الجزء ( 35 ) : للحب عنوان

ملخص الجزء السابق: تم المصالحة بين غزلان وأحمد.. إعتراف منى لمحمد عن مشاعرها صوبه.. واعتذار غزلان من إبراهيم وصد إبراهيم لها.. ندم آمنه وإحساسها بالذنب.. وسفر علي وهند وبوسعيد للعمرة.. وإصرار خالد على حبه لغزلان..
=-=-=-=-=-=-=
هند وعلي وبوسعيد وصلوا المطار وعلى طول سار علي خلص كل الإجراءات ودعوا محمد وساروا صوب البوابه رقم 3 عشان يركبون الطياره..
هند: اسميني مستانسه من الخاطر والله ..
بوسعيد: لعلج دوم مستانسه يا بنتي ربي يفرح دووم..
علي: تدرون انا آخر مره سرت فيها العمره وانا عمري 13 سنه يوم رحت ويا أمي وأبوي وجاسم..
بوسعيد: أحين غير المكان بيكون أكيد .. يعني انت ساير لها قبل 11 سنه.. أحين معدلين وموسعين ومضبطين..
علي: أكيد.. اصلا المكان بوجود الكعبة يحلى
هند: ربي يقدرنا وانسير الحج ان شاء الله
علي + بوسعيد: ان شااء الله..
ركبوا الطياره وقعدوا في أماكنهم..
=-=-=-=-=
حصه دخلت الصف ولقت غزلان قاعده وتكتب على الدفتر.. ابتسمت وراحت صوبها وسحبت عنها الدفتر..
حصه: صباح الخيييييييير
غزلان رفعت راسها وابتسمت ابتسامة خفيفة : صباح النور
حصه: نشي خل نتمشى لين ما تبدأ الحصة الأولى
غزلان: مالي بارض والله
حصه: واذا قلت لج عشان خاطري
غزلان: ماعاش الي يكسر بخاطرج..
نشت غزلان وظهرت ويا حصه من الصف عشان يتمشون..
حصه: غزلان ماعليج منه احين صدقيني ما يقصد شي..
غزلان: حصه دخيلج لا اتيبييييين لي طاريه مابا اسمع عنه شي..
حصه: بس ..
غزلان وهي تقاطعها: لو تبيني اتمشى رجاء غيري الموضوع
حصه: أوكي..
======================
وداد بعد ما نزلت هند راحت الدوام.. وصلت الدوام ومن دشت المكتب شافت في المكتب باقة ورد كبييييره حمرا.. تفاجئت من الخاطر.. استغربت منو الي يايب الباقة هذي.. شافت في بطاقة معلقة عليها سارت وشلت البطاقه وقرتها ارتسمت على ويهها ابتسامه عريضه.. : فديته والله.. ربي لا يخليني منك يا سلطان..
على طول قعدت على المكتب وشلت التليفون واتصلت عليه.. مارد عليها.. تمت تتصل.. وصل لها مسج..
سلطان <<مابا أرد أخاف من حبي وشوقي أخرب صيامي.. خلني جيه أحسن>>
ضحكت على المسج الي قرته وردت التليفون مكانه وكانت كل ما تشتغل شوي ترفع عينها وتطالع الورده وتبتسم.. ومن بعد ساعه تقريبا ياها الفراش وياب لها كوب الجاي ومعاه جيس كبير.. استغربت..
أمين: سلام عليكم ماما
وداد: وعليكم السلام.. شو ها أمين؟؟
أمين: هذا كيس مشان إنتي في واحد نفر يجيب هذا كيس قول عطي حق ماما وداد…
وداد: حقي أنا .. من منو؟؟ منو هالنفر؟؟
أمين: مافي معلوم ماما.. انتي سوفي يمكن في نيم..
وداد: هات.
شلت وداد الجيس وفتحته.. شافت فيه بوكس.. فتحت البوكس.. شافت فيه طقم عطور.. وساعه ألماس.. وعلبة ثانيه. فتحتها انبهرت من الطقم الي شافته.. وفيه بطاقة..
كان ودي ملجتنا اتكون أحلى من جيه.. واهدي لج هذا الطقم والبسج اياه.. بس انتي ادرى بالظروف.......... أحبج
تفاجئت زود.. فعلا سلطان فاجئها بالحركه هذي... تمت تتصل فيه وهو معاند ما يرد جان اتطرش له مسج
إذا مارديت علي بغلق التليفون ومابكلمك
سلطان من قرى المسج على طول شل التليفون واتصل عليها..
وداد: الوو
سلطان: هلا.. هلا بالورد.. هلا بالجوري.. هلا بالفل.. هلا بكل شي حلو في هالدنيا
وداد تمت تضحك بصوت خفيف من الخجل..
سلطان: قلت لج لا تخليني ارمسج ماروم اتحمل هالضحكه وهالرقه.. وداد. تمي مكانج انا ياينج أحين
وداد:وين اتييني اتخبلت... انا في الدوام
سلطان: ما يهمني ابا الناس كلها تعرف انج ملكي. انج حرم سلطاااااااااااااااااان
وداد: اقول ياريتني ما دقيت باي باي
سلطان: فديتج.. اليوم الفطور والسحور عندكم ..
وداد: هههههههه اوكي حياك
سلطان: غصبن عنج.. ولا نسيتي اني ريلج
وداد: ليش انا اقدر اصلا
سلطان: اتحسبت..
وداد: شكلك ما تبا اتبند وايد اطول في الرمسه
سلطان: الصراحة ما ودي
وداد:بس انا ودي لأن وراي شغل اخلصه
سلطان: اففف مابا شي يشغلج عني
وداد: ماعاش الي يشغلني عنك
سلطان: لا لا لا.. انا اليوم صيامي بيخترب.. اقول يلا باي
وداد: ههههههههه...باي
وبند عنها .. وكل واحد فيهم مستانس ويحمد ربه على هالنعمه ان الله جمعهم بعد هالسنين كلها..
=-=-=-=-=-=
الساعه 12.00 كانو علي وهند وبوسعيد واصلين مطار جدة.. وراعي الحملة كان يترياهم عشان يركبهم الباص الي بيوديهم لمكة عشان يعتمرون لأنهم كانو جاهزين ومحرمين..
هند: افففففف متى بنوصل
علي: تصبري انزين شوي.. خلج صبورة
هند: انا ربي رزقني بنعمة الصبر من زمان.. وهالشي الي خلاني اعيش للحين...
علي بصوت واطي عن يسمعه بوسعيد الي كان مشغول وياراعي الحملة: وهالشي الي خلاج تصبرين عني
هند رفعت راسها اتطالعته ونزلت راسها من غير لا تنطق بأي كلمة..
علي: هند.. ارجوج ف..
قاطتعته هند: تتوقع نحن في مكان يسمح لي افكر في هالشي
فقط علي من ردها وسكت.. : انتي دومج اتصديني مب عسب المكان.. عسب انج بس تبين اتصديني وبس..
ومشى عنها وسار صوب بوسعيد عشان يشوف راعي الحمله.. وكانوا وياهم حريم ثانين في الحمله قربت منهم هند وتمت ترمس وياهم وتعرفت عليهم عشان ما تكون وحيدة..
هند: شو اسوي.. بعد ربكم..
عنود: وحليلج يا هند.. والله وطلعتي راعية سوالف..
هند: هههههههه.. قعدة البيت اتخلي السوالف كلها اتصير وتظهر
عنود: صدقج.. بس مافكرتي تشتغلين ولا تكملين دراستج؟؟
هند: حالتي الصحية ما تسمح
عنود: هييييييه.. ربي يعينج ويشفيج..
هند: الله يسمع منج
وفي هالوقت نادى راعي الحملة على الكل عشان يركبون الباص ويروحون صوب مكة ويعتمرون.. وهم في الدرب طول الدرب كان يرددون التلبية.. ويقرون أدعية.. وقبل ما يوصلون قام شيخ الحملة ويعطيهم التوجيهات الصحيحة عشان يأدون المناسك الي عليهم من غير ما يغلطون في شي..
وصلوا مكه بعد ساعتين كانو على الساعه 3.30 في مكه.. نزلهم الفندق انتركونتيننتال أبراج مكه.. وحطو أغراضهم ونزلوها وتمسحوا وساروا صوب الحرم.. طبعا هذا الفندق كان مقابل بوابة الملك فيصل يعني جريب من الحرم واااااايد وبسرعه طلعوا الكل عشان يعتمرون ويتحللون من بعدها..
راحت هند ويا ابوها وعلي ودخلوا الحرم..
علي: هند أول ما تطيح عينج على الكعبة ادعي بالي في خاطرج وان شاء الله مستجاب..
هند: هيه ادري..
أول ما دخلوا كان علي منبهر في المكان حاس بوسعة المكان ونوره الغير طبيعي الي في الحرم.. ومنظر الناس وهم مندمجين في العبادة والصلاة.. والطاعة.. وريحة المسك الي مالية المكان كله.. مشوا وخطواتهم .. في اللحظه الي طاحت عينهم على الكعبة من غير لا يحسون بأعمارهم نزلت الدمعة من عينهم من هيبة هذا البيت.. والناس اطوف حوله.. وكل واحد فيهم رفع ايده وخشع وبدا يدعي بالي في خاطره.. وقبض بوسعيد ايد هند وعلي كان يمشي وراهم عشان محد يزاحمهم .. ومشوا عشان يوصلون للعلامة الخضرا المجابلة الحجر الأسود.. عشان يبدأون الطواف.. وكبروا وبدوا من بعدها يطوفون .
وكل واحد خاشع وكل تفكيره في الله والعبادة .. وطلب التقرب.. يدعون بالي في خاطرهم وكلهم أمل في الإستجابه.. خصوصا هند الي كانت منهاره وهي اتصيح وتدعي ربها وابوها كان لاف ايده على ظهرها عشان تكون بقربه وماتتعب.. وعلي طبعا وراهم.. وخلصوا أشواطهم السبعة وراحوا صلوا الركعتين خلف مقام إبراهيم.. وكان مأذن العصر وقتها صلوا العصر جماعه ومن بعد ما خلصوا راحوا صوب الصفا والمروة عشان يكملون آخر منسك من مناسك العمرة ومن بعدها الحلق وينتهون من كل شي..
ومن بعد ما خلصوا ساروا صوب الفندق لأن ما تم شي على اذان المغرب.. كانوا ماخذين جناح فيه غرفتين وصاله.. غرفة لهند والثانيه لبوسعيد وعلي.. واتصلوا في البلاد عشان يطمنونهم انهم وصلوا بالسلامة..
هند: الووو أمي.. فدييييييتج والله ولهانه عليج.. ليتج ويانا..
أم سعيد: فديت بنتي انا.. ياريت والله.. ماعليه المرات اليايه بكون وياكم..
غزلان تصرخ من بعيد: وانا انا بعد..
هادف: انتي بالذات خلج هني...
غزلان: ليش بالله بنت البطه السودا؟؟
ام سعيد: اسكتوا خلوني اسمع.. هلا امي.. تدرين بهم اخوانج كيف حشرة..
هند: هي ربي يخليهم ويحفظهم..
تمت هند اترمس الكل وغزلان ما صخت عن التوصيات.. والأدعية الي تباها تدعيها لها.. ومن بعدها علي وبوسعيد رمسهم وبندوا الخط وكان باقي خمس دقايق وبيأذن.. نزلو صوب مطعم الفندق عشان يفطرون ومن بعدها يلحقون على الصلاة في الحرم..
=-=-=-=-=-=
الإمارت..
في بيت آمنه.. كانت كعادتها منهارة .. بس هالمرة غير.. كانت مصممة على شي انها اتسويه لا محال.. وظهرت من الغرفه ونزلت صوب الميلس شافت أبوها ومرت ابوها قاعدين..
آمنه: السلام عليكم
..: وعليكم السلام
مرت ابوها: اخيرا ظهرتي من هالجحر الي مقعده روحج فيه
صخت عنها امنه وماعطتها سالفه وماردت عليها.. : ابوي بغيتك في موضوع
مرت ابوها: يعني يا عمتي ظهري عشان اقدر ارمس براحتي..
ابوآمنه: لا إله إلا الله.. شو هاليوم الي مابيمر على خير.. شوفيج ياحرمة البنت ماقالت شي انزين
مرت ابوها: انزين انا طالعه بخليكم
ظهرت مرت ابوها من الغرفه وخلتها ويا ابوها..
بوآمنه: خير يا بنتي قولي..
آمنه: أبوي انا فكرت وصار لي كم يوم ما ارقد عدل وانا افكر بهالكلام الي بقوله وهالقرار الي بتخذه..
بوآمنه: عساه خير..
آمنه: أبوي انا مالي غناة عن ريلي وعيالي..
بو آمنه: أحين خليتيني اتأكد إني عرفت اربي عيالي عدل.. هي يابنتي كان ودي اقولها لج بس بعد ما تهدين شوي.. وزين يوم ظهرت منج.. والريال لو ماكان شاريج من بعد الي سويتيه جان مايانا وطلب منج اتردين له
آمنه: وانا هالي اقوله... وانا متندمه على كل شي سويته.. ومستعده استسمح من عمي وعمتي ومحمد .. بس علي مب موجود ولا كنت بعد بستسمح منه.. لأنه بسببي اغترب عن بلاده وهله
بوآمنه: بس يا بنتي ماباج اتردين يوم ويومين زينه ومن بعدها تردين على حالج
آمنه: لا يابوي.. خلاص انا فكرت وعاهدت نفسي انسى كل ماضيي..
بوآمنه: وكيف ناويه اتردين له؟ تبيني ارمسه.. انا ماروم الصراحه
آمنه: لا أبوي ما ارضاها عليك انك اتذل عمرك.. وانا الي لازم اسوي هالشي.. وبرمس جاسم باجر بسير له مقر شغله
بوآمنه: خير ماتسوين يابنتي.. ربي يوفقج ان شاء الله
آمنه نزلت راسها وتمت سرحانه شوي..
بوآمنه: شوفيج يابنتي؟؟
آمنه: بس اخاف..
بوآمنه: شو منه؟؟
آمنه: أخاف ما يوافق يرد لي.. ومايسامحني..
بوآمنه: يوم بيشوف النظره الي انا اشوفها احين في عيونج.. والحال الي وصلتي له من بعدج له ولعيالج.. صدقيني بيردج.. وجاسم ريال وايد زين وطيب..
آمنه: هيه والله وانا اشهد.. طول السنين هذي الي عشتها وياه عمره ما جرحني ولا قالي كلمه تضايقني بعكسي انا الي ماكان يهمني شي غير اني اسوي مشاكل..
بوآمنه: الحمد لله ان الأمور يت على هذي الحد ومازادت.. وأهم شي الندم والنيه يا بنتي.. وربج بيسهل..
آمنه ابتسمت لأبوها وظهرت من الميلس مستانسه وخايفه في خاطرها من ردة فعل جاسم كيف بتكون. شو بيقول لها.؟؟ بيذلها وبيردها.. ولا بيسامحها.. لا مستحيل.. جاسم يحبني وبيني وبينه عشره وعيال مستحيل إنه ما يسامحني..
تمت آمنه سرحانه ويا أفكارها الي توديها واتييبها وتتريا باجر بفارغ الصبر..
=-=-=-=-=
الساعه 9.00 بتوقيت الإمارات
في إستراليا
سعيد كان يالس ويا وضحان ربيعه في المكتبة العامة يحضرون دروسهم ويراجعون..
سعيد: أخبرك نواف وحمود مب يايين اليوم ؟؟
وضحان: مدري.. بس اليوم قالو إنهم بيروحون السينما ..
سعيد: اهااا
وضحان: سعيد.. شوف من الي جالس في الطاولة الي وراك..
صد سعيد وراه عشان يشوف من الي قاعد انصدم وبسرعه رد صد صوب وضحان: خس الله ابليسك تدري بي ماحب اشوف شيفتها ليش اتقولي؟؟ .. وانا اتحسبت حد مهم احين اخر شي تظهر هاااااااي
وضحان: ههههههههه..
سعيد:احين كيف اذاكر واركز..مجرد فكرة ان هاي الشيفه هني.. اكتئب.. الله يسامحك
وضحان: والله جد.. انك كاسر خاطري..
سعيد: هيهيهي.. وحليله خاطرك مووول علي.. اشوف غثيتني..
وضحان: اقولك تراها جايه صوبنا
سعيد فج عيونه: إحلف.. اقول انا رد الشقه ..
وضحان: إستهدي بالله.. انت اشفيك.. بس انت يوم شفتها مالاحظت شي يديد..
سعيد: شي يديد مثل شو.. تراها هي هي .. شو الي يديد يعني..
وضحان: إسكت فضحتنا.. هذي وصلت ..
أفنان جربت صوب طاولتهم وقفت مجابل سعيد.. : السلام عليكم...
سعيد كان في هالوقت منزل راسه مندج في اوراقه.. : وعليكم السلام..
وضحان رد عليها السلام من قبل سعيد صدت أفنان صوب وضحان وابتسمت في ويهه وهاي اول مره اتسويها..: اشحالك وضحان ؟؟
في هاللحظه كل من وضحان وسعيد اتعجب وماصدق الي يسمعه.. رفع راسه وفج عيونه زود من الي شافه مب مصدق المنظر الي جدامه تم يتمعن ويطالع في افنان.. ومب مصدق وهي كانت منزله عيونها تتطالع الأرض
وضحان: بخير ربي يعافيج انتي شخبارك؟؟
أفنان: الحمد لله.. اشحالك سعيد؟؟
سعيد حس نفسه مبلم مب قادر يرمس ولا يقول أي شي... : ها.. انا....بخير...
أفنان: انزين عيل انا شفتكم هني وقلت مب حلوه لازم اسلم على الأقل.. يلا عيل برايكم انا سايره..
وضحان : الله وياج..
سعيد نزل راسه وبعده مب مصدق من الي صار.. وضحان كان يكلمه بس سعيد ما يرد عليه..
وضحان: لا بالله خذت عقلك وسارت.. سعيييييييييييييييييد
المراقبه في المكتبه وهي محرجه ليش إنه وضحان علا صوته.. :
Excuse me don’t shout…you are in the library you must be quite…
سعيد ضحك على وضحان وهو شكله قافط يوم صرخت عليه المراقبه.. : تستاهل. حد يزقر حد بهالصوت ..
وضحان: ايش اسوي.. ماهو انت ما تسمعني.. مادي في ويش سرحان..
سعيد: مستغرب.. معقوله افنان تغيرت لهالدرجه..
وضحان: ايه اتصدق.. أول مره اتكلمني وتسلم علي..
سعيد: روح انت لا .. انت تطري السلام... هالشي مب مستغرب منه.. لأنها مزاجيه ومتى مابغت تسلم اتسلم ومتى مابغت ما تسلم..
وضحان: عيل من شو مستغرب؟؟؟
سعيد: من شو بعد.. لا استويت اماراتي اصيل.. هههههههههه
وضحان: لازم دامني عاشرتك طول هالمدة..
سعيد:وحليلك
وضحان: لا تغير الموضوع.. وقول لي.. من شو مستغرب..
سعيد: أفنان تحجبت..
وضحان: هههههههههه.. صار لها فترة طويله للحين ..
سعيد: إحلف.. والله..
وضحان: أي والله.. اسميك انت مب عايش معانا..
سعيد: انا من ردت من البلاد وماشفتها كيف بعرف..
وضحان: اصلا من قبل لا ترجع وهي تحجت.. أول ما دخلت الجامعه وهي متحجبه الكل تم يطالعها ومستغرب.. قاموا يطلعون عليها كلام.. أونه اكيد شعرها كله طاح وصارت صلعة فاتحجبت.. و و و ..
سعيد: زين والله.. ربي هداها أخيرا.. بس ليش؟؟
وضحان: هههههههههه... سير إسئلها .. توك اتقول لي ما تشتهي شيفتها.. واحين تسأل وتتخبر عنها..
سعيد: بس فضول لا غير..
وضحان: فضووووووووول متأكد
سعيد: خسك الله من ريال.. هيه فضول..
وتموا قاعدين لين ما خلصوا دراستهم وردوا الشقة..
=-=-=-=-=-=
في بيت بوسعيد
غزلان وهي تصرخ: عععععععععععععععععععععععععع
هادف: اعوذ بالله من هالصوت.. اشفييييج؟؟
غزلان: مقهوووووووره والله
هادف: ليش ان شاء الله؟؟؟
غزلان: أكره المدرسة والله لولاها جان انا وياهم هناك..
هادف: ههههه انا قلت شي احين... انتي دوم جي ماعندج سالفه
غزلان: جب جب.. انت محد يشكي لك همه..

هادف: عاد الله والهم مادري شو اقول عنه.. صخي صخي..
غزلان ربعت وشلت التليفون واتصلت في ناصر: الو ناصر..
ناصر: هاااااااا
غزلان:ها في عينك لعلها البط.. شو ها بعد.. كم مره اعلمك قول نعم..قول لبيه.. شو هاي بعد؟؟
ناصر: ويا ويهج نعم
غزلان: اباك اتقول لأحمدوا يتصل فيني فاااااااهم.. ابا اكلمه محد يفهمني غيره
ناصر: لا لا لا بدت بنت العم اتهيني.. ليش انا وين سرت..
غزلان: جب لا انت وهدوف نفس الشي ما تنفعون..
ناصر: بعد كبرت البنت وقامت اتقول جب..
غزلان وهي معصبه: احين شو بتقول له ولا شو؟؟
ناصر: انزين انزين.. بس حطي في بالج اني زعلان منج..
غزلان: افااااااااااااااا تزعل والله ما اقصد بس صدق طفرانه
ناصر: ماعليه..
غزلان: يلا عااااد نصورررررر
ناصر: ليش انا اروم ازعل .. لو احاول بعد ماقدر..
غزلان: فديتك والله عسل..
ناصر: يلا خليني احين اذاكر علي امتحان اقتصاد باجر...
غزلان: اوكي لا تنسى..
ناصر:ان شاء الله
بندت عن ناصر وتمت ماسكه التليفون واتدور في البيت.. : اتصل في منووو .. في منووو.. اممممم فكري يا غزوووول
هادف: والله افتر راسي سايره وراده شو هالحال.. قعدي مكان واحد..
غزلان:هيه بتصل في محمد.. بشوف شو اخبار الريجيييييم
هادف: هذا محمد كاسر خاطري لأنج الطبيبه المعالجة مالته..
غزلان: جب انت...
محمد رد عليها وهي كانت اتقول جب: خيبه خيبه خيبه.. ليش عاد؟؟ ماقلت شي..
غزلان: اوبس.. مب لك هاي.. هاي لهدوف الغبي..
محمد: ههههههه وحليله.. انتي محد يسلم من لسانج
غزلان: اخبرك شو فطرت اليوم..
محمد: شرات الجدول..
غزلان ومتى آخر مره وزنت عمرك؟؟
محمد: اخر مره وزنت عمري كان يوم الأربعا.. وكنت نازل 800 جم..
غزلان: وايد زين.. عيل يلا مر علي وانا برمس امي عشان انسير تركض على الممزر..
محمد: لا باجر ..
غزلان وهي تصرخ: لا...اليوم يعني اليوم ماشي ..
محمد: لاحووووووول
غزلان/ بعد للثلاثه .. واااااااااااااااحد..
محمد.. انزين
غزلان/ اثنييييييييييييييينه..
محمد: خلاص خلاص.. يلا بس بتلبس وبيي..
غزلان/ دايما النصر لغزلان.. واي فديتني انا..
محمد: مشكله والله..
هادف: محمد.. الله يعينك..
محمد/ هي والله
غزلان/ نعم نعم.. ماسمعت..
محمد: ها ماشي .. ماشي
غزلان/ اتحريت بعد.. يلا عشر دقايق واتكون هني فاهم

محمد: حاضر عمتي..
بند عنها وكان في خاطره مستانس من كل قلبه على غزلان واهتمامها فيه..
=======
في الكلية.
أحمد: اسكت يا ضاحي.. أسميني مستانس والله
ضاحي: لاحظت عليك هالإسبوع ماشاء الله كلك نشاط وحيويه
أحمد: يعني اخيرا ارتاح قلبي.. يوم عرفت انها تباني..
ضاحي: وانت شو ناوي اتسوي احين؟
أحمد: طبعا بلا شك.. اول ما أنزل هالإسبوع برمس الوالدة في هالسالفة وبخليها تخطبها لي.. ابااااااااها ماروم اصبر عنها..
ضاحي: ربي يوفقك.. وخير ما قررت..
أحمد: أخبرك منو المراقب علينا اليوم؟؟
ضاحي: الملازم عبدالله..
أحمد: وناسه عيل بروم ارمس في التليفون..
ضاحي: ههههههه .. انت هذا بس الي يهمك..
أحمد: هي والله ودي اطمن على هلي..
ضاحي : مب مشكله انا احين بسير غرفه قوم خليفه وبيلس عندهم وانت ارمس ويا هلك وتعال عقب..
أحمد: خلاص صار..
طلع ضاحي من عنده وأحمد بسرعة طلع التليفون واتصل على ناصر وتم يسولف وياه وعرف منه آخر الأخبار وقاله ناصر ان غزلان تبا تكلمه.. وأول ما بند عن ناصر دق على غزلان..
كانت غزلان في هالوقت تتمشى ويا محمد..
غزلان: ههه.. وحليك.. بس بعد ما كسرت خاطري.. يبالك بعد دورة هرولة..
محمد: حرام عليج والله شوفي شقايل تعباااان وريلي تكسرت خلاص
غزلان: تحملت.. اوه لحظه اشوف منو متصل.... أحمدووووو
محمد بصوت واطي: اشوه عيل بتنشغل وانا برتاح
غزلان: سمعتك ماشي راحه.. ألوو
أحمد: هههه.. منو هذا الي ماشي راحه؟
غزلان: انا ويا محمد عالممزر عشان برنامج الريجيم تدري بعد.. لازم نعذبه شوي
أحمد: الله يعينه.. اشحالج.. سمعت تبيني ادق لج
غزلان: افاااا يعني لو ماقالو لك جان ما دقيت من عمرك.. لا خلاص زعلت
أحمد: هههه.. جكتني..
غزلان: لا تكلمني يلا باي
أحمد: افاااا انا ماصدقت تصالحت وياج بتردين تزعلين يلا عاااد..
غزلان: ههه.. خلاص اخر مره فاهم
أحمد: توبه خلاص اول وحده ادق لها انتي خلاص
غزلان: هيه خلك جيه.. اشحالك
أحمد: والله تمام.. انتي اشحالج واشحال الأهل كلهم تمام.. واشحال علي وهند وعمي اتصلوا؟؟
غزلان: هيه .. بخير الحمد لله
أحمد: الحمد لله.. بعد
غزلان: قام وقعد..
أحمد: ويا ويهج
غزلان: أحسن من ويهك.. اصلا انت شايف ويهك؟؟ اشك
أحمد: لا اترياج اتراويني اياه اتصدقين
غزلان: ههههههههههههههه
أحمد: انزين عيل اقول اناماروم اطول عن يدخ الملازم مب حلوه يعني..
غزلان: مب مشكله المهم الأربعا اتيي عندنا فاهم
أحمد: اووووكي.. كلتني..
غزلان: ههههه.. يلا مع السلامه
أحمد: مع السلامه..
بند احمد عن غزلان.. وردت غزلان صوب محمد شافته تعبان وايد.. غيرت رايها وأجلت التمارين لليوم الثاني.. استانس وقتها محمد وردوا البيت سوا.. وغزلان كانت روحها تعبانه من المشي سارت غرفتها ونامت على طول..
=-=-=-=
في السعودية
كان هند من بعد صلاة التراويح في الحرم وصلوا قيام الليل من بعد صلاة قيام الليل راحوا الفندق عشان يتسحرون وينامون.. هند كانت نفسيتها مرتاحه لدرجة فضيعه هيبة المكان وجماله كان آسر هند.. ومبعدها عن العالم كله.. ماتفكر غير كيف تعبد ربها وترضيه وتستغل هالإسبوع الي هي في هالمكان في العباة.. وكان أبوها يالس على الطرف الثاني ويا علي عشان ما يكونون بعاد عنها لابغت شي..
وجريب وقت السحور.. نش علي عشان ينادي على هند ..
علي: هند.. هند..
هند: نعم
علي: خل نروح وقت السحور أحين
هند: ان شاء الله
نشت هند من مكانها وظهروا صوب الفندق وتسحروا ومن بعدها ردت مره ثانيه الحرم عشان تصلي الفجر ومن بعد صلاة الفجر ترد الفندق عشان ترقد وترتاح شوي..
علي: لا تضغطين على نفسج وايد يا هند.. انتي تدرين حالتج ما تتحمل الضغط
هند: صدقني مب حاسه بتعب بالمره.. ولا كنت بسير الفندق.. بس ماحس بشي..
علي : ماعليه بس احتياطا لازم اتحطين بالج من عمرج .. ترا ربج مايرضى انج اتعبين نفسج لو في سبيل عبادته.. انج اتدارين على صحتج ونفسج هاي بنفسها عبادة..
هند: أدري.. بس انت تدري ان هالمكان مب دوم نحن فيه.. والواحد يستغل كل ثانيه ودقيقه في هالمكان
علي: هي والله صدقج..
بوعلي: يلا بدأ يقيم لثلاة الفجر اتزهبوا..
على طول راحت هند صوب الحريم وعلي وقف حذال بوسعيد وحشد الناس الكبير الي كان مجتمع حول الكعبة لهدف واحد وهو العبادة.. وقبلة واحده وبيت واحد يجمعهم جميعا.. وغاية واحدة وهي مرضاة الله والجنة.. ونتيجه للعدد الكبير وايد ناس منهم كانو يصلون برع الحرم..ياسبحان الله .. كل هالعدد من المسلمين.. والضعف والهوان الي نحن فيه.. الله المستعان..
=-=-=
يوم الإثنين الصبح
نشت غزلان كعادتها عشان تزهب للمدرسةوتروح ويا وداد.. وحصه مع إبراهيم.. إبراهيم بعده ماكان متعود على وضع إن غزلان ما تيي وياهم.. وقتها حس بالشوق لها.. حس إنه مفتقدها..
حصه: يلا شو تتريا.
إبراهيم: ربيعتج..
حصه: تستهبل ولا شو.. ترا قلت لك خلاص البنت بتسير ويا اهلها
إبراهيم: اوه.. نسيت..
وشغل الموتر وظهر من الكاراج وساروا صوب المدرسة


شو تتوقعون الحال بين غزلان وإبراهيم؟؟
وهند وعلي.. ؟؟
وجاسم بيرضى على آمنه وبيردها.. ولا بيصدها؟؟
سعيد معقوله بدا يميل لأفنان؟؟
تحياتي