الجزء ( 15 ) : للحب عنوان

للحب عنوان
ملخص الجزء السابق: الزعل الي دار بين هند وعلي يوم سمعت مكالمته مع ساره، ومقابلة سلطان لمريم والكلام الي قالته والشك الي دار في قلبه، موافقة غزلان على خالد، وقرار ملجة حصه وعادل قبل رمضان، والسكران الي ألقوا القبض عليه شو حكايته؟؟،

==============
نشت غزلان من عند أبوها وسارت الحجره كل تفكيرها في خالد.. كيف راح تكون حياتها.؟؟؟ .. كيف راح يعاملها؟؟ .. وليش اختارها من بين البنات كلهم.. تمت على هالحال اتفكر لين ما ياها نوم ونامت..
وأما علي فحالته حاله .. مب عارف شو يسوي هند ماخذه كل تفكيره.. وده انه يكلمها بس هي ما معطتنه مجال أبدا.. ما قدر ينام ليلتها.. دخلت عليه خالته وقالت له إن بو سعيد يباه تحت في المكتب يترياه.. بسرعه طلع ونزل سار عند بوسعيد..
علي: السلام عليكم عمي..
بوسعيد:وعليك السلام.. تعال إيلس برمسك..
علي: خير عمي شو السالفه؟؟
بوسعيد: والله يا علي نحن موافقين على خالد.. ورمست ولدي سعيد توني وهوماعنده مانع أبدا.. فتروم ترد عليه احين..
علي: والله يا عمي ان خالد ريال زين وما ينعاب بشي.. وله الشرف انه يناسبكم..
بوسعيد: سلمت.. وعلى طاري السفر للعمره.. تراني حجزت لك ولهند ولي .. إن شاء الله في أول إسبوع من رمضان بنسافر.. تقريبا على تاريخ 20/10..
علي: خير ان شاء الله..
بوسعيد: اتروم اتسير احين..
علي: سلمت وماقصرت ما تامرني على شي ثاتي..
بوسعيد: لا سلامتك يا ولدي..
طلع علي من عند بوسعيد وسار غرفته وأول شي سواه دق على خالد يبشره..
خالد: هلا.. هلا بالمهلي ..
علي: الله الله شو هالترحيب..
خالد: اتصالك في هالوقت وراه شي..
علي: احم احم..
خالد: بسرعه وبدون مقدمات ابا اعرف القرار..
علي: والله القرار مادري شو اقول لك يا خالد..
خالد وبعصبيه.. شوووووووو قول بسرعه
علي: ببساطه وإختصار .. موافقين..
خالد والفرحه مب شايلته: ششششووووو .. عيد ما سمعت..
علي: كلام الملوك لا يعاد
خالد: لا حوووول.. يلا عاد انطق..
علي: انطق شو اقول.. مواااافقين.. يعني رمس هلك خل يحددون موعد مع خالتي
خالد: احلف انت بعد.. جيه بخليهم يحددون موعد ماشي الليله
علي: هههههه.. اشكثر مستعيل..
خالد: مليت ياخي من العزوبيه ابا اعرس خلاص..
علي: وحليلك ياخالد.. بتصير معرس.. ومب أي معرس بعد.. ريل بنت خالتي.. بنستوي نسايب
خالد: مب عارف شو اقول لك.. بس الي اعرفه اني بسير عند هلي أبشرهم..
علي: خلاص اوكي عيل
خالد: يلا مع السلامه..
علي: في امان الله..
بند خالد عن علي وسار عند امه عشان يبلغها ان اهل غزلان وافقوا .. واما علي فرد لهمه .. ولو انه مستانس لربيعه انه قدر ياخذ الي يباها ولبنت خالته.. الا ان فرحته ناقصه بزعل هند.. ماقدر يتحمل.. راح صوب غرفتها وتوه بيدق الباب.. الا هند فتحت الباب كانت بتظهر من الغرفه.. ومن شافت علي كانت بتبند الباب في ويهه.. بس علي مسك الباب ومنعها من انها اتبنده..
علي: هند الله يخليج خليني افهمج ..
هند: نعم شو بغيت..
علي: انزين بتمين جيه من ورى الباب تعالي في الصاله على الأقل..
طلعت هند وبندت باب غرفتها وسارت صوب الكنبه الموجوده في الصاله وقعدت عليها: ها ممكن اعرف احين شو عندك؟؟
علي: هند.. اذا بتمين على هذا الحال تراني بظهر من البيت .. ومب راد له دام انج متضايقه مني..
هند حست انه جاد بكلامه: ليش تطلع من البيت..
علي: لأني ماقدر اشوفج متضايقه من وجودي فيه
هند: لاعادي مب متضايقه ولا شي
علي: انزييييييييين.. عيل شو معناته انج تقعدين في الغرفه وماتظهرين منها ولا تاكلين ويانا ولا ترمسيني حتى..
هند: لا عادي .. انا روحي ابا جيه ومرتاحه جيه
علي: بس انتي اتصديني يعني ما تبين اتجابليني
هند: عيل شقايل انا ياسه وياك احين
علي: نسيتي بغيتي اتبندين باب الغرفه بويهي..
هند تمت تتطالعه بنظره حقد من راسه لريوله وبعدها صدت عنه الجهة الثانيه.. علي كره نفسه على هالنظره الي عمره ما تعودها من هند صوبها.. تعود على حنانها وطيبتها .. لكن هالنظره ماتعود عليها منها.. نش من مكانه وحس نفسه مطعون ومجروح.. وهو ماشي صوب غرفته وقف وهو معطنها ظهره : هند.. أنا آسف.. بس بييج يوم وبتفهمين ان الي اسويه عشانكم .. وبتعرفين علي قلبه على منو.. ويحب منو..
ودخل غرفته من غير لا يعطيها فرصه اترد عليه وترمس.. هند تمت تتطالع باب غرفته وهي مستغربه.. شو يقصد بكلامه؟؟ .. معقوله كلامه ويا ساره فيه مصلحة لنا.. كييييف؟؟ مستحيل اصلا.. ساره ماتعرفنا.. ساره مالها علاقه فينا.. آآه يا راسي .. والله احسه بينفجر.. ياربي مابا اظلم علي.. وفي نفس الوقت مب قادره اسامحه او اتقبل هالوضع.. ليش حبيته ليش؟؟
..في بيت بوخالد ..
خالد كان قاعد عند أمه يقولها عن قن قرار أهل غزلان.. والفرحه باينه على ويهه.. وأمه كانت تسوي خبز وخمير.. وهو يالس حذالها ومنصلخ من حر التنور... ومحمر.. بس الفرحه خلته ما يحس بأي حراره
ام خالد: انزين امي ماعليه خلني احين اخلص الي بين ايديه ويصير خير..
خالد: امي اقول لج وااااااافقوا.. يعني ولدج بيعرس وانتي قاعده اتسوين خبز وخمير..
ام خالد: لا إله إلا الله من هالولد ما بيخليني فحالي..
خالد: امي هاتي الخمير انا بخبز اليوم.. بسوي كل شي .. بس انتي سيري اتصلي في امها وحددي موعد وياهم انزورهم رسمي..
ام خالد: انزيييييين .. ومدت ايدها وصخت ويه خالد بالخمير.. وتمت تضحك على شكله والخمير عالق في لحيته وشواربه.. ,, روح لا اخبز ويهك..
خالد: افففففف.. ابا اعرس لاحووووول.. يوم مانعرس اتقولون ليش ما تعرس.. ويوم نبا اتعرس .. تخبزون وتتذكرون الخمير.. مب حاله هاي..
نش من مكانه وتم يتحرطم ويمشي.. وأمه تضحك عليه وعلى شكله..
دش البيت وسار عند إخته يكلمها.. عل وعسى يعطونه ويه شوي..
خالد: فريده.. فرووووووووووود وينج؟؟
فريده اخت خالد الكبيره ... كانت ياسه في المطبخ اتسوي الغدى..
فريده: لا إله إلا الله أكيد في شي..
خالد: عشون عيل مافي شي.. لازم بيكون في شي ..
فريده: مشغوله أحين بعدين..
دش المطبخ وشافها اتسوي السلطه.. وقف يطالع السلطه ويطلعها.. وكل شوي يمد إيده ياخذ شوي من السلط.. : انزين.. بساعدج..
فريده وهي اتدز ايده بعيد عن السلط: اول شي عيب.. لا تمد ايدك على الأكل.. وثاني شي.. مابا مساعده شكرا.. شوعندك خلصني..
خالد: شوفي .. أنا ابا اعرس..
فريده: اوكي.. وشو يعني.. تباني ادور لك حرمه..
خالد:لا شو اتدورين لي حرمه ماشي شغل.. مابا شكرا.. انا محصل وكل شي .. ورمست ربيعي الي من أهلها وهم موافقين ماعندهم مانع يتريون امي وابوي يسيرون لهم..
فريده: ماشاء الله مخلص على الموضوع.. شو المطلوب مني انزين
خالد: ماشي تيرين امج واتخلينها تشل السماعه واتدق على رقمهم وتشوف متى مناسب لهم عشان انسير..
فريده: انزين سير عند امي وقولها ليش هي مب موافقه..
خالد: بلا موافقه انا رمستها عن اهل البنت وكل شي.. ماعندهم مانع.. واهل البنت ناس والنعم فيهم.. أبوي يقول سامع عنهم وسمعتهم زينه يعني..
فريده: أهم شي البنت حلوه وزينه.. وشو اسمها.. وكم عمرها..؟؟
خالد: هي احين ثانويه عامه.. عمرها يعني 18 سنه.. واسمها على مسمى .. غزلان.. حلوة موووت بعد..
فريده: شوقتني الصراحه ودي أشوفها..
وفي هاللحظه دش عليهم يدهم.. : السلام عليكم.. شو غداكم اليوم؟
فريده: مجبوس دياي..
اليد: اللللله . هالأكل الزين.. ممكن اجرب شوي؟
فريده وهي اتصرخ لأنها شافت خالد ويدها سايرين صوب الجدر وفي ايدهم قواشيق يبون ياكلون.. : لاااااااااااااااااااااا..
اليد: بسم الله.. غربلات العدو.. روعتيني يا بنت الناس.. ماصار أكل هذا الي ميته عليه ما تبيني آكله.. مادري عاد منو الي طابخ..
فريده: الشيفه فريده الي طابخه ..
اليد: اقول خلووود.. وينها المزيونه ذيج الي شفتها على الكمبوتر الي عندك.. عنلاتها من طباخه.. اتسوي أكل ماشي مثله
خالد: يديي.. انت متى ماكل من ايديها.. هاييج الا ممثله كيف وصلت لها..
فريده: أي وحده؟؟
اليد: لاحووووول.. المزيونه.. ريتني بس اشوف ذاك الهندام الي ماخليت منه يارب..
خالد:يدي بيخربني على إيده وانا بعدني ما تيوزت..
فريده: الا يدي تدري ان خلود ناوي على العرس..
اليد: اشلك بالعباله وعوار الراس.. خذ لك الغرشوبه ذيج اصلح لك..
خالد: شو اخذ لي أليسا.. ماشي شغل.. خلصوا بنات البلاد أخذ لي هاي..
فريده: أخبركم.. ظهروا برع لا أييكم بالملاس عروسكم.. وماتلقون مني حبه عيش..
اليد: عنبو.. جيه اترمسين يدج.. عيل انا طالع وزعلان
فريده مشت صوبه: فديييييتك يديي.. انا فرووود.. بنتك حبيبتك.. وهاي بوسه على احلى راس..
اليد: والله واتعرفين اتقردنين.. يلا امشي خلصي شغلج يوعان تراني..
فريده: من عيوني.
وظهر خالد ويا يده وتموا يسولفون في الميلس يتريون الغدا.. وتوها كانت ام خالد يايه من برع وفي ايدها صينيه الخبز.. بسرعه نش خالد وشل الصينيه عن امه وداها المطبخ.. وتم يزن مره ثانيه على راسها عشان تتصل لين ما طفرت وسارت صوب التليفون عشان اتكلمهم..
خالد: هييييه.. واخيرا..
اليد: ههههه الله يهنيك يا وليدي..
ام خالد: عور راسي من الصبح ايون على راسي.. هات الرقم خل اتصل واظهر برع الميلس..
خالد:لا والله ليش اظهر.. ماشي انا قاعد هني ولازم اسمع المكالمه بالكامل
اليد: خليه يا أم خالد.. تدرين به ولدج.. هاي سواته .
ام خالد شلت التليفون ودقت على بيت غزلان وردت عليها غزلان: الووو
ام خالد: مرحبا بنيتي.. اشحالج؟؟
غزلان: بخير.. منو وياي؟؟
ام خالد: وياج ام خالد.. بغيت امج هني.. ؟
غزلان من سمعت طاري ام خالد فز قلبها وانصبغ ويها حيا.. على طول نادت على امها وشلت التليفون لها.. ونادت على وداد عشان تيلس عند امها وتسمع المكالمه وهي سارت غرفتها..
ام خالد: مرحبا ام سعيد اشحالج؟؟ واشحال بوالعيال.. عساكم بخير..
ام سعيد: بخير.. ربي يسلمج ويعافيج.. بس منو وياي ماعرفتج؟؟
ام خالد: انا ام خالد.. الي رمس ولدكم عن البنت..
ام سعيد: هيييه عرفتج.. هلا والله.. إشحالج؟ اسمحي لي والله ماعرفتج.. حقج علي..
ام خالد: لا افا عليج.. محشومه ياوخيتي..
ام سعيد: الله يخليج ان شاء لله..
ام خالد: والله نحن يشرفنا يعني اناسب ناس شرواتكم مثل ما رمسكم ولدي.. ونشدتوا عنه.. وقالي ان ماعندكم مانع؟؟
ام سعيد: لا يختي.. كلنا اهل.. وماشاء الله ولدج ريال ما ينعاب بشي..
ام خالد: تسلمين والله.. بغيت اخذ منج موعد متى انييكم رسمي؟؟
ام سعيد: حياكم الله في اي وقت..
ام خالد الخميس الياي مناسب؟؟
ام سعيد: خلاص.. مناسب.. نترياكم..
ام خالد: خير ان شاء الله.. تامرين على شي..
ام سعيد: لا سلامتج..
ام خالد: سلمي على العيال..
ام سعيد: يبلغ.
بندت ام خالد عن ام سعيد.. وكان خالد من الفرحه يغني وايول.. وشل يده وياه وتموا يترقصون.. وام خالد استانست يوم شافت الفرحه الي باينه على ويهه.. وكل هذا عشان الزواج..
=================
في مركز الشرطه..
سلطان طول الوقت يفكر في السكران.. وكان يترياه ينش من الرقاد عشان يرمسه.. وطبعا أحالوهم للتحقيق.. ومن سمع انهم نشوا سار على طول عند السكران ويشوف شو سالفته
دش السجن عنده.. شافه يالس روحه وكله حزن.. ويخيمه هدوء كبير.. استغرب.. معقوله هالإنسان الي جدامه هو نفسه الي كان أمس.. الحالة الي كان فيها أمس ماتوحي ان هالإنسان ممكن يكون نفس الشخص.. يوم السكران لاحظ وجوده صد صوبه وابتسم له ابتسامه خفيفه ورد صد الجهة الثانيه يسرح بأفكاره الي ماندري وين هي.. جرب منه سلطان وقعد على الأرض وعطاه عصير..
سلطان: اتفضل..
السكران: لا شكرا.. مابا..
سلطان: أحين انا متعني وياي لعندك ويايب لك هالعصير وآخر شي اتقول لي مابا..
السكران: انا هني في سجن.. يعني أنا والباقي نفس الشي.. إشمعنى انا اتييب لي عصير.. الباقي ليش لا؟؟
سلطان حس بإحراج من كلامه على طول نادى على الفراش وقال له اييب عصير لكل المسجونين على حسابه.. استانس السكران يوم شاف ردة فعل سلطان وإرتاح له..
سلطان: اشحالك؟؟
السكران: دامي هني في السجن.. انا بخير وأحسن حال..
سلطان: والله إنك غريب.. الناس ما يواطنون السجن.. وإنت تبا السجن أكثر من بيتك.. الي خلاني أييك رمستك الي كنت اتقولها أمس.. انك سلمت نفسك لنا.. وهالشي استغربنا منه وايد..
السكران صد صوب سلطان وطالعه بنظره وابتسم ابتسامه كلها ألم وحزن.. وتم ساكت..
سلطان: انا ييتك هني عشان ارمسك.. مب عشان اتم ساكت لي.. وصدقني بساعدك.. بس أول شي ما قلت لي إسمك؟؟
السكران: إسمي عارف..
سلطان: هلا والله.. عاشت الأسامي.. وياك الملازم سلطان..
السكران: تشرفنا..
سلطان:انزين ياعارف..ممكن اعرف شو قصتك.. ؟؟
عارف: قصتي.. ماعندي قصه ولا شي..
سلطان: أحين.. تبا اتقول لي .. انك بس ياي السجن زياره.. عشان جيه سلمت نفسك..
عارف: لا يا حضرة الملازم.. بس انا مابا اعور راسك بمشاكلي.. فخلني فحالي..
سلطان: لا افا عليك.. انت ارمس طلع الي في خاطرك.. انا ودي أسمع.. يمكن انصير ربع شو دراك انت..
عارف: انا وانت ربع؟؟ وين تبا؟؟ .. مستحيل.. واحد بنمصبك ومستواك يرابع سكير..
سلطان: ليش السكير ماله رب.. أكيد.. بس فيه شي خلاه يوصل بهالحال.. ولا تنسى .. كلنا عيال آدم وحوا.. كلنا اخوان..
عارف استانس من رمسة سلطان.. وإرتاح له زياده.. وما لقى نفسه الا الدموع تذرف منه ويرمس ويقول قصته لسلطان..