الجزء ( 13 ) : للحب عنوان

=============
ملخص الفصل السابق: مواجهة مريم لوداد.. واتفاقها ويا ساره.. وخطتها للإنتقام.. وعلي ولعبتها لي يلعبها على ساره.. غزلان وقفت خالد عند حده.. وهالشي خلى خالد يخطبها.. والكلام الي قالته منى لناصر وأثر فيه.. وتأقلمها في بيت بوسلطان
===============

محمد ووداد وعلي وهادف كل واحد فيهم قاعد ويسولف عن غزلان.. ويعلق..
هادف: والله كبرت هالملقوفه وقامت تنخطب اشوف..
وداد: ليش يعني؟؟ هالكثر اختي طايحه من عينك؟؟
محمد: اصلا غزلان الف من يتمناها.. بس انا اقول لو نصبر عليها شوي؟
علي: لالا.. شو.. خل انشاورها.. حرام والله ربيعي يحبها وايد..
الكل صد صوب علي وفج عيونه .. شو قاعد يقول هذا..
علي: اوبس.. نسيت عمري.. طلعت من لساني جيه..بس صدق والله.. هو من يوم ما شافها قبل لا يعرف اني ولد خالتها كان يسولف عنها ويقول انه معجب فيها ويباها.. يعني يبا يخطبها..
محمد: حلوه هاي.. وانت ماشاء الله ساكت عنه..
علي: اشفيك انت.. اقولك قبل لا يعرف اني ولد خالتها او حتى انا اعرف.. والذمه من يوم ماعرف ما قام ينطق جدامي عنها ابد.. للحين يوم طلب ايدها..
دشت هند على كلمة طلب ايدها ابتسمت:جني سمعت في سالفه خطوبه؟؟
علي: هي تعالي.. اختج المصون انخطبت؟؟
هند: منو.. وداد.. بس وداد مخطوبه من زمان..
هادف: لا شو.. وداد عيوز منو يباها.. نحن نرمس عن غزلان..
هند في هاللحظه كانت مبتسمه وفرحانه.. لكن في قلبها ألم انها الي اكبر عنها وللحين محد دق الباب وقال انه يباها.. وحتى لو يو.. ما تقدر انها توافق واتعيش الريال في عيشه جحيم مثل ما هي تشوف في نظرها..
هند: والله.. منووو؟؟
وداد: ربيع علي.. اسمه خالد..
هند: عيل اسير اخبر غزلان..
محمد في هاللحظه نطق.. : لا انا ابا اخبرها اذا تسمحون لي...
الكل استغرب من طلب محمد.. في هالفتره كان علي اقرب لهم من محمد.. شو الي خلا محمد يطلب هالطلب.. الكل خذا الأمر انه يبا يتقرب لهم لا أكثر..
وداد: لا اصلا اول شي لازم انخبر امي وابوي قبلها هي.. هو كبار هالبيت..
علي: وينهم؟؟
هادف: يالسين في الحديقه..
علي: يلا نشوا بنسير لهم..
الكل نش الا هند تمت قاعده مكانها.. والكل نزل.. بس علي تذكر انه نسى تليفونه فوق.. رد عشان ياخذه ولاحظ هند الي قاعده روحها وتلعب بصبوعها.. وسرحانه..
علي: هند.. انا فاهم الي فيج.. والي يدور في خاطرج.. بس ربج يقول ولا تقنطوا من رحمه الله.. صدق الله العظيم..
وسار عنها ودرها على الأفكار الي في راسها.. وهي عقب نشت وسارت غرفه غزلان عشان تقعد وياها.. شافت ملصقه اذنها على الباب عل وعسى تسمع شي.. بس هند ريحتها وقالت لها السالفه..
غزلان: قولي والله.. معقوله؟
هند: هي ليش مب معقوله؟؟ مافيج شي قاصر عشان ما ينعجبون فيج ويخطبونج..
غزلان: لا مب جيه.. انا اقصد بعد الزف الي زفيته ايي ويخطبني؟؟
هند: ترا يوم زفيتيه حركتيه انه يخطبج..
غزلان: هند.. ماصدق.. حرارتي ارتفعت.. لحقي علي..
هند نشت بسرعه صوب غزلان وهي تضحك عليها.. : فديتج والله عروس منو قدج؟
غزلان: لا بس انا بعدني ما وافقت..
هند: ان شاء الله بتوافقين..
غزلان: بفكر..
-----------
في الحديقه
=========
بوسعيد: والله ياعلي فاجأتني؟؟ بس منو ها؟
علي: اسمه خالد ابراهيم عبدالله الهرمودي..
بوسعيد: والنعم والله.. بس انا ماشفته ولا اعرفه مايصير جيه؟؟ لازم ننشد عنه؟
ام سعيد: لا .. مايصير الصغيره تنخطب قبل الكبيره..
محمد: هي وانا بعد اقول جيه خالوو..
علي: خالوو.. هالكلام مال زمن اول.. ماعليج هند بعد بييها الي يخطبها.. والريال حسب الي انا اشوفه ما ينعاب.. بس الشور الأول والأخير راجع لكم..
بوسعيد: على كل حال.. انا بنشد عن الريال.. وقول له يمر علي المكتب اشوفه.. اتعرف عليه.. عقبها بنشاور البنت..
محمد:انا مادري انتوا ليش مستعيلين على البنت هالكثر..
وداد: لا يا محمد مب مسأله استعجال المسأله اننا ما نبا نخسر الريال اذا كان ماعليه كلام وما ينعاب..
علي: ولازم اتشاورون اخوها العود سعيد بعد لا تنسون..
بوسعيد: اكيد ولدي لازم اخذ شوره..
وداد: انزين وغزلان بتخبرونها؟؟
ام سعيد: لا خل البنت تهتم بدراستها ومانبا شي يشغلها احين لين ما نتخبر عن الريال ..
محمد: هي جيه احسن بعد..
---------
في بيت حصه
=====
حصه قاعده اتكلم عادل في التليفون ..
حصه: ههههههه.. حللللوه.. يلا قولي نكته غيرها
عادل: يقولج نكته منخشه ورى الباب لييييييش؟
حصه: امممم.. سامعتها بس نسيت.. ليش؟
عادل: خايفه الناس يضحكون عليها..
حصه: هههههههههه..
عادل: فديت هالضحكه ما تتصورين اشكثر افرح يوم اشوف هالضحكه الحلوه على شفاتج..
حصه: جذاب
عادل: بل.. ليش؟
حصه: لأنك ما تشوفني تسمعني..
عادل: خس الله ابليسج.. ههه.. تدرين.. مستعيل ابا املج .. كم يبوني اتريا؟؟
حصه سكتت حست بخجل..
عادل: لاااااااااا.. لا تسكتين.. والله صدق انا اليوم برمس امي بخليها اترمس امج ويجدمون الملجه ماروم اصبر ابا اقعد وياج .. ولا اظهر وياج.. مب حاله هاي..
حصه: ان شاء الله خير.. لا تستعيل..
عادل: لا والله كيف ما استعيل.. وحبيبه قلبي وعمري بعيده عني..
حصه: اممم.. اقوووول.. بسير امي تزقرني
عادل: امج تزقرج ولا من المستحى تبين تشردين..
حصه: ههههههه.. بسرعه تكشفني..
عادل: خلاص أنا عارفنج وخابزنج.. اعرف كل تصرفاتج ..
حصه: حرااااام.. ماروم اسوي شي بسرعه بتجكني..
عادل: ليش على شو ناويه؟؟
حصه: ها.؟. ماشي ماشي..
عادل: فديتج والله.. اخبرج .. انا امي قالت لي عن سالفه ربيعتج.. شو علاقتج وياها..
حصه: تصدق ماقمت ارمسها غير في المدرسه .. ماقمت اتصل فيها شرات اول ولا هي ادق..
عادل: لا يا حصه.. مابا علاقتج ويا ربيعتج تهتز والسبه انا..
حصه: لا تحاتي.. احين بدق لها..
عادل: يلا عاد ما قلت احين.. احين انا ارمسج..
حصه: مو بسك؟؟
عادل: ليش شبعتي مني..
حصه: ههه.. وبصوت واطي.. لا..
في هاللحظه سمعت دقه الباب بندت عن عادل وسارت فتحت الباب ..كان ابراهيم اخوها ..
حصه: هلا والله بوخلي..
ابراهيم: هههه.. ليش قافله الباب.. أكيد اترمسين حبيب القلب..
حصه من الخجل نزلت راسها وتمت تلعب بصبوعها..
ابراهيم: يلا مو وقت المستحى احين.. بسير السينما ما بتيين؟
حصه فجت عيونها وتبتسم ابتسامه عريضه وركضت تحضن اخوها: الللللللللله وناسه.. بيي شقايل ما بيي..
ابراهيم: يلا عيل.. شو تترين.. اتزهبي وانا اترياج..
حصه: بس..
ابراهيم: بس شو؟؟ عادل ما يرضى؟؟
حصه: لا مب عادل..
ابراهيم: ها عيل شو؟؟
حصه: غزلان..
ابراهيم يوم سمع طاري غزلان انجلب ويهه: شو فيها؟
حصه: اذا ما قلت لها بتزعل
ابراهيم: عيل مب طالع.. شو انا ابا اطلع ويا اختي هاي ليش اترز ويهها؟
حصه: ابراهيم: ليش جيه ترمس عنها؟؟ ماحيدك جيه؟
ابراهيم: ما تستاهل اني ارمس عنها بالزين.. المهم بتيين ولا شو؟
حصه: هي بيي بيي..
ابراهيم: اترياجطلع وبند الباب وراه
حصه في هالأثناء اتصلت في غزلان ولو انها عارفه ان غزلان ما بتيي بس عشان غزلان ما تزعل منها..
غزلان: اوه.. حصوو.. اخيرا اتنزلتي تتصلين؟
حصه: حرام لا تقولين لي هالكلام... والله اتضايج.. حتى انتي ما تتصلين؟
غزلان: اوكي اوكي.. سمعي بقولج سالفه؟
حصه: شو قولي..
غزلان: تحيدين خالد الي شفناه في المدرسه..
حصه: اخخخخخخ.. شو ياب طاري هالصايع؟؟ شو فيه؟
غزلان:خطبني من ولد خالتي اتخيلي؟؟
حصه: صــــــــــــج
غزلان: هي والله.. بس احين اهلي بيتشاورون وبسألون عنه..
حصه: اوبس.. هالموضوع يباله قعده.. المهم سمعيني انا اتصلت اخبرج اني بظهر السينما ويا ابراهيم بتيين؟
غزلان: لا وعععع
حصه: اتوقعت.. المهم يوم برد بيي بيتكم وخبريني؟.
غزلان: اوووووووووكي.. حطي بالج من عمرج..
حصه: يلا باي..
بندت ولبست عالسريع وظهرت من غرفتها عشان تزل وتسير عند ابراهيم الي كان يترياها في الموتر..
ابراهيم: شو ها.. ساعه لين ما تلبسين؟
حصه: لا ترا رمست غزلان..
ابراهيم: لا يكون بتيي؟
حصه: لا..
ابراهيم: اصلا انا وايد مصدق عمري.. اصلا من بتسمع طاري ما بتيي..
حصه ما قدرت اترد لأنها اتعرف ان الي قاله اخوها هو الصح.. فسكتت وطلعت تليفونها وطرشت مسج لعادل اتقول له انها بتظهر ويا ابراهيم السينما..
ابراهيم: شو تبين اتواعدين حبيب القلب.. عادي ترا..
حصه: استح.. شو اواعد.. لا بس اخبره اني بظهر..
ابراهيم: واعديييييه خل اواعد ربيعتي ..
حصه: شووووو؟؟ ربيعتك؟؟ اي ربيعه؟؟
ابراهيم: خلاص يا حصه زهقت.. زهقت وانا اصبر على غزلان مليت.. كم بصبر عليها... وهي موول مطنشتني .. فتعرفت عوحده عن طريق ربيعي؟؟
حصه وهي مستغربه من اخوها.. وتمت تتطالعه.. ومتضايجه مابغت ان اخوها يوصل به الحال لهالدرجه والسبب ربيعتها: برهووووووم.. انت شو اتقول؟؟ من صدق ترمس والله؟؟
ابراهيم: هي واسمها نوال تبيني ارمسها جدامج عشان اتصدقين..
حصه: لا ويه.. مابا.. طحت من عيني والله..
ابراهيم: شو تبيني اسوي.. كم تبيني اتريا عليها هاي لين ما تحن علي.. على الأقل نوال تسأل عني وتتصل وتنشد عني ..
حصه: بس مابتروم اتحبها؟؟
ابراهيم: ليش شو دراج؟؟
حصه: اخيييي كيف بتحب بنت جيه رضت اترمسك في التليفون .. وين أهلها عنها..
ابراهيم: هي شراتي محتاجه لشخص اترمسه..
حصه: كم عمرها؟
ابراهيم: في نفس عمركم ..
حصه: صخ صخ عن السالفه انا صدق صدعت من هالطاري.. ما اتخيل..
ابراهيم: يلا وصلنا وبلا هذره زايده خل ننزل.
حصه اكتفت انها تتطالع اخوها بنظره وحده من فوق لتحت والغضب باين عليها ونزلت.. وابراهيم ابتسم لها .. وفي خاطره يقول افهميني يا حصه.. والله غصبن عني انا ابا انسى غزلان .. ما يسوى علي هالحب اعذب عمري عشانه..
==========
عادل طبعا كلم امه في سالفه الملجه ووافقت .. وكلمت ام حصه .. وهي قالت انها بتشاور ابو حصه وبترد عليها خبر.. وفي بيت بوسلطان .. كانت منى ياسه تتطالع تلفزيون ويا ام سلطان وناصر.. ام سلطان كانت ترمس في التليفون .. ومنى وناصر يسولفون ويتابعون القنوات..
منى: انزين حط قناة.. شو ها جلبت في القنواة كلها افتر راسي..
ناصر: جب انتي..
منى: لا والله..
ناصر: هي.. في بنت اترمس اخوها جيه؟؟
منى: بسم الله شو قلت انا..
ناصر كان ياكل لب.. خذا قشر اللب وفره عليها.. منى زاعجت: يالوصخ..
وفي هالوقت نزل بوسلطان ويوم شاف الإبتسامه عويه منى استانس.. بوسلطان طبعه حنون ويحب البنات.. كان وده ان الله يرزقه ببنت بعد فدوى بس الله ما كتب.. فكان مب مقصر على منى أي شي.. ومعززها ومكرمنها بشكل.. ومنى كانت اتحس بإحساس انها فعلا بنتهم.. بس ما خلت هالإحساس ينسيها انها في هالبيت كعامله وبس.. خدامه يعني.. طلع بو سلطان من البيت يروح ميلس واحد من جيرانهم.. ورن تليفون ناصر.. تم ناصر يطالع منى ومنى تتطالعه تنتظر انه يرد.. وناصر يطالع الرقم ويرد يطالع منى.. عرفت منى ان الي متصل اكيد وحده.. بس ناصر قدر يقاوم رغبته في الرد وبند الخط في ويهها وفر التليفون على منى..
منى: بسم الله .. شفيييييك
ناصر: اتصلي فيها قولي لها لا تتصل عرقمي؟؟
منى ابتسمت.. وتمت تتطالعه بإستغراب.. معقوله ناصر يقول لها هالكلام.. : من صدقك..
ناصر: سوي الي قلت لج عليه وخلج ساكته..
وفعلا منى اتصلت في البنت وسوت الي قالها عليه.. وهي فعلا في هاللحظه افتخرت في ناصر.. واستانست انها قدرت اتأثر عليه ويودر هالبنت.. وردت تسولف وتضحك وياه.. لغايه ما تأخر الوقت وراح ينام..
======
حصه بعد ما خلص الفلم ردت ويا ابراهيم.وطلبت منه ينزلها عند باب بيت غزلان .. وكانت ساكته ما تسولف وياه من غيضها لن ابراهيم تعرف على وحده.. ونزلت بيت غزلان وقعدت وياها.. وسمعت سالفه منى..
حصه: ودي اتعرف عليها..
غزلان: ان شاء الله بوديج لها يوم بسير بيتهم..
حصه: هي دخيلج.. غامضتني.. اعوذ بالله من هالحرمه كيف جيه..
غزلان: والله لو اتشوفين اماكن الجروح الي عجسمها بتحسين بالظلم الي كانت فيه..
حصه: الله يعينها المسكينه..
غزلان: بس احسها مشتاقه لأبوها وايد..
حصه: وحليلها.. بس كيف جيه امها بعد ما تسأل عن بنتها..
عزلان: ماعندها قلب هالأم..
حصه: الله يعينها.ز بس ما قلتي لي عن سالفتج.. شو موافقه انتي..
غزلان: مادري.. بس
حصه: بس شو؟
غزلان: خل اشوف راي هلي اول عقب بشوف..
حصه: هي احسن.. تدرين بعد هلج يعرفون مصلحتج اكثر..
حصه كانت تتطالع غزلان وفي قلبها غيض منها لأنها السبب في الي وصل له ابراهيم ومب رايمه تقول لغزلان عن سالفه ابراهيم عن تكرهه زود.. فسكتت ؟؟
غزلان: شو فيج سرحانه.. اكيد اتفكرين في حبيب القلب.
حصه: ههههه.. لا والله بس فيني رقاد.. بروح البيت اوكي..
غزلان: ليييييييش؟
حصه: شو ليش؟.. شوفي الساعه كم.. 11.. وقت الرقاد وراي دوام باجر..
غزلان: اها.. اوكي.. باجر بييج الصبح عشان انروح سوى..
حصه: خلاص ان شاء الله..
نشت حصه وطلعت عشان اترد بيتهم وترقد.. وغزلان تمت تايهه بأفكارها دخلت عليها وداد.. وشافتها سرحانه..
وداد: شوفيج؟
غزلان: مادري هالموضوع اربكني؟
وداد: غزلان.. لا تفكرين احين تو الناس.. خل انشوف شو بيصير؟
غزلان: مادري..
وداد: ان شاء الله خير.. بس اليوم بكلم سعيد وبقول له السالفه..
غزلان: سعيييييييييد.. مشتاقه له.. دقي عليه خليني اكلمه..
وداد: اوكي..
وداد خذت التليفون ودقت على رقم سعيد.. سحبت غزلان عنها التليفون عشان اتكلمه..
سعيد: الو..
غزلان: هلا والله بالطش والرش.. وماي الورد بالغرش..
سعيد: اوه.. غزولتي.. اشحاااااالج؟؟ ليش صارقه تليفون وداد .. تبين اتغازلين منو؟
غزلان: واحد اسمه سعيد.. اتعرفه؟
سعيد: لا.. شو حلو..
غزلان: لا وع.. شيفه..
سعيد: هههه مالت عليج.. ما شفتي عمرج في المنظره..
غزلان: ماعندنا منظره..
سعيد: عشان جيه شكلج يخرع.. اشحالج؟؟؟ وشو اخبار دراستج؟
غزلان: انا بخير.. والدراسه اوكي.. بس انت اشحالك؟
سعيد: بخير.. بس والله متوله عليكم وعلى البلاد بكبرها..
غزلان: متى بتيي؟
سعيد: على ايجازه الكريسمس مالهم.. يعني شهر 12
غزلان: خييييييبه وايد ماروم اصبر عنك زود
سعيد: شدي حيلج ودرسي عدل عشان اتيين عندي تدرسين وياي؟
غزلان: صدق والله
سعيد: هي صدق بعد شو.. مليت قاعد روحي هني..
غزلان: لا جيه حمستني الصراحه بدرس عدل عيل..
وداد: شو السالفه؟
سعيد: ول.. انتقلت العدوه منج لوداد استوت ملقوفه
غزلان: الظاهر جيه..
وداد وهي تسحب التليفون من غزلان: هاتي لا.. خسرتيني.. برمسه بقوله سالفتج؟؟؟ هاتي..
غزلان من غيضها يودت ايد وداد وعضتها.. وتمت وداد تصرخ: الله ياخذ ابليسج.. حشى مب آدميه..
غزلان: امممم.. لذيذ.. بعد لقمه..
وداد وهي اتدزها .. : خوزي هناك..
سعيد: ياريتني وياكم.. شو السالفه؟
وداد: هاي اختك عضاضه مستويه.. اتعضني.. المهم اسمع السالفه بإختصار مفيد مابا اخسر تليفوني.. ماشي بيزات.. جان انت بتدفع شي ثاني..
سعيد: روحي لا انا روحي مفلس.. يلا قولي...
وداد: اختك كبرت يا سعيد.. خاطبنها واحد من ربع علي..
سعيد: شوووووووو.. هند خطبوها؟؟
وداد: لاااااااااا.. غزلان
سعيد: من صدق ترمسين انتي.. غزلانووووو تنخطب.. لا لالا.. اكيد هاي جذبه ابريل.. لا شو ابريل نحن في سبتمبر..
وداد: والله صدق وحتى اسمه خالد..
سعيد: اووه .. بوالوليد بعد.. انزين وابوي شو قال؟
وداد: ماشي ابوي قال بيشوفه وبينشد عنه وقال لازم انشاورك انت بعد
سعيد: تبين الصراحه بيني وبينج ابا الفكه من اختج..
وداد وهي مغيضه: شووووو.. لا والله
سعيد: اتمصخر شو فيج.. لا والله بس تدرين.. هالأيام على الي نشوفه حولنا والي يصير في هالدنيا والشباب الي ما منهم أمان واللعابين هاييل يخلوني اخاف على اختي.. والبنت كل ما اتعرس ابجر يعني بعد الثانويه احسن.. وغزلان ماشاء الله مب صغيره
وداد: وانا بعد اقول نفس الرمسه..
سعيد: عيل نشوف ابوي شو بيقول عن الريال ويصير خير..
وداد: ان شاء الله.. عيل اقول لأبوي هالكلام..
سعيد: هي قولي له رايي..
وتمت اتسولف وياه وبندت.. وقالت لغزلان كلام سعيد ورايه.. وطلعت من الغرفه وخلت غزلان غرقانه بأفكارها .. وحيرتها..
=======
مرت ثلاث أيام الثلاثاء
==
خالد: خلوووووود كم بتريا والله بتخبل... ابوها وشفناه وكلمته..
علي: ههههه.. شفيك.. اتريا اشوي.. خل ينشدون عنك
خالد: شو انت ما قلت لهم كل شي عني..
علي: بلا.. بس لا تستعيل انت.. خلك ريلاكس.. وبعدين هلك شو قالو؟
خالد: هلي قلت لهم يتريون ردكم عشان ايون رسمي..
علي: ان شاء الله خير..
خالد: والله اخرتها بتخبل والسبه انتوا..
عبدالله: بتلحق عالزواج وعبالته اشله مستعيل..
خالد: سكتووه ها .. يرفع الضغط.. محد يحس فيني غير علي..
عبدالله: افا والله احين قمت انا عبووووود ماحس فيك..
تم عبدالله يغايض بخالد وعلي يساعده.. وهو ساكت عنهم ومغيض منهم ومحرج حده..