان ابراهيم يتريا لحظه وصولهم عشان يروح ويسلم على بوسعيد.. ماخذ اجازه من الدوام وتم برع البيت يسوي عمره يصلح السياره.. عشان ما يشكون في السالفه.. ولو انها مكشوفه منه..
من بعد نص ساعه وصلوا البيت ومن انتبه ابراهيم لوصولهم على طول شل القطعه الي نظف فيها ايده عشان يقدر يسلم عليهم.. الكل نزل من الموتر ومن شافت غزلان ابراهيم استانست من الخاطر.. وكانت اتحاول انها اتسوي اي شي وماتدخل البيت.. اما علي فمن شاف ابراهيم وده يموت من الضحك لأنه عرف من سعيد عن حب ابراهيم لغزلان.. جان يجرب صوبهم ابراهيم وسلم على بوسعيد وعلي.. وتحمد لهم بالسلامه..
بوسعيد: تفضل عندنا..
ابراهيم : لا مشكور ماقصرت بس مشغول شوي فرصه ثانيه اكيد بزوركم..
علي: يلا عاد لا تردنا.. تعال داخل.. في هالحر وانت صاير يالس تعابل في الموتر..
ابراهيم: شو اسوي.. مب مشكله يوم ثاني انتوا تعبانين من السفر..
علي: لا تعبانين ولا شي.. قلنالك تعال..
غزلان كان ودها تقول له انه يدخل بس كانت مستحيه.. جان تقرص وداد عشان ترمس لأنها العوده وعادي اذا رمست.. فهمت عليها وداد وابتسمت.. جان اتصد صوب ابراهيم: يلا عاد بترد ابوي.. تفضل.. تراك هب غريب عنا.. منا وفينا..
ابراهيم استانس من كلام وداد .. حس بالراحه .. خصوصا يوم قالت انك منا وفينا.. حس بغلاته عندهم شكثر.. وجان يبند كابوت السياره.. ودخل البيت يسبح ويتلبس ويروح عندهم.. غزلان كانت الفرحه ماتنوصف عندها.. من خاطرها تونست.. اول مادخلت البيت.. وكانت وداد صاعده غرفتها.. ربعت صوب غرفه وداد.. دقت عليها الباب.. ومن فتحت لها الباب ربعت وحضنت وداد بقو..
غزلان: والله احبج احبج احبج..
وداد: ههههه.. شو ياج..
غزلان: واااااااو.. ياربي اشكثر انا احبج..
وداد: هههه.. والله مب صاحيه انتي..
غزلان: اسكتي انا بطير من الفرحه..
وداد: كل ها عشان ابراهيم..
غزلان استحت ونزلت راسها.. وفي هالوقت دشت عليهم هند.. ومن شافتها غزلان ربعت وحضنتها..: فديتج والله تولهت عليج.. مره ثانيه ماشي سفر من غيري فاهمه
هند: هههه.. والله اني تولهت عليج زود.. اصلا مب حلو المكان من دونج..
غزلان: هندووووووو عندي وايد سوالف ابا اقولها لج..
وداد في هالوقت صدت صوب غزلان وتمت تتطالعها بنص عين..: ماعليه .. انا اختج حبيبتج ماتقولين لي.. انا اراويج..
غزلان: ترا انا كنت اترياكم تجتمعون عشان اخبركم مره وحده وماتعب لساني اتم كل مره اعيد السالفه لكل وحده فيكم..
وداد: ههههه اونه اتعب لساني.. انتي لو لسانج يتعب وااايد زين.. تفكين البشريه ..
هند: يلا خبريني مافيني صبر لين مانسوي اجتماع..
غزلان: احم احم.. استحي
وداد: عاشوووو البنت كبرت وقامت تستحي..
غزلان: لا والله .. مابخبركم خلاص..
وداد: اونها زعلت.. بتخبرينا غصبن عنج ولا بنحبسج في الحجره ومابطلعج..
غزلان: ها لا.. كله ولا الحبس اليوم..
هند: ههههههه.. يلا قولي..
غزلان: ابراهيم سامحني.. وقال لحصه انه يتريا ابوي يرد من السفر عشان يخطبني..
هند من سمعت الخبر ماقدرت تيود عمرها من الفرحه تمت اتيبب من خاطرها.. وداد يودتها وسدت حلجها..: فضحتينا بيقولون عندنا عرس..
هند: معلوم عرس عيل ..
غزلان: هههههههه.. يعني هالكثر هالخبر يفرحكم..
وداد: هي والله.. ماتصورين كم كنا نتمنى هالإنسان يكون من نصيبج..لأن ماشي احسن عنه ممكن انه يدير باله عليج ..
غزلان: الله يجمعنا على خير..
هند: يلا مب ناوين تنزلون..
غزلان: بلا بسير ابدل ثيابي وبنزل..
وداد: اوكي.. يلا هند خل ننزل..
=-=-=-=-=
في الوزاره..
كانت هند اتدور على مريم عشان اترمسها.. ماحصلتها في البدايه لأن كان عندها اجتماع واول ماخلصت مريم من الإجتماع راحت لها هدى اترمسها..
هدى: السلام عليج مريم..
مريم: وعليكم السلام.. هلا اشحالج؟؟
هدى: بخير ربي يعافيج.. انتي اشحالج..
مريم: والله الحمد لله.. بس الشغل ضغط علينا هاليومين..
هدى: الله يسهل عليج..
تمت ساكته هدى مب عارفه كيف تبدأ الموضوع.. مريم حست ان هدى في شي في خاطرها ودها تقوله بس مستحيه..
مريم: هدى.. في شي في خاطرج تبين تقولينه؟؟
هدى انتبهت لها ورفعت راسها: ماعرف كيف ابدأ الموضوع..
مريم: افا عليج ارمسي..في شي في الدوام تبيني اساعدج فيه.
هدى: لا.. مايخص الدوام.. السالفه بكل إختصار عن عبدالله..
مريم تمت اتفكر..ماعرف منو عبدالله.. : عبدالله!!!!.. أي عبدالله؟
هدى: اخوي؟؟
مريم: أخوج.. شفيه؟
هدى: ترا الي خاطبنج هو اخوي..
مريم فجت عيونها مستغربه معقوله انه اخو هدى..كيف ماعرفت هالشي.. : والله ماكنت ادري.. ولا لاحظت من الإسم..
هدى: انا بنفسي مادريت الا من يومين من كثر ما مستعيل رمس امي في الموضوع ومافكر يرمسني قبلها ويسهل الموضوع على امي.. بس يلا ماعلينا .. فبغيت اقول لج فكري على راحتج ومتى ماحبيتي اتردين ترانا نترياج.. وانا مابيي وبمدح اخوي جذب واخرب حياتج.. في النهايه انتي بنت.. اذا انا كنت سبب في دمار حياتج بييني يوم والله بيراويني في عيالي..بس والله من غير مديح.. عبدالله انسان ملتزم ومدين.. وكان يدور على بنت تدخل خاطره مالقى.. لين شافج في الجمعيه.. ومن يومها تميتي في باله.. صدق عيبتيه بتصرفاتج .. واصر انه يخطبج.. واخوي عمره ماكانت عنده سوالف الخرابيط شرات شباب هالأيام.. دومه في البيت ويانا وبالنادر يظهر مع ربعه يرد.. فالي اباه منج تفكرين وتاخذين راحتج ويوم تقتنعين ردي علينا خبر نترياج..
مريم كانت منزله راسها ومب عارفه شو ترد عليها: ان شاء الله خير
هدى: يلا عيل بخليج وفكري براحتج واتريا منج الرد في اقرب وقت
مريم: ان شاء الله..
وظهرت هدى من عند مريم وخلتها تايهه في افكارها مب عارفه شو اتسوي..كل الي تترياه احين الخبر من عند ابوها من بعد ما يسأل عن عبدالله ويعرف عنه..
=-=-=-=-=
العم راشد كان محتار في موضوع منى مب عارف شو يسوي.. ومب عارف كيف يتصرف.. كان خايف يرمس منى وتنصدم ويستوي بها شي.. فقرر انه يرمس ام عارف بس.. ويشوف شو بتقول.. من غير لا تعرف منى.. وانه يحاول يرمس اخوه مره ثانيه..
في بيت أم عارف..
كان راشد توه ياي عندهم.. واستقبلته ام عارف.. ومنى كانت نايمه في هالوقت..
ام عارف: يا حيا الله من يانا..
راشد: الله يحييج.. اشحالج..؟؟ واشحال عيال اخوي؟
ام عارف:كلهم بخير الحمد لله يسلمون عليك..
راشد: الله يسلمهم.. والله انا اليوم ياي ارمسج في موضوع ضروري..
ام عارف: خير ان شاء الله اكيد يخص منى.
راشد: هيه..
ام عارف: خير ان شاء الله.. رمست اعمامها؟؟
راشد: رمست عمها علي وعبيد..
ام عارف: وشو قالو..
راشد: ترا هالموضوع الي ياي ارمسج فيه.. الله يهداه بس اخوي علي معارض..
ام عارف : ليش ان شاء الله..
راشد: اونه لا .. يبا ولده عمر ياخذ منى.. وعمر ابد مب مناسب للزواج.. انسان مايعرف شي عن المسؤوليه..كيف يعرس.. ويبا يغصبهم على بعض..
ام عارف: كيف جي.. وهي معصبه.. مافي شي غصب .. وبعدين انا مستحيل افر بنتي لأي واحد يبهدلها عقب..
راشد: ونحن هالي نقوله .. بس انتي اتعرفين علي كيف..
ام عارف: دومه متسلط مع الكل.. حتى مع المرحوم خلفان..
راشد: فأنا ياينج اليوم ارمسج قبل لا ايي علي ويكلمج في الموضوع.. فأبا اعرف رايج شو بتسوين..
أم عارف: مستحيل اخلي عمر ياخذ منى.. لو انجبر اروح واشتكي عليه المحكمه انه بيغصب بنتي.. ولا اني اخليه ياخذها..
راشد: والله ريحتيني يا ام عارف.. هالموضوع كان شاغل بالي وايد.. من امس ومب قادر انام عدل.. ولا عارف شو اسوي..
ام عارف: لا تحاتي.. ويزاك الله الف خير يوم ييت وتعنيت وقلت لي..
راشد: وعن الريال تراني سألت عنه.. وكلن يمدحه.. وانا اعرف اخوه والكل يمدح فيهم.. ناس ما يتعوضون.. وأحمد الكل راضي عنه.. وانا شخصيا مرتاح للموضوع وايد
أم عارف: وانا بعد.. لأني اعرف هالناس شخصيا ومتعامله وياهم.. ناس والنعم فيهم.. يعرفون الأصول..
راشد: الله يكتب الي فيه الخير.. يلا عالعموم انا طالع.. تامريني بشي..
ام عارف: مايلست.. ايلس افطر عندنا اليوم..
راشد: لا ماعليه .. اليايات اكثر.. بس لا تقولين شي لمنى تتضايق..
أم عارف: ماعليك انا بتصرف في الموضوع وبحله بنفسي ان شاء الله.. وسلم على ام العيال..
راشد: ان شاء الله.. مع السلامه
ام عارف: بحفظ الرحمن..

شو تتوقعون أم عارف تقدر تمنع العم علي..؟؟
ومريم بتوافق على عبدالله؟؟
غزلان وابراهيم.. انتظروهم ..
هند اكيد راح تسير المستشفى .. شو راح يردون عليها؟؟
عمر اذا شاف منى.. بيغير رايه وبيوافق.. او بيتم معارض؟؟