الجزء ( 33 ) : للحب عنوان

ملخص الجزء السابق: إهتمام غزلان بمحمد عشان ينزل من وزنه.. وإستمرار إبراهيم في عناده وتجاهله لغزلان.. اكتشفا جاسم عن حقيقة علي.. وقرار ملجة وداد وسلطان.. وحزن خالد المستمر لفراقه غزلان.. تحسن حالة سارة واعتذارها من وداد وزواجها القريب.. راحة علي من كل شي.. تفكير أحمد ومنى الي ما ينتهي ببعضهم.. نوال ومضايقاتها المستمرة لغزلان وحصه في المدرسة
=-=-=-=-=
أرسل حروفي يمك إحساس وإقرا.. تلقى كثر أشواق هالعالم إشتقت.. غيرك لا من غاب فرقاه يسرى.. وطيفك لا من غاب لحظه تضايقت..
=-=-=-=-=
الكل كان ينتظر ومتفاجئين.. ويفكر شو السالفه.. ليش علي طلب من الكل يتجمع .. تموا ياسين يتريون دخول علي عشان يشوفون شو عنده.. ومن بعد ربع ساعه دخل علي وكان وياه جاسم وهو بكامل صحته ويبتسم لهم.. بعدهم ما كانوا مستوعبين الموضوع عدل.. نش الكل سلم على جاسم وتحمد له بالسلامه وقف علي وحذاله جاسم ومحمد وابوه وامه كانو وراهم وهم مستانسين بالحيل..
علي: أقدم لكم أخوي جاسم...
الكل تم فاج ثمه يحاول يستوعب الموضوع.. ماحسوا إلا بغزلان تزاعج...صدوا صوبها: علي انت مينون.. جاسم ما يعرف ليش قلت له.. زين احين كشفت عمرك جدامه..
علي من سمع رمسة غزلان صد صوب جاسم ومحمد وانفجروا من الضحك ثلاثتهم.. والكل مستغرب..
علي: وحليلج يا غزلان.. جاسم طلع كروستوف كولومبس.. روحه كشفني..
هند: ويييييه متى هالكلام.. ليش ما قلت لنا من قبل؟
محمد: انا قلت له يود لسانك لا تقول عشان نفاجئكم..
هند: الصراحه أحلى مفاجأة يا علي.. أخيرا ردت العلاقة بين الإخوان مثل ما مفروض إتكون..
علي وهو حط إيده عجتف اخوه ويبتسم له: الحمد لله..
وسار الكل قعدوا سوا وخذتهم السوالف والفرحه مبينه عويوهم ..
أم جاسم: جاسم.. ولدي إنت ظهرت من المستشفى.. خلاص.. وآمنه..
جاسم نزل راسه وتنهد: إن شاء الله الليله بسير ويا محمد..
محمد : لا.. انا مب ساير..
الكل صد صوبه.. وعلي كان فاهم محمد وليش رفض.. بسبب إخت آمنه..
علي: انا بسير وياك خلاص..
جاسم: خلاص اوكي.. بعد صلاة التراويح بسير لهم ..
أم جاسم: ربي يوفقك يا ولدي..
غزلان: اقول امي ترا اليوم بسير عند حصوو عالإفطار اونها عازمتني..
ام سعيد: مب مشكله.. بس لا تتأخرين لأن ورانا شغل لباجر..
وداد نزلت راسها من الحيا.. باجر هو اليوم الموعود من بينهم من بعد هالسنين كلها وهي تنتظر هاليوم بفارغ الصبر..
علي: اسميني متشوق لباجر..
أم سعيد: يلا ربي يوفقهم ان شاء الله.. وعقبالك..
في هالوقت صد صوب هند الي كانت منزله راسها وتفكر.. وابتسم: ان شاء الله
=-=-=-=-=
في بيت حصه..
غزلان: يلا عاد حصوو.. خلج أقوى من جيه.. المهم انج سويتي الي عليج..وبعدين الأبله هي الي تقيم جهدج مب البنات انا الي لازم ازعل ما زعلت كثرج اني ما سويت شي مووول ولا لطوف المسكينه بعد
حصه: بس انا ماعرف ليش تكرهني هالبنت هالكثر..
غزلان: ربي يسامحها ان شاء الله .. طنشيها وخلج منها..
حصه: انزين خبريني شو اخر تطورات محمد..
غزلان: مسكين ماخليه في حاله.. بس احسن عشان ينزل وزنه.. للحين مر اسبوع .. يقول نزل 800 جرام.. قلت وايد زين عقبال 800 كيلو جرام
حصه: خييييييبه المسكين وزنه ما وصل 800 .. تبين تنفينه من الوجود
غزلان: ههههه لا ويه بسم الله على اخويه..
حصه: هههههههه
غزلان: هيه جي اباج تضحكين .. اذا شفتج زعلانه ترا والله اكسر اسنانج فاهمه.. شوفي انا ابا ارمسج في سالفه واعترف لج فيها
حصه وهي تجرب من غزلان: شو السالفه خبريني
غزلان: رزه هالبنت .. ملقوفه..
حصه: يلا قولي بسرعه..
غزلان: بكل إختصار.. انا ندمانه على الي سويته في إبراهيم.. وأباه يعطيني فرصه مره ثانيه
حصه فاجه عيونها وتتطالع غزلان ولا راضيه تنطق.. : شووووفيج جذا تتطالعيني ..
حصه: مب مصدقه عيوني وإذوني.. الي جدامي غزلان... والي ترمس احسها مب غزلان.. بس نفس الصوت..
غزلان وهي تقرص حصه .. : مالت عليج.. مابقول شي خلاص..
حصه: هههههه.. زعلتي فدييتج انا.. بس دخيلج عيدي الرمسه اخاف سمعت بالغلط..
غزلان: انا غزلان بنت امي وابوي.. ربيعتج .. ابا من اخوج يعطيني فرصه ثانيه.. لأني متندمه..
حصه: كلولولولولووووووووش
غزلان وهي اتصك ثم حصه وتتطالع صوب الباب: فضحتينا الله يخس ابليسج..
حصه: مستاااانسه..
غزلان: هههه..
وفي هالوقت رن تليفون غزلان.. كان أحمد الي متصل.. : الوووو
غزلان: هلا والله .. أحمدووو.. اشحالك ؟؟
أحمد: بخير.. وينج ياي بيتكم شارده هااا؟
غزلان: لا ياسه عند ربيعتي شوي..
أحمد: أي وحده فيهن..
غزلان ارتبكت مارامت تنطق إسم أحمد.. بس ما كانت تدري ان أحمد خلاص ما قام يهتم لها..: انزين سمعيني.. لا تتأخرين ترا انا بروح تدرين باجر ورانا يوم عالمي..
غزلان: هههه.. لا اصلا انا احين يايه..
أحمد: اوووووكي
وبندت عنه.. وقبضتها حصه: شوو احين يايه..ماشي تيلسين؟؟
غزلان: حصو ودي والله.. بس تدرين باجر ملجه ودادو وشغل ورانا..
حصه: اممممم خلاص عذرتج بس المره اليايه ماشي اعذار فاهمه..
غزلان: اوووووكي..
حصه: يلا طلعي برع
غزلان: قويه في حقي طردتيني تراج..
حصه: هههههه.. مستقويه اليوم انا؟.؟
غزلان: وحليلي انا بس الي تستقوين علي.. فلحي جدام نوالو وعصابتها..
حصه: ههههههه .. وحليلي انا ..
غزلان: يلا امممموح باي..
حصه: باي..
ظهرت غزلان من بيت حصه وهي حاسه بإرتياح إنها اعترفت بكل شي لحصه.. وهي ظاهره شافت إبراهيم واقف عند الباب يرمس في التليفون.. وصك الخط توه بيدخل اتوايه ويا غزلان.. الي بسرعه غطت ويهها وراحت عنه بسرعه.... فديت ريحة هالعطر عنه.. والله أحبج يالحماره.. شو مسويه فيني..
غزلان حست جسمها يرتعش بكبره وهي تمر حذاله .. ياربي قلبي بيطلع من مكانه من كثر ما يدق.. دشت البيت وتمت واقفه ومسناده الباب وهي صاكتنه.. وتتنفس بسرعه.. كأنها يايه تربع.. ومشت شوي شوي ودخلت البيت كان أحمد وهادف وناصر ياسين يلعبون كالعاده..
غزلان: هلا والله أحمدوو .. ونصور هني بعد.. كملت الشله
أحمد: تعالي ماشي وقت لعبي انتي ونصور فريق..
ناصر: يلا تعالي للحين هازمنهم مب واثقين في قدراتي.. خل نسحقهم..
هادف: واثق الأخ وايد..دام غزوول وياك.. رحت وطي..
غزلان: ماعليه احين براويكم غزلان شو تقدر اتسوي.. بس ابدل وبيي..
صعدت غرفتها عشان تلبس لها مخوره وتنزل تلعب وياهم.. حصه في هالوقت كانت مستانسه من الخاطر تتريا إبراهيم في غرفته تمت تتطالع البرواز الي فيه صوره إبراهيم وكل اخوانه وخواته صوره جماعيه يوم صغار وتضحك.. دش إبراهيم وشافها تتطالع الصوره ابتسم.: شو اتسوي الحلوه عندي..
حصه: يايه اسولف وياك.. اترياك يعني
إبراهيم: حصه بشحمها ولحمها يايه عندي ما صدق عيوني.. تعالي تعالي.. ير الكرسي عشان تقعد عليه,..يلسي.. عصير جاي ماي.. آمري بس..
حصه: هههه.. تسلم لي.. مابا شي.. ابا اسولف وياك ..
إبراهيم قعد مجابلها.. : كلي اذان صاغيه..
حصه: إبراهيم.. شو يعني غزلان بالنسبه لك..
إبراهيم انصدم من سؤالها.. تم ساكت وهو يطالعها.. : غزلان!!!
حصه: هيه غزلان..
إبراهيم: ههه.. شو ياب هالسؤال على بالج؟؟
حصه: لا تلف ودور.. رد علي..
إبراهيم: غزلان.. كانت جزء من روحي .. ماقدر اعيش من دونه.. بس هي بصدها وهجرانها.. خلتني اتعود على غياب هالجزء مني..
حصه تضايقت.. بس كان عندها أمل إن كل شي بيصير اوكي من بعد ماتقول له..: انزين.. واذا قلت لك انها ندمت احين.. وتبا منك فرصة..
إبراهيم يطالع حصه بإستغراب: لا والله.. احين بس ندمت وفكرت..وعرفت اني اباها.. وانا طول هالسنين اركض وراها.. اسف ..
حصه: إبراهيم..
وهو يقاطعها: رجاء حصه.. غيري الموضوع.. غزلان خلاص شي انتهى من حياتي..
حصه: بس..
إبراهيم وهو متنرفز: شوفي يا حصه.. جان بتقعدين بترمسين عن هالإنسانه اقول لج ظهري من عندي..
حصه عصبت.. ونشت من مكانها وظهرت من الغرفه وصكته بويهه بالقو..: اففففف شو هالمشاكل.. موول محد فيكم يتنازل عشان الثاني.. قبل كانت مشكلتي ويا غزلان.. واحين ويا إبراهيم.. شو هالغرور..
دخلت غرفتها وبسرعه شلت التليفون واتصلت في عادل..: لا هاييل بيخبلوني..
عادل: ههههه.. بسم الله .. شفيج كلتي السلام عليكم..
حصه: اسفه حبيبي.. السلام عليك..
عادل: وعلي السلام حياتي.. شفيج؟؟
حصه: ها ابراهيم وغزلان.. بيخبلون بي..
عادل:بعد شوووووو؟؟
حصه قالت لعادل السالفه..: والله مب قهر بذمتك
عادل: اخوج ها ماعرفنا له.. احين يوم البنت يايه ومعتذره ومتندمه يصدها..
حصه: شفت كيف..
عادل: يلا ماعلينا.. المهم خلنا بحبنا..
حصه صخت مستحيه من كلامه..
عادل: فديتها المستحيه.. شوفي انا استأذنت من امج ان باجر امر عليج ونسير الفنادق الي شفتها عشان تختارين من بينهم..
حصه: فندق .. ليش؟
عادل: لا والله ليش بعد.. عشان نشتريه..
حصه: هههه.. احلف..
عادل: هي ترا انا يالس على نهر بترول.. والله ذكيه حبيبي.. سمعي عشان تختارين من بين الصالات للعرس
حصه استحت زود.. : ياويلي..
عادل: ياويل حالي انا كم بعيش.. انزين ياعمري ..
حصه: متى؟؟
عادل: الصبح يكون أحسن..
حصه: يعني باجر ما بنام.. مب مشكله اوكي
عادل:اذا ما تبين وهالشي بيتعبج خلاص مانبا..
حصه: لا لالا.. اوكي..
عادل: خلاص حبيبي.. انا احين بسير بقعد في ميلس ربيعي عبدالرحمن.. وبرمسج فليل..
حصه: خلاص ان شاء الله.. حط بالك على عمرك
عادل: من عيوني.. وانتي بعد.. يابعد كلي..
حصه: مع السلامه
عادل: مع السلامه..
بندت حصه عن عادل وكانت حدها مستانسه من الخاطر.. واتصلت في غزلان وقالت لها.. بس ترددت تقول لها عن كلام إبراهيم فضلت انها تعطي فرصه لإبراهيم يفكر مع نفسه..
=-=-=-=-=
في هالوقت علي وجاسم كانوا سايرين صوب بيت آمنه عشان يتصالحون وياها.. ونزل علي ويا جاسم ودخلوا البيت .. الكل تفاجأ من وجود علي ومن بعد ما سلم عليهم.. قعد جاسم وعلي قاله انه بيظهر عشان ما تشوفه آمنه..
بو آمنه: زين يوم ذكرت ان لك حرمه فريتها في هالبيت ولا سألت عنها..
جاسم: عمي انا كنت في المستشفى مسوي حادث.. واظني آمنه قالت لكم السبب ولا؟؟
بوآمنه: واعلي بنتي من يومها منهاره.. وانت ولا على بالك..
جاسم تم يشرح لأبو آمنه كل السالفه.. وهالشي الي عصب به.. عمره ما توقع ان بنته بتكون بهالدنائه.. وافتشل من جاسم.. ونزل راسه وراح غرفه آمنه يطلب منها اتيي.. : مب يايه
بو آمنه: قلت لج تعالي يعني تعالي.. وبلاها هالحركات.. فشلتيني .. شو من بنت انتي؟؟
آمنه: لا والله.. لأني ابا له الخير وابا له الزين جي يسوي..
بو آمنه: اخبرج انا مربنج واعرف خبثج.. تبين له الخير.. امشي جدامي اشوف.. تردين بيت ريلج فاهمه..
آمنه: حشى علي مارد له.. مابيه
جاسم كان في الصاله ويسمع صراخ آمنه..
بو آمنه: استهدي بالله احسن لج.. الريال ياينج رغم انج الغلطانه يعتذر ويردج.. لو ما يحبج ما سواها..
آمنه: عاد انا الي احبه .. مابا .. قوله امنه تتريا ورقتها
بو آمنه عصب وصفع آمنه طراق: سمعيني.. انا ماعندي بنت ترجع من بيت ريلها مطلقه فاهمه.. امشي قبل لا اسطر عالعصاة عظهرج..
آمنه تمت اتصيح: حتى انت وياهم.. خلاص.. محد تم وياي.. أمي والله يرحمها.. وحرمتك هاي ماتدري عنا اصلا.. وانت متى سألت عني.. وتبا اتردني لهالظالم.. عشان انظلم زود.. صدقني مب محتايه لا لك ولا له.. انا اشتغل واروم اعيش عمري احسن عيشه.. وعياله ماباهم .. خل ياخذهم..
بو آمنه عصب من خاطره .. مسكها من شعرها ويرها وراه: دام ان هاي رمستج انتي ما اتيين الا جذا.. طولة لسان ولا بعد المشكله الغلط منج هب منه.. والله جاسم ريال .. وتمشين وراي غصبن عنج تردين له..
تمت آمنه تصارخ وتصيح وتردد انها ما تباه.. لين ما نزلها بو آمنه عند ريول جاسم وفرها صوبه..: خذها وعلمها الأدب.. راضي بشو ما تبا اتسوي بها.. الي ما تحترم ابوها شي أكيد ما بتعرف تحترم غيره.. أباك يا جاسم اتعلمها الأدب والسنع..
جاسم: عمي.. انامابا اغصب حد يعيش وياي.. ودام انها تنازلت عن عيالها وانا ماهمني ارد لها .. انا الي هموني هالعيال لولاهم جان ما تعنيت وييت.. آمنه انسانه مريضه محد يقدر يعيش وياها.. فيها حاله نفسيه وانا مب مستعد أرد اعاني نفس المعاناة الي يتني من تحت راسها..
آمنه: نعم نعم.. انا مريضه نفسيا.. شوف عمرك.. حد يدور الفقر شراتك.. مو ويه خير انت.. تفو عليك..
وفي هالوقت مارام يمسك عمره جاسم .. كم يسكت على طولة لسانها.. صفعها بقو بحيث طاحت عالأرض ..: اخر شي اسمح لج اتسوينه .. وانا هب محتاي لج.. وين عيالي..
آمنه وبكل غرور: كاتريييييييييييييييييين.. هاتي العيال ..
ركضت الخدامه ويابت اليهال ونزلتهم ومن شافهم جاسم ما قدر يمنع نفسه يشل ولده ويمسك ايد بنته ويبوسهم ويحضنهم .. ونزلت الدمعة غصب عنه.. : فديتكم والله
آمنه: ههههه.. اونه الأب الحنون.. خذهم ماباهم..
جاسم: عيل بترياج.. مستحيل اخلي عيالي ويامختله عقليه مثلج.. عمي إسمح لي.. والله مجبور لو انت مكاني ما تحملت.. آمنه.. إنتي طاااااااااااااااااااااالق..
وشل عياله ويا الخدامه وظهر من البيت وركب الموتر وطلب من علي يرده البيت.. وكان من الخاطر متكدر.. ومتولم ليش راح لها يطلب رضاها وهي ما تستاهل.. وكل شوي يشوف عياله ويشوف الخوف في عيونهم ينزل راسه ويفكر فيهم شو مصيرهم من غير امهم .. كيف بيعيش؟؟
وأما آمنه تمت مصدومه من بعد ما سمعت هالكلمه.. ومن عقبها ارتفعت صوت ضحكاتها بصوت عاااااااالي.. : هههههههههه.. طلقني.. ههههههه.. جاسم طلقني.. وشل العيال.. ههههه انا اطلقت.. ابووووووي انا اطلقت..
بو آمنه خاف من حركات بنته ماعرف شو يسوي.. مسكها وتم يسحبها يوديها غرفتها عشان تنام من بعد ما عطاها حبه مسكن.. وظهر عنها.. وفي هالوقت انهارت آمنه من الصياح من خاطرها.. وركضت صوب الجامه وهي تنادي: جااااااااااااااسم.. جاسم لا تروح.. جااااسم..
وتمت اتصيح من خاطرها ونزلت على الأرض تمت ياسه لين ماغافلها النوم ونامت..
=-=-=-=-=
جاسم فكان متكدر من الخاطر.. قال السالفه لهله وشل عياله وداهم الغرفه وياه ينامون معاه.. وفي خاطره يصيح.. أول ما دخل شاف برواز يوم عرسه.. كان وده يمسك الصوره ويفرها على الأرض ويكسرها بس ماحب يسوي هالشي جدام عياله اكتفا يجلبها ويحطها على الطاوله عشان ما يشوف الصوره.. شو سويتي فيني يا آمنه.. ما كفاج خربتي من بين هلي.. والحين دمرتيني.. ماشي مصبرني غير امي وابوي واخواني وعيالي.. أهم ما أملك في هالدنيا.. عيالي.. يسوون الدنيا ومافيها..
ام جاسم كانت متكدره من خاطرها.. وتصيح.. علي ومحمد يهدون فيها
محمد: انا كنت زايغ من هالسيره حسيت ان في شي بيصير..
علي: انا كنت في الموتر واسمع صريخها.. توقعت يصير جيه.. آمنه قلبها قاسي ما تحس بشي..
محمد: فعلا مريضه نفسيا..
عليه: شكلها ما تحب اتشوف عايله مستانسه ومترابطه.. لأن هي من صغرها انحرمت من امها وعاشت عذاب مرت الأبو.. فحست بتشتت عسب جي طلعت فينا كل غيضها
ام جاسم: ولدي جاسم غامضني.. والله.. ليتني ما اخترتها له.. انا قلت هاي يتيمه ومسكينه مادريت انها جذا
محمد: لا تلومين عمرج يامي.. هاي الدنيا كل شي مقدر ومكتوب..
ام جاسم: هي والله.. والنعم بالله..
=-=-=-=
يوم الخميس الصبح..
الكل كان مربوش من الخاطر عسب اليوم هو اليوم الموعود بالنسبه لسلطان ووداد .. راح يملجون وكل واحد يمتلك الثاني في هاليوم .. سلطان كانت الفرحه مب شايلته اي طلب يطلبونه منه مستحيل
يردهم فيه.. ونفس الشي هله كانو مستانسين يوم شافوا الفرحه في عيونه.. ومريم ماحبت اتفوت هالفرحه ويتهم البيت اتشاركهم الفرحه.. الكل من شافها خاف منها..وخصوصا أحمد.. إلا سلطان الي كان معطيها كل ثقته وكان يعزز هالثقه فيها كل شوي يطلب منها اتسوي شي.. وكانت اتسويه .. ومستانسه يوم شافت ان سلطان يشركها فرحته.. وهالشي الي خلاها تندم زود وزود على كل الي سوته.. ومر الوقت وكان مقرر ان الملجه اتم من بعد صلاة التراويح.. الكل كان مجتمع في بيت بوسعيد.. طبعا ماشي حفلة.. بس عشا وحلويات وفرحه لأن كان رمضان ومايصير يحتفلون.. كانوا مأجلين كل شي لبعد رمضان.. ومنى طبعا ما فوتت هالمناسبه.. وحصه كانت ملاصقه لغزلان طول الوقت.. وداد طبعا تعدلت وتجهزت.. وكانت طالعه جميله جدا..الكل منبهر فيها.. ويابو عقد الملجه عشان توقع عليه .. كانت مستانسه من خاطرها ومن وقعت الكل تم يبب ومن سمع سلطان اليباب فرح زود.. حس وده ينش ويرقص.. بس قابض عمره جدام الرياييل ما يصير.. ومن بعدها الكل ارتاح نفسيا ان كل شي مر طبيعي .. ظهرت غزلان من الصاله الي كانت قاعده فيها لأن الوقت تأخر وكانو بيدخلون سلطان عندها عشان يقعد وياها.. وكانت ميته من الحيا.. لأن هاي أول مره سلطان بيشوفها وهي كاشفه شعرها.. ودخل سلطان وياه هادف وابوه.. وسلموا على وداد الي كانت منزله راسها.. وسلطان نفس الشي .. كان للحين ما شايفها ومن ظهروا رفع راسها وشافها وهي منزله راسها وخصله شعرها نازله على خدها..
سلطان: جني مغلط.. انتي وداد..
وداد تبتسم له: هيه
سلطان: ياويل حالي.. وداد أجمل انسانه في هالدنيا اشوفها بحياتي.. معقوله انتي مرتي انا الخسف سلطان..
وداد: ههه.. هيه..
سلطان: لا تقولين هيه ارمسي خل اسمع صوتج واتأكد زود..
وداد: سلطان شفيك..
سلطان: انزين رفعي راسج خل اشوفج... رفعت راسها للحظه ومن بعدها صدت.. هي والله وداد.. احبج احبج
وداد: وانا بعد
وكملوا ويا بعض ومب حاسين بالدنيا حولهم كل واحد يعبر عن حبه للثاني.. وفي هالوقت كانت منى في الحديقه تتمشى .. ومن شافها أحمد روحها استغل الفرصه ولحقها.. : احم احم
منى عرفت تيبست مكانها وحست قلبها بيظهر من مكانه.. وافديته
أحمد: إشحالج؟؟
منى: بخير ربي يعافيك وانت اشحالك؟
أحمد: بخير وايد بخير..
منى: مبروك على ملجه سلطان.. عقبالك..
أحمد وبشوق: آميييييين.. انحرج ونزل راسه.. ااااقصد الله يبارك فيج..
منى بعد استحت ونزلت راسها وابتسمت.. : شو الكليه؟؟
أحمد: ها.. الكلية.. هيه.. اوكي.. وانتي شو الدراسه
منى: الحمد لله مقزرين..
أحمد: منى.. في شي مب رايم احبسه زود ولازم اقوله.. كافي مره حبست وانا الي خسرت فمب قادر هالمره بالذات اخفي هالشي..
منى: شو عن سر لعبه الورقه
أحمد: هههههه.. لا ..
منى: عيل شو؟؟
أحمد: مادري .. بس سكت للحظه ونزل راسه.. ولا اقول انسي خلاص..
منى:لا لا لا.. قول..
أحمد: شوفي الكلام الي ابا اقوله لج بكتبه في ورقه وبعطيها للطوف بنت فدوى وشوفيها اوكي..
منى: امممم.. اوكي..
وبسرعه راح أحمد داخل البيت ودور على ورقه وكتب عليها..
ودي بقربك يالحبيب.. ياترى لي مكانه؟؟
ودي أعيش بظلك يالحبيب.. ياترى ألقى منك إجابة؟؟
وطوى الورقه ونادى على لطيفه بنت اخته وقال لها اتوديه لمنى.. وسارت ودته لمنى وكانت ياسه في الحديقه وأحمد يراقبها من الجامه.. ومنى حست انه يراقبها قبضت عمرها وسوت نفسها معصبه عشان يخاف أحمد.. وكتبت له..
كيف علمت ما يجول بخاطري.. هل أنت ساحر .. أظن ذلك لأنك سحرتني بقلبك.. فكيف لي الرفض
وعطت الورقه للطيفه عشان ترده لأحمد... ومن شافها احمد يايبه الورقه ربع سحبها عنه.. تمت اتصارخ عليه..: مله ثانيه مابلوح.. إنذين..
أحمد: انزين.. انتي روحي ..
لطيفه طلعت له لسانها: ماحبك.. اننننن
فدوى عيب يا بنت.. شو هالحركات..
لطيفه: سوفي خالي أحمد.. كله يصرخ علي..
أحمد: بل بل منج يالجذابه..
لطيفه: انا مو جذابه انذييييييين
أحمد: ذبحتيني انزين.. انا الجذاب..
فدوى: ههههه .. تعالي انزين وقت الرقاد احين..
راح لطيفه ويا امها وهي تتحرطم وكان أحمد خاش الورقه عن اتشوفها فدوى ومن سارت فتح الورقه وقرا الي فيها طار من الفرحه.. وتم يرقص.. وشافته غزلان: بسم الله تخبلز. استهدي بالله رمضان..
أحمد: خليني مستانس..
غزلان: ويا ويهك.. وين منى؟؟
أحمد في الحديقه.. ليش؟؟
غزلان: مايخصك..
أحمد: ليش؟؟
غزلان: سر..
أحمد: ابا اعرف..
غزلان: مب شغلك.. انزين.. الا اقول مب جنه المعاريس مصخوها كم ساعه بيلسون سوى..
أحمد: اي معاريس؟؟
غزلان: لا احمدو اليوم مب طبيعي.. شفيك حبيبي مسخن.. اخوك واختي منو بعد؟؟
أحمد: خلهم اشعليج محتره يعني لأنج مب شراتهم..
غزلان من سمعت هالكلمه انصدمت من الخاطر وتمت اتصيح.. وربعت بسرعه وردت غرفتها.. وأحمد يوم انتبه للكلام الي قاله ضرب على ثمه.. واحمر.. في هالوقت دشت منى.. بس ماحس بها لأنه باله كان ويا غزلان.. اما منى فإحمرت من شافته ومشت وصعدت صوب الغرفه من غير لا ترمس.. وأحمد بعالم ثاني مب حاس.. ومن لمح حد يمشي على الدري لحقه بسرعه .. وضربها على جتفها بطرف صبعه.. خافت منى.. وتيبست.. وحست بالدم يسري في عروقها جنه نهر.. وارتفعت حرارتها..
وأحمد يوم استوعب انها منى.. احمر.. وافتشل.. بس تدارك الموضوع.. : منى.. سيري شوفي غزلان شوفيها؟؟
منى وبإهتمام: شوفيها؟؟
أحمد: انا الغبي طلعت مني رمسه بايخه .. تمت اتصيح وصعدت.. والله ماكان قصدي..
منى: شوقلت انزين؟
أحمد قال لمنى السالفه.. ومن سمعت منى بطلت عينها وماعطته مجال يقول شي وربعت صوب غرفتها وتمت اتدق عليها الباب بس مب طايعه تفتح.. كانت اتصيح من خاطرها.. ومكتأبه.. وفي هالوقت ياها عارف مارامت تقعد زود.. مجبوره انها ترد البيت.. وأحمد طبعا مستانس ومتضايق في نفس الوقت.. وراحت منى وحس ان روحه راحت معاها.. بس مرتاح نفسيا انه عرف رايها فيه.. وأهم شي انها تباه مثل ماهو يباها.. ومتضايق من داخله عسالفه غزلان..
منى في هالوقت ظهرت من الفيلا تبا تروح صوب الباب بس عارف بعده ماكان واصل فتمت واقفه تترياه.. وتمت تسمع همس في الحديقه.. تحسبت في البدايه انه أحمد بعد ما سمعت اسمها.. بس بعد ما ركزت على الصوت وصدت صوبه شافت علي ومحمد .. بس هم كانو معطينها ظهرهم فمب حاسين بوجودها..
محمد: علي لا تحاول مب قادر اواجهها..
علي: لين متى بتم جيه.. جرب .. يمكن البنت توافق..
محمد: مابا .. اخاف انصدم..
علي: اففففف.. عنيد.. بس والله منى بنت زينه ما بتلقى أحسن عنها
محمد: وانا لو مب متأكد من هالشي جان ما فكرت فيها بالأساس ..
علي:عيل شو تتريا..
محمد: تو الناس قلت لك..
انصدمت منى من الي سمعته.. هي تعز محمد وتعرف عن طيبه قلبه وما تبا اتكون سبب لجرحه ولا زعله.. ماعرفت شو اتسوي ارتبكت.. وسمعت هرن موتر عارف بسرعه ظهرت.. وفي هالوقت لمحها علي ونفس الشي محمد..
محمد: لا يكون سمعتنا؟؟
علي: ماعتقد .. اخوها توه ياي وهي سايره..
محمد: افففففف اتخيل سمعتني والله مابروم اجابلها..
علي: لو سمعت شو يعني يمكن هالشي يخليها تفكر فيك..
محمد: انت وايد تتحلم شكلك..
علي: انت لو شوي تشل نظره التشاؤم هاي بترتاح..
محمد: هههههه

وهذا جزء صغيرون اراضيكم فيه من بعد الإصرار الي اشوفه عشان الجزء.. لا تقولون قصير لأني عارفه انه قصير بس احسن من لاشي..
يلا شو تتوقعون ردة فعل منى؟؟
أحمد.. وغزلان.. شو بيصير من بينهم.؟؟
غزلان.. كيف موقفها يوم بتعرف بصد إبراهيم لها؟؟
آمنه.. لين وين بيوصل بها الحال؟؟
تحياتي