الجزء ( 10 ) : للحب عنوان

====================
ملخص الجزء السابق : اكتشف علي من الي كان متصل فيه ومواجهة وداد وهند له وعرف حقيقة من يكونون بالنسبه له وانتقاله للعيش وياهم وانه يسلم على اهله، اكتشف خالد بيت غزلان وين ، وعلي تقرب اكثر واكثر من هند وفرحه بلقائها وقراره انه يروح العمره ويا هند وابوها، أحمد كشف عن حبه لحصه لكن بعد ما عرف انه حصه استوت لغيره ورضوخه لأمر الواقع الأليم، وتمت خطوبه حصه وعادل على خير

=====================

خلصت الحفله.. وردت حصه لغرفتها.. وبسرعه بدلت ودشت الحمام تسبح.. وطلعت من الحمام ولبست بيجامه النوم كان لونها سماوي عليها ورود بيضا صغيره.. فتحت شعرها وبدت اتنشفه.. وانتبهت انها غالقه تليفونها ابتسمت وفتحت تليفونها .. وفي هاللحظه سمعت حد يدق باب غرفتها.. نشت وفتحت الباب كان ابراهيم
ابراهيم: مبروووك يا أحلى إخت في الدنيا وحضنها بالقو..
حصه نزلت الدمعه من عينها وفي نفس الوقت كانت مستحيه فحبت اتغير الموضوع: خوز عني.. خرستك بالماي الي فشعري.. بتمرض..
ابراهيم: ههههه..لا عادي.. ها شو شعورج يلا قولي لي..
ونش من عندها وراح انسدح على السرير ومسك مخدتها الصغيره وحطها تحت راسه وكان حاط ايديه تحت راسه بعد..
حصه: نش.. نش.. بتوصخ سريري..
ابراهيم: عناد مب ناش..يلا قولي شو كان شعورج..
حصه: افف يا ابراهيم.. شعور مب شي.. مرتبكه وخايفه.. ارتجف..
ابراهيم: عنبو.. ليش كل ها؟؟
حصه: مادري.. بس مادري كنت زايغه..
ابراهيم: وحليلج.. بس تدرين قبل لا اتيين انتي من الصالون شفت منو؟؟
حصه فجت عيونها ورفعت حواجبها كأنها عرفت هو يقصد من..
ابراهيم: هي.. غزلان..
حصه: انزين شو صار
ابراهيم: والله اني ما اقدر انسى هالبنت يا حصه.. اتخبلت عليها زووووود.. كانت طالعه فضيعه صدق..
حصه: هي حتى انا انعحبت فيها..
ابراهيم: الله يصبرني على فراقها..
وفي هاللحظه رن تليفون حصه كان واصل لها مسج.. استحت حصه لأنها عرفت اكيد الي مطرش هو عادل.. وهي ما كانت مخزنه رقمه بعده.. وابراهيم تم يطالعها بخبث وشل التليفون لأنه كان على الكوميدين حذاله وحاولت حصه انها تسحب عنه التليفون بس ما طاع.. وهو يوم شاف الرقم عرفه .. لأنه رقم عادل..
كان مكتوب في المسج: جيتك ولا غيرك ذكرته بمسراي
جيتك وكل انسان غيرك نسيته
جيتك وقلبي دقته تسبق خطاي
جيتك أقول مفارقك ما قويته
وإن مر يوم بالعمر منت وياي
أشتاق لك شوق المسافر لبيته
ابراهيم استانس وتم يضحك: عاشووووووو.. بدى الغزل احين.. ما صدق يوصل البيت على طول خذا رقمج اكيد من اهله وبدا يطرش.. الله يهنيكم.. يلا لازم اتطرشين له شي.. خل ادور شي في تليفونج وبطرشه له..
حصه استحت من اخوها وفي نفس الوقت كانت مستانسه..
ابراهيم: شو ها.. عفان الله... مافي مسج حلو.. كله نكت ولا سوالف ويا رباعتج.. جاتنج مسوين في المبايل..
حصه: من وين لي مسجات غزل يا حسره..
ابراهيم: افا عليج.. اخوج راح اييب لج.. لحظه بشوف شي حلو في تليفوني وبطرشه لج وانتي طرشيه له.. بس خل انخزن اسمه.. شو بتسمينه..
حصه: شو بسميه بعد.. عادل..
ابراهيم: وع.. انتي مول مب رومانسيه.. اختاري له اسم حلو..
حصه: لا والله
ابراهيم: سميه.. حبيب القلب..
حصه: لا شو.. عيب..
ابراهيم : طاعو هاي انتوا.. شو عيب.. تراه بيصير ريلج عقب كم شهر..
حصه: يوم بيصير بغير اسمه.. خل عادل..
ابراهيم: عنااااااد بخليه حبيب القلب..
حصه: ههههههه.. اخ منك عنيد..
ابراهيم: طالع على امج..
حصه: اصص.. عن تسمعك امي تفضحنا..
ابراهيم: هي والله عقب بتفر قشاري برع البيت.. خل اسير الحجره قبل لا اطب علينا..
حصه: يكون احسن لأن فيني رقاد بصراحه..
ابراهيم: يلا تصبحين على خير..
طلع ابراهيم وشال في ايده المخده الصغيره الي في غرفه حصه وتمت حصه اتزاعج: مخدتي يالحرامي..
ابراهيم: ما تبينها.. خلاص صادرتها.. يلا مناك..
حصه ابتسمت وصكت الباب وبندت الليت.. وتوها بترقد.. وصل لها مسج كان ابراهيم مطرشه لها عشان اترد اتطرشه لعادل.. وطرشته لعادل.. الي ما صدق يوصل له شي من حصه على طول اتصل لها.. حصه من شافته يتصل ماتت حيا.. ردت عليه بس تمت ساكته..
عادل: الووو..
حصه....
عادل: حصه.. اشحالج؟؟ ..
حصه.. ..
عادل: بعدج تستحين مني يعني؟؟ .. لا تستحين عاااد..
حصه: ان شاء الله بصوت واطي
عادل:اشحالج..؟
حصه: بخير..وانت؟؟
عادل: بخير.. شو الدراسه وياج؟؟ ان شاء الله اوكي مرتاحه
حصه: الحمد لله.. زينه..
عادل: اهااااا.. انزين ما قلتي لي.. شو رايج في الحفله اليوم؟؟ استانستي؟؟
حصه: هي..
عادل: ههههه.. شوفيج ترمسين بالقطاره كلمه كلمه..
حصه ضحكت.. ويوم سمع عادل ضحكتها تخبل زود: وافديتني انا..
حصه مارامت تمسك عمرها ضحكت زود ومن خاطرها..
عادل: هي.. جيه اباج.. مب مستحيه ومادري شو.. خلج عاديه.. ماباج اتعديني واحد غريب عنج.. ترا انا خلاص مرتبط وياج..
حصه: بحاول..
عادل: ماشي بحاول.. لازم
حصه: اوكي..
عادل: واي على الرقه كم بعيش.. تدرين يا حصه.. صح اني ماعرفج وايد.. وهاي اول مكالمه لي وياج.. بس والله الراحه الي حاس بها صوبج.. ما تساوي اي راحه .. الله لا يرحمني منج..
حصه: ولا منك..
عادل: شو قلتي.. عيدي ما سمعت؟
حصه: ههه.. ولا منك..
عادل: لا انا اليوم ما برقد..
حصه: لا لازم ترقد لأني انا بعد برقد احين..
عادل: شو يعني بتبندين عني؟
حصه: يقولون
عادل: افا..
حصه: بس انا صدق فيني رقاد
عادل: فيج رقاد ولا تبين تتهربين مني..
حصه: لا والله مب جيه..
عادل وهو يقاطعها: خلاص اهم شي راحتج.. ارقدي وارتاحي.. وانا بعد برقد.. بس ابا منج شي؟
حصه: تفضل..
عادل: اباج اتقوميني باجر حق الصلاة..
حصه: خلاص.. الساعه 10.30 بتصل بقومك..
عادل: خلاص اوكي..تصبحين على خير الغاليه
حصه: وانت من اهله..
بند عادل وهو مستانس انه حصه بدت تاخذ عليه وبدى الخجل يروح منه.. وها دليل انها ارتاحب له بسرعه.. وناموا وكل واحد فيهم يفكر في الثاني..
=======
في بيت غزلان.. من وصلت فهي بدلت ونامت.. وكانت الساعه 1.30 .. والكل كان راقد من بعد ما ردوا من بيت بوسلطان.. إلا هند الي كانت اتحس بصداع شديد في راسها من صوت الأغاني.. الي كانت في الحفله.. لأنها في العاده ما تحب الحشره وايد.. تحب الجو الهادي.. نزلت من الدري عشان اتروح المطبخ التحضيري الي تحت وتاخذ لها حبه بندول وتيلس تتطالع تلفزيون لين ما اييها رقاد.. وهي كانت تمشي.. علي حست بصوت الخطوات.. فطلع من غرفته وشاف هند وهي نازله.. بسرعه بند ليت غرفته وبند الباب ونزل وراها.. وهي في المطبخ اتييب لعمرها كوب الماي دخل وراها شوي شوي عشان يزيغها..
علي: بووووو
هند من سمعت صوته من الزيغه فرت الكوب الي في ايدها على الأرض وانكسر.. وتم يضحك عليها علي: الله ياخذ ابليسك.. خوفتني.. وقفت قلبي...
علي: لا.. فدييييته.. وين وين..
هند استحت من كلامه.. ونزلت راسها.. وفي نفس الوقت متغايضه منه.. وكان قلبها يدق بقو .. وزادت انفاسها.. حست ان قلبها بيوقف وهالمواقف مب زين على قلبها لأنها ما تقدر تتحمل.. بسرعه راحت وخذت دواها عشان تهدا شوي.. ويوم حس علي ان هالشي تعبها ندم على الي سواه.. وتم يحاتيها.. وهي راحت بسرعه الميلس وقعدت وتمت حاطه ايدها على قلبها وتتنفس بسرعه ومنزله راسها.. وفي هالوقت نزلت وداد من الدري.. من شافت هند في هالحاله.. بسرعه ربعت صوبها..
وداد: هند.. حبيبتي.. شو فيج..
هند ما كانت رايمه ترمس عشان ما تجهد على عمرها بس رفعت عيونها واطلعت وداد وردت راسها على ورى وحطته على الكنبه.. وتمت تتنفس بشده.. وداد صدت وراها وشافت علي واقف وهي لأنها متشتته ومب عارفه شو الي صاير.. تمت اتزاعج على علي.
وداد: شو سويت بإختي؟؟ .. شو قلت لها..؟؟ في شو ضايقتها..
هند كانت اتحرك ايدها ولكنها مب رايمه تنطق.. انه لا.. وداد ما كانت منتبهه لإيد هند..
علي: ما سويت لها شي.. ما كان قصدي والله مادريت انها بتتعب جيه..
وداد ردت صدت صوب هند وشافت حركات هند وهي اتهز راسها انه لا علي ماله خص..
وداد: عيل شو استوى بج.. قولي لي..
هند بعد ما بدا تأثير الدوا وياها.. وبدت تهدأ شوي.. : مممماشي.. انا روحي تعبت .. كككان ياي يمممزح وياي .. بس ااانا منننننن الصصدمه تتتعبت..
وداد: خلاص هدي هدي.. صدت صوب علي.. الله يهداك علي.. ما تعرف حالتها..
علي وهو نظرات الخوف والقلق الي في عيونه.. كان وااايد زايغ على هند: لا والله .. لو ادري جان ما سويت... اسمحي لي هند والله ماكان قصدي أذيج..
هند: لا حصل خير.. عادي..
وداد: يلا نشي فديتج.. بسرعه على الفراش جدامي سيري ارقدي..
هند نشت من مكانها وراحت صوب الدري عشان اتروح غرفتها وتمت هند اتساعدها بس هند دزتها لأنها خلاص تقدر تمشي روحها.. : تصبحون على خير..
وداد +علي: وانتي من اهله..
وراحت هند غرفتها وانسدحت على السرير ومن التعب رقدت.. اما وداد فقعدت على الكنبه وعلي قعد على الصوب الثاني..
وداد: الله يعينج ياختي.. ويشفيج ان شاء الله..
علي: هي والله.. بس يعني موول ماشي علاج لحالتها..
وداد: لا... الدكاتره قالو مكان الثقب يشكل خطر عليها انهم يسوون له عمله..
علي: اهاااا..
وداد: دومي ادعي ربي انه اتصير معجزه وهالثقب ينسد.. دوم اتقول لي ان خاطرها اتعيش حياتها طبيعيه شرات اي بنت .. بس هي اتحس عمرها غير عن الباقي.. ومحرومه من هالشي..
علي: والله اني حاس بمعاناتها..الله يعينها.. بس انتي شو موعنج هالوقت..
وداد: ماشي قلت بدق حق سعيد لأني كنت ارمسه وقطع الخط خلصت بطاقته وانا ناسيه تليفوني في الميلس قلت بشل التليفون عشان ادق له..
علي: اهااااا.. سلمي عليه..
وداد: ان شاء الله.. بس انت ما قلت لي شو سويت اليوم في بيت عمي؟
علي: اسكتي والله وايد استانست .. بسرعه اتأقلمت وياهم.. أحمد وناصر ماشاء الله عليهم.. سوالف وضحك طول الوقت..
وداد: يلا ربي يوفقكم..
علي: يلا عيل.. تصبحين على خير.. ولا تنسين سلمي على سعيد.. وقولي له اني باجر بدق له..
وداد: خلاص اوكي..
روح علي من عند وداد وصعد غرفته.. قبل لا يدخل غرفته تم يطالع باب غرفه هند.. وتم حزين.. يفكر في حالتها كيف.. ودخل غرفته وفر عمره على السرير واستسلم للنوم.. واما وداد فدقت على سعيد..
وداد: هلا.. سوري تأخرب.. بس كنت ادور على تليفوني..
سعيد: انزين ليش ما دقيتي من تليفون غرفتج؟؟
وداد: قافله الصفر وناسيه الرمز وماعرف وين حاطه الورقه الي كاتبه فيه الرمز..
سعيد: ذكيه فديتج والله..
وداد: تتطنز ويا هالويه..
سعيد: هههههه.. انزين كملي سوالفج؟
وداد: صح.. علي يسلم عليك وايد.. وقال بيتصل فيك باجر..
سعيد: الله يسلمه.. وحليله والله.. ودي اشوفه اتصدقين.
وداد: عادي رد البلاد وبتشوفه
سعيد: وين ياريت لو اقدر ارد جان ييت احين..
وداد: ليش متى بترد
سعيد: شهر 12 ان شاء الله.
وداد: يلا بالسلامه.. ومتى التخريج؟
سعيد: السنه اليايه.. على شهر واحد 2006
وداد: اففف وايد.. يلا بالتوفيق..
سعيد: اجمعين يارب.. وشو اخبار الدبه غزالوو.. ما اتكلمني احين؟؟
وداد: هاي خلها مشغوله ويا خطوبه ربيعتها وسوالفها .. خلها هاي..
سعيد: وحليليها .. وهادف شو علومه؟؟ .. مارد على سوالفه القبليه..
وداد: لا فديت هدووف.. صدق اتغير يا سعيد.. لو اتشوف هادف اليوم.. غير هادف الي قبل..
سعيد: الله لا يغير عليه ان شاء الله.. وهند ما بسأل لأني كل يوم ارمسها..
وداد: لازم .. تأومك.. وانا ما اتكلمني غير في السنه مره
سعيد: عندج سلطان اتكلمينه شو تبين في؟
وداد: هههههه.. جب
سعيد: ما ترضى عليه بعد.. لازم .. من حقج يختي..
وداد: اقول.. باجر انت دوام صح؟
سعيد: هي.. لا اتذكريني بصيح..
وداد: وييييو.. نحن اجااااااااازه..
سعيد: عادي.. ترا انا السبت والأحد.. وانتي بتكونين دوامها هاليومين.. ههههههه
وداد: جب يالسخيف.. يلا اجلب ويهك بروح ارقد
سعيد: بتروحين ترقدين ولا تبين اتكلمين حبيب القلب..
وداد: ههههه.. وييين حبيب القلب في سابع نومته احين..
سعيد: هههه.. انزين انزين.. بسوي عمري مصدق.. يلا تصبحين على خير.. في امان الله
وداد: في امان الله
بندت وداد عن سعيد وراحت فوق.. قبل لا ترقد..راحت تتطمن على هند وشافتها نايمه.. بعدها بندت الباب.. وراحت غرفتها عشان تنام..
.........
يوم الجمعه
الساعه 9.00 الصبح
في بيت خالد
...............
خالد كان قاعد عالنت .. وطبعا على الجات كعادته.. يسولف ويا الي موجودين.. دخل عليه يده وشافه يعابل بالكيبورد.. تم يبهت في الشاشه ومب عارف شو الي قاعد يصير جدامه.. انتبه خالد لوقفه يده وراه وتم يضحك..
خالد: يدي شفيك.. بسم الله شوي وبتدخل في الشاشه..
اليد: الي شاشه.. شاشه ولد عفووور .. ماشوف شاش هني قصده على الفرش الي ينحط تحت الياهل يوم يبدلون له ثيابه
خالد: هههههههه.. يدي هب شاشه يهاااال.. شاشه يعني ها تم يأشر على شاشه الكمبيوتر..
اليد: عنلاتك من ولد.. ها شاشه.. ها تلفزيون الا..
خالد: لا يدي.. التلفزيون كلمه انجليزيه.. وحنا عرب .. لازم انقول شاشه التلفاز مثلا.. ولا شاشه الكمبيوتر..
اليد: خل عنك.. انزين اشو ها الي يتحرك في الكمبوتر؟؟
خالد: لحظه يدي بييب لك كرسي..
نش خالد عشان اييب ليده الكرسي الي مال التسريحه.. وخلاه حذاله .. وقعد هو مجابل الشاشه..
خالد: شوف.. هالمكان يدي يدخلون فيه ملاييين الناس من كل مكان.. يسولوفون ويا بعض.. ويتعرفون على بعض.. يتراسلون..
اليد: هيييي.. يعني شرات الميالس..
خالد: هييييي.. بس الفرق ان هالميلس مختلط فيه بنات واولاد..
اليد وهو يطالع وراه.. وتم يرمس بصوت واطي: اخبرك.. فيه مزيونات ليدك الفقير..
خالد: هههههههه.. هي شي..
دشت عليهم عفرا اخت خالد وشافت خالد يالس يأشر على الشاشه ويرمس يده: خووش خوووش.. اتخرب ابوي العود من احين.. يلا خوز عنه.. عنلاتك من ولد..
خالد: يدي.. شوف عفووور هاي.. حاطه دوبها بدوبي.. دومها اتزفني..
اليد وهو رافع عصاته: عفووور وصمخ.. استحي عويهج اخوج ها.. ريال شو كبره تهزبينه..
عفرا: ماعليك منه.. ها بيخربك ابويه..
اليد: لا ما يخربني ولا شي.. يعلمني على الي يسمونه عنتر نت..
خالد: هي يدي يبا يستوي عنتر سنه 2004..
تمت عفرا تضحك ويا خالد .. ويدها تم يكفخ عفرا بالعصا عشان تطلع.. وطلعت من الغرفه.. ورد صد صوب خالد الي كان زايغ عن ينضرب بعد..
اليد: يلا.. هات لي مزيونه.. شقرا.. حليوه.. تشبه عانسي مجرم..
خالد: ههههه.. يدي نانسي عجرم..
اليد: الي هي.. بس خبرها ترا انا ماحب هالأسامي.. دور لي على وحده اسمها خبيصه.. ولا موزه.. ولا شيخه... يعني هالأسامي الزينه..
خالد: هههه.. بصوت واطي.. وين احصل له هالأسامي على النت احين..
اليد: شو قلت..
خالد: ها لا ماشي.. بس في بنيه مطرشه.. اتقول شو اسمك وعمرك ومن وين؟؟ .. لحظه خل اكتب لها..
اليد : شو بتكتب لها..
خالد: اسمك وعمرك ومن وين.. ؟
اليد: لحظه.. خل اقول لك.. قولها اسمي جورج.. وعمري 23 سنه.. ومن بوظبي..
خالد تم يضحك بصوت عالي مارام يمسك عمره: يدي.. احين وين استوت هاي.. جورج ومن بوظبي.. توك اتقول اسامي زينه ومادري شو..
اليد: ترا بنات هالأيام يحبون هالأسامي.. ماعليك انت اكتب...
خالد: ههههههه.. يدي والله ما بيصدقون..
اليد: اوهوو.. اخبرك.. نش نش من جدام هالشاشه مالتك .. يلا جدامي.. تزهب للصلاة..
خالد: اان شاء الله.. بس شل عصاك مافيني انضرب..
اليد: يلا جدامي..
نش خالد بعد ما بند صفحه الجات.. بس نسى يبند صفحه المغنيات الي كانت ورى صفحه الجات.. وراح يسبح.. واليد من شاف صور المغنيات قعد على الكرسي وتم يطالع: عنلاتكن من بنيات.. هب جمال عليكن.. الله يغربلكن ويغربل الي يابكن..
وفي هاللحظه طلع خالد من الحمام لأنه نسى يشل فوطته.. وشاف يده مندمج في الشاشه.. ويطالع المغنيات..
خالد: يدي..
زاغ يده من سمع صوت خالد وفز من مكانه : عنلاتك.. اشفيك.. روعت بي..
خالد:يدي يلا نش.. ولا ترا والله اخبر امي..
اليد: شو.. امك.. لا ابوي.. ماقوى على لسانها.. يلا سير انت اسبح واتزهب للصلاة وانا بسير اتريق..
خالد: هههههه.. خاف
طلع يد خالد من غرفته .. وهو بند النت.. وتوه بيبند الكمبيوتر كان حاط خلفية صورة غزال.. تذكر غزلان.. وقعد على الكرسي وتم يتأمل الصوره.. آآآآه ه ه .. يا غزلان لو تعرفين بحالي.. لا ليلي ليل.. ولا نهاري نهار.. ابا اوصل لج بس مب عارف كيف.. بتخبل والله.. وخصوصا يوم طلع علي.. ليش؟؟ .. صح يمكن سهل علي.. بس بعدني من غزلان.. ماروم اسمع صوتها ولا اشوفها.. اااااااااه يا قلبي..
ونش من مكانه متهايز ودش الحمام عشان يسبح.. ومن غير لا ينتبه لنفسه انه فتح الماي وهو بعده ما طلع ملابسه.. وتم بالوزار والفانيله.. ويوم انتبه على عمره تم ضحك.. صدق انج ماخذه عقلي..
-----------------
الساعه 1.30 الظهر..
الكل كان مجتمع في بيت بوسلطان..
-------------------
هادف: أحمدوو .. انت واخوك .. العبو عدل.. لعب الغش ها انا موول ما احبه..
غزلان: لا عيل انا الي احبه.. ماشي.. عيد عيد من اول ..
أحمد: حرام عليكم.. ليش جي ظالمينا.. ما غشينا..
غزلان +هادف: لا غشيتوا..
هادف: عيل كيف هالورقه عندك.. انا متأكد شفتها ويا ناصر..
ناصر: انا .. ماكانت وياي..
غزلان: لا وياك..
ناصر وهو يالس على ركبه ويرص بأسنانه ومعصب: اقولج ما كانت وياي..
غزلان: بلللل.. طاعوا ها.. شوي وبيكفخني..
سلطان من بعيد: ماعااااااااش من يكفخ غزلان بنت خليفه..
هادف وهو يصفر: عاش النسيب..
أحمد نش من مكانه معصب وفر الأوراق الي بيده: لا مب لاعب... شو ها.. كل ما نجرب انفوز هالإثنين ينطون.. لا غاشين وغاشين..
علي كان قاعد ويا سلطان يقرا جريده: ههههههه.. اعصابك.. الا هي لعبه..
أحمد: لا ترا نلعب واخر شي يقولون غاشين..
علي: خلاص انا بلعب بدالك.. يلا انا ياي..
ناصر: يلا احين والله ان قلتوا غاشين.. بشرمخ ويوهكم بهالأوراق..
هادف: هههههه ولد العم معصب..
أحمد قعد شوي جريب منهم عشان يشوف اللعبه.. وداد وفدوى وهند كانوا في المطبخ يساعدون ام سعيد وام سلطان .. وبوسلطان وبوسعيد قاعدين يسولفون وكل واحد فيهم يذكر ايام اول.. وجاسم وسلطان قاعدين وياهم.. ولطوف وعمور عيال فدوى وجاسم ياسين يلعبون.. ولطوف كل شوي تستغل الفرصه واتكفخ عمور الصغير وتشرد.. لنها تغار منه.. وفرق العمر من بينهم سنه وثلاث شهور.. لطيفه عمرها 3 سنين يعني كي جي ون.. وعامر عمره سنه وتسع شهور.. توه بدا يتعلم يرمس عالخفيف..
وفي هالصمت الكل كان مندمج في شي.. فجأة علا صريخ غزلان: هييييييييي.. فزنا.. شفتوا.. شفتوا..
ناصر: لا اصلا علي ما يعرف يلعب عشان جيه..
أحمد نش من مكانه لأنه انكشف انه كان يغش بهالطريقه..
هادف: ها ليش نشت ولد عمي.. وين شارد..
أحمد: ماعندي سالفه اقعد وياكم.. بسير اقعد ويا جاسم وسلطان ابرك لي..
علي: ههههههه.. انا بعد.. يلا تعبت..
غزلان: يلا عااااد.. ما لعبت غير دور واحد..
علي:بعد الغدا.. بسير اخذ لي كورس من أحمد..
هادف: لا من أحمد لا.. بيعلمك على الغش ها..
وفي هاللحظه رن تليفون علي.. والي كان متصل كان خالد.. رد عليه علي وقعد .. كان جريب من غزلان..
علي: هلا والله بوالوليد اشحالك؟
خالد: بخير يسرك الحال.. وينك ياخي؟؟ .. من يوم ما سرت بيت هلك ما قمنا انشوفك..
علي: تدري بعد.. انشغلت.. اسمح لي والله حقك علي..
غزلان من عرفت ان علي يرمس ربيعه.. تذكرت خالد.. بس ما قدرت تتأكد لأنها ما تعرف اسم خالد.. وتمت اتحاتي.. وميته وتعرف منو ها..
وفي هاللحظه كان ناصر ملاحظ سرحان غزلان وتم يمشي شوي شوي وراها عشان يزيغهازز وفعلا خافت.. وصرخت.. : الله ياخذ ابليسك يالحمار.. انا اراويك..
ناصر: ويييييو ماترومين..
خالد من سمع صوت غزلان عرفها.. تم صاخ.. علي كان يرمس بس خالد كان في عالم ثاني.. راح تفكيره صوب غزلان.. واتحسف زياده انه مب رايم يوصل لها.. كيف يكلمها..
علي: حووووو.. وين انت.. اكلمك..
علي: ها.. وياك وياك..
علي: لا ابوي.. انت لا وياي ولا شي.. ساعه ارمسك وانت صاخ ماترد علي وبالك مب وياي.. اكيد اتفكر في حبيبه القلب.. ماقلت لي شو سويت وياها؟.. ماشفتها بعد من ذيج المره..
خالد يوم سمع علي ياب طاري السينما خاف لا يكون علي لاحظ انها هي غزلان نفسها.. وتم يحاتي.. : انت شفتها صح..
علي: تبي الصراحه لا.. ما اذكرها..بس احيد عبود كان يقول انك شفتها..
خالد وبصوت واطي: اشوه.
علي: شو..
خالد: ها .. ماشي ماشي..
علي: هههههه.. والله حالتك اتعور القلب..
خالد: انزين عيل.. لازم انشوفك..
علي: خلاص بحاول الليله امر عليكم الكوفي..
خالد: خلاص نترياك.. تامرني على شي.
علي: لا سلامتك..
خالد: يلا في امان الله.
علي: مع السلامه..
وبند علي عن خالد.. وصد عيمينه شاف غزلان قاعده وتقرا مجله: بل.. مب انتي توج اتراكضين..
غزلان: هي.. بس خلاص عفيت عنه..
علي: هي زين زين..
غزلان: انزين كنت اترمس منوووو.. ها اعترف..
علي: هههه .. شكت فيني بنت الخاله.. لا تشكين.. ها ربيعي خالد.. الي يابني ذاك اليوم بيتكم
غزلان من سمعت طاري انه هو الي وصله.. عرفت انه اسمه خالد.. تمت مصدومه.. ومرتبكه وخايفه..
علي: تدرين..
غزلان والخوف ممتلكها وهي تبلع ريجها: شو؟؟
علي: وحليله كاسر خاطري..
غزلان: ليش؟.. شو بلاه
علي: يقول انه يحب وحده ... ومتخبل عليها.. ومتعذب المسكين لأنها ما تعطيه ويه.. بس ودي اعرف منو هالغبيه الي تضع من ايدها ريال مثل خالد شاريها..
غزلان: ويه انا اتوقعت شي احين بلاه..
علي: ليش الحب مب بلا.. !!!؟؟؟
غزلان: متفيجين انتوا.. اونه حب يقول لي..
علي: لا بس خالد صدق يحبها حتى انه يفكر يخطبها..
غزلان: انزين خل يخطبها شو يبا فيها يلاحقها..
علي: لا ترا هو يبا يكلمها بالأول عشان يعرف رايها فيه.. عشان يوم يخطبها يكون عارف رايها وما يفتشل جدام هله..
غزلان اكتفت انها اتهز راسها..
علي: الا اقول لج؟؟
غزلان: شو؟
علي: ولاشي.. روحي..
غزلان : يلا عاااااد.. لا تستوي سخيف قووول..
علي: اوهوو .. قلت لج ماشي..
غزلان: كيفك..
وراحت عنه..وعلي كان يبا يسألها عن هند اذا في حياتها حبت حد.. بس تردد عقبها وغير رايه.. ونادتهم ام سلطان عشان يروحون غرفه الطعام ويتغدون..
-----------------
في بيت سليمان جاسم أبو علي
----------
طبعا عليه اخت علي كانت على اتصال ويا اخوها وتعرف هو وينه وكيف احواله.. وين موجود.. بس كانت ساكته وما قالت شي لأمها عشان علي لين ما يستقر..
عليه: امي.. هاتي صحن الفطاير حق ريموو بنتي..
ام علي: هاج امي..
وفي هاللحظه دش عليهم ولد عليه الي عمره 5 سنين.. وفي ايده صوره.. ويركض صوب امه.. وامه كانت قاعده حذال ابوها.. بوعلي..
فهد: امي.. امي.. صوره منو هاي؟؟
عليه صدت على الصوره الي في اي ولدها وفي نفس الوقت صد بوعلي.. ومن شاف الصوره سحبها من ايده.. تم يطالعها وعيونه كانت مليانه دموع.. تذكر علي ولده يوم صغير.. وحن له.. تم يطالع الكل الي ياسين على السفره.. وخصوصا ان اليوم جمعه يعني الكل مجتمع.. محد ناقصهم غير علي.. بس ما حب يبين لهم انه مهتم لعلي لأنه هو الي طرده من البيت
ام علي: صوره من؟؟
بوعلي: ولدج .. وفر الصوره على ام علي.. الي من لقطت الصوره خذتها وحضنتها وتمت اتصيح.. لاحووول.. ياحرمه ياسين نتغدا لا تسدين نفسنا وتفتحينها مناحه..
ام علي: كله منك.. حرمتني من ولدي.. حشاشه يوفي..
بوعلي: والله ولدج مب متربي عدل.. وانا عيالي ماشاء الله كلهم زينين..
ام علي: حرام عليك فرقت اخو عن اخوانه وخواته..
بوعلي: ههههه.. نسيتي عمرج فرقتي عيالج من عيال خوالهم.. تتحسبين الكل شراتج طماع..
ونش بوعلي من على السفره وراح المكتب.. وقفل الباب وتم يصيح بحرقه.. وفتح الخزنه الموجوده وطلع صوره ولده علي وتم يطالعها ويتمسح بها.. وينك يا ولدي.. ارجع .. والله مسامحك.. بس ابا اشوفك.. اشتقت لك يا ولدي.. حرام حارم عيونا من شوفتك.. مابا اروح من هالدنيا وماشوفك.. ابا اعتذر منك قبل لا اروح لأني حرمتك من كل شي طول هالسنين.. يا ترى وين دارك.. حي ولا ميت.. مادري عنك.. الله يسامح الأقدار الي فرقت من بينا..
..
من الجهة الثانيه في الميلس كانت ام علي اتصيح وحاضنه صورة ولدها.. واليهال مب فاهمين شي.. علي هو اصغر واحد في العيله.. كان مدلع في البدايه.. بس صار الي صار انه في ضرابه صارت بينه وبين اخوه العود صفع مرت اخوه وطعن اخوه وطلع من البيت.. ومن يومها ابوه طرده من البيت ومنعه انه يدخل البيت.. ومن يومها وهم مايدرون عنه شي.. غير عليه الي تكفلت بكل شي هي وريلها من غير علم اهلها.. عليه تمت تتطالع الي يصير وفي خاطرها تصرخ واتقول كل شي انحل خلاص.. علي هني.. علي في البلاد.. رجع لكم ومتلهف على شوفتكم.. علي نسى كل شي.. علي يباكم وبس.. يبا حضنج يامي.. بس مب قادره.. تمت اتصيح ولاويه راسها على جتف ريلها.. واخوها العود كان توه نازل من الدري وشاف الصياح ها كله.. استغرب.. وشاف الكل ناش من السفره وماكل شي.. تم يسأل مرته وخبرته الموضوع..
جاسم: لا والله.. اشتقتوا لآخر العنقود احين..
ام علي: شقايل ما بشتاق لولدي الي من لحمي ودمي..
جاسم: نسيتي الي صار شكلج.. بسبب هالولد الي ترمسين عنه.. كنتي بتفقدين ولدج البجر..
عليه وهي تصارخ على اخوها: انت ليش قاسي بهالطريقه.. حرام عليك.. ها اخوك.. من لحمك ودمك..
جاسم: انا ما عندي غير اخو واحد والي هو محمد..
محمد: لا يا جاسم.. امي يابتنا ثلاث.. وبنتم نحن الثلاث اخوان.. محد فينا يتخلا عن الثاني..
جاسم:لا ابوي انا متبري من الثالث.. انتوا شو.. كلكم انجلبتوا ضدي وصرتوا وياه اشوف؟؟
آمنه: وانا ما انسى الصفعه الي صفعني اياها.. عمري ما بنساها..
عليه: انتوا ليش ما تفهمون.. علي كان عمره وقتها 17 سنه.. يعني مراهق.. وتصرفاته مب عقلانيه..
محمد: قولي لهم.. ها يالمتعلمين يالدارسين.. يالي تعرفون الدين..
جاسم: شو قصدك يعني.. شو هالشوق الي ياكم فجأة صوبه وتذكرتوه؟؟ .. ناوين اتدورون عليه واتييبونه؟؟
محمد: ليش لا.. في النهايه هو اخونا..
جاسم: مليوون مره قلت لك انا ما عندي اخوو.. ولا تخليني اقول انت بعد وياه
محمد: مشكووووور وما تقصر..
وتوه بيظهر من البيت.. وعليه اتصرخ وتنادي عليه.. : محمد.. محمد .. تعالي ياخوي.. واتعوذ من الشيطان..
محمد: اخوج ها يقهر..
عليه: ماعليك منه.. مصيره بيعقل وبيعرف الصح من الغلط.. بس تعال الله يهداك برمسك..
محمد: خير..
عليه: بلبس عباتي وبظهر وياك اترياني شوي..
محمد: يلا بترياج في الموتر.. لا اتييبين عيالج الشياطين لأني صدق مب فايج لهم..
عليه: افااااا احين عيال علايه مب فايج لهم..
محمد: هههه.. فديت علايه وعيالها.. يلا اترياج..
عليه: ههه.. ثواني..
دشت عليه البيت واستأذنت من ريلها وشلت شنطتها وطلعت وركبت الموتر..
عليه: يلا امش..
محمد: على وين؟؟
عليه: اي مكان.. اليوم بطلع على حسابك عاد وين المكان الي يسوى علايه ودها..
محمد: بوديها مطعم الخان..
عليه وهي تضربه بالشنطه على ظهره: مااااااالت..
محمد: كسرتي ظهري.. وانا بعدني شباب..
عليه: اي شباب صكيت الثلاثين وللحين ماعرست..
محمد: ماقدر اعرس واخوي مب موجود..
عليه: حجه .. انت اصلا مادري شفيك.. المهم خلنا من ها كله.. بند المسجل ابا اتصل..
محمد: اوكي.. بس بسرعه لأني ماروم من غير اغاني بوخالد..
عليه: انزين.. اسكت ولا كلمه.. وخلني ارمس على راحتي ..
محمد: بعد.. اوكي.. يلا انشوف.. بس اول شي بتكلمين منو انتي؟؟
عليه: بتفهم السالفه عقب.. اسكت..
اتصلت عليه في اخوها علي..
علي: هلا والله بعلايه الغاليه.. وييييينج ما تنشدين عن اخوج..
عليه: يلا حقك علي.. واممممممموح هاي بوسه على راسك ولا تزعل..
محمد استغرب.. منو هالي ترمسه عليه.. ؟؟ .. وليش جيه عاقه الميانه وياه.. مايحيد في حد من هله اوكي ويا علايه عشان لهالدرجه انها تعطيه بوسه.. قرر يسكت ويتريا اخته شو بتسوي..
عليه: ها وينك انت احين حبيبي؟؟
علي: انا في بيت عم عيال خالتي..
عليه: هي.. شخبارهم.. كلهم بخير؟؟
علي: الحمد لله.. ليش؟
عليه: ماشي بغيت امر عليك شوي اظهر وياك..
محمد استغرب زياده منو ها الي تبا عليه تظهر وياه؟؟ ومهتمه فيه وفي اخباره..
علي: امممم.. خلاص اوكي تعالي وتم يشرح لها مكان بيت بوسلطان.. بس بشرط تدخلين داخل واتسلمين عليهم..
عليه: اوكي..يلا يوم بوصل بدق لك..
وبندت عنه الخط بسرعه صد صوبها محمد وتم يسألها..
محمد: منو ها؟؟ .. وليش عاقه الميانه وياه لهالدرجه .؟؟ .. وين بتطلعين وياه؟؟
عليه: بل بل.. وحده وحده.. كليتني.. المهم سير وشرحت له المنطقه.. وما يخصك..
محمد: مب ساير غير يوم اتقولين لي..
عليه: لاحوووول.. مشكلتي اعرفك اشكثر عنيد.. بس اول ممكن توعدني بشي..
محمد: خير..
عليه: اوعدني..
محمد: وعد..
عليه: ماتقول لحد عن المكان الي بتروح له وبتشوف الناس الي فيه؟؟
محمد: شو السالفه..
عليه: اوعدني..
محمد: وعدتج خلاص..
عليه: بنسير عند علي..
محمد من الصدمه الي يته دح بريك قوي وقف الموتر على جنب.. ومسك ايدها بالقو وتم مفجج عيونه: شوووووووو
عليه: ههه.. ايدي.. كسرتي ايدي.. شو بلاك.. اقولك بنشوف علي.. فيها شي..
محمد: احلفي عليووو.. وعيونه انترست دموع.. قولي انه علي اخوي.. اخونا..
عليه: هي.. ونحن منو عندنا غيره اسمه علي؟؟
محمد تم يصيح ونزل راسه على السكان وتمت عليه اطبطب على ظهره.. وفجأة نش.. خافت عليه ونقزت.. بس تمت تضحك من نظراته.. بسرعه بسرعه تم يمسح دموعه: مابا علي يشوف دموعي.. وين بيتهم وين.. وين ساكن.. بسرعه..
عليه: هو ساكن عند خالتي ام سعيد ووداد وهند.. اتحيدهم..
محمد: انا ما نسيتهم عشان اذكرهم.. انا مستحي اروح لهم من يوم امي طردتهم من بيتنا..
عليه: الله يسامحها بس.. تطرد اختها واخوانها.. بس هم والله طيبين.. علي يقولي اشكثر استانسوا يوم شافوه ودلعوه دلع عمره ماحس بمثله..
محمد: يعني بنسير بيت خالوو... ادله.. بروحه وانا مغمض..
عليه: لا دخيلك لا تغمض.. وراي عيال اربيهم.. بيت عمهم اليوم سايرين الغدا هناك جنه..
محمد: هي.. وين وين..
ردت عليه شرحت له العنوان وهو على طول دق سلف وراح صوب العنوان .. كان مسرع من الفرحه الي فيه.. وعليه مستانسه وفي نفس الوقت زايغه من السرعه الي هو فيها.. وبعد 10 دقايق وصلوا جدام باب بيت بوسلطان.. ومحمد نزل قبلها.. تمت اتنادي عليها ورد..
محمد: شو عندج؟؟
عليه: لا تخرب المفاجأة.. رد.. انا بدخل اول وبسلم عقب بزقرك.. ابا افاجأه..
محمد: انتي حركات بعد.. يلا بسرعه..
عليه دقت عليه وبسرعه الخدم فتحوا لها الباب ودخلت.. وما وعت الا بحد يركض ويحضنها كانت هند.. الي صار لها سنين ما شافتها..
عليه: هندووو.. حبيبتي والله..
هند: يالجلبه اشتقت لج والله.. كبرتي يا عليه..
عليه: حتى انتي.. فجأة صدت وشافت وداد.. ودااااااد.. حبيتي والله.. تغيرت اشكالكم وايد..
ويوم شافت خالتها ما قدرت اتيود عمرها ربعت وحضنتها وتمت اتصيح في حضنها واتبوس ايدها وراسها.. وعقب لاحظت هادف وغلان.. بس ما كانت اتعرفهم.. بس خمنت..
عليه: اعتقد انتي غزلان.. وانت هادف صح..
هادف+ غزلان: صح..
راحت وسلمت عليهم.. وعقب تذكرت سالفه محمد.. : اقول.. لحظه.. انا عندي مفجأة لعلي.. تخيل منو عند الباب..
علي: اكيد ريلج.. وها اتسمينه مفاجأة..
عليه: لا.
علي وهو مبطل عينه: اميييي..
عليه: لالالالالالا..
علي: ها عيل منو..
عليه: اتريا هني.. بزقر المفاجأة..
وطلعت برع وشافت محمد يمشي ويلعب بالتراب بريله وحاط ايده ورى ظهره ويفكر.. : تعال يلا..
محمد صد صوبها وبسرعه ربع عشان يدخل.. : خايف عليووو..
عليه:يلا بسرعه عاد يترياك هو..
محمد: كيف شكله يشبهني؟؟
عليه: هههههه.. صدق متفيج يلا لا تحرق اعصابه زود..
محمد دش شوي شوي.. وكان منزل راسه.. : احم احم..
وعلي الي من شافه انصدم صدق.. تم مبهت مكانه.. ما كان منتبه للدموع الي كانت تنزله من عيونه من غير لا يحس بها.. كان وده يركض بحضن اخوه.... بس الشعور الغريب والفرحه الي في قلبه كأنه مجمدتنه من الحركه.. وفي هالأثناء تم محمد يرفع راسه شوي شوي عشان يشوف علي.. وكانت عليه اتقربه اكثر واكثر من علي.. فشاف ريوله.. وتم يرفع راسه.. وشافه لبطنه.. وشاف ايديه.. واشتاق انه يمسكهم ويحضن اخوه.. ومن رفع راسه وحط عينه في عين علي.. ما حس بعمره الا انه يرتمي بحضن الي .. الي كان من الصدمه الي فيه جامد مكانه بس يصيح..
محمد: علي.. اخوي.. اشتقت لك..
الكل كان يصيح يوم شاف هالموقف.. وفي نفس الوقت مستانسين لعلي..
علي بعد ما استوعب الصدمه ضم ايده على ظهر اخوه.. : سامحني.. سامحوني كلكم.. والله اشتقت لكم.. احبكم.. كلكم..
محمد: وهو ماسك ويه اخوه بإيديه: مسامحينك ياخوي.. بس كان ناقصنا وجودك..
وتم يضربه بكس على صدره.. ويضحك وياه.. وعلي يبادله الضحك.. : يالحمار يا علي.. اشتقت لك والله.. جيه اتسوي في اخوك..
علي: غصبن عني.. والله اني عايش بعذاب وانا بعيد عنكم.. قولي.. عرست.. كم ياهل عندك؟؟ يشبهوني اهم شي..
محمد ابتسم له: لا يا علي.. وصد وعطاه ظهره.. بعدني ما عرست..
علي ربع صوبه وجابله: ليييييييش؟؟
محمد رفع راسه وتم يطالع اخوه بكل حنان: كيف اعرس واخوي الغالي محد.. اكيد ما بتكتمل فرحتي..
علي استاااانس من خاطره يوم سمع هالرمسه وحضن اخوه وتم يصيح في حضنه من خاطره.. وعليه مسكتهم وقالت لهم يدخلون داخل.. الكل دخل.. وعلي ومحمد كل واحد فيهم حاط ايده على جتف الثاني ويمشون.. وقعدوا العايله كلهم سوى.. ومحمد تم يسلم على خالته.. وشاف عيال خالته تذكرهم كلهم بحكم انه كان كبير كفايه عشان يثبتون في باله.. وقالهم ان وده انه دوم يزورهم بس فشيلته من الي سوته امه هو الي يمنعه.. هدوه وقالو له انهم ناسين الموضوع.. فرح من قلبه.. واستانس انه رد العلاقة وياهم.. واهم شي رده علي.. وعلي فهمه ليش مازارهم الفتره الي طافت..
محمد: عاشوووو.. وصرت الدكتور علي احين.. منو قدك..
علي: هههههه.. شفت عاد..
محمد: والله اني مفتخر فيك.. وانتي يالحماره يا عليووو.. والله براويج.. خاشه اخونا عنا..
علي: لا يا محمد.. لا تلومها.. انا طلبت منها..
محمد: اهااااا جي السالفه..

وهذا الجزء كتبته لكم..
ان شاء الله عيبكم..
وراح احاول اكتب لكم بعد جزء خلال هاليومين..
تحياتي