الجزء ( 32 ) : للحب عنوان

ملخص الجزء السابق: عناد إبراهيم على تجاهل غزلان المستمر.. وإحساس جاسم بالذنب خلاه يكتشف حقيقة زوجته آمنه وقراره تطليقها بعد ما أرسلها بيت أهلها... تعرض جاسم لحادث أدخل بسببه المستشفى
=-=-=-=-=-=
<<<< لا تعاند عنادك في عنادك عنادي.. عطني قلبك يا قلبي حط قلبي مكانه.. حس نبضه بيوفك وإسمعه بك ينادي..إحفظه يا حبيبي وسط صدرك أمانة..>>>>
=-=-=-=-=-=-=
سعيد: ألوو..
___:ألو
سعيد: إنتي منو؟؟
___: أنا الي قلبي نبض من يوم ما شافك.. أنا الي ما تهنى لي الدنيا من غير وجودك.. أنا الي حياتي صارت مرتبطه بحبك..
سعيد يضحك بإستهزاء: ههههههه.. لا والله.. الشاعره نجاح المساعيد وياي وأنا مادري..
___ تضحك بدلع: حلوه منك.. بس انا احساسي هو شعري..
سعيد بدا يعصب من أسلوبها: سمعي ترا انا مب فايج للسخافات هذي.. بتقولين انتي منو لا برقع التليفون بويهج..
___: ياربي شديد .. وهذا الي محببني فيك..
سعيد من سمعها قالت هالرمسه عرفها منو..: مسكيييييينه.. بس ماعرفتي تحبين الشخص الصح.. لأني مب مستعد ألعب لعبة الحب وياج.. يلا يلا جلبي ويهج
أفنان وهي تضحك بسخريه: ههههههههههه... أي صفحه..
سعيد وهو ثاير ..: صفحة الموت والهلاك..
أفنان انصدمت يوم سمعت هالرمسه من سعيد.. وبندت الخط في ويهه.. سعيد مسك التليفون وتم يطالعه .. : نفاد.. افففف شو هالعله..
بندت أفنان وهي كل مره تزداد إعجاب بسعيد وإصرار إنها تكسب قلبه وإنتباهه بأي طريقه.. لازم أكسر هالغرور الي متملكنه وهالخشم الي رافعنه مادري على شو شايف عمره.. بس انا وراك يا سعيد.. إن ما خليتك انت الي تركض وراي ما أطلع انا أفنان بنت أمي وأبوي..
=-=-=-=-=-=-=-=
مرت الليلة على ماهي جاسم كان في غرفه المراقبه.. والكل كان يقرا عليه قرآن ويدعوا الله إنه يقوم بالسلامه.. وبما إن الوقت تأخر فالكل رد البيت إلا علي الي أصر إنه يتم عند أخوه.. ورغم محاولات محمد إنه هو الي يتم إلا إن علي تم مصر على رايه.. والكل رد لأن اليوم الثاني دوامات ولازم ينامون..
في البيت...
محمد كان يالس يطالع تلفزيون وياكل فطاير.. وغزلان توها ظاهره من غرفة المكتب من شافته ياكل زاعجت: محمـــــــــــــــد
محمد فز من مكانه وغص وتم يكح.. بسرعه راح له هادف وتم يدحه على ظهره ويشربه ماي: اعوذ بالله شوي شوي.. ذبحتي الريال.. شو هالدفاشه الي فيك..
مشت غزلان بسرعه صوب صحن الفطاير وشلته..: أحسن.. عشان يتوب مره ثانيه يمد إيده على الأشيا الممنوعه..
محمد وهو ينزل كوب الماي على الصينيه: انزين بس لا تصرخين جي الله يهداج بغيتي تذبحيني.. كل هذا عشان كلت كم فطيره..
غزلان: هي.. وبعدين الفطيره مب موجوده في جدولك يعني ممنوع عليك.. وبعدين بييبون لي باجر الجدول الغذائي والبرنامج الي لازم تمشي عليه ولا خلاص ما تباني اساعدك..
محمد وهو يبتسم لها: خلاص أوكي..
هادف: احين انت من صدقك معتمد على هاي عشان تخفف من وزنك هاي بتجتلك..
غزلان: جب انت لا اخليك تتبع برنامج يجلبك لنبيل شعيل..
محمد: كملت.. انا حسين جسمي واخوج نبيل وعلوو راشد الماجد..
الكل: هههههههه..
هند: شو تقولون.. ضحكوني وياكم..
هادف: هندوو ماحيدج ملقوفه جذا..
هند وهي تتطاع غزلان بنص عين: من عاشر قوما أربعين يوما.. صار منهم..
غزلان وهي تتطالعه من تحت عينها: اصلا تتمنين انتي تتطلعين شراتي..
ام سعيد: والله انكم ما تستحون خالتكم راقده تحت وانتوا مسوين هالحشره كلها.. يلا جدامي اشوف.. سيروا نامو...عنبوكم من عيال
غزلان: وجان يهزبوني.. تصبحون على خير
والكل نش من بعد غزلان عشان ينام لأن وراهم دوامات.. وهند ومحمد طبعا راح يروحون عند جاسم..
=-=-=-=-=
في هالوقت في بيت حصه.. كان إبراهيم يالس في بلكونه غرفته الي مطله صوب بيت غزلان ويروم يشوف جامة غرفة غزلان.. وكان يكتب في دفتره..
أوعديني تجين.. وحاولي ما تجين
خلي الشوق يتمناك... ما ياصلك
امنحيني حنانك.. واحرميني الحنين
واتركي لي مجال احن.. واشتاق لك
للشاعر مساعد الشمري
ورفع راسه تم يطالع غرفة غزلان.. وشاف ان الليت ولع.. يعني في حد دخل الغرفه حس ان قلبه فز من مكانه وده يشوفها .. وماوده.. نزل راسه بسرعه وغزلان في هالوقت كانت توها بترقد.. بندت الليت.. وتمت تتطالع النجوم الفسفورية الي لاصقتهم في سقف الغرفه وسرحانه واتفكر.. وأفكارها تلف يمين وشمال.. صدت صوب الجامه.. تذكرت يوم شافته.. ابتسمت ونشت من مكانها بسرعه تبا تسترجع ذكراها.. وفتحت الستاره على الآخر وكانت فاله شعرها وحاطه خصله ورى إذنهاوالثانيه نازله ويهها.. تمت تتطالع ما كانت تشوف عدل.. فتحت الأبجوره عشان تشوف عدل.. ركزت وشافته ماكنت مصدقه عينها.. كان حاط ريل على ريل وماسك القلم ويكتب.. أموووت وأعرف شو قاعد يكتب في هالوقت.. ولا بعد برع البيت.. والله متفيج.. انزين ليش يالس في البلكونه.. شو يبا الناس يشوفونه.. اففف يقهر.. .. بندت الستاره وردت على السرير وتمت متغايضه.. بس في لحظه ابتسمت وهي تذكره لابس جلابيه البيت وعلى قعدته ذيج.. ياربي كيف انا كنت غبيه جيه .. وساهيه عن إنسان بهالروعه من كل النواحي وأهم ناحيه فيهم انه يحبني.. بس بعده يحبني ولا نسى حبي خلاص.. ااااااااااااااااااه ياربي ساعدني اكسب وداده..
=-=-=-=-=-=
اليوم الثاني..
إبراهيم طبعا ليلتها ما كان رايم ينام عدل من التفكير.. كان التعب مبين في عيونه.. وراح صوب غرفه حصه ودق عليها الباب يشوفها اذا جهزت ولا بعدها..
حصه: صباح الورد يا ورد..
إبراهيم وهو يبتسم لها.. : صباح الفل.. يلا جاهزه..
حصه: هيه.. بس لحظه.. جربت منه ومسكت ويهه.. شو فيك؟؟
إبراهيم ماشي ليش؟
حصه: شوف عيونك كيف صايره مسوده تحتهم.. مارقدت عدل؟
إبراهيم: هيه شوي تعبان..يلا عن تتأخرين..
حصه: خلاص انا زاهبه بس نتريا غزلان اتيي..
إبراهيم: افففففف هالبنت ماعندها حد يوصلها يعني.. لازم تيي ويانا كل يوم؟؟
حصه تمت تتطالع ابراهيم وهو يرمس بهالطريقه وينزل من الدري.. مستغربه منه .. أول مره يقول مثل هالرمسه عن غزلان خصوصا.. ماعرفت له الصراحه مره يباها ومره ما يدانيها.. والله هالإثنين يتشابهون.. يليقون على بعض.. وابتسمت وردت دخلت غرفتها وشلت شنطتها وشيلتها وظهرت من الغرفه وسمعت الخدامه تزقرها لأن غزلان وصلت.. ونزلت بسرعه بعد ما باست راس امها وابوها ظهرت عشان تركب الموتر..
حصه طلعت وشافت غزلان بعد نفس الشي عيونها مبين عليهم السهر ومارقدت عدل.. استغربت زود..: وانتي بعد شو فيج؟؟ .. ليش سهرانه؟؟
ركبت غزلان الموتر وتمت ساكته..
حصه هزت راسها: لاحووووول.. انا الي عندي ريل مب شراتكم انا الا اعرف شو فيكم انتوا الإثنين بسم الله ..
إبراهيم صد صوب حصه: بلاج تتحرطمين..
حصه: مادري عنك انت وهي عيونكم منتفخه مب راقدين.. لحظه لحظه جني قلت انتوا الإثنين.. صدت ورى صوب غزلان وتمت كل شوي تتطالع غزلان وإبراهيم بخبث.. شو السالفه؟؟
غزلان بصوت واطي: سالفه شو؟؟
حصه: لا لالا .. انا اليوم مب نازله المدرسه غير اعرف السالفه اشمعنى انتوا الإثنين مب راقدين ..
ابراهيم صد وتم يطالع غزلان في عينها وهي استحت ونزلت راسها ..وهو رد صد جدام وكمل سواقته.. وحصه تمت تتطالعهم بنظره خبث وابتسامه خبيثه وسكتت... ونزلت ويا غزلان من وصلو.. ومن نزلت قبضتها غزلان من مريولها ويرتها..: انتي مينونه .. لا خبله.. والله مب صاحيه..
حصه وهي تضحك: بسم الله شوفيج..
غزلان: مادري عنج مستويه محلله اونه.. احين شو دخل اخوج فيني عشان تقولين هالرمسه جدامه وتقفطيني..
حصه: كيييييييييفي..
غزلان وهي تدز حصه عجدام: انا اراويج.. امشي جدامي..
حصه: هههههه.. واتقووووول انا ماحبه واحسبه شرات اخوي..
غزلان نزلت راسها وابتسمت من غير لا تلاحظ حصه وفي خاطرها اتقول.. صدقج محد فاهمني غيرج..
=-=-=-=-=
في المستشفى..
كانت حالة جاسم مستقره فنقلوه للجناح.. وتم علي يراكض عشان يطلع له تقرير عن حالة التشوه الي صابته ويوديه ألمانيا عشان يسوي عمليه يتعالج من الجروح الي في ويهه.. ورد الغرفه وشاف هند ومحمد فيها..
علي: صباح الخير بهالويوه الحلوه..كان يطالع هند الي ابتسمت ونزلت راسها..
هند + محمد: صباح النور..
علي: ها شو .. فتح عيونه؟؟
محمد: لا للحين .. نحن تونا يادوب يايين..
علي: اها.. وين خالو وعمي ما بيون؟
محمد: بلا في الدرب.. بس ابوي قال عنده شويه اشغال عشان الشركه وبيي..
علي: زين زين..
محمد: الا اخبرك علي متى سفرك للعمره ويا خالي وهند..
علي: الإسبوع الياي ان شاء الله..
محمد: إن شاء الله.. إدعيلي عاد هناك..
علي: افا عليك..
هند: وانا بعد بدعي لك..
محمد: زين يوم عرفتي من روحج من غير لا اقول لج.. هههههه
علي: اشششش ويا هالضحكه .. جاسم راقد..
وفي هالوقت من الحشره بدا جاسم يكح.. بسرعه نش علي وياب كوب ماي ومسك جاسم من ظهره ورفعه شوي على ايده وتم يشربه ماي.. : اشرب.. هني..
هند ومحمد كانوا متأثرين للموقف .. يدرون عن الحرمان الي ياه علي والسبب جاسم.. وأحين هو الي قايم بجاسم من أمس لليوم.. والله انك شهم..
رد علي جاسم مكانه.. وفي هالوقت فتح جاسم عيونه وشاف جدامه هند ومحمد لأنهم كانو يالسين مجابلينه.. ابتسمت بفرحه كبيره.. نش محمد بسرعه وسار صوب اخوه وباسه على راسه: الحمد لله على السلامه اخوي..
جاسم طبعا من تأثير البنج والمسكنات كان لسانه ثجيل ومايروم يرمس عدل اكتفى انه يبتسم ابتسامه خفيفه ويقبض بإيد محمد ويرص عليها.. ورد له محمد الإبتسامه..: شوف نحن نسينا كل شي.. وما نباك اتضايج بروحك أبد.. تراك بعدك أخوي الي مالي غناة عنه ولا عن اخوي الثاني..
فتح عيونه جاسم على الآخر.. كيف ياب طاري علي.. ليش؟؟ وشاف علي وقف يمه على الصوب الثاني صد صوبه واطالعه بس ما قدر يعرفه.. صد صوب محمد وعقد حياته وهز راسه بمعناة منو ها..رد عليه محمد: جاسم.. انا ما بقول لك هذا منو.. بس بقول لك ان هذا هو الشخص الي من امس للحين وهو يالس عندك ويقوم فيك ويداريك..
جاسم رد صد صوب علي .. ويحاول انه يعرفه بس مب قادر .. لأنه اولا مب متوقع انه علي.. وثاني شي لأنه كبير وما يذكر شكل علي عشان حتى يشبه عليه لأن علي يوم ظهر من عندهم كان صغير ومر على السالفه اكثر من 8 سنين.. وماقدر يعرفه..
علي: ماعليه .. احين مب وقته اتعرفني.. يوم بيي وقته بتعرف انا منو..
جاسم ابتسم له وهز راسه بمعنى موافق وصد صوب هند.. وماعرفها.. ومحمد ابتسم وقال لهند اتيي جريب..: وهاي يا جاسم بنت خالتك ميثا.. هاي هند.. تذكرها؟؟ اخت سعيد..
جاسم استغرب شو يابهم بعد هالسنين كلها.. ابتسم لها وطالعها.. وهي ردت له الإبتسامه..: الحمد لله على السلامه يا جاسم ما تشوف شر..
جاسم هز راسه.. وتم يطالع علي مره ثانيه يبا يعرفه مب رايم..
وفي هالوقت دخلت ام جاسم ومن شافت جاسم فاج عيونه طارت من الفرحه.. وربعت صوبه وحضنته.: يما ولدي حبيبي.. حشاشه يوفي.. الف الحمد لله على السلامه.. يما ليش تسرع.. طيحت قلبي بغيت اموت .. دخيلك لا تسويها في امك حرام عليك..
جاسم وهو حاط ايده على ظهر امه ويبوس راسها.. وبصوت واطي: سامحيني.. سامحيني..
ام جاسم وهي تحط ايدها على ثمه: لا تنطق ولا ترمس هالرمسه.. مابغي اسمعها منك.. انا لو ازعل من هالدنيا ولدي ما ازعل منه..
ابتسم لأمه وصد صوب ابوه ورد نزل راسه مستحي منه.. بس ابوه ابتسم له وجرب منه.. وضم ايد ولده : الحمد لله على السلامه يا جاسم.. يلا نش بلا دلع بسرعه لأن الشركه من غيرك بتضيع..
جاسم يوم سمع هالرمسه من ابوه ما قدر يقاوم دموعه انها تنزل من عيونه .. في هالوقت ما قدر علي يتمالك نفسه اكثر وظهر من الغرفه.. واما جاسم فرفع ايد ابوه وتم يبوسها.. وايده الثانيه ضام ايد امه.. حس ان الروح ردت فيه من بعد ما شاف هله حوله .. وخصوصا وجود هند بنت خالته حسسته ان في ناس غير هله بعد يفتكرون فيه..
=-=-=-=-=-=
في المدرسه..
كانت غزلان ويا حصه قاعدين في فتره الفسحه في الصف يحلون بعض واجبات الرياضيات الي كانت معطتنه المدرسه لهم..
حصه: لا شوفي.. تكامل س.. لازم نطلع المشتق عشان نقدر...
غزلان وهي تقاطعها: اف منج .. سمعيني انزين خل اشرح شوفي.. اول..
وتوها بترمس ما حست إلا بحبر سائل انصب على ثيباها.. شهقت وصدت وراها شافت نوال ويا سعاد..
غزلان: شو هالحركات بعد..
نوال وهي تتطالعها بنظره حقيره: اي حركات.. ما كنت قاصده كنت احرك القلم ما انتبهت الا الحبر انتشر..
غزلان: لا والله سبحان الله ما انتشر الا على ثيابي..
سعاد: شوفيج.. تتحرينا جذابات يعني.؟؟
حصه نشت تبا اتهدي الجو..
غزلان: لا خليتي ادب هاي الي مادري شو شايفه عمرها..
حصه وبصوت عالي: بسكن.. رمضان احترمن هالشهر على الأقل.. أعوذ بالله منكن..
غزلان اتعوذت من ابليس ويلست مكانها.. اما نوال وسعاد تموا يضحكون بصوت عالي وغزلان كل شوي تتعوذ من ابليس عشان تهدأ.. : والله ياحصو لو ما اني صايمه جان راويتهم شغلهم.. شو هالبنات..
حصه: ماعليه كبري عقلج.. خلهم يزولن..
غزلان: متى اخلص السنه افتك منهن والله..
حصه: يلا هانت.. يلا ردي شرحي لي..
=-=-=-=-=-=
عادل طبعا في هاليومين كان يدور الفنادق يشوف صالاتها عشان يشوف أنسب صاله ممكن يحجزها للعرس.. وكان وياه بنت عمته الكبيره.. اسمها عذبه.. معرسه وعيالها كبار يالسه في البيت ما تشتغل.. فطلب منها اتيي وياه عشان اتساعده..
عادل: شوفي صاله البوم ماباها.. مب حلوه ابا صاله فندق.. أو حتى صاله المركز التجاري حلوه..
عذبه: انزين.. شو رايك في صاله حياة ريجينسي حلوه وكبيره..
عادل: معقوله.. يبالنا اندور..
عذبه: انت على اي تاريخ تقريبا ناوي تحجز..
عادل: ان شاء الله 7/7..
عذبه: بس ما تحس ان تو الناس على الحجز.. تونا شهر 10 جدامك 9 شهور..
عادل: لا بالعكس احسن من احين لأني ابا يوم الخميس وبالنادر نحصل يوم الخميس..
عذبه: اها.. اوكي.. ربي يوفقكم.. وهي متى بتخلص امتحاناتها..
عادل: على نهايات 6 .. وطبعا النتايج راح تكون أول 7.. وانا ابا وقت عشان نقدر نسافر ونستانس..
عذبه: صح .. احين وين بنسير..
عادل: خل انسير اقرب فندق الي هو ماريوت..
عذبه: ماريوت بعد صالتها معقوله وحلوه..
عادل: بنشوفها وبنشوف الباقي.. ولا تنسين الراي الأخير يترك للمدام حصه..
عذبه: هههههه لازم..
=-=-=-=-=
مرت الأيام وتحسنت حاله جاسم.. وبعده ماقالو له عن شخصيه علي.. وعلاقة جاسم مع علي صارت حلوه وااااايد نتيجه لتواجد علي الدايم ويا جاسم والسوالف كانت ما تخلص من بينهم.. وهالشي الي ريح علي واااايد.. وقدر علي يطلع لجاسم سفره علاج لألمانيا بس بعد رمضان.. والدكاتره طمنوهم على حاله جاسم انها مستقرة بس يحتاج لعلاج طبيعي مكثف عشان جيه قرروا انهم يخلونه في المستشفى لمده اسبوع..
جاسم: شو اسبوع.. روح رمسهم قول لهم ان اسبوع وايد.. ماروم تعبت.. انا صار لي ثلاث ايام ولايعه جبدي..
علي: ماشي بتم غصبن عنك احسن عشان صحتك..
سلطان: هههههههه.. الريال مل .. الريال ماشاء الله عليه راعي شغل مب متعود على القعده بتقعدونه جيه
جاسم: هيه دخيلك سلطان قول له..
علي: مااااااشي..
ام جاسم: الا جاسم ما خبرتني شو عن حرمتك؟؟
جاسم صد صوب امه : لا اتذكريني فيها.. كل ما اتذكرها اتذكر انها هي السبب في كل الحزن الي انا فيه ..
ام جاسم: ماعليه سامحها تراها في النهايه ام عيالك .. عشان خاطر هالعيال..
جاسم: انا محد كاسر ظهري غيرهم
محمد: شووو.. بترد حرمتك.. انا ماروم امنعك ولا اقول شي.. ترا انت ريال وعارف قرارك.. بس عيال لو حتى كانو مب عندك تروم تقوم فيهم ولو تشلهم عندك بعد احسن لأن الي مثل امنه ما تصلح تكون ام..
جاسم نزل راسه لأنه يعرف ان كلامهم صح.. بس هو نفسه دايخ مب عارف شو يسوي..
ام سعيد: شوفيكم الريال مريض وتعبان اتعورون قلبه.. ماعليكم ترا عياله ومرته في بيت اهلهم.. مب في الشارع.. ويوم بينش جاسم بالسلامه ذاك الوقت كل شي بالعقل بينحل.. وخلني اخبركم شي.. عشان افرحكم فيه..
غزلان: قولي يميي من متى وانا ودي اسمع شي يفرح..
بوسلطان: لا خلني انا بقول..
سلطان: شو السالفه؟؟
بوسلطان وهو يطالع وداد وسلطان بخبث ويضحك.. : شو رايكم انخلي الخميس هذا قبل سفر بوسعيد للعمره ملجتكم.. لأن نحن قلنا في رمضان وها رمضان يانا..
سلطان نش ويلس حذال ابوه وحط ايده على راس ابوه:لا ابوي مب مسخن.. نزل وباس راسه.. احلف..
وداد كانت محمره من الحيا ومنزله راسها والكل يضحك عليها.. عليه إخت علي.. وهند وغزلان..
بوسلطان وهو يضرب سلطان على ايده: ومتى اتحيد يالهرم ان ابوك يجذب..
سلطان: لا افا محشووووووم.. ويه اخيرا بعرس..
الكل تم يضحك على سلطان وناسته الود وده ينش يغني ويرقص لولا انه رمضان وحشمه المكان الي هو فيه مب مناسب..
في هالوقت كانت غزلان سرحانه.. ومتعذبه من داخلها .. تذكرت اللحظات الي قضتها مع خالد.. وإنها في لحظه من اللحظات كانت تتفق وياه على تفاصيل الملجه ومستانسه وفرحانه وكل هذا الحلم تبخر لأسباب غصبن عنها وعنه.. وكل هذا عشان ترضي أهلها وأهله.. وتدوس على حبها وقلبها وتتخلى عنه عشانهم.. ما تقدر تنكر إنها لازالت رغم هالفتره الي مرت انها تعيش على ذكراه وانه بعده يطري على بالها وتحن له.. بس كل ما تذكر انه صار ملك وحده ثانيه تطرد هالأفكار من راسها .. لأنها عارفه من من حقها تفكر في انسان مرتبط مب حلوه يعني... وفي قلبها متحسره انها فارقته وتصبر نفسها واتقول الحمد لله على كل حال.. وتذكرت إبراهيم.. وحبه لها.. لكن خموله صوبها مخوفنها انه نسى حبها.. تمت على هالحال لين ما ردت البيت..
....
وطبعا تقرر ان الخميس يكون ملجه سلطان ووداد ان شاء الله والأحد سفر هند وعلي وبوسعيد للعمره.. وكانو طبعا اهل علي رادين بيتهم من بعد ما كل شي رد طبيعي.. وعلي مب طايع يقول لجاسم عن شخصيته الأصليه الا يوم جاسم يرد البيت.. وجاسم احتشر انهم الا يطلعونه يوم الأربعا عشان يحضر الملجه.. لأنه بهالجو العائلي الكبير مستحيل انه يفرط فيه ويترك أي لحظه ممكن تجمعه معاهم..
=-=-=-=-=-=
خالد تذكرونه.. اشك.. خالد مثل ما عرفنا انه ملج.. لكنه لازال على ذكرى غزلان وحبه لها.. وكل شوي يلوم أمه وأبوه انهم هم السبب في حرمانه من هالحب.. وانه خذا مرته الحاليه غصبن عنه بس عشان يرضي أبوه وندم ليش انه ما واجههم.. اه يا غزلان لو تدرين بحالي كيف..
=-=-
واعذابي كل ما فيني جريح..
واعذابي كل جرح بي يصيح..
ياهموم الكون هلي وأرحلي..
واتركيني عن همومي أستريح..
هم قلبي .. هم حبي والعنا
والجروح بكل يوم تستبيح
الزمان يخون والغالي يخون
لعنبو دنيا غديت إبها ذبيح
ذي حياتي يالحكي عنها تطول
وذي همومي جعلها تلتقي السميح
ربي اللي خالق الكون الوسيع
ذا رفيق وذا حبيب وذا نصيح
الحبيب الي صار لك صعب المنال
كيف تلقى لك حبيب وتستريح
والعذاب إن صار أصعب ما يكون
ضاق بك كون تحسبه الفسيح
والطبع لا صار يفرض لك سكوت
كيف أقول وكيف أعلم وكيف أبيح
خوفي إن طبعي تطول به السنين
وخوفي إني لا وقفت أرجع أطيح
ياهموم قلبي ما بعدك هموم
ياهمومي كل ما فيني جريح
للشاعر: محمد بن عبدالرحمن البراهيم
=-=-
عبدالله: لاحووول يا خالد.. وبعدين لين متى بتم على هالحال.. ترا في ذمتك حرمه ومسؤول عنها وهي صاحبة قلبك لازم تكون
خالد: بس يا عبدالله ماقدر اتخيل في لحظه حياتي كنت متصورها بطريقه ثانيه ينجلب الحال بيوم ليله ماقدر اتحمل
عبدالله: شوف يا خالد .. هالبنت الي ماخذنها لا تظلمها على حساب ماضي كان في حياتك.. ترا هي ما وافقت عليك إلا لأنها تبا الإستقرار ودام انك بتعذبها بحياتها وبتم تفكر بغيرها اكيد بتعذبها .. عيل ليش خذتها بالأساس بس عشان يقولون ان خالد ماخذ بنت فلان وفلانه ماخذه ولد فلان .. واتييب عيال.. بس هذا هو مفهوم الزواج..
خالد: انتو ليش ما تفهمون..
عبدالله وهو يقاطعه: لا تقول ما تفهمون.. كافي وحده ظلمتها وياك ودرتها عسب هلك ورضاهم .. واحين خذت وحده ثانيه فلا تظلمها.. ولا تنسى فإنما أنتم محاسبون..
خالد نزل راسه ومب عارف شو يرد على عبدالله وعارف ان كل كلمه يقولها عبدالله صح.. بس حاس نفسه ضايع مب عارف شو يفكر بالضبط.. بقلبه ولا عقله.. ولا يشغل الإثنين سوى..
=-=-=-=-=
يوم الثلاثاء..
الصبح.. كالعاده الكل سار دوامه.. وعلي طبعا مخيم عند جاسم مايرد البيت إلا للضروره.. وكان علي طبعا عايش في بيته يعني ظهر من بيت خالته.. وغزلان كل يوم تحشر محمد بإتصالاتها عسب موعد الأكل والجدول.. مبهدله عيشته.. بس محمد راضي بهالشي لأنه مقتنع انه يضعف ويخفف من وزنه..
وداد راحت الدوام كعادتها.. ويالسه تراجع اوراقها سمعت دق على الباب رفعت راسها.. وشافت ساره.. مع انها تشتغل معاها في نفس المكان الا انهم يتلاقون بالنادر جدا.. وماشافتها من فتره لأن ساره كانت ماخذه اجازه عشان الحادث وتوها راده.. تفاجأت وداد لمنظر ساره .. مختلفه تماما.. حتى لو انه رمضان كانت ساره في اخر كشختها بس هالمره غير... حجابها كامل.. وماحاطه شي بوييها.. ابتسمت لها وقالت لها تدخل..
ساره: كل عام وانتي بخير..
وداد: وانتي بخير.. سلامات سمعت انج سويتي حادث وخذتي اجازه..
ساره: هيه.. الله يسلمج.. اشحالج؟؟
وداد: والله بخير.. شو هالمفاجأة يايه عندي؟
ساره: والله بصراحه انا يايه لموضوع
وداد: خير..
ساره: انا يايه اعتذر عن كل شي ضايقج مني... وكل ضرر سببته لج..
وداد: افا عليج يا ساره حنا خوات مابينا هالرمسه..
ساره: تسلمين.. وانا الحمد لله ملجت.. وان شاء الله عرسي بعد رمضان.. لازم تحضرين..
وداد: أكييييد افا عليج.. بس انتي لا تنسين البطاقه..
ساره: اول الناس ما انساهم..
وداد: تسلمين لي..
ساره: على العموم.. استسمحي لي من اختج بعد.. جان تطاولت عليكم ولا شي.. ترا ها شيطاني الي تحكم بي.. سامحوني..
وداد: مسموحه الغاليه..
ساره: يلا انا بعطلج عن شغلج وبسير اجابل شغلي مع السلامه..
وداد: مع السلامه. بعد ما ظهرت سلامه.. سبحانه يهدي من يشاء ويظل من يشاء..
=-=-=-=-=-=-=
في المدرسه..
غزلان: شوفي لطوف.. انتي هاتي الهدايا وانا بسوي اللعبه والأسئله.. وحصو عليها الشرح..
حصه: خلاص اوكي..
لطيفه: اوكي..
غزلان: حصوو .. حضري عدل الدرس.. ولا تنسين اتسوين لهم مراجعه للدرس الي طاف..
حصه: ادري مجهزه كل شي ماعليج ان شاء الله بيطلع احلى درس درسنا الي بنشرحه..
لطيفه + غزلان: ان شاء الله
=-=-=-=-=-=
جاسم كان ملان في هالوقت لأن علي سار يتابع شغله.. ومحمد طبعا رد للدوام فتم روحه.. شل ملفه الي محطوط جدام ريوله وتم يطالعه.. ويشوف فيه.. فجأة فج عيونه تم مبهت.. رد يطالع مره ثانيه وثالثه ورابعه.. لين ما تأكد من الي شافه..
أنا كيف كنت غافل عن هالشي.. والله اني غبي.. ههههههههه.. جسوم انت اصلا من يومك غبي لا تعرف تختار حرمه ولا تعرف شي.. شي طبيعي يعني اكون غبي.. بس مب مصدق الي اشوفه معقوله.. كيف جيه.؟؟
تم يطلب الممرضين على الجرس.. ودش عنده الممرض .. : روح بسرعه ازقر دكتور علي بسسسسسسسرعه
الممرض ربع سار ينادي على الدكتور علي عشان يروح عند جاسم.. علي من سمع الممرض زاغ.. تحسب شي طايب اخوه.. استأذن من الطبيب المسؤول عنه وسار الجناح عند اخوه بسرعه.. ودش عنده.. شافه يالس ما بلاه شي.. استغرب..
جاسم: تعال ابغيك في سالفه..
علي جرب من جاسم ويلس عنده: خير طيحت قلبي..
جاسم :لا والله.. يابو قلب رهيف.. جب ولا كلمه
علي: خييييييييبه شو الي جلبك علي..
جاسم : معلوم بنجلب عليك.. يا علي بن سليمان جاسم .. ولد بوجاسم..
وقتها استوعب علي ان جاسم عرف عنه.. نزل راسه وتم يضحك.. وجاسم ضربه على راسه بالقو.. : ارفع راسك لا اشل لك راسك بهالسجينه الي عندي..
علي: خيبه مجرم..
جاسم وعيونه مزغلله من الدموع: معلوم بستوي مجرم دامك تبا تحرمني من وجودك.. والكل نفس الشي.. حسابكم عسير عندي.. وحضن أخوه بقو.. ونفس الشي علي.. سامحني ياخوي.. انا السبب..
علي تم يطبطب على ظهر اخوه: افا بومحمد.. ماهقيته منك تصيح.. بوالشباب يصيح.. افا..
جاسم وهو يضربه بالقو: بالملعون ليش ماقلت لي؟؟
علي: خيبه.. مب ايد..
جاسم احيييييين بتنكسر ايدي انا متأكد..
علي: بسم الله عليك..
جاسم: لا اتكسرت ايدي بتعالجها يا دكتوووووور علي..
علي تم يطالع اخوه ويضحك له.. مب مصدق عيونه.. احين حس ان جاسم هو اخوه مب ربيعه مثل ما كان متوهم.. حس ان كل شي رد طبيعي .. احس ان الله وفقه في حياته.. وهالشي ريح بال علي وااااايد.. وجاسم اكثر..
جاسم: علي سامحني.. ادري انا..
قاطعه علي: جب ولا كلمه زايده لا اخليهم ينومونك اسبوع زياده..
جاسم: حاضر دكتور..
علي: يلا ضيعت وقتي قلت احين عنده شي..
جاسم: ماعليه انت خلص دوامك وحسابك بعدين عسير..
علي: عصير ولا عسير.. هاهاااااي..
جاسم: بايخه.. يلا برع من غرفتي..
طلع علي وهو طاير من الفرحه مب مصدق الي صار له.. اتصل في محمد وقاله عن الي الي صار وهالشي فرح محمد زود.. خلاه صدق صدق يستانس.. اه يالدنيا .. واخير الدنيا ضحكت بويهي.. ماباقي غير شي واحد وتكتمل حياتي.. هند.. ياجعل ربي يهديج وتوافقين.. ياحلاته سلطان مستانس.. ووداد اشحلاتهم.. مب انا .. اففففف.. مشكله العناد.. انا بسير اعتمر خصوصي عشان ادعي ان الله يشفيج من هالثقب الي مادري من وين طلع لنا.. عشان غصبن عن ويها اتوافق.. ياربي كيف احبج واموت فيج.. علي الدنيا ما كانت شايلته من الفرحه كان يشتغل بهمه ويعطي كل الي يقدر عليه ويسولف ويا الكل.. وشو طلب من الدكان اييبون كرتونين عصير وتم يوزع على الموظفين على اساس اونه قومه اخوه بالسلامه.. ويروح عند جاسم ويسولف وياه ولا كأنه في يوم من الأيام كان على خلاف ويا اخوه وانهم انحرموا من بعض لفترة..
=-=-=-=-=
الكل خلص داوماته ورد البيت.. ومحمد من وصل البيت كان مستانس من الخبر الي سمعه من علي.. قال لازم يبشر هله..
محمد: السلام عليكم
أمه وأبوه: وعليكم السلام..
محمد من بعد ما باس راسهم .. يلس حذالهم..: بخبركم سالفه.. بطيرون من الفرحه ..
أم جاسم: قول ودي أفرح..
محمد: جاسم عرف ان علي اخونا.. واستااااانس وردت العلاقه من بينهم مثل ما مفروض اتكون..
ام جاسم: محمد ترا انا اعرف حركاتك عن الجذب..
بو جاسم وهو يربع الجريده: هذا محمد من صغره يجذب بس عشان يفرح قلبي وقلبج..
محمد : هههههههه.. شوفيكم انا صايم كيف اجذب.. والله حلفت لكم ان جاااااسم عرف وهو وايد زين ويا علي احين.. ولا بعد اعتذر منه..
ام جاسم: واعليه ولدي ادريبه قلبه كبير كيف بينسى أخوه..
بو جاسم: ربي يحفظكم ولا يرد يفرقكم..
محمد: آمين.. شو مب ناوين اتسيرون عنده اليوم ولا شو السالفه؟؟
بوجاسم: لا أكيد.. بس كنا نترياك عشان نروح سوى..
محمد: خلاص.. كلها ساعه وانا بجهز وبنسير..
بوجاسم: ننتظرك..
=-=-=-=-=
في بيت منى..
أم عارف: وبعدين وياج انتي.. ألف مره قلت لج قعدي ..
منى: يامي انزين رمضااااان واخواني خاطرهم في كيك..
أم عارف: ماعليج منهم يدلعون هاييل.. خلج منهم.. وسيري جابلي دروسج.. أباج اتخلصين ثاني ثانوي وثالث وتدخلين الجامعه الي تبينها..
منى: فديتج والله.. بس صدقيني انا مذاكره وباقي لي شوي.. وهالكيك ما بياخذ من وقتي وايد..
عارف: ماشاء الله متيمعين في المطبخ.. شو مسوين لنا اليوم؟؟
منى: شوف اذا ما شفت اليوم حلويات على الفطور لا تحرج ترا امي ما تخليني اسوي شي..
ام عارف: لا ماشي.. يلا جدامي سيري ذاكري..
عارف: صدقها امي.. وراج امتحان..
منى: عاد الي يسمع امتحان نهائي.. إلا هو تقويم..
عارف: ليش ها بعد مب إمتحان؟؟
منى: مادري عنك؟.انت الي تعده مب امتحان ما تذاكر فيه..
عارف: احم احم..
ام عارف: اسكتي عني منوو والله اخوج ها مشوب راسي.. شكله بيرسب..
عارف: ماعليكم انتوا بييب أحسن درجه في المدرسه انتوا شو بلاكم مستعيلين..
منى: انشوووف
وطلعت منى من المطبخ وهي مرتاحه .. تذكرت يوم امها كانت عايشه وياهم.. وحست إن مرت ابوها تعيشها الحين نفس الدلع الي كانت عليه يوم صغيره.. الله يرحمك يابوي.. لولاك جان انا بعدني في عذاب.. ودخلت غرفتها.. وفتحت لها الكتاب وتمت تذاكر.. وكان عالصوب الثاني محطوط مجله كل الأسره.. يوم ملت من المذاكره نشت اتييب المجله اتشوفها .. شافت على الغلاف مكتوب عن شخص يحتوي المجله حوار معاه.. إسم أحمد.. تذكرت أحمد.. ياني تولهت على هالإنسان وسوالفه.. والله ودي اشوفه من زماااااان ما شفته ولا ادري عنه.. ليش ما اسير عندهم باجر.. بس.. بس المشكله ماعرف يمكن يكون في بيت عمه.. مادري هالإنسان اهتمامه فيني وجاذبتيه الي احس بها غير غير.. اوه انا بشوف افكر.. صايمه وجيه.. اعوذ بالله..
شلت تليفونها واتصلت في ناصر: الوو
ناصر: هلا والله بالقاطعين.. هلا والله بالي نسونا..
منى: لاتقول جيه والله ما نسيتكم بس تدري رمضان ومشاغله..
ناصر: ماعليه انا قلت عندي اخت بتسأل عني .. اشوف ماشي..
منى: لاتقول جي ترا والله أزعل..
ناصر: لا خلاص خلاص.. اسف.. اشحالج؟؟ شو الدراسه؟؟
منى: والله تمام.. والدراسه ماشي حالها.. انت شو المهم .. ثانويه عامه تراك..
ناصر: مب ثانويه هاي الي انذليت عليها كل حد من كل صوب قالي جيه.. مادري دكتوراه باخذ..
منى: ماعليه بس بعد مب معناته ما تذاكر.. اونه مب محسوب..
ناصر: لا ماعليج بذاكر..
منى: ماعليه بنشوف نهايه السنه كم النتيجه بتكون..
ناصر: ان شاء الله..
منى: يلا اجلب ويهك بذاكر علي امتحان..
ناصر: بعددد..ماعليه.. تعالي بيتنا وانا اراويج..
منى: بيي باجر..
ناصر: زين والله اوكي..تعالي بيتنا عيل.. وتعالي الخميس لأن ملجه سلطان ووداد
منى: احلف.. مبروووووك.. بس ما بيي وداد ما عزمتني..
ناصر: لا اكيد بتعزمج..
منى: ماعليه لو ما عزمتني تراني معزومه من صوبكم يعني بيي..
ناصر: ان شاء الله..
منى: يلا مع السلامه.
ناصر: مع السلامه
=-=-=-=-=
من الجهة الثانيه في الكلية..
الشباب من مللهم كانو يلعبون بلي استيشن ومسوين حشره.. وأحمد كان الدور وياه انه يلعب بس خسر وعصب تم يتحرطم.. : ماشي اتغيرون اللعبه مابا العب ها..
فؤاد: لاحوووول.. يلا عاد.. تعال خل انكمل..
أحمد: مابا.. شو رايكم نلعب ورقه.. ترا صرت حريف فيها..
داوود: انا موافق..
طلال: وانا بعد..
فؤاد: أمري لله اوافق..
والكل تيمع عشان يلعب ويا أحمد.. وتذكر أحمد يوم منى كانت ياسه جدامه كيف كان يطالعها ويشوفها.. فديتها والله وفديت ويهها .. وينج تولهت عليج..
طلال: حووووو بتم تخبص ما بتلعبنا شكلك.
أحمد: اوه.. سوري
داوود: العاشق الولهان..
أحمد صد صوبه واطالعه بنص عين وسكت عنه...: انا اراويك ماعليه..
داوود: اوكي..
الشباب تموا يضحكون عليهم ويكملون لعب.. وتموا يلعبون لين ما نادوهم للتجمع عشان الإفطار ودروا كل شي وتمسحوا عشان يستعدون للصلاة مره وحده.. ونزلوا صوب صالة الإفطار..
=-=-=-=-=
في بيت بوسعيد..
وداد كانت يالسه ويا أمها وهند وغزلان يرمسون شو بيسوون يوم الملجه.. مع انها بتكون عائليه ومافيها حد غريب..
هند: انزين شوفي بنطلب البوفيه من صدف..
وداد: مادري بس جنه سلطان قالي مكان ثاني..
هند: بس صدف شغلهم حلو.. أحيد سرت ملجه ربيعتي كانو يايبين بوفيه من صدف كان لذيذ ومرتب واااايد
وداد: بقوله وبشوف..
غزلان: شو بتلبسين؟؟
وداد: باجر بسير الستي ولا وافي ويا هند وبندور..
غزلان: وانا؟؟
هند: وراج مدرسه..
غزلان: اففففففف.. لو ماكان علي درس الجيلوجيا جان بغيب بس المشكله ماروم..
هند: إلا إقول كلمتي منى؟؟ .. ترى سلطان بيزعل جان ما عزمتوها..
وداد: زييييين ذكرتيني اصلا هو موصيني بهالشي..
غزلان: ياربي مابا منافسين..
هند: هههه مشكله الغرور..
شلت وداد تليفونها واتصلت على منى..
وداد: الوو..
منى: هلا ومرحبا بالعروس..
وداد استغربت كيف منى عرفت.. قالت يمكن سلطان قايل ولا شي.. : اهلين.. بس منو قال اني عروس..
منى: بعد .. اخوي ناصر ما يقصر.. بعد مب ناويه تعزميني ها.. ؟؟
وداد: هههههه اافا والله ظلمتيني انا متصله عشان اقول لج.. وانا يادوب امس قرروا بهالملجه .. حالي من حالج تفاجئت..
منى: يلا ربي يوفقج ان شاء الله.. ويهنيج.. ويسعدج دنيا وآخره.. قولي آمين..
وداد: هههه آمين..
ومنى: ويفكج شر الحاسدين ان شااااء الله..
وداد: ههههه تصدقين احس جني ارمس يدو..
منى: ههههه.. حرام عليج بعدني شباب.. بس مقبوله لأنج عروس ما بقول شي..
وداد: غصبن عنج اصلا ما تقولين..
منى: ويا ويهج يالخقاقه.. اشحالج؟؟ واشحال امج.. وخواتج؟؟
وداد: كلهم طيبين الحمد لله وانتي شو علومج وشو الدراسه معاج؟؟
منى: والله كل شي بخير وماشي على اصوله..
وداد: يالله الحمد لله.. اسمحيلنا غثيناج.. بس عاد خليني اشوفج الخميس..
منى: ان شااااء الله..
وداد: يالله مع السلامه..
منى: مع السلامه..
وداد: وحليلها والله هالبنت طيبه..
هند: هي والله انا بعد وااايد أحبها..
غزلان: ودادووو.. حجزتي صالون؟؟
وداد: لا فكرت فيها قلت ما يحتاي ليش.. اللهم بسوي سشوار بتصل وحده بتيي البيت بتسشور لي.. والمكياج بتصل لوحده من رباعتي هاي ماشاء الله عليها خبيره اتعرف يعني.. وبخليها هي الي اتمكيجني..
غزلان: عاد مب اطلعج سباله اتخرعين الريال من أول يوم..
هند: الي يسمعج يقول انه اول مره شايفنها..
تموا يضحكون..ولكن غزلان كل ما لها تزداد ألم وحسره.. وتتذكر خالد.. نشت من عندهم ودشت غرفتها بس ما بينت لهم الي في داخلها عشان ما يتضايقون ويلست مجابله الجامه وتتطالع الجامه والرطوبه مغطتنها وطالعه مبلله.. ومن غير لا تحس كتبت بصبعها إسم خالد على الجامه وتمت تتطالع اسمه ونزلت دمعتها.. وبسرعه قاومت وسارت الحمام ومسحت ويهها وفتحت لها القرآن عشان تطرد هالتفكير الي في راسها..
ومن بعدها اتصلت وداد في سعيد عشان اتقول له هالخبر.. وتضايق طبعا لأن هاللمه الحلوه فاتته..
سعيد: يعني انتوا ما فكرتوا تملجون غير يوم انا رديت استراليا
وداد: والله مب بيدي انا.. هم الي قرروا فجأه.
سعيد: ما يخصني يوم ابرد اباكم تملجون من أول ويديد..
وداد: حلوه هاي..
سعيد: هي عيل شو..
هند: عطيني خل أرمسه.. مرحباااااا
سعيد: اهلا بتوأمي العزيز..
هند: هلا وغلا .. يا مسهلا..
سعيد: علومج؟؟؟ اخبارج؟؟ شو دنياج؟؟ شو صحتج؟؟ عساج بخير..
هند: خيبه خيبه.. حبه حبه.. عشو مستعيل..
سعيد: ابا اطمن عليج وعلى اخبارج..
هند: تطمن دامك بخير انا بخير..
سعيد: عسى دوم.. وين سي ان ان..
هند: سارت الغرفه وراها باجر شرح ومتلعوزه وياه..
سعيد: هيه وانتوا من وراها اتكلموني ماعليه.. انزين وشو اخبار جاسم احسن؟؟
هند: هيه الحمد لله.. تحسنت حالته..
سعيد: الحمد لله.. وشو عرف عن علي؟؟
هند: لا هو قال انه ما بيقول له الا يوم يظهر من المستشفى..
سعيد: زين زين..
ومن بعد ما كملوا سوالفهم معاه بندوا عنه.. ونزلوا عند أمهم تحت يساعدونها تجهز الأكل للسحور عشان الفجر يسخنون الأكل..
=-=-=-=-=
في المستشفى..
كانت ام سعيد وبوسعيد وبوجاسم وام جاسم وعلي ومحمد وعليه عند جاسم.. كان وااااايد مستانس وميلس علي حذاله وقابض بإيده ويسلوف.. وام جاسم وااااااايد كانت مستانسه لهالجو.. أخيرا عيالها اجتمعوا..
عليه: روح روح.. نسيت عمرك كيف يوم تلعب في الطين.. شكلك كان اعوذ بالله..
جاسم: لا تخليني افضحج وافضح شعرج المكشكش.. ولا اللبس.. ياربي شو كانت تلبس هالبنت معنقشه..
عليه: على الأقل البس شي.. انت حتى نعال ما كنت تلبس جنك عيال فقارى..
علي: ههههههههه.. لا انا اذكر يوم محمد لبس قميص جاسم.. شو سوى جلب الدنيا فوق تحت من صياحه اونه قميصي ومادري شو.. اسميك والله
جاسم: هيه قميصي شو تباني اخليه يلبسه.. وععع
محمد: من حلاته اصلا.. لو ما امي لبستني ولا انا شو ابا في البراغيث الي فيه تحجج جسمي بكبره
ام جاسم: لعلي ما نحرم من هاللمه واليلسه طول العمر وياكم..
جاسم : ربي يطول من عمرج انتي وابوي ويخليكم لنا ذخر .. والله لا يعود ذيج الأيام..
بوسعيد: يلا ربي يهنيكم
ام جاسم: يما جاسم شو بتسوي على موضوع آمنه..
جاسم: امي انتي لازم اتغثيني بطاريها.. ماباها عفتها..
عليه: جاسم وعيالك شو ذنبهم يعيشون بعيد عنك.. وصدقني آمنه ندمانه احين على كل الي سوته.. بس تشوفها احين تتغلا تباك انت اتردها لأنك طردتها..
جاسم: آمنه تترياني.. شو تعلموني في حرمتي انتو.. انا عايش وياها عمر وادريبها كيف. امنه ما تباني.. ما وافقت علي الا يوم ظهر اسم ابوي في السوق مع الشركه.. ولا قبل هالشي ولا فكرت فيني..
علي: وانا بعد اقول جي.. بس عشان عيالك حاول..
بوسعيد: صدقهم هلك يا جاسم.. عشان هالعيال المساكين..
جاسم وهو يبتسم لهم.. ان شاء الله بس اطلع من المستشفى بردها.. شو رايكم؟؟
ام جاسم: ها ولدي جاسم الي اعرفه.. ربي يخليك لي..
=-=-=-=-=-=
الساعه 12
كانت غزلان تتجهز لدرس الجيولوجيا الي مفروض يشرحونه اليوم الثاني لأن المديره قالت إنهاراح تحضر هذي الحصه وكانت حصه متفاعلة وايد ومتشوقة انها اتقدم كل الي عندها جدام عمتها ام عادل عشان اتبيض الويه ونفس الشي كانت غزلان.. في هالوقت كانت غزلان ترمس لطيفه عشان تتفق وياها
غزلان: انزين شوفي لطوف انتي عقب ما تسألين تسحبين اسم من الأسامي الي عندج وتردين تسألينها سؤال..
لطيفه: خلاص أوكي. بس اول شي تأكدي من حصه انها تركز علىالجزئية الي نحن قلنا بنسأل عليها..
غزلان: هيه احين بتصل فيها وبقول لها..
لطيفه: خلاص اوكي..
بندت غزلان عن لطيفه واتصلت في حصه على طول.. : الوووو حصوص
حصه: هلا والله بالمجتهدة.. إشحالج؟؟
غزلان: بخير الحمد لله.. المهم ماشي وقت رصيدي بيخلص..
حصه: مشكله .. يلا شو عندج بسرعه..
غزلان: شوفي انا كتبت الأسئلة على اساس درس السلم الجيولوجي عن العصور الأولى..
حصه: هيه اوكي..
غزلان: يعني اباج اتركزين على هالجزء عشان يوم نسأل يكون كمراجعة
حصه: اها. اوكي..
غزلان: يلا جلبي ويهج..
حصه: ههههه.. باي
بندت غزلان وتمت اتقصقص الهدايات واترتب الأوراق.. ومن بعد ما رتبت الأغراض سارت ترقد لأن الوقت تأخر.. بي تذكرت شي بسرعة شلت التليفون واتصلت على محمد بس عاد اتصلت رنه..
محمد: ألو ها ام رنه شو عندج..
غزلان: ههههههه ماعندي رصيد شو اسوي..
محمد: لا والله .. يلا شو تبين متصله تالي الليل
غزلان: متصله اسلم عليك.. شو عندي مالت انت مب ويه حد يتصل عليك..
محمد: يلا عااااااد غزوووله..
غزلان: هيه جي اوكي.. يلا نبدأ.. اليوم على الإفطار شو كلت..
محمد: تمر ولبن وفطيرة خضرا حبتين وعصير برتقال..
غزلان: انزين وبعد صلاة التراويح..
محمد: عصير برتقال.. وسرت ركضت عند البحر..
غزلان: وبعدين
محمد: ههههه.. افف الله يعيني اليوم.. رحت عند جسوم..
غزلان: لا يكوووووووووون؟؟
محمد: لا وانا اتجرأ اصلا امد ايدي علىالحلاوة.. بس
غزلان: انا هالبس الي ماحبها.. بس شو؟؟
محمد: حبه باتشي..
غزلان وهي تصرخ .. : يا قليل الأدب.. يالي ما تستحي.. خلاص خلاص.. اف انت خربت كل شي.. تدري كم سعرة حراريه في هالحبه.. تدري ولا لا.. يعني ولا كنك ركضت ولا كنك سويت شي..
محمد: انا قلت الليلة هذي ما بتعدي على خير..
غزلان: لازم ما بتعدي على خير يوم انك انت ويا ويهك اقول لك سو شي اتسوي لي عكس هالشي..
محمد: آآآآآآآآسف..
غزلان: ماشي اسف .. خلاص محروم من السحور..
محمد: خيييييبه ما بغيت رجيم هذا الي بيحرمني من السحور.. انتي شكلك ناويه تذبحيني.. روحي جذا مب متحمل .. تبيني ما اتسحر واصوم باجر.. خوش خوش..
غزلان: اقول .. يلا باي انا بنام..
محمد: غزووووووله يلا عاد بلا دلع.. ترا والله بضايج..
غزلان: خلاص خلاص.. بس وعد ما تعيدها..
محمد: ما بعيدها..
غزلان: انت بس خل يعتدل جسمك .. ما بقول لك شي .. كل شي تباه وفي خاطرك كله بس بإعتدال..
محمد: خلاص من عيوني..
غزلان: تسلم .. يلا احين ترقد فاهم..
محمد: فاهم عمتي..
غزلان: تصبح على خير..
محمد: وانتي من أهله..
بندت غزلان عن محمد ونامت.. اما محمد فتم سرحان.. أول مره يهتم فيه شخص بهالطريقه.. ويحاتيه .. حس عمره غير .. حس ان في شي يديد في حياته.. في شي مختلف كليا.. نفسيته تحسنت وكل شي.. حس انه خلاص يقدر يحقق حلمه إنه يعرس حاله حال باقي الناس.. وتم يتخيل عمره وهو اضعف عن جيه.. ويوم بيخطب منى.. أكيد بتوافق علي وما بترفضني وقتها.. وينج عني يا غزووول من زمان..
..
=-=-=-=-=-=-=
يوم الأربعاء الصبح
=-=-=-=
نشت حصه على صوت رنة التليفون.. شافت على الشاشه مكتوب .. حبيب قلبي.. ردت عليه بسرعه..
عادل: صباح الخير يا أحلى إنسانة في الدنيا..
حصه وهي تبتسم: صباح الورد والجوري..
عادل: كيف أصبحتي؟؟
حصه: الحمد لله دام اني اول صوت اسمعه من انش صوتك..
عادل: اااااه عيل شو اقول من صوتج انتي الي معذب كياني.
حصه: عمري والله .. الساعه كم احين؟؟
عادل: 7.00
حصه: شووووووووووووو؟؟ ابيييييه تأخرت.. لازم اتلبس احين برهوم بياكلني..
عادل: خلني انا بوصلج..
حصه: هههههه.. لا والله.. مابا عالصبح وشكلي أرف انت اتوصلني
عادل: ترا بعيش عمر وياج وبشوفج كل صبح وليل وعصر وظهر.. اااااه متى بيي هاليوم..
حصه وبخجل: هههههه.. بس عقب غير.. واحين غير..
عادل: فديت الغير.. المهم ما بطول عشان تسيرين تتجهزين بس قلت لازم اسمع صوت عمري قبل كل الناس..
حصه: ياعمري والله..
عادل: يلا حطي بالج من عمرج.. واباج تبدعين اليوم جدام امي فاهمه
حصه: ان شاء الله..
بندت حصه عن عادل ونشت تلبست على السريع ولمت أغراضها كلهم.. وطلبت من الخدامه اتساعدها في شل الأغراض وتحطهم في الموتر.. وغزلان طبعا كانت تتريا حصه لأنها تأخرت عليها.. وركبوا الموتر عشان يروحون المدرسة.. وغزلان في هاليوم هي الي كانت ما تعبر إبراهيم ولا تتطالع صوبه ومحتشره في الموتر كل شي ترمس ويا حصه ويسولفون عن الدرس الي بيشرحونه ويضحكون.. وفجأة طرت غزلان سالفه محمد لأن حصه تدري ان غزلان تراقب برنامجه الغذائي..
غزلان: ههههه خل اقول لج حصوو..
حصه: قولي لي..
غزلان: أمس فليل متصله في محمد بهدلت حياته كرهني..
حصه: بعد شو سويتي فيه المسكين .. ها ابتلش فيج..
غزلان: بهدلته عشان كل حبة كافي .. لو حبتين جان بروح بيتهم وبدوس ببطنه..
حصه: وحليله .. يلا نزلي وصلنا..
غزلان نزلت بسرعه وشلت أغراضها.. وحصه توها بتنزل قبضها إبراهيم من إيدها.. : منو محمد؟؟
حصه تفاجأت في البداية بس بعدها استوعبت كلام إبراهيم بغت تمووت ضحك.. : اونك ما تفكر فيها.. مابقول لك.. انت شلك؟؟
إبراهيم: حصووو .. لا تخليني اخليج اتردين البيت مشي..
حصه: عادي المشي رياضه..
إبراهيم: تستهبلين ماعليه انا اراويج حصوص..
حصه: ههههههه
وظهرت ولحقت غزلان عشان يلحقون على الحصه الأولى.. وكانو شالين وياهم الأغراض والحصه كان عليهم الشرح في أول حصه.. دخلوا الصف شافوا نوال واقفه وتتفلسف.. ماعبروها وتموا يرتبون أغراضهم لأن المدرسه يايه والمديره وياها..
حصه: انزين انتي حطي اغراضج ويا لطوف ذاك الصوب عشان انا اعلق اللوحه مالتي والمجسم الي سويته..
غزلان: اوكي.. بس بسرعه لأن شفت ابله هنادي في الدرب..
لطيفه: هذوم وصلوا..
والبنات طبعا من سمعوا ان المدرسه وصلت كلهم ساروا مكانهم وبسرعه يلسو.. وفي هالوقت نشت نوال وصدت ورى صوب البنات وتمت تتطالعهم بنظره غريبه استغربت منها غزلان بس تجاهلت لأنها كانت مشغوله ...ودشت المدرسه وياها المديره والكل نش يرد السلام.. وطلبت المدرسه من حصه تبدأ في الشرح..
حصه: السلام عليكم بنات..طبعا اليوم ببدأ في شرح جزء بسيط من الدرس.. بس قبل لا أبدأ راح أقوم بمراجعة سريعه للدرس الي طاف.. أول سؤال يقول.. ..
بدت حصه تسأل وتطلب من البنات يجاوبون كانت كل ما تسحب إسم من الأسامي كانت البنت اتنش واتقول ماعرف وماتجاوب على السؤال.. وبس بنتين من البنات ردوا على الأسئله وهالشي أحبط حصه شوي وأربكها في الشرح وكانت المديره أم عادل.. مستانسه من حصه وقفتها وجرائتها.. وتضايقت يوم البنات ما تجاوبوا معاها.. وبدت حصه تشرح الدرس.. وكانت شله نوال ورباعتها كل شوي يقاطعونها.. عيدي مب فاهمين.. لا انتي نسيتي شي.. وكان هالشي يزيد ارباك حصه أكثر وأكثر.. غزلان تغايضت وحست انهم متعمدين يسوون هالشي عشان يضيعون الوقت ويخربون عليهم الشرح والدرس.. وكانت مع ذلك حصه تحاول اتكمل وتشرح.. وراوتهم صوره لأحفوره .. طلعت هالصوره من النت..
نوال: إنزين هالأحفوره لكم سنه بالضبط قبل..
سلامه: وشو الي خلاها تتأحفر جيه..
حصه ارتبكت من سؤالهم وتعلثمت مارامت اترد.. وغزلان كانت خلاص معصبه ومب رايمه تسكت اكثر.. تداركت الموضوع وردت عنها..: والله نحن ما دققنا على هالمعلومه بنشوفها وبنقولها لج يوم السبت..
حصه كملت شرح بس ما كانت رايمه ودها اتصيح من تصرفات نوال كيف اتقاطعها ولا ترمس ويا شلتها.. وهالشي خلا المدرسه اتنش اتوقف حصه من الشرح لأن وقت الحصه ضاع والمدرسه لازم تشرح الدرس.. وبهالطريقه قالت لغزلان انه اذا كفا وقت راح ينفذون مسابقتهم واذا ما كفى الحصه اليايه.. وهالشي أحبطهم وايد ان بعد هالتعب كله ماراموا يقدمونه بالشكل الي كانو متصورينه وهالشي الي غايض بغزلان زود من شله نوال.. والمديره كانت تدري انهم تعمدوا هالشي خصوصا من بعد ذاك الموقف الي شافته منهم بس مارامت اتقول شي ولا اتسوي شي لأن المدرسه تدري بالعلاقه الي تجمع المديره بحصه.. وراح تاخذ الموضوع على اساس الأهليه.. وراح تبرر موقف نوال ورباعتها انهم مب فاهمين ومن حقهم يقولون هالشي.. ومن بعد ما خلصت الحصه ماراموا ينفذون المسابقه.. تمت حصه اتصيح من خاطرها.. : والله حرام تعبت وحضرت وآخر شي يستوي فيني جيه.. ليش انا شو مسويه فيهم عشان يكرهوني جي..
غزلان كانت مغيضه نشت من مكانها وصدت صوب نوال ورباعتها: ربي يسامحج.. صايمه استحي على ويهج واتسوين هالشي اتخلين البنت اتصيح .. شو مسوين لج نحن؟؟ عشو غيرانه منا..
نوال: نعم نعم.. شو قلتي عيدي.. غيرانه.. هههههههه سمعموا بنات غزلان شو تقول .. غيرااانه منج؟؟ ليش بالله شو الي فيج زود اغار فيه منه؟؟
غزلان: مادري..
غزلان ماكانت رايمه تتمالك عمرها.. مسكتها حصه وسحبتها وطلعوا برع الصف.. عشان اتهديها.. ومر اليوم مثل الكابوس عليهم .. وقت ردتهم للبيت ركبت حصه الموتر ويا غزلان وكان الحزن في عيونها.. شافها إبراهيم.. تم يسألها شو فيج.. ما كانت اترد عليه..
غزلان: هاييل شله بنات من الصف خسسوا فينا.. نحن نشرح الدرس ومتعبين اعمارنا وبسببهم وقفتنا المدرسه عن الشرح عشان استهبالهم اونه مب فاهمين ومادري شو..
إبراهيم: لا والله.. وليش يسون جذا؟؟
غزلان: مادري عنهن.. متغايضات منا من يوم ما دشينا هالمدرسه.. مايحبونا مووول..
إبراهيم: حصوو.. قولي لي عنها منو هاي؟؟
حصه: ماشي بس خلاص لا ترمسون بالسالفه دخيلكم..
غزلان: والدرس كان جدام أم عادل.. وهالشي الي غايض بحصه زود..
إبراهيم وهو يصارخ: حصه.. منو هالبنت قولي لي عنها؟؟
غزلان في هالوقت تغايضت من إبراهيم .. لأنها ياسه تقول لإبراهيم الي صار ومفروض يسألها هي عن البنات بس هو ولا كأنه معبرنها ولا جنها موجوده وترمس.. وصلوا البيت غزلان نزلت من الموتر وصكت الباب بقو.. بحيث حس به إبراهيم وصد صوبها تم مستغرب.. ودشوا البيت.. ولحق حصه لغرفتها..
إبراهيم: حصووو منو هالبنت قولي؟؟
حصه: ليش تسأل ليش؟؟
إبراهيم: بس ابا اعرف منو هاي الي ما تستحي وتنزل هاللآلئ من عيون حصوصتي..
حصه: نوال وشلتها..
إبراهيم: منوووووو؟
حصه: شوفيك بطلت عيونك جذا.. نوال..
إبراهيم: وع شو هالإسم..
حصه ابتسمت له..
إبراهيم: هيه جيه اباج.. يلا غسلي ويهج وبدلي وتعالي عندي في الغرفه ابا العب وياج بلي استيشن واهزمج واضحك عليج..
حصه: لا ماتروم انا بهزمك..
إبراهيم: بنشوف يلا تعالي..
حصه: اوكي..
طلع ابراهيم وحصه على طول شلت تليفونها واتصلت في عادل.. وعادل كان يعرف بالسالفه لأنه امه قالت له وكان متضايق تم يهون عليها.. وأكد لها إنه امه مدحتها ومدحت شرحها .. لين ما ارتاحت وظهرت من الغرفه وسارت عند إبراهيم..
=-=-=-=
غزلان كانت متغايضه من الخاطر من السالفه الي صارت ومن تصرف إبراهيم.. شو فاكر عمره هالخقاق.. ها يزاتي اني حبيت اطمنه على اخته .. أو حتى اني للحظه فكرت فيه وملت صوبه.. ما يستاهل.. ابد.. وينك يا خالد فديتك والله واحشني.. ونزلت دموعها.. مستحيل في لحظه اشوف منك هالتعامل.. وكيف اشوفه من هذا الي يقول انه من سينين يحبني.. ولا يحبني ولا شي.. اكرهه اكرهه.. ليش يا زمن دوم تمشي عكس الإتجاه وحرمتني من طيبه خالد.. اااااااااااه.. ربي يوفقك مب رايمه اقول غير هالرمسه.. وفي هاللحظه.. سمعت دق على الباب نشت من مكانها بسرعة تفتح الباب.. وكان شعرها مكشوش وحالتها لله ولابسه بيجامه نوم.. فتحت الباب كان هادف الي عند الباب: اعوذ بالله متأكدة انج غزلان إختي؟؟ والله أشك..
غزلان: ويا ويهك شو عندك..
هادف: امي تزيغين والله.. تعالي تحت في مفاجأة..
غزلان: شو مفاجأته؟؟
هادف: تعالي انتي بس بالأول لبسي شي محتشم وغطي هالكشه.. اعوذ بالله انا لا عرست باخذ وحده مافيها شعر عن اتزيغني واتزيغ عيالي..
غزلان: هههههههههه .. اووووكي احين بيي
نزل هادف قعد ويا هله يتريا المفاجأة حاله حال الباقي .. مايدري شو السالفه.. وغزلان نزلت لابسه مخوره عنابيه وشيله ونزلت وياه تحت وشافت امها وابوها وهادف وهند ووداد كلهم يالسين في الصاله.. استغربت شو سر هالتجمع؟؟ .. وليش قالو لها لبسي وتغطي؟؟ تمت تسأل خواتها قالو لها انهم ما يعرفون شي بعد..

ظهري انكسر.. لا تقولون الجزء قصير ..
شو تتوقعون سبب هالتجمع؟؟
وإبراهيم.. راح يتم بتجاهل غزلان.. لين متى؟؟
وعلي من بعد هالتصالح وأموره كلها تصلحت.. راح يواجه هله بموضوع هند؟؟ ولا؟؟
وأفنان بتروم تسلب قلب سعيد ولا؟؟
ومنى.. وأحمد.. ومحمد؟؟ منو الي بينتصر في النهايه؟؟
تحياتي..