الجزء ( 36 ) : للحب عنوان

ملخص الجزء السابق: وصول هند وأهلها لمكه.. الحب الي عايشه فيه وداد ويا سلطان.. رغبة آمنه في الرجوع لجاسم.. التغير المفاجئ الي طرى على أفنان وتفاجئ سعيد للوضع الجديد..ورغبة أحمد في خطبة منى رسمي.. .
=-=-=-=-=-=-=
جــــاسم & آمنـــــه
=-=-=-=-=
نشت آمنه من النوم بكل نشاطهاوكلها أمل .. ومتفائلة من خاطرها.. وتحاول تكتم أنفاسها عشان تقدر تواجه جاسم وتعتذر له عن الي صار وتنهي كل شي.. نشت سبحت ومن بعد ما تلبست يلست تقرا لها شوية من القرآن وأدعية.. وظهرت من غرفتها شافت أبوها قاعد في الصالة.. آمنه: السلام عليكم أبوي
أبو آمنه وعليكم السلام بنتي هلا ..
آمنه .. والله اني خايفة دخيلك أبوي إدعي لي..
أبو آمنه.. دام إنج قاعدة اتسوين الشي الصح اطمني.. وربي بيوفقج وبيوقف وياج..
آمنه: الله يستر بس
أبو آمنه: انتي بس شلي هالوسواس الي في راسج وإن شاء الله ما بيصير إلا كل خير..
نشت آمنه من بعد ما باست راس أبوها وشلت سويج الموتر وظهرت.. وشغلت الموتر وتمت ياسه مكانها وتتذكر يوم ولدها كان يالس حذالها ويحن عليها.. : مابا ابا اسوق..
آمنه: لا ماما مايستوي.. انت بعدك صغير..
عبود: أفففف انا رياااااااااااال
وفي هالوقت نزلت الدمعة من عينها وهي تذكر منظر ولدها وهو يالس يحن على راسها.. حست بقيمة ولدها وافتقدته واااايد.. من بعدها حركت الموتر وسارت صوب مكتب جاسم عشان اترمسه فيه.. وهي طول الوقت تقرا على عمرها وميته خوف وسرحانه..

=-=-=-=-=-=
في هالوقت في مكه
هند: توه مر يوم واحد .. الود ودي ان الأيام تتوقف وماتمر واتم هني
علي: ليش ماحنيتي للبلاد..
هند: بلا .. بس الراحة الي احسها هني.. ما حسيتها في حياتي..
بوسعيد: ربي يهنيج ويريحج دوم ان شاء الله.. انزين انا ساير احط راسي شوي وانام ..
هند: سير ابوي يبالك ترتاح انت من امس مانمت عدل
علي: معلووم العيوز محد كيف بينام روحه..
بوسعيد: هي والله..
هند: ههههههههههه
نش عنهم بوسعيد وراح الغرفه وتمدد عشان ينام.. وهند وعلي تموا ياسين في الصاله ..
علي: هند.. بما إن أبوج نش أبا اكلمج في موضوع..
هند: شو من موضوع؟؟
علي: موضوعنا..
هند: علي..
قاطع علي هند.. : أرجوج خليني أرمس..
هند: إرمس..
علي: هند أنا أبااااااااج تفهمين شو معناة أباج .. أحبج يا بنت الناس.. وأباج اتكون حليلتي.. خلاص كل مشاكلي انحلت .. وحياتي مب ناقصنها شي .. غير وجودج وياي..دخيلج يا هند وافقي..
هند: انت والله متفيج.. وتظن هالمكان مناسب لكلام مثل هذا.. وبعدين انت تعرف رايي .. ماقدر..
علي: انتي اشعليج انا راضي بكل شي وربج كريم..
هند: علي..
علي: هند.. ماباج اتردين علي احين... أباج اتفكرين بعدين تردين علي..
سكتت هند ونشت من مكانها ودشت الغرفة الي تنام فيها.. ويلست مجابله الجامه الي كانت مطله صوب الحرم.. وتمت ياسه تتأمل في الحرم.. وتشوف النور الي طالع منه كيف.. وتشوف الناس داخله بخشوع.. وكيف هيبة هالمكان.. تمت تتأمل للحظات ومن بعدها نزلت الدمعة من غير لا تحس.. ياربي.. والله إني اباه واحبه..وأدري ان سعادتي وياه.. بس أنا ماودي له المضرة.. ومابا أعذبه ويا وحده مريضه مثلي.. ياربي دخيلك ساعدني وأرشدني شو أسوي.. نزلت راسها وحطت ايدها على راسها وضمته فيه.. وتمت اتصيح من الخاطر... من بعدها صدت على يمينها شافت المصحف شلته وبدت تقرا منه شوي.. ومن بعدها نشت وتمسحت وصلت إستخاره .. عشان ربها ييسر الأمور للخير .. وحطت راسها ونامت شوي عشان تقدر تروح لصلاة الظهر..
=-=-=-=-=
آمنه وصلت عند باب الشركه.. وقفت الموتر وتمت تتطالع الشركه .. وهي ميته خوف.. وكل جسمها يرتعش من الخوف .. ماتدري شو تسوي.. تنزل ولا ترجع.. في هاللحظات وهي تتطالع الباب شافت جاسم وهو ظاهر من الباب وماسك في إيده أوراق وطالع .. لا إراديا نزلت من الموتر..وكان هي وراه لأنه صد يروح صوب موتره فعطاها ظهره.. نادته..
آمنه: جااااسم..
جاسم.. مستحيل.. انا اعرف هالصوت.. معقوله تطلع هيه.. صد وراه وشاف آمنه جدامه.. والشمس كانت فعينه فكان مضوج عينه ومب رايم يشوف عدل.. : آمنه..
آمنه: ممكن آخذ من وقتك شوي لو سمحت..
جاسم تم واقف مكانه يتشاور .. ياترى يكلمها .. يروح لها.. يشوف شو عندها.. توه بيعطيها ظهره وبيمشي في آخر لحظه تردد ورد لها: نعم.. في شي.. تبين اتشوفين عيالج.. ترومين تروحين البيت أي وقت ما امنعج منهم..
آمنه: أنا يايه أكلمك في موضوع..
جاسم: ورقة الطلاق؟؟ ولا المؤخر.. كل هذا بيوصلج.. بس مافضيت للحين أروح المحكمة..
آمنه وهي متنرفزه من أسلوبه البارد.. : جااااااسم.. أباك في موضوع.. عطني مجال أرمس من غير إحتمالاتك السخيفه هاي..
جاسم: نعم.. قولي شو عندج.. تراني مشغول..
آمنه: وتشوف حلوه اني ارمسك هني في الشارع كل من مر يشوفنا..
جاسم: وين تبين أروح وياج؟؟
آمنه: مادري..
جاسم: تعالي المكتب فوق عيل..
بسرعة بندت آمنه الموتر ولحقته عشان تروح له المكتب.. كان توه بيصك باب اللفت.. لحقت عليه آمنه وفتحت الباب بعد ما ضغطت على الزر ودخلت المصعد ..وماكان فيه حد غيرها وياه.. طول الوقت كانت آمنه تتطالعه بشوق وحب.. وهو صاد عنها ولا يطالعها.. وتتأمله.. وتدعي ربها إنها ترجع له.. وجاسم ما ينكر دقات قلبه الي تخفق بسرعه ..ومايقدر ينكر إنه بعده يحبها.. هي أحبج يا آمنه. بس الي الي سويتيه فيني مب شوي.. جبرني اتصرف بهالطريقه...
وكانت في هالوقت آمنه سرحانه وتفكر ومنزله راسها.. وفجأة وقف المصعد بطريقة قوية هزت المصعد .. آمنه من خوفها وبلا شعور فزت من مكانها وقبضت إيده وحطت راسها على جتفه.. جاسم في هالوقت حس بحراره كبيره تسري في عروقه.. حس انه تيبس في مكانه.. وكتم أنفاسه تم يطالعها كيف لاويه عليه وزايغه وترتجف.. ومن غير لا يحس بعمره قبض إيدها بقو ورص عليها شوي وودرها.. وهي من انتبهت لنفسها نشت عنه وسارت بعيد.. ونزلت راسها.. وهو تم يدق جرس الإنذار.. وبعد أقل من خمس دقايق اشتغل المصعد لأنه توقف نتيجه انقطاع الكهربا لفترة بسيطه.. ومن وقف المصعد على الطابق الثامن .. فتح الباب وظهر جاسم وظهرت آمنه من وراه تلحقه صوب المكتب.. ودشوا المكتب..
آمنه: آسفه على الي صار.. ماكنت قاصده..
جاسم: ماعليج.. قولي لي شو السالفه لأني مشغول..
آمنه: جاسم ليش اترمسني بهالجفاف..؟؟؟
جاسم: يايه اتكلميني في الموضوع ولا يايه تسأليني هالسؤال السخيف..
آمنه: خلاص خلاص.. الظاهر ما قمت تتحمل مني شي.. برمسك وبظهر من المكتب وما بشغلك أكثر.. جاسم.. هالفتره الي انقطعت انت وعيالي عني فيها.. صدق تخبلت وجن جنوني من الوحده الي كنت فيها.. وماكنت عارفة شو اسوي وكيف اتصرف...حسيت بقيمة وجودك إنت والعيال في حياتي.. وزعل أبوي مني وتجاهله لي خلاني أفكر بكل شي سويته وهالشي الي خلاني اندم واتحسر صدق على كل شي بدر مني...
جاسم يمكن تقول اني ياسه اخطط ولا اقصد شي من ورى كلامي هذا.. بس أنا صايمه في هاليوم والله عزيز وغالي وشاهد على كلامي .. جاسم انا يايتنك اليوم وأطلب إنك إتسامحني وتردني لبيتي وعيالي الي مالي غناة عنهم.. اسفه.. اقصد بيت عمي .. وأبا اروح عند عمي وعمتي واطلب منهم السماح.. ومحمد.. والود ودي بشوفه علي واطلب منه السماح بس مادري كيف بلقاه.. كانت ترمس وعيونها تذرف الدموع وجاسم كل ما يشوف دموعها ينقبض قلبه ومايهون عليه مهما كان العشره والعيال الي بينهم.. ومن بعدها نزل راسه ويفكر بكلامها.. ويسمع نبره الألم والصدق منها.. .. دخيلك يا جاسم سامحني لو تباني ابوس ريلك والله لأسويها بس عشان تردني ..
وفي هالوقت ساد الصمت من بينهم... لا هي ولا جاسم يرمسون..
آمنه: ليش ساكت.. رد علي.. قولي إذا بتردني ولا بطلقني خلاص
جاسم: أطلقج؟؟ أنا ها يمكن آخر شي فكرت فيه .. بس سويته لأنج انتي الي طلبتي
آمنه: كنت مينونه .. وبعدين انت طلقتني لفظيا وطلقة وحده يعني تروم تردني.. جاسم صدقني تغيرت
جاسم تم ساكت ومنزل راسه.. مب عارف شو يقول ولا شو يرد عليها..
آمنه: انا طالعه .. وبخليك اتفكر براحتك .. ولافكرت اتردني... تعرف كيف اتيبني..
ظهرت آمنه من بعد هالمرسه على طول.. وخلت جاسم تايه بأفكاره الي توديه شرق وغرب.. آه منج ذبحتيني.. ويايه أحين تحيين حبج في قلبي من بعد الي صار.. بس انا أعرفج وحاس بصدقج.. بس الخوف هو الي مانعني مابا يصير فيه شرا الي صار من قبل.. مابا حد يتألم من وراي.. ياربي ساعدني شو اسوي.. نزل راسه وحطه على الطاوله وهو يفكر..
في هالوقت كانت آمنه راكبه الموتر وسايره صوب بيت بوجاسم.. ومن وقفت عند باب البيت ... إسترجعت ذكرياتها معاه وذكرياتها في هالبيت...نزلت من الموتر وقلبه شرات الطبل يدق.. ياترى كيف بتواجه عمتها وعمها وكيف بيستقبلونها..
دقت الجرس والخدامه انصدمت من فتحت الباب وشافت آمنه...زاغت من الخاطر.. ارتبكت ماعرفت شو اتسوي..
آمنه: ماما هني؟؟
الخدامه: داخل..
دشت آمنه وسارت صوب باب الصالة.. ودقت الباب.. ودخلت شافت الصاله فاضيه.. ومشت صوب الباب الخلفي الي يفتح صوب المطبخ.. وشافت عمتها في المطبخ.. خافت في البدايه.. بس من بعد ما تنفست نفس عميق راحت صوب المطبخ..
أم جاسم: كوماري.. هاتي الطماط من الثلاجه..
أم جاسم كانت معطه ظهرها لآمنه وماتدري انها موجوده.. تمت واقفه تتطالع عمتها وهي تشتغل وتبتسم ..
أم جاسم: كوماري وصمخ إن شاااااااء الله.. شو ماتسمعين.. صدت وراهاو إنصدمت من وجود آمنه وتمت ساكته..
آمنه: إشحالج عمتي؟؟
أم جاسم نشت من مكانها وغسلت إيدها وسارت صوب آمنه وهي تبتسم لها.. مهما كان تراها أم أحفادها: الحمد لله بنتي إنتي إشحالج..
آمنه: بخير.. عمتي هاتي عنج انا بشتغل ..
أم جاسم مستغربه من آمنه بس ما حبت اتبين لها: لا ماعليج.. تعالي الميلس بتوصخين عباتج في المطبخ..
مشت أم جاسم ومن وراها آمنه صوب الميلس ودشوا .. وقعدوا على الجلسه.. وتموا ساكتين حول العشر دقايق.. آمنه سرحانه وتفكر كيف اتواجهها وترمسها.. وام جاسم مستغربه من زيارتها..
آمنه: عمتي انا يايه اليوم أبا أكلمج في موضوع..
أم جاسم: خير بنتي..
آمنه والدموع تذرف من عينها: بعد كل الي صار تقولين لي بنتي.. بعد كل الي سويته؟؟
أم جاسم: الي صار شي وانتهى.. والحمد لله على كل حال.. وانتي بنتي وبتمين بنتي دوم
نشت آمنه من مكانها وقربت صوب أم جاسم وحضنتها وتمت اتصيح من الخاطر..: عمتي انا آسفه والله متندمه على الي سويته كله.. دخيلج سامحيني وقولي لعمي يسامحني.. وتمت اتبوس راسها.. سامحيني.. وقولي لمحمد يسامحني.. وعلي.. وينك ياعلي عشان اطلب السماح منك..
أم جاسم فهمت من كلامها انها ما تعرف ان علي رد.. وتأثرت من رمستها وتمت اتصيح وياها وتمسح على راسها.. وهي حاضنتها: بس يابنتي والله مسامتج.. انا عمري ما شليت بخاطري منج..
آمنه: وينه عمي؟؟
وفي هالوقت كان بوجاسم نازل من الدري وشاف آمنه وسمع كلامها.. وكان يطالعها وهو يبتسم: عمج هني يابنتي
من سمعت آمنه صوت عمها نشت من مكانها وربعت صوبه وحضنته.. : عمي انا اسفه.. اسفه.. سامحني .. انا غلطت بحقكم وايد..
بوجاسم وهو يطبطب على ظهرها:افا عليج بلاها هالرمسه الماصخه.. وسيري غسلي ويهج ولحقي على صلاة الظهر لأن بيأذن بعد شوي.. وعيالج بيون..
آمنه: عيالي.. والله متولهه عليهم..
بوجاسم: ماعليه .. بتشوفينهم.. انتي روحي تغسلي..
آمنه: وين أسير.. مالي مكان من بعد ما طلقني جاسم..
بوجاسم: جاسم قلبه كبير وبعده يحبج.. وتره طلقج طلقة وحده وترومين تردين له.. وهابيتج حتى لو مابغاج..
آمنه باست راس عمها: تسلم والله عمي.. ربي يخليك لي ذخر..
أم جاسم: روحي يابنتي وماعليج جاسم يحبج .. ولدي واعرفه زين..
آمنه ابتسمت ونزلت راسها: اتمنى.. أنا اعتذرت منه اليوم وطلبت منه يردني.. وأترياه يرد علي شو قرر؟؟
أم جاسم: زين ما سويتي.. وجاسم طيب يا آمنه..
صعدت آمنه الدري وسارت صوب غرفتها.. ودشت الحمام وتمسحت وظهرت .. وفرشت السياده وصلت ركعتين قبل الظهر وفتحت المصحف وبدت تقرا فيه..
=-=-=-=-=
في المدرسة..
حصه: غزووول بقولج شي..
غزلان: قولي..
حصه: اليوم تدرين إن إبراهيم ذكرج..
غزلان: أقول خليني أصلي أحسن لي.. قلت أحين بتقولين شي مهم
حصه: صدق غزووول.. إبراهيم يباج بس خقاق شوي تدرين به
غزلان: والله لو خقاق مب علي انا.. الله أكبر..
وبدت اتصلي ومتجاهله حصه.. الي تمت تضحك.. وفي قلبها تقول.. والله ان مايوزتكم لبعض ماكون أنا حصيص
=-=-=-=-=-=-=-=-=
في هالوقت كان محمد ساير يمر على مريوم بنت جاسم في الروضه عشان يردها البيت.. ومن بعدها يروح يشل عبوود ولد جاسم بعد من المدرسه ..
محمد: ها مريوم شو سويتي اليوم..
مريوم: الأبله عطتني نجمه.. عشان انا شطوره..
محمد: شطووووره..عيل انا بشتري لج حلاوه ليش انج بنت حلوه وتسمعين الكلام..
مريوم: الله.. انذين لا تاخذ حق عبوود.. انذذييييين؟؟
محمد وهو يقبض بخشمها ويرص عليه: انذيييين؟؟
مريوم: لا تعورني..
محمد: اوه سوري نسيت..
وقف عند البقاله ونزل وشرالها كافي هي وعبود.. لأن لو ماخذ لعبود بيطلع الكافي من عيونها ورد ركب الموتر وسار صوب مدرسة عبود.. وتوه عبود فتح باب الموتر الي جدام.. شاف مريوم قاعده
عبود: مريوووم.. نزلي يلا.. انا بيلس
مريوم:مابا.. أنا اول قعدت هني.. لوووح
عبود: اقول.. انا اخوج الكبير اسمعي الكلام..
مريوم: مااااااااابا.. سوف خذالي عمي سكليييييم
عبود: لا تخليني اشل الآيس كريم مالج وافره.. يلا سيري ورى..
محمد: عبود وبعدين يعني.. بتيلس اتحط راسك براس ياهل.. يلا اركب..
عبود: مابا.. خل تروح ورا..
محمد: لاحووووول.. اقول مريوم سيري ورى.. الإسكريم الثاني ما بعطيه لعبود .. بعطيه لج..
مريوم وهي تتطالع عبود بغيض.. واتطلع له لسانها: ويييو ما بياكل سكليييم..
عبود: خلاص بسير ورى.. افففف
محمد ميت من الضحك على أشكالهم.. : انتوا ما اتيون الا بالتهديد.. يلا اركب.. خل اسير البيت..
عبود: لا أنا صايم ما اكل ايس كريم.. يلا سيري ورى..
محمد: لاحووول عنيد هالولد..مريوم سيري ورى..
مريوم: أحسن عشان اكل سكليم بعد..
وركب عبود جدام من بعد الحشره الي سواها.. ويلس طول الدرب يهذرب شو سوو في المدرسه وان ودوهم رحلة وتم يرمس لين ما وصلوا عند باب البيت شافو موتر امهم.. محمد اتفاجأ شو يايب موتر آمنه هني..
مريوم: سياره ماما.. الله بلووووح..
عبود: ماما هني.. بسير اسلم عليها..
نزلوا اليهال من فرحتهم وهم يربعون صوب البيت عشان يسلمون على أمهم..
محمد تم مستغرب يحاول يلاقي تفسير ليش آمنه عندهم.. ودش البيت شاف أمه وأبوه قاعدين في الصاله.. سلم وتوه بيصعد نادته امه..
أم جاسم: تعال محمد أبا أرمسك..
محمد: خير امي..
نزل وسار صوب امه..: إسمعني يا محمد.. ترا مرت أخوك هني..
محمد:أدري شفت موترها برع.. والله قوات عين..
أم جاسم وهي تقاطعه: لا يا محمد.. آمنه تغيرت.. يت اليوم وطلبت السماح مني ومن أبوك ومن جاسم.. ندمانه على كل شي.. لا تقولي ما تصدقها.. انا صدقتها لأني شفت بعيني الصدق في عيونها.. وقالت انها تبا تتسامح منك ومن علي.. بس ماتدري ان علي رد لنا..
محمد: ماصدق.. معقوله آمنه تتغير جيه فجأة..
أم جاسم: ربك كريم ويهدي من يشاء..
محمد: سبحانك يارب.. وجاسم شو بيردها؟؟
أم جاسم: مادري.. ترانا نترياه عشان نرمسه..
محمد: خل يردها ويشوف كيف.. ترا والله العيال غامضيني من غير أمهم تايهين أحس بهم..
بوجاسم: وانا هذا الي اقوله
محمد: بس إن شاء الله تكون صادقه..
أم جاسم: لا ماعليك .. انا متأكده إن آمنه تغيرت..
وفي هالوقت توه كان عبود نازل شاف أبوه داش البيت ربع وحضن أبوه.. : بابا .. ماما فوق..
جاسم ابتسم لولده .. وشلاه.. وشاف هله كلهم متيمعين.. سلم عليهم: السلام عليكم
الكل: وعليكم السلام..
أم جاسم: روح يا ولدي عند حرمتك فوق..
جاسم تم يطالعهم.. وشوي يصد فوق يطالع.. آمنه في هالوقت كانت ياسه في الصاله الي فوق وتسمع الي يصير تحت.. : بس .
قاطعته أمه: جاسم .. إنسى الي صار وإفتح صفحه يديده.. وآمنه لو مب ندمانه مايت لين هني وتسامحت من الكل..
نزل جاسم ولده وتنفس بعمق.. ونزل راسه .. وتم يهز به إنه موافق على كلام أمه: إن شاء الله امي..
ومشى صوب الدري.. آمنه في هالوقت كانت طايره من الفرحه ربعت صوب الغرفه ودشت عشان محد يحس بها كانت تسمع.. وكان جاسم يمشي صوب الغرفه ويحس بثجل في خطواته.. ياترى الي أسويه صح ولا غلط.. يارب مابا أسوي شي وأندم عليه .. يارب عيني.. إنت المعين..
تنفس بعمق ودق الباب.. ودش داخل.. شاف آمنه ياسه على الكرسي الهزاز الي على الزاويه تبتسم له.. تم يطالعها لوهله.. ويحاول يرد لها الإبتسامه بس الي سوته كان يمر جدامه كنه شريط يشوف فيه سواياها.. يتردد.. : السلام عليكم..
آمنه: وعليكم السلام.. آسفه انا بظهر.. كنت ياسه لأن..
قاطعها جاسم: لا .. تمي مكانج..
آمنه استانست في خاطرها .. وردت يلست مكانها.. وهو سار صوب غرفه الملابس يبدل ثيابه.. ودخل الحمام.. آمنه طبعا بعدها ماكانت عارفه منه لا حق ولا باطل.. وماتقدر تتصرف كزوجته لين ما يقولها إنه ردها وسامحها.. وتمت تحوط في الغرفه ومب عارفه شو تسوي.. ظهر جاسم من الحمام ومشى حذالها وسار صوب التسريحه بس من غير لا يحس بوجودها.. وهالشي الي كدر آمنه زود.. سمعوا دق على الباب.. وكانت مريوم بنتهم ودشت.. : ماما ابا انام وياج..
توها كانت بترمس.. جاسم رمس قبلها: تعالي حبيبتي نامي..
آمنه انقهرت لأن ماكان ودها مريوم تنام وياهم عشان تقدر ترمس وتناقش جاسم.. بس جاسم تعمد هالشي عشان ما يحس بإنه ملزوم يجابلها.. ومن بعدها يلس على الكرسي ومسك المصحف تم يقرا.. بس ماكان قادر يقرا عدل لأن أفكاره متشتته مب عارف شو يسوي.. مب عارف بشو يفكر بالضبط.. كان ضايع..
=-=-=-=-=
في المدرسه..
الحصه الأخيره خلصت والكل توجه صوب السيارات والباصات عشان يردون بيوتهم..
حصه: الصراحه أول مره اشوف درس أحيا سهل جي
غزلان: قولي إن الأبله شرحها فنان خلت الدرس سهل..
حصه: صدقج والله.. يلا هاتي دفتر الرياضيات لأن في أشيا ابا انقلها منج..
غزلان : هاج خذيه..
شلت حصه الدفتر ومشوا صوب السيارات وكانت وداد طبعا واقفه تتريا غزلان الي ما صدقت ركبت الموتر على طول.. ونفس الشي حصه ركبت الموتر ويا إبراهيم..
حصه: أقولك شي اتصدقني..
إبراهيم: قولي
حصه: غزلان إتسلم عليك..
إبراهيم: اتسلم علي أنا.. خير إن شاء الله.. شو المناسبه..؟؟
حصه: أعوذ بالله منك.. شو شو المناسبة بعد.. السلام لله ..
إبراهيم: هيييه لله.. الله يسلمها.. لله اوكي
حصه: ههههه.. والله انت مب صاحي
إبراهيم: لا انا صاحي.. انتي وربيعتج الي مادري بلاكم مشوطين ..
حصه: ليش بالله انا مشوطه.. وحتى ربيعتي؟؟
إبراهيم: ربيعتج.. اونه سلام لله.. هههههه.. وانتي.. هبله يوم اتبلغيني السلام..
حصه: أقول وقف وقف.. ولا أقول.. اتصل في عادل يمر علي ياخذني من هالشارع نزلني..
إبراهيم: يوم اقول مشوطه.. ماشي عادل.. انسي.. احين انتي ويا ابراهيييييييم
حصه: مارمسك..
إبراهيم: أخاصمك آه.. أسيبك لا.. ويتم يدغدغها.. .. وجوه الروح حتفضل حبيبي.. إلي انا بهوااااااااه..
حصه: الحمد لله والشكر.. استوى ابراهيم عجرم..
إبراهيم: شو اسوي بج لازم انراضيج..
وصلوا البيت في هالوقت .. ونزلت حصه بسرعه ودشت البيت وسارت غرفتها.. وأول شي سوته فتحت التليفون .. وشافت واصلها مسج..
عادل أغليتك أكثرمن هلي .. ورميت روحي بين يديك.. لك آخري ولك أولي.. كلي على بعضي أبيك.. إن كنت ناوي مقتلي.. برضاي وبكيفي أجيك.. لأنك الغالي علي!.. عمري أحطه بين إيديك..سويت كل الي علي.. والي بقى كله عليك
ابتسمت من المسج.. واتصلت فيه على طول..
عادل: حي الله هالصوت..
حصه: الله يحييك.. إشحالك حبيبي..
عادل: كم بعيش.. حبيبي.. اشحلاتها وهي ظاهره منج.. بخير انتي اشحالج؟؟
حصه: الحمد لله طيبه..
عادل: شو سويتي اليوم في المدرسه؟؟
حصه: والله أوكي.. خل أخبرك شو سويت بغزول وبروهوم.
عادل: شو بعد.. هاييل سوالفهم ما تخلص. شورايج نسوي عنهم قصه ونكتبها في المنتديات؟
حصه: خل اخلص امتحاناتي وبسويها اتريا انت بس..
وخبرته السالفه كلها.. : شو رايك؟؟
عادل: اقول.. توني أكتشف ان حرمتي ذكيه.. الصراحه حركه حلوه.. بهالطريقه بتقربينهم من بعض أكثر من غير لا يحسون..
حصه: هيه.. ماشي إن ماخليته يتخبل ويخطبها.. ماكون حصيص مرت عدووله..
عادل: فديت هالإسم انا..
حصه: اي اسم فيهم؟؟
عادل: عدووله..
حصه: مااااااااالت .. قلت أحين بيقول اسمي..
عادل: ههههههه

شو تتوقعون الحال بيكون بين آمنه وجاسم؟؟ بيتحسن؟؟
ياترى خطه حصه بتقربهم من بعض؟؟
وهند بتغير رايها عن موضوع علي؟؟