الجزء ( 14 ) : للحب عنوان

=======
ملخص ماسبق: علي خبر بو سعيد عن موضوع خالد.. وطلب بوسعيد مقابلة خالد وقابله وهم في هالوقت يتخبرون عنه، اكتشفت حصه ان ابراهيم اخوها على علاقة ويا وحده، أم عادل فاتحت موضوع ملجة عادلوحصه لم حصه وتتريا الرد، ناصر ودر البنت الي كان يرمسها والسبب منى ، عرف سعيد عن موضوع خالد الي خاطب غزلان\
=========
يوم الثلاثاء
الساعه 6.00 الغرب
======
في بيت بو سلطان الكل كان قاعد ويا بعض.. وبوسعيد ويا أم سعيد وعيالهم بعد يو عندهم يومها، ومنى طبعا كانت شوي تشتغل وشوي تقعد وياهم.. وداد كانت يالسه اتسولف ويا سلطان .. وعلي ما كان عندهم لأنه كان طالع يتشرى ويا اخوه محمد،..
ناصر: عندي باجر امتحان ومب فايج أذاكر..
غزلان: امتحان شو؟؟
ناصر: عربي نحو أونه.. انا يادوب اعرف الفعل والفاعل.. ماعرف شي غيرهم
غزلان: عيل انا اعرف اكثر عنك بشي واحد.. الجار والمجرور..
منى: تباني اساعدك ناصر.. انا كنت شاطره في النحو..
ناصر: والله.. انسوين خير فيني الصراحه
منى: هات دفتر وقلم والكتاب.. وقولي شو الي مب فاهمه بحاول افهمك..
راح ناصر ياب الي طلبته منى وقعد وياها عشان اتدرسه.. وغزلان مستانسه ان منى بدت تتأقلم والكل اتعود عليها من طيبتها حسوا انها وحده منهم وفيهم.. وما حسسوها ابد انها مب بنتهم ولا منهم..
هادف كان يلعب بلي استيشن ويا عموور ولد فدوى.. وغزلان كل شوي تنتقل مره عند ناصر ومره عند هادف..
وداد: سلطان في سالفه بغيت اقولك اياها بس متردده شوي..
سلطان: خير قولي.. ؟؟ شو صاير؟
وداد صدت صوب وداد واطالعت في عيونه .. وعيونها غرقانه دموع.. والخوف من فقدان سلطان ممتلكنها: مريم
سلطان من سمع اسم مريم بدأ يتأفف وقاطعها: وبعدين يعني.. هالإنسانه ما بنخلص من شرها..
وداد: سلطان اسمعني بالأول..
سلطان: قولي..
وداد: هي يتني المكتب وتمت تتوعد وتهدد .. ومادري شو.. حتى ان علي كان موجود وسمع كلامها..
سلطان وبغضب: وداد.. انتي مقتنعه فيني وانا مقتنع فيج.. وصدقيني هالمره مستحيل افرط فيج لو شو ماصار.. وهاي الي اسمها مريم ماباها اتأثر فيج.. خذيها على قد عقلها..
وداد ابتسمت .. استانست في خاطرها وحست بشوي اطمئنان من كلام سلطان وتمت ساكته .. واما سلطان كان يفكر .. يبا يعرف اخرتها ويا مريم وشو مخططه عليه هالمره.. وشو الي في راسها..
====
مر الوقت ورد بوسعيد وعياله البيت.. لأن اليوم الي بعده عليهم دوامات ومابقدرون يسهرون زود..
بس بوسعيد وهند وام سعيد كانوا قاعدين يسولفون شوي في الميلس..
هند: انزين ابوي متى السفر على العمره ان شاء الله..
بوسعيد: اول اسبوع في رمضان ان شاء الله .. حجزت لج ولي ولعلي طبعا..
ابتسمت هند ابتسامتها الهاديه: علي بعد بيي ان شاء الله..
بوسعيد: هي.. اذا حاسه بضيج بقول له..
هند: لا عادي.. ولد خالتي تراه في النهايه
أم سعيد: يلا امي.. خذي دواج وسيري ارقدي فديتج..
هند: ان شاء الله.. تصبحون على خير..
باست راسهم وسارت.. ونش بوسعيد وام سعيد صعدوا فوق عشان يرقدون.. وهند كانت في المطبخ الي برع حست بيوع يلست اتسوي لعمرها سندويجات وتاكلهم.. وعلي كان ياي توه من برع ويرمس في التليفون.. هند من سمعت صوته استانست.. راحت صوب باب المطبخ عشان توايج شوي شوي وتشوفه..
كان علي في هالأثناء ينفذ خطته ويا ساره وقاعد يكلمها.. وكان مندمج في السوالف.. وتم يالس في الحديقه الي مجابله المطبخ ويرمس..
علي: هههههه.. تصدقين دمج خفيف بعد..
هند يوم سمعت انه قاعد يكلم وحده.. استغربت.. وتمت اتحاتي.. جربت اذنها عشان تسمع عدل..
علي: انزين ... ساره ما قلتي لي.. كم واحد في البيت انتوا؟؟
هند من سمعت اسم ساره انصدمت.. ومن الصدمه فرت الكوب الي كان في ايدها وانكسر.. علي صد وراه شاف هند طالعه من المطبخ وهي اتصيح وتركض.. وقتها عرف انها سمعت كل شي..
علي: ساره.. بخليج احين اوكي.. مع السلامه..
بند علي الخط من عند ساره ولحق هند.. وشاف ان المكان الي ركضت فيه هند ممزور دم.. لأنها يوم ركضت ما انتبهت انها داست على قطعه من الكوب المكسور وجرحت ريلها.. وشاف انها صعدت غرفتها فوق.. صعد وراها وتم يدق الباب..
علي: هند.. افتحي الباب بكلمج..
هند كانت ياسه ورى الباب اتصيح.. وبعدها مب حاسه بريلها..
علي: هند الله يخليج افتحي الباب ابا اكلمج...
هند: بصوت مبحوح وعالي : ابا انااااااااام..
علي: انزين على الأقل طلعي عشان تربطين ريلج المنجرح..
هند وقتها اطلعت ريلها وشافت انها تنزف وبدت اتحس بالألم.. : شكرا مابا.. عندي كل شي في غرفتي وما احتاج حد يوجهني..
علي ما حب انه يصر عليها زود.. لأنه أكيد بيشوفها الصبح وبيكلمها..
وهند في هالوقت كانت اتداوي الجرح الي في ريلها وربطت ريلها.. بس الجرح الي في قلبها كان تأثيره أكبر.. والألم أكثر .. علي ما قدر ينام تم يتجلب على الفراش.. يفكر كيف يفهم هند.. مستحيل يقول لها عن خطته..لأنها بتعارضه أكيد.. وفي نفس الوقت ما وده ان هند تاخذ عنه فكره .. كان يتريا الصبح ايي عشان يكلمها.. وهند كانت طول الوقت اتصيح.. كانت نايمه على بطنها وماسكه المخده وحاضنتها واتصيح بحرقه.. ااااه يا علي.. حتى انت فقدت الأمل فيك.. ليش ياربي ها حظي؟؟ ليش ليييييييش؟؟ وتمت تضرب بإيدها على السرير.. كان يسوي عمره انه ما يباها وبسرعه قدرت تاخذه عني .. لازم .. لأنها مب ناقصه مثلي.. أكيد ما بيطالعني.. أنا ليش حاطه امل .. لأنه مافي أي أمل في هالشي.. ااااااه.. بس لييييييييش يسوي عمره شي جدامنا انا وداد واخرتها من ورانا يسوي ها كله.. ليش يا علي.. ليش انت جيه.. كل الرياييل نفس الطينه.. لهم ويهين.. ويه طيب.. والويه الثاني يظهر من ورانا..
========
يوم الأربعا الصبح
====
غزلان: اميييي.. وين مريولي..
ام سعيد: انا عطيته للبشكاره تكويه لج.. ما يابته..؟؟
غزلان كانت واقفه على الدري ومنزله راسها .. وليش ان شعرها طول نزل على تحت.. فالي يشوفه يقول شي معلق من فوق الدري.. وكان هادف توه بيصعد الدري تم يحاول يمسك شعرها ؟.. وغزلان ما كانت منتبه له.. ومسك شعرها ويره.. وتمت غزلان اتزاعق بصوت عالي: يالحمااااااااار..
هادف: عنبو مب شعر.. حبل حبل..
غزلان: قول لا إله إلا الله..
هادف: لا إله إلا الله.. لا تخافين اختي عيني مب حاره..
والخدامه توها كانت يايبه مريول غزلان وكانت بتوديه لها فوق بس هادف خذاه عنها وفره عويه غزلان..
غزلان عصبت وتمت اتطلع لسانها لهادف: انننن.. ماحبك..
هادف: انا اكرهج..
غزلان: اخخخخ.. ريحتك خايسه سير اسبح..
هادف: شو اسوي تراني مستخدم فوطتج بعد عشان جيه ريحتي خاست..
غزلان: شوووو.. شليت فوطتي.. اخييييييي.. اميييييي
ام سعيد: ياربي.. اعوذ بالله من هالعيال.. شو عندج بعد؟
غزلان: فو..
هادف ما خلاها اتكمل كلامها غطا على بوزها بإيده ويرها.. وتم يطالع تحت يكلم امه: ماعليج منها امي طبيها.. مستخفه بنتج اليوم..
غزلان استغلت الفرصه وعضت ايد هادف.. : ااااااااي.. جلبه عنبو. ..
غزلان: عشان تتأدب.. سير ييب لي فوطه يديده..
هادف: ماتنزل اصلا استخدم فوطتج.. تبين الجراثيم الي فيج تنتقل لي.. مينون قالولج..
غزلان: ههههه.. تتمنى فوطتي اصلا..
وداد توها كانت طالعه من غرفتها.. : لا اله إلا الله.. انتوا ماشي يوم نفتك فيه من حنتكم وونتكم هاي..
غزلان+ هادف: لاااااااا..
وداد ابتسمت ونزلت تحت عشان تتريق وتسير الدوام.. وهادف تلبس وسار مدرسته من بعد ما مر عليه ناصر.. وغزلان بعد تلبست وسارت عند حصه عشان يروحون المدرسه كالعاده ويا بعض..
حصه: ها شو.. ماشي اخبار يديده؟
غزلان: لا.. مادري متى بيردون خبر؟
حصه: بيني وبينج انتي موافقه؟؟
غزلان: اول شي بشوف هلي شو بيقولون عنه بعد ما يتخبرون عنه عقبها بقرر..
حصه: اذا الكل مدح فيه.. ؟
غزلان: ما بقول لا.. بعد موافقه اهلي طبعا..
حصه: اهاااا.. الله يوفقج؟
غزلان وهي تضربها على جتفها: وليش من ورى خاطرج؟
حصه: انتي تدرين انا كان ودي اتصيرين مرت منو؟
غزلان: سكتي سكتي الله يخليج.. متفيجه اسمع سيرته على الصبح بعد..
==========
أحمد كان مفروض ينزل هالإسبوع بس الكليه حجزوهم بسبب مخالفه واحد وياهم.. فنزلوا العقوبه على الجميع بالحجز للإسبوع الي بعده.. تم أحمد يالس متكدر ليش انه ما يقدر ينزل الإجازه.. استأذن من الملازم ودق لأمه وقالها انه ما بينزل هالإسبوع.. ورد غرفته عند الشباب الكل كان متيمع ويسولفون ..
أحمد فضل ييلس على جنب بروحه وتم يتعبث بالدفتر الي وياه ويسولف ويا ربعه..
إبراهيم: أحمد.. ليش قاعد بعيد ياخوي.. اقرب ويانا..
أحمد: لا ماعليه خلاف بييكم..
إبراهيم: نش عاد..
فيصل: اخبرك.. الصراحه ودي اسمع شله بصوتك من زمان ما سمعتنا شي؟
الشباب كلهم أيدوا كلام فيصل وساروا قعدوا حذاله عشان يشل لهم شله.. خذ الدفتر الي في ايده وصكه وحطه حذاله وبدأ يشل شله:
ما نسينا لو تناسينا يالغلا في يوم حبينا.. يوم كنا بسمه حلوة قلب واحد من يساوينا
تذكرين حروف كلماتي.. يوم كنتي اروع أبياتي.. يوم قلتي قول وحياتي... غير موتي يفرقينا..
تذكرين كم وعدتيني.. كم حلفتي ما تناسيني.. بس الي صار هنتيني.. واجتمع العذل فينا..
يا حسافه ما مضى والله..يا حسافة هالغلا كله.. ليت قلبي ليت ما توله.. ليت مافي يوم أغلينا..
يالغلا لو كان لي خاطر.. عند وعدي انا حاضر.. لو يضيق بك الفضى تامر.. قلبي الوافي لك رهينه..
ما أبيعك ذا عهد مني.. لو يخيب احساسي وظني.. وبشرى غيري ترى فني.. يوم أجفي عنك تجفينا..
ما نسينا لو تناسينا يالغلا في يوم حبينا.. يوم كنا بسمه حلوة قلب واحد من يساوينا
سلمتم..
الكل تم يصفق.. ودش عليهم المدرب وأمرهم انهم يتزهبون عشان التدريب.. والكل نش متهايز.. الي يسب المدرب.. والي يسب الي تسبب في حجزهم.. والي والي..
========
علي نش الصبح وتم يتريا هند تنش بس ماشي فايده الساعه صارت 12.00 وهي مب طايعه اتنش.. تم يحاتي.. زقر الخدامه وقال لها تدخل عليها الغرفه وتشوفها.. وسارت الخدامه وقومتها بس هند قالت لها تطلع لأنها تبا ترقد.. وطلعت وطمنت علي.. بس علي فهم ان هند بعدها شاله بخاطرها.. تم يلوم نفسه وفي هالوقت اتصلت ساره.. ومن شاف علي رقمها من كثر ما عصب شل التليفون وضرب فيه اليدار وانكسر وطاح عالأرض.. وتم يدق باب غرفتها بس هي ماترد عليه.. ورد غرفته..

ام حصه شاورت ابو حصه .. ووافقوا انهم يملجون بهم في أقرب وقت.. قبل رمضان يعني.. واتصلت ام حصه وخبرت ام عادل بهالموضوع.. وام عادل ما كان عندها أي إعتراض المهم عندها سعادة حصه وعادل.. وفي هالوقت كان توه مخلص دوام المدرسه وحصه وغزلان كانوا في الدرب رادين البيت.. ونزلت غزلان بيتها وحصه سارت بيتها.. وأول ما فتحت تليفونها سمعت صوت نغمه المسج.. فتحت المسج..
خلاص يا حصه.. أخيرا بتصيرين زوجتي شرعا وحلالا.. آآآآه يافرحتي
من قرت حصه الكلام بعدها ما كانت مستوعبه شو قصده.. طنشت.. الا وشوي يتصل فيها عادل:الوو
حصه: هلا والله
عادل: شو ماشفتج رديتي على المسج؟؟ شكلج ما تبين؟
حصه: شو ما ابا.. المسج بلاه عادي..
عادل: تستهبلين.. اقولج بنملج جريب.. بتصيرين زوجتي خلاص..
حصه: شووووووو؟
عادل: هاااااا.. انتي عيل ما تدرين؟
حصه: ادري شو؟
عادل: مادري.. سيري سألي عمتي؟
حصه: عااااادل..
عادل: وااااااااااي عالدلع ها كله ماروم انا..
حصه: هههه.. يلا عاد قول
عادل: بنملج قبل رمضان؟
حصه: احلف؟
عادل: جذاب انا جذاب..
حصه: ههههه.. لا بس مادري.. محد قالي؟
عادل: اليوم امج ردت خبر لأمي وامي بشرتني أحلى بشاره..
حصه: ان شاء الله..
عادل: احبج احبج والله..
حصه: وانا بعد.. انزين بسير ابدل واتغدى اوكي
عادل: اووووكي.. احبج..
بند عنها الخط وكل واحد فيهم كان في عالم من السعاده منفصل عن الثاني.. ويتخيلون اليوم الي بيجتمعون فيه مع بعض.. ااااه متى ايي هاليوم..
نزلت حصه عشان تتغدى ويا أهلها .. وتموا يساسرون ويضحكون.. عرفت حصه انهم يرمسون عنها من ضحكاتهم وهمساتهم ونظراتهم.. افتشلت تمت منزله عينها على صحنها وتاكل..
إبراهيم: عاشت العروس.. تتدرب من احين..
حصه عصبت بس مسكت عمرها وتمت ساكته..
خولهمرت اخو حصه.. عبدالله..: أحلى عروس بعد..
عبدالله: بس شكلها جنه باربي..
عبيد ولد عبدالله : انا ماحب باربي.. مال بنات.. أبا طياره
راشد ولده الثاني: وانا ابا سبايدر مان .. ابا القناع ماله.. مع ملابسه..
خوله: احين انتوا منو ياب طاريكم داشين عرض..
عبدالله: طالعين على عمهم ابراهيم..
ابراهيم: لا والله.. بالعكس طالعه ملقوفين على عمتهم حصوص..
حصه هني مارامت تتحمل شلت الليمون وعصرته في ويهه.. وهو غمض عيونه والحمد لله ما دخل في عينه.. بعد ما هدت حصه تم يفتح عيونه شوي شوي.. وشافها تاكل.. : امممم.. تصدقين الليمون مفيد للبشره.. سويتي خير فيني..
حصه رفعت عيونها ومسكت الشوكه بإيدها بطريقه اجراميه .. والغضب في عيونها كأنها تتوعد فيه بإنتقام حاد..
ابراهيم: امي.. انا اليوم بهاجر.. بنتج ناويه علي..
ام عبدالله: مالكم شغل في بنتي.. خلوها عروس.. لعلني ماخلا منج.. اخيرا برقد وانا مطمنه على بنتي ان في ريال ما ينخاف عليه ماخذ بنتي..
حصه استحت زود.. ونزلت راسها..
بوعبدالله: خلو البنت تاكل عدل.. ماتت من الحيا.. عقب بتضعف ومب شي للزواج..
-------------
مر الوقت .. وفي بيت بوسلطان هند نادت على الخدامه اتييب لها الغدا في الحجره عشان محد يحس بشي.. وغزلان وداد ساروا يتغدون وياها ما بغوا يخلونها بروحها..
غزلان توها داشه الغرفه وفي ايدها قوطي بيبسي بس مصكوك.. من شافت ريل هند صرخت وفرت قوطي البيبسي ونقزت صوبها: هييييييييييييييه.. هندوووووووو.. شو مستوي في ريلج ؟؟
هند: بسم الله خرعتيني.. بتنقعين القوطي.. ماشي.. امس انكسر كوب الجاي ودست على الزجاج بالغلط..
غزلان: حبيبتي والله.. ماتشوفين شر..
هند: الشر ما ييج..
غزلان: امي شافت؟؟ ووداد؟؟
هند: لا محد شاف..
غزلان: زين عيل حصلت لي خبر اعلنه اليوم.. وانا اقول ليش ما تبين اتيين تحت تتغدين ويانا
هند: عرفتي احين يالشاطره..
دشت وداد وتموا يتغدون سوى ويسلوفون.. علي كان حزين يومها .. وماقدر ياكل عدل كل تفيكره في هند.. كيف بيراضيها.. ولين متى بيتم هالزعل من بينهم؟؟ وشو الحل؟؟
علي: تسلم ايدج خالو.. سفره دايمه ان شاء الله..
ام سعيد: علي يا ولدي ماكلت شي؟؟
علي: شبعت خالو بسني..
ام سعيد: هني وعافيه..
راح علي من عندهم وصعد غرفته.. وتم يطالع غرفه هند ويسمع الضحكات.. وفي وده يشوف هند وهي تضحك.. وتسولف وياه.. دش غرفته والحزن مخيم عليه.. ومر اليوم على هالحال.. هند رافضه تطلع من غرفتها وعلي كل شوي يوايج اذا طلعت ولا لا.. ويرد يدخل في غرفته ومايظهر منها.. وكل واحد فيهم سرحان يفكر في الثاني.. ومر اليوم على هالحال من بينهم..
===
في بيت بو سلطان.. سلطان كان تفكيره في مريم وخططها.. شو ممكن اتكون؟؟ وعلى شو مخططه.. ومن غير لا يحس بعمره ركب الموتر وساق لصوب بيت مريم.. ويوم وصل عند باب بيتهم تم يطالع الباب.. والغضب في عيونه استغرب ان مافي موتر موقف عند باب بيتهم.. استغرب.. وهم ما عندهم كاراج.. نزل من الموتر.. ودق الجرس.. تم يتريا حد يفتح الباب.. وسمع صوت خطوات..
مريم استغربت منو الي ياينهم.. اكيد مب أهلها لأن لو اهلها اكيد عندهم المفتاح ليش بيدقون الجرس وقفت ورى الباب تسأل منو عند الباب: منوووو؟
سلطان: انا سلطان..
مريم من سمعت حس سلطان استانست في خاطرها.. وابتسمت.. وعرفت انه اكيد وداد خبرته.. فتحت الباب: هلا والله.. حياك.. ادخل..
سلطان: اشحالج؟؟
مريم: بخير.. انت اشحالك؟ .. اخيرا شفناك ما بغينا.. صح مبروك .. والله فرحت لك من خااااااااطري.. وكنت ياسه اطالع توني في المجلات ادور على الموديل الي بسويه ليوم عرسكم..
سلطان استغرب.. تم يطالعها بإستغراب.. شو سالفتها؟؟ .. على شو مخططه؟؟ .. كيف .؟؟ معقوله هاي مريم؟؟ ولا هاي خطه من خططها الخبيثه: لا والله.. اتباركين بعد.. وشو الرمسه الي سمعتها وتهديداتج الي ما تخلص.. وبعدين وياج؟؟.. متى بنخلص من شرج ..
مريم: حرااااااام عليك.. انا اهدد؟؟ اهدد منو؟؟
سلطان: مريم.. لا تستهبلين.. نحن مب يهال.. وداد قالت لي عن كل شي؟؟
مريم: وليش شوفيها يوم اروح لوداد لمقر شغلها أبارك لها .. فيها شي..
سلطان: اتباركين لها؟؟ لا والله.. ولا اتهددينها؟؟
مريم: رد على التهديد.. شوفيك انت.. ؟؟ ياهل جدامك؟
سلطان: لو ما كنتي ياهل جان ما سويتي الي سويتيه؟
مريم: اسمعني سلطان.. انا انسانه مرتبطه مب فايجه اعور راسي وياك.. ويا وحده اطلع علي رمسه.. بس من غيرتها..
سلطان: مرتبطه!!!!!!!!!!!!!!
مريم: هيه.. وليش يعني مب تارسه عينكم؟؟ يعني ما بيي واحد وبيخطبي؟
سلطان: كيف.. ونحن ماعنا خبر؟
مريم: لا انا جذابه.. يعني مايستوي خطوبه سريه.. مايستوي كل شي نكشف عنه ونقول عنه.. ويوم كل شي بيصير رسمي بتعرفونه ..
سلطان حس بفشله ماعرف شو يسوي.. حس راسه دار من الأفكار.. ماعرف شو يقول ولا شو يرد عليها.. على طول عطاها ظهره وطلع من البيت وركب موتره ودق سلف وراح.. وطول الدرب يفكر.. معقوله يا وداد تجذبين علي؟؟ .. وتألفين علي قصه؟؟ .. ليش؟؟ يعني معقوله تبين تنتقمين منها أحين.. بس نظراتج كانت اتقول لي انج صادقه .. علي؟؟ هي.. علي بيقول لي الصج.. احسن شي اتصل به.. شل التليفون ودق على رقم علي.. : الو..
علي: الو.. مرحبا.. هلا والله
سلطان: اشحالك؟
علي: بخير طاب حالك؟؟ انت اشحالك؟
سلطان: بخير.. يسرك الحال.. الا بغيت اتخبر عنك في سالفه؟
علي: شو من سالفه؟؟ قول؟
سلطان: مريم بنت خالتي.. شو سوت يوم يت في مكتب مريم؟
علي: اخخخخ.. السموحه لا تزعل مني.. بس قاهرتني.. وداد ما قالت لك السالفه؟
سلطان: لا بس قالت انها يت وهددت بغيت اعرف الموضوع بالتفصيل...
علي: عيل اسمع..
علي قال السالفه كلها سلطان.. وقتها سلطان حس الدنيا تدور حوله.. ماعرف شو يسوي.. الحيره زادت.. وراسه قام يعوره.. يصدق منو.. ولا منو؟؟ وفي النهايه من الصادق فيهم؟؟ .. سلطان ما قال لعلي عن زيارته لمريم والكلام الي قالته.. انهى المكالمه وبند؟؟ .. وسار قعد على البحر.. المكان الي كان دوم يقعد فيه ويا وداد.. تم يطالع البحر ويخاطبه..
سلطان: يابحر.. انقذني.. من الصادق فيهم.. ويسمع صوت الأمواج وهي تصدم بالصخور كأنها ترد عليه وتكلمه بس مب فاهم شو يقوله.. اااااه لو أفهم كلامك.. ولو تفهم كلامي؟؟.. يابحر زادت حيرتي.. من أصدق.. مريم ولا وداد.. عشرتي ويا وداد اتقول لي لازم اصدقها.. وعشرتي ويا مريم اتقول انها ماتعرف الا الجذب.. بس كلام مريم حيرني يابحر.. وحس بموجه يته وخرسته.. ياترى شو تقصد بهالشي؟؟
نش وتم يمشي على طول البحر.. وشاف شله شباب سكارى يالسين يضحكون وبحكم وظيفته مايقدر يشوف هالأشكال ويسكت عنهم.. اتصل في ربعه الي في الدوريه وبلغ على الموقع وتم يراقبهم لين ما توصل الدورية وتقبض عليهم.. وتم يتسمع لكلامهم..
سكران1: هههههه.. الي نساك.. هيييييق.. الي نساااااااااااك.. انساااااااه
سكران 2: بس بس.. صوتك خرعني.. مااااااعرف اكككل.. اوبس.. وضرب على بوزه.. اشرب.. تم يأشر بصبعه صوب ربعه.. سوري..
سكران1: اقووول؟؟ .. وين تتوقع اتكون احين؟؟
سكران2: في جهنم.. ههههه
السكران 1 .. عصب وصب عليه ماي : ايه.. رمسني عدل.. هاي اختي ترا.. والله ابا اشوفها.. ابوي مات وهو وده يشوفها.. امي ظالمه.. وبدأ يصيح..
سكران 2 نش من مكانه وسار حضنه وتم يصيح: بس بس.. صيحتني وياك..
السكران 3: طاع.. والله يهال.. خوزو بسير اسبح في الماي..
وفي هاللحظه وصلت الدوريه ومن لاحظوا ليت الدوريه ..
سكران2: اوه.. شوفو شوفو.. عرس .. قوموا نسير نرقص..
سكران3: اي عرس.. شرطه.. نش نش..
من سمع سكران2 طاري الشرطه.. شل البطل وخشاه تحت فانيلته.. والي سار صوب البحر يفر عمره.. واما سكران 1 نش وسار صوب الشرطه.. كان سلطان يراقبهم واحد واحد.. بس سكران 1 .. تصرفاته الغريبه جذبته اكثر.. استغرب.. اول مره واحد يروح ويسلم عمره للشرطه.. ربع وسار صوبهم..
سكران1 وهو يصيح وماد ايده عشان يكلبجونه: زخوني.. احبسوني.. احكموا علي مؤبد.. اعدام.. بس لا تردوني البيت.. اترجاكم..
الكل استغرب وتموا يطالعونه بإستغراب.. ياترى شو في يدور في راسه؟؟ ليش جيه؟؟ شو الي خلاه يقول جيه؟؟ شو هي ظروفه؟؟ .. المهم قبضوا عليهم كلهم ودخلوهم في الموتر ودوهم المركز.. وسلطان لحقهم عشان يشوف سالفتهم.. واتصل في وداد قال لها انه ساير الدوام طلعت له مهمه ضروريه وما يقدر يكلمها ليلتها..
ومريت الليله.. والكل نام..
========
يوم الخميس
الساعه11.00 الظهر
====
نش بوسعيد.. وقعد يتريق وياهم.. والكل كان قاعد طبعا بلا هند.. ولا علي..
بوسعيد: وينها هند؟؟ ليش ما نزلت؟
غزلان: عشان ريلها ابوي ما تقدر تضغط عليها وايد..
بوسعيد: انا اليوم بوديها المستشفى؟
وداد: هي ابوي رمسها مب طايعه. راسها يابس هالبنت..
بوسعيد: مب بشورها.. بتسير غصبن عنها..
هادف: اقول ابوي.. شو صار على موضوع الخطيب؟؟
بوسعيد: هي زين ذكرتني به..
غزلان نزلت راسها من المستحى.. ونشت..بس ابوها زقر عليها عشان ترد تقعد مكانها..
غزلان: ان شاء الله..
بوسعيد: سمعي يا بنتي.. انا وامج ما تهمنا غير مصلحتج.. اهم شي سعادتج عندنا هي سعادتنا.. يوم انشوفج مستانسه في حياتج.. كأن نحن المستانسين.. غزلان انت غديتي حرمه.. هب ياهل.. وماشاء الله امج علمتج على المسؤوليه وماعليج قاصر.. يا بنتي نشدنا عن الريال وهله.. والكل يمدح فيه وفي أخلاقه وفي أهله.. محد قال عنهم رمسه شينه.. ناس والنعم فيهم.. وانا ما سألت شخص ولا اثنين.. انا نشدت عنه حتى مديره في الشغل.. واحين الشور لج.. اذا موافقه ولا لا..
غزلان تمت ساكته ومنزله راسها.. حاسه لسانها منربط مب رايمه اترد..
هادف: ابوي.. يقولون السكوت علامه الرضا..
بوسعيد: جب انت.. نحن نبا البنت هي ترد.. بابا غزلان.. جان ما تبين اتردين احين وتبين اتفكرين خذي راحتج ترا هاي حياة مب لعبة تملين منها اتغيرينها..
غزلان: ابوي انا استخرت.. والشور عندكم.. الي تشوفونه انا مب معارضه عليه..
بوسعيد: وهاي شيمتي في بنتي.. احين اقول انج تربيه خليفه..
انتظروا..
قرار غزلان الي اتخذته من خلال موافقتها على خالد.. شو وراه؟؟
وسلطان.. راح يصدق من؟؟
والسكران شو سالفته؟؟
وعلي وهند.. شو سالفتهم لين وين راح ترسي؟؟
تحياتي