الجزء ( 8 ) : للحب عنوان

ملخص الجزء السابق: ردة علي من بعد سنين الغربه الطويله للبلاد.. معاناة هند وهاجس تحقيق الحلم .. حيرة غزلان بخالد .. وتأقلمها لفكره زواج حصه.. إبراهيم وزعله من غزلان.. معرفه وداد لعلي وقرارها مواجهته.. وساره الي ماندري شو الي تحت راسها.. وقرار هند انها اتروح العمره ويا أبوها
==============
في بيت المديره
الأحد.. الساعه 5.00 العصر
==========
عادل ويا أميره وأمه قاعدين يشربون جاهي..
عادل: ها أمي.. شو سويتي اليوم في المدرسه..؟؟
أميره: أيا الخبيث.. اونه تسأل امي شو سوت في المدرسة.. يعني طول هالسنين الي امي تشتغل فيها في المدرسه ما سألتها اشمعنى احين اشمعنى؟؟
عادل: اكرمينا بهدوئج يا حضره أميره المكرمه..
أميره: ان شاء الله..
ام عادل: خليه.. اشعليج منه.. الحمد لله كل شي تمام.. وحصه بخير.. بس كانت في مشكله صغيره وحليناها..
أميره: شو مشكلته..؟؟
عادل: طاع اللقافه.. توج تعطيني محاضره.. صخي صخي.. شو السالفه امي؟؟
ام عادل وهي تبتسم لعيالها: ماشي.. ربيعه حصه الي دوم وياها.. وايد متعلقات في بعض..
اتقاطعها أميره: لا يكون شارطه ان عادل ياخذ ربيعتها بعد..
عادل وهو يضربها على راسها: خبله انتي ولا شو.. مينون اخذ 2 مره وحده.. خل اخذ الأولى بالأول.. اعوذ بالله.. كملي امي ماعليج منها..
ام عادل: خبله.. لا .. كانت زعلانه وتتحسب ان حصه اذا عرست بتنساها وبتهملها.. بحكم علاقتهم القويه ..
عادل: لا مستحيل امنعها من رباعتها.. شو بلاها هاي خبله..
ام عادل: ترا انا هالي فهمته لها.. وقلت لها لا محد بيفرقكم من بعض وجيه.. لين ما هدت ورضت..
عادل: هيه. مافينا هاي بعد اتأثر عليها اتقولها ما تعرسين
ام عادل: لا شو مب لهالدرجه.. وبعدين البنت والنعم فيها.. يعني الواحد يطمن جيه .. على الأقل في بنت زينه.. مب شرات بنات هالأيام ينخاف منهم.. وغزلان وحده ما ينخاف منها.. بنت والنعم فيها وفأهلها..
عادل: يلا انا ساير عند ربعي تامروني على شي..
أميره.. هي لازم خذيت الأخبار الي تباها واحين بتشرد..
ام عادل: خلي الولد يستانس اشفيج عليه؟ ؟
أميره: من القهر الي فيني.. ما فكر يطلعني.. ملانه في البيت..
ام عادل: هي والله عادل يما ليش ما اطلع اختك؟؟
عادل وهو يطالعها بلؤم: أحين.. انتي يا أم لسان.. في مره طلبتي مني انج تبين تظهرين وانا قلت لج لا؟؟
أميره تمت تضحك ومنزله راسها: لا..
أم عادل: عيل ليش تتبلين على الولد؟؟
أميره: عشان اكسر خاطركم ويوديني..
ام عادل: هي يما.. ودها..
عادل: ان شااااء الله .. كم أمووره عندي.. بس امي انتي بعد تعالي؟؟
ام عادل: لا خلوني انا هني.. وانتوا روحوا استانسو.. انا عندي شغل..
عادل: خلاص.. يقولون نازل فلم يديد في السينما.. بوديج له..
أميره وهي تحط كوب الشاي: صدق.. فريييره.. بسير اجهز..
ونشت من مكانها بسرعه تربع لغرفتها عشان تتلبس وتظهر.. وتم عادل يطالعها ويبتسم.. أسعد لحظه بالنسبه لعادل يوم يكونون هله راضين عليه ويونسهم..
======
في غرفه غزلان
====
كانت غزلان تتعدل وااتغني اغنيه الجسمي.. لا تجرح إحساسي.. أنا انسان حساسي.. ليتك تداريني واتحس ياقاسي.. .. وفجأه صخت وربعت صوب وداد: وداااااااد.. ممكن اتصل في حصوو واتيي ويانا..
وداد: هي ليش لا .. بس أهلها بيرضون؟؟
غزلان: هي دام انج انتي وهادف بتيون ويانا عادي..
وداد: خلاص .. هاج التليفون ودقي لها .. قولي خل تجهز بسرعه عشان ما نتأخر..
شلت غزلان التليفون ودقت على رقم حصه لقته مغلق.. استغربت.. دقت على البيت ورد عليها ابراهيم: الوو
ابراهيم: السلام عليكم؟؟
غزلان وهي مبعده السماعه: وعععع احين وقته.. ردت السماعه.. وعليكم السلام.. ممكن حصه؟؟
إبراهيم: غزلان؟
غزلان: هيه..
إبراهيم: ممكن اقول لج كلمتين وبعطيج عقبها حصه؟؟
غزلان في خاطرها: يلعن ابو المذله مجبوره اسمع له عشان اكلم حصوو ولا بيتم يتفلسف وما بيعطيني اياها..
غزلان: بسرعه لأني ابا حصه في سالفه ضروريه؟
إبراهيم: أشكرج.. غزلان.. والله اني احبج من سمعت غزلان هالكلمه حست برعشه بجسمها.. جمدت مكانها ماعرفت شو اتقول.. سمعيني ولا تحرجين.. غزلان.. انا الي ابا اعرفه شي واحد.. انتي ليش ما تبيني؟؟ شايفه علي شي؟؟ ليش كاهرتني؟؟ سويت شي ضايقج؟؟ لا تسكتين ردي علي؟
غزلان: بتعرف الجواب من حصه بخليها اتقول لك؟؟
إبراهيم: يعني حصو اتعرف؟؟
غزلان: لا اليوم انا بكلمها.. عطني اياها..
إبراهيم: ان شاء الله.. بسرعه زقر على حصه ويت ردت .. وهو تم واقف عندها
حصه: هلا والله
غزلان: يالحماره حسابي وياج عسير.. ليش قافله تليفونج.. ؟؟ وبعدين يلا اتلبسي بسرعه بنسير السينما ويا وداد وهند وهادف
حصه: قولي والله.. صج.. اسميني ملاااااااانه.. وتليفوني بخبرج السالفه عقب.. يلا باي..
حصه بندت وابراهيم ينادي عليها وهي مطنشه اتسير عند امها عشان تستأذن وطلبت منها وطبعا امها ما رفضت مثل ما توقعت غزلان..
إبراهيم: حصووووووو
حصه: هاا.. انا مستعيله ابا اتجهز برهووم؟؟
إبراهيم: ماقالت لج شي غزلان؟؟
حصه: شي مثل شو؟؟
إبراهيم: قال بتقول لج ليش هي رافضتني؟
حصه: لا ماقالت لي شي.. يلا اطلع من الغرفه بتلبس عيييب
إبراهيم طلع من عندها وهو مكسور من الداخل حاس انه غزلان قصت عليه.. ودخل غرفته وصك الليت وفر عمره على السرير واتلحف وتم يطالع صوب الدريشه ويتأمل السما.. وهو كل تفكيره في غزلان.. وليش اتعامله جيه.. مع انه يدور على رضاها.. ويحب الأرض الي هي تمشي عليها..
..
تجهزت حصه وبسرعه راحت عند غزلان الي كانوا يتريونها في الموتر.. هادف قعد جدام.. وهند وغزلان وحصه ورى.. والربشه والضحك كان مالي السياره قرروا يروحون مجمع السينما.. جراند سينما دبي.. الي جريب مركز وافي ووندرلاند.. وعقبها قالو بيسيرون شارع مرقبات يتعشون ويردون البيت..
غزلان كانت مندمجه بالسوالف ويا حصه.. وفجأه حطوا على إف إم الخليجيه كانوا حاطين اغنيه الجسمي الرساله.. أشتكي من بعدهم.. قلبي متعلق بهم.. حتى لو جار الزمان .. في فؤادي حبهم.. هم على بالي أكيد.. لو عن عيوني بعيد.. والله هذا الكون كله.. ما يساوي شوفهم..
غزلان: تيرا لا لا لالا.. تيرا لا لا لا.. هوب...
وهادف يطالعها وضحك عليها ويبوس ايده.. : الحمد لله والشكر..
غزلان: تمت اتكمل الإغنيه: انا اكتب بدمي لهم.. هالرساله بإسمهم.. حتى لو ماكان في جواب.. يكفي توصل عندهم.. اذكروا شوقي الكبير.. واعرفوا اني بخير.. واذكروني في غيابي كني.. قاعد بينهم..
هادف عاد هالمره غير الموجه: تيرالا لا لالا لا.. تيرالا لا لا..
الكل تم يضحك.. هادف: حسبي الله منج.. خبلتيني.. والله..
حصه هالمره قررت انها اتكمل: من كثر ما حبهم.. قلبي يسأل عنهم.. لو أنا لحظه نسيت.. هو يذكرني بهم.. بعدهم عايش غريب.. لا وطن لي لا حبيب.. ودي أغمض عيوني وألقى نفسي عندهم..
هند: أشتكي من بعدهم.. قلبي متعلق بهم..
وداد عاد حبت اتقول المقطع الهندي: أبكي دل هاي كي دي.. كسي دلكو شكايت..
غزلان: هوي هوي.. أهوي..
حصه: هااااااااااي..
هادف: اهوي اهوي اهوي..
حصه + غزلان وهم يقلدون رقصه الهنود بصبع الإبهام: هااااااااااااااااييي.
وداد..: بس فضحتوا.. الله يخسكم خبلتوني حرمه شكبري.. يلا وصلنا..
حصه كانت لابسه شيله سودا مطرزه أطرافها بتطريز وردي خفيف .. وعالطرف توقيع محل فير ليدي.. واما غزلان فكانت لابسه شيله ساري.. عليها تطريخ اللون الفستقي الفااااااتح.. ويا الأحمر على شكل ورود صغيره.. ونزلوا.. رن تليفون وداد .. كان الي متصل سلطان..
غزلان: عاشو .. مواعده هااااا.. جكيناج؟؟
كانوا بعدهم في الباركينج.. وقفوا شوي عشان اتكمل مكالمتها وداد ويدخلون..
وداد: هلا وغلا..
سلطان: هلا بهالصوت الي عذبني وداده.. ياربي..
وداد: احم احم..
سلطان: هااا حد وياج يعني؟؟ اشحالج حبي؟
وداد: بخير وانت اشحالك؟؟
سلطان: حالي أبد مب شي من غيرج؟؟ وين اسمع حشره سيايير..
وداد: رايحه السينما؟؟
سلطان وبإنفعال: روحج؟؟ ويا منو؟؟
وداد: هههه.. روحي..
الكل تم يضحك .. فهم ان وداد تبا اتعلوز سلطان وترفع ضغطه..
وداد: والله كنت ملانه قلت أظهر اشوي اغير جو..
سلطان: لا والله.. وين عمي عنج؟؟ خلاج؟
وداد: فديته ابوي.. ما يقولي لا.. قالي روحي استانسي..
سلطان: لا عمي اكيد صابه شي.. كيف يخليج اتروحين السينما هالوقت ولا روحج.. احين احين احين يايج.. اي سينما انتي؟؟
وداد: لا لا .. خلك مكانك عيب شو منقود..
غزلان من سمعت ان سلطان بيي.. ماحبت الفكره.. بيتم يبربر وما يخليهم يستانسون وبيردهم البيت من وقت على طول استغلت الوقت وجربت عند السماعه وبصوت عالي : لا.. نحن وياها.. وهادف بعد لا تخاف..
سلطان: هي.. جيه.. تلعبين بأعصابي .. ماعليه كله محسوب لعقب الزواج..
وداد: الجلبه غزلانوو خربت.. انزين حبي.. مايصير ارمس جيه.. تدري موحلوه.. لما برد البيت برمسك..
وفي هاللحظه .. في سياره مرسدس كوبي توها كانت موقفه جبالهم.. حصه من ضرب ليت الموتر في عينها تم اتصك عينها واتلف..
عادل: لا .. ما اصدق.. معقووله.. انا في حلم ولا في علم.. أموور قرصيني بسرعه..
أميره: اشفيك؟؟ بسم الله..
عادل: قرصيني..
قرصته أميره بقو: أأأأي.. ماقلت عضيني..
وجرب من أميره وحضنها وباسها على خدها: امووووووت فيج.. يا احلى اخت في الدنيا..
أميره: الحمد لله والشكر.. اتخبل هالريال..
عادل: نزلي بسرعه بسرعه..
نزل عادل ويا أميره الي مب فاهمه شي.. وبسرعه دخلت حصه وغزلان والباقي للداخل عشان يروحون فوق وياخذون تذاكر للفلم.. وعادل مسك ايد أميره الي توها كانت تبا اتعدل شيلتها وسحبها بسرعه وراح..
أميره: شوي شوي.. كسرت ايدي.. شو صاير فهمني؟؟ ترا انا لين احين مب فاهمه شي؟؟
عادل: خلج لو مره ذكيه شرات اخوج.. الله يخليج مره بسسسس..
أميره: شو؟؟
عادل: حصه.. حبيبه القلب هني.. شفتها يا أميره لو ماييت السينما وعشانج جان ما بشوفها.. فهمتي؟؟
أميره: ههههههه.. هيه.. وانا اقول شو هالحب الي نزل عليك صوبي..
عادل وهو يضربها على راسها: انا يعني ما احبج عادز.
أميره وهي تتطالع حواليها والناس شافو يوم عادل كفخها على راسها وهي ودها اتصيح من الفشله.. وتمت تضحك وهي مقهووره وترمس ويا عادل وهي ضامه اسنانها : فضحتني فضحتني.. في البيت زين جيه.. فشلتني.. الله يسامحك.. اذبحك..
عادل: اسف اسف..
وتوها بترمس الا عادل ودرها ولحق وداد يوم شافها بتاخذ تذاكر عشان ياخذ تذاكر لنفس الفلم ومكان جريب منهم.. وتم يطالع وين حجزت وداد وحجز وراهم على طول.. وداد ردت صوبهم وكانت اترمسهم.. وحصه وغزلان كانوا واقفين يطالعون فوق اسامي الأفلام الي تنعرض ويتناقرون.. فجأه إلتقت النظرات.. شافته.. تم قلبها يدق بقو.. وعيونها مب قادره اتنزلهم من المفاجأة الي صارت.. ريولها تمت ترتجف.. وهو تم يطالعها.. وعينه مب قادر يشلها من عليها.. أميره ياها فضول تبا اتشوف ويه حصه .. لأن حصه كانت معطتنها ظهرها .. سارت صوب عادل.. ومسكت ايده
أميره: يلا بيبدأ العرض..
حصه من شافت أميره استغربت.. وتمت تتحرقص .. اتموت واتعرف هاي منو.. وليش ماسكه ايده بهالطريقه.. معقوله بتطلع حرمته.. وهو بيطلع معرس.. لا لا.. ما اظن.. عيل ليش بيخطبني دام معرس.. وبعدين محد قال انه معرس.. افففف ياربي.. منو هاي انزين..
غزلان استغربت من السكوت الي هل على حصه: اشفيييج .. حوو؟
حصه: غزلان.. شفته.. هذوا جدامي..
غزلان: منوووو؟
حصه: عععععادل.. نزلت راسها من المستحى..
غزلان: يميي.. استحت البنت..
وداد: يلا شو مب ناوين تدخلون الفلم.. ؟؟
غزلان: لا هالبنت اتخبلت لنا.. مستحيه شافت حبيب القلب؟؟
وداد: شو السالفه؟
غزلان اشرت صوب عادل الي كان يمشي صوب البوابه.. وكل شوي يحاول يصد على ورى واخته تسحبه على جدام.. : هذوا..
وداد فهمت السالفه وابتسمت.. : ماعليه.. سوي عمرج ولا كنج شفتيه.. خليه يتحرقص.. ولا كنج معبرتنه..
حصه: لا.. شو ماروم؟؟
وداد: يالهبله .. جيه بتخلينه يتخبل عليج زود..
حصه: صدق؟؟
هند: هي صدق.. وداد مجربه من كثر ما حقرت سلطان.. وانتوا شفتوا النتيجه..
حصه: خلاص يلا امشوا..
قالتها وسحبت غزلان وياها.. ووداد وهند وهادف كانوا وراها ودخلت ولا كنه على بالها.. بس في قلبها ميته مستحى.. ودخلوا صاله العرض.. وهي عينها تدور على مكانهم.. وشافته.. بينها وبينه شعره.. اي شعره.. توه بيظهر عشان ياخذ فراخ.. وهي توها بتدخل.. ارتبكت زود. لكن تداركت الموقف بعد ما سحبتها غزلان.. وداد وهند تموا يضحكون .. وفي قلبهم يتمنون لها السعاده.. لأن عادل بشكله وهيئته امبين عليه واحد له شخصيه وانسان رزين وعاقل.. وهادف قال بياخذ لهم فراخ وجيبس وبيبسي وبييهم..
وتوها حصه بتيلس مكانها شافت أميره وراها تمت تتطالعها بحقاره.. وهي ولا حطت في بالها احتمال انها تطلع اخته.. : امووت واعرف شو يايبنها وياه.. وليش جيه لاصقه فيه؟؟
غزلان: منووو؟؟
حصه: هاي الي وراي؟؟
غزلان: يمكن اخته؟؟
حصه: اخته ولاصقه بالقو فيه؟؟
غزلان: يعني منو ربيعته بتيي اشكره تلصق فيه؟
حصه: ماعرف..
وداد: صخوا.. احين بيطردونا..
غزلان: هاي.. ذبحتني..
حصه: خلاص سكت..
فجأه سمعت صوت حد يناديها.. كانت أميره: السلام عليكم..
حصه تمت امبهته.. ومستغربه.. هاي ليش اتناديني.. شو تبا فيني.. ابيييييي.. لايكون سمعتني .. لازم لازم يعني اتفشلين عمرج وتصيرين غبيه.. اففففف..
غزلان: اشفيج... البنيه تزقرج..
حصه: ها.. هلا.. وعليكم السلام
أميره وهي تبتسم لها.. : انتي حصه صح؟؟ .. اشحالج؟؟
حصه يوم سمعتها تنادي اسمها بطلت عيونها.. وتمت فاجه ثمها.. : هي.. بخير.. انتي منو؟
أميره: انا بنت مديرتكم.. حضرت المسرحيه الي سويتوها على حفل تخريج الدفعه الي طافت من الثانويه..
حصه يوم سمعت انها بنت المديره.. انصبغ ويها من الفشيله.. وتمت غزلان تتضحك عليها: هيه.. بس انا ما شفتج..
أميره: بس انا شفتج في المسرحيه..
حصه: شو كنت اوكي..
أميره: نقعتينا من الضحك.. أحلى شي في المسرحيه يوم انتي..
غزلان قاطعتها ودشت عرض في السالفه: وانا وياها..
أميره تمت تتطالعها .. : هيييييي.. انتي بعد ذكرتج.. بس كان شكلج غير وانتي لابسه الساري..
غزلان: اششششش.. فضحتينا.. بيقولون سيلانيه يايه السينما..
أميره: خل اكمل لج.. يوم اونج كنتي اتدقين في الكلاس.. والبنات يترقصن.. حسيت بج صدق مندمجه كنتي..
حصه: اووووه.. شو سوينا يومتها.. اسألي المديره.. جكتنا ونحن ورى الكواليس نرقص من الفرحه ان المسرحيه نجحت..
دخل عادل وشاف اخته اتسولف ويا حصه.. ابتسم .. واستانس لهالشي.. ومن شافته حصه من غير مقدمات صدت ويلست مكانها.. ونزلت راسها.. أميره استغربت.. ليش صدت حصه؟؟ بس بعد ما شافت عادل عرفت السبب: اتصدق.. تعال بقولك شي..
جرب منها عادل وهي تمت ترمس بصوت واطي عشان ما تسمعها حصه.. الي كانت ميته واتعرف شو يقولون.. اكيد يرمسون عني.. افففف يالقهر.. : اتصدق.. اول مره اعرف ان ذوقك حلو..
عادل تم يعدل سفرته.. ويبتسم: احم احم..
الفلم الي كانو داخلينه كان فلم رعب.. The Apocalypse انا مادري اذا نزل السينما ولا لا.. .. وطبعا حصه عاد ميته خوف.. وقابضه ايد غزلان بقو.. تنتظر اي لحظه مرعبه في الفلم عشان تنقز على حضنها.. وعادل عايش في عالم بعيد عن الفلم.. طول الوقت وهو يتابع تحركات حصه.. ويتأملها.. يتخيل انها هي الي قاعده حذاله.. وانها هي الي قابضه ايده .. كل ما يشوفها اتفز من الخوف يبتسم.. وأميره مب حاسه غير في الفلم.. الي قابضه هالفراخ وتاكل فيه بسرعه.. وكل شوي اتغص.. وتشرب عصير.. هند في عالم الفلم مندمجه وكل شوي تسولف ويا هادف.. اما وداد فكل فكرها في الفلم.. يايه تستانس.. غزلان.. شوي تتطالع الفلم وشوي تسرح بالإتصال.. اه.. ليش اتصلت؟؟ .. منو هذا؟؟ وشو يبا مني؟؟ .. صدت صوب حصه الي كانت مندمجه ولاويه على كتف غزلان وابتسمت.. ياترى الي فيني نفسه الي انتي فيه؟؟ .. ليش انا افكر فيه ماعرف.. مع انه مافي داعي.. بس احين اتذكر صورته.. غمضت عينها.. هذوا جدامي.. لونه السماري الحلو.. وعيونه العسليه.. ونظره الإستغراب الي كانت عليه.. ابتسمت.. احلى شي الجبس الي في ايده.. مسكيين..
حصه: حوووو.. اشفيج.. تبتسمين وصاكه عينج؟؟ في شو تفكرين..
غزلان: ها ماشي.. تمت تتظاهر بالخوف.. والمفاجأه.. شوفي وراج..
حصه من كثر ما متأثره بالفلم تخيلت فعلا في شي وراها.. ونقزت تنزل تحت الكرسي.. وتمت غزلان تضحك عليها... وعادل يوم شافها.. ما قدر يود عمره.. تم يضحك بصوت مسموع.. الي كان حذال عادل حرج وتم يسكته.. بس هو مب قادر.. تم يبتسم.. ووده ينفجر من الضحك.. وحصه يوم عرفت ان الي صار مقلب حرجت.. وتمت تتطالع غزلان بنص عين.. وهي ترتفع عشان تقعد على الكرسي التقت عينها في عينه.. تمت تتطالعه لوهله.. ويوم انتبهت لعمرها صدت عنه وعطته ظهرها.. ارتاح في داخله لهالنظره.. حس بودها.. وشل تليفونه وكتب لها مسج عيونج هي شاشتي الي اشوف فيها فلم حياتي.. فديتج.. .. استغرب يوم ما وصل له التقرير .. يعني تليفونها مغلق.. بس ما اهتم.. خلص الفلم وفتحوا انوار الصاله.. وقتها قدر يشوفها بوضوح..
أميره: يلا نش.. الناس يبون يظهرون وانت صاك عليهم..
عادل: مابا.. ابا اشوفها.
أميره: انت نش بتشوفها شو فيك؟؟
عادل: مابنش قلت لج..
أميره: يلا عااااد.. لا تفضحنا.. نش وبتشوفها..
عادل بعد اصرار أميره نش وهو متضايق.. وفي ذات الوقت نشت حصه.. وقف مكانه وتم يطالعها .. وأميره ادزه عشان يطلع.. وهو مب طايع.. لين ما دزته من كتفه بقو.. تم يطالعها بغضب..
عادل: انا اراويج؟؟
سمعت حصه هالكلام وتمت تضحك.. لفت صوبها أميره : حصه.. شوفي هذا يتوعد فيني .. ترضين علي؟؟
حصه ارتبكت.. لأنها كانت في هاللحظه موايهة صوبهم.. ووداد وهند وهادف ظهروا وتمو يضحكون.. غزلان تمت وياها.. الي كانت ناقعه من الضحك على شكل حصه الي منصبغ بألوان الطيف كلها.. وشكلها بتقبض أميره وبتمسح فيها الأرض من الفشيله..
أميره: مارديتي.. ترضين..
حصه ابتسمت: لا.. كملت طريجها وبسرعه ظهرت من الصاله تلحق وداد الي كانت طالعه تترياهم برع.. وهي ماشيه ما انتبهت ودعمت واحد في صدره.. .. عمي ما اتشوف..
غزلان رفعت راسها اتشوف الي دعمته وتمت امبهته مكانها.. معقوله.. لا لا لا... ما صدق.. التقت النظرات والود ودهم ما يشلون عينهم من بعض.. واخيرا شفتها.. حصه تمت تسحب غزلان بقو صوبها عشان يظهرن من الصاله.. وخالد مارام.. على طول لحقهم وظهر.. وتم يطالع غزلان الي كانت ميته خوف وترتجف.. وقلبها ينبض بقو..
حصه: شو بلاج.. ؟؟ .. مستانسه يعني دعمته.. ؟؟
غزلان تمت ساكته وما ردت عليها.. مشوا صوب وداد الي كانت تترياهم في الكوفي تحت الي في جراند.. كانوا قاعدين عشان يشربون شي ويظهرن يتعشن في مطعم في شارع المرقبات.. خالد كان نازل من الدري وعينه صوب غزلان.. وهو توه بيروح صوبهم علي وعبدالله توهم كانوا واصلين وقفوه..
عبدالله: وين وين ساير؟؟
خالد: دخيلك لا تخرب علي.. الغزاله هني؟؟
عبدالله وهو منصدم: احلف.. مسرع ما تواعدتوا..
خالد: لا يالأهبل.. ما تواعدنا.. صدفه والله.. هي ويا اهلها..
علي: شفيكم عن شو ترمسون؟؟
خالد: تعالو نقعد في الكوفي.. باقي على الفلم نص ساعه؟؟
عبدالله: ين الريال.. ؟؟
خالد: اوهووو.. يلا عاد..
علي: يلا عاد لا تكسر بخاطره.. المسكين متخبل..
مشى علي ويا خالد وعبدالله وقعدوا في الطاوله الي وراهم.. وخالد مجابل غزلان.. وعلي كان يالس على يسار خالد يعني صوب الحاجز.. وعبدالله كان معطيهم ظهره ومجابل خالد.. وداد كانت في الحمام عشان اتعدل وقايتها.. وهي راده.. كانت تتطالع الطاوله الي وراهم .. استغربت.. هو ولا لا؟ .. بس يشبهه.. اظني هو.. افففف.. ماداني اشوف حد من المراجعين حتى لو كان ولد خالتي..
وفي هالأثناء علي شاف وداد.. وعرفها هي نفسها الي تشتغل في الوزاره.. غزلان طول الوقت صاده عالجهه الثانيه وتسولف ويا حصه عشان ينسون الي صار.. أميره وعادل كانوا نازلين من الدري انتبهوا لحصه انها قاعده في الكوفي..
عادل: دخيلج أمور.. شوي بس.. بنشرب شي وبنروح؟؟
أميره: عادل.. شوفيك؟؟ اركد شوي؟؟ والله بتتحراك راعي سوالف وأهبل.. ترا يوم الخميس بتشوفها..
عادل: مافيني صبر..
أميره: اقول.. هات السويج انا بتم في السياره.. وانت روح.. تراك انت الخسران.. انا نصحتك وانت حر..
عادل: افف منج... يلا خل انسير..
عادل وهو يمشي عينه على حصه الي كانت منزله راسها.. وتلعب بصبوعها..
غزلان: عشتووو.. شو هالدلع؟؟ .. اونها تستحي.. هندوو .. لحقي حصه تستحي..
هادف وهو يضحك على شكلها: ههههه.. اشك.. تمثيل بارع..
حصه يوم انتبهت انه عادل راح رفعت راسها وهي تتطالع هادف بغضب: جب انت..
هادف: بسم الله.. كشرت انيابها.. ما صدقت الريال يظهر..
وداد قعدت وتمت ترمس هند: اقول هند.. علي هني؟؟
هند وبكل شوق: ها.. وينه.. صدق؟؟
وداد: الطاوله الي ورانا.. قاعد صوب الحاجز.. سفره حمرا.. سرحان..
هند وهي تدور عليه.. وهي تتطالع في ذات الوقت رفع راسه والتقت عيونهم .. علي ما يستحي.. لأنه عاش في مجتمع غربي.. ما كان يحس بإحراج اذا اتطالع وحده في عينها.. تم يطالعها مستغرب لنظراتها.. هي من شافته يطالعها استحت ولفت عنه.. : حلييييييييو ودادووو.. شوفي الشبه بينه وبين غزلان؟؟
وداد: هي صدقج.. وداد اصلا تشبه خالو... وهو شكله طالع على امه..
هند تمت سرحانه اتفكر.. كيف هالدنيا صغيره.. اجتمع وياك في مكان.. واشوفك واتشوفني.. وما تدري اني انا الي دوم اتسولف لها عن همومك.. وترمس وياها .. ابتسمت.. وتجاهلت وجوده.. وتمت تشرب العصير..
غزلان كانت كل شوي اتحرك كرسيها بحيث ما تجابل خالد.. بعد ما خلصت شربالعصير نشت ويا حصه عشان يروحون الحمام.. على طول خالد نش ولحقهم.. هادف ووداد وهند كانوا منشغلين بالسوالف ما انتبهوا ان خالد لحقهم..
في الحمام
حصه: افف.. ياربي يخبل..
غزلان: هههه.. يحليلج يا حصه.. لازم بيخبل بج.. ان شاء الله بيصير ريلج.. واتهني فيه..
حصه: اف بس متى؟؟
غزلان تمت تطالعها واتقيس حرارتها: لا .. انتي مب صاحيه.. مستعيله اشوفج..
حصه: لو تحسين الي فيني.. ؟؟
غزلان: احس..
حصه: كيف اتحسين وانتي اتعيبين علي؟
غزلان: شفتي الي قاعد مجابلي..
حصه: هي هالعمي الي دعمته.. شفيه؟
غزلان: ههههه.. تحيدين الي كان يتصل وقلت لج عنه.. ويعرف اسمي.. هذا هو؟؟
حصه: شوووووووو.. وبعصبيه.. وانتي مواعدتنه اليوم؟؟ هاااااااا
غزلان: اشفيج هبله انتي.. متى اتحيديني راعيه هالحركات.. لا.. ترا انا هذا دخلت عليه في المستشفى بالغلط اتحريت غرفه هند.. وهو من يومها تم يدور على رقمنا شكله.. وعرفه.. واتصل قالي منو هو.. واحين يوم شفته تذكرته..
حصه: هييييييه .. قولي جيه السالفه.. اتحريت شي ثاني.. جان بدفنج في المرحاض..
غزلان: وعييييج.. اقول.. ظهري ظهري..
توهم بيظهرون من الحمام شافوا خالد برع واقف.. اتجاهلته غزلان وتوها بتمشي عنه وقف جدامها..
خالد: دقيقه من وقتج..
غزلان: نعم.. ما تستحي انت؟؟ تتحرى عمرك وين؟؟
خالد: دخيلج.. مابا شي.. بس دقيقه.. تم يطالع حصه.. قولي لها؟؟
حصه: حوو.. نحن هني في الإمارات.. مب في امريكا.. انت مينون الظاهر..
خالد: الغزاله.. بقولج شي.. صدقيني والله ما اجذب عليج.. من يوم ما شفتج شي صابني.. والله كل بنت ارمسها ودرتها.. وغيرت رقمي.. وما تصدقيني هاج تليفوني طلع تليفونه ومده صوبها.. وهي مبهته مستغربه.. .. والله العظيم وغلات امي عندي.. اني امسات كنت اسولف لها عنج.. واني اباج.. انا اعرف عنج كل شي.. انج بنت ناس ومحترمين.. مستحيل افكر العب ولا اقص عليج.. انا احبج.. لأني اتمناج لي؟؟
غزلان يوم سمعت هالكلمه ارتعش جسمها كله.. وحصه كان الخوف ممتلكها.. لأن هالمكان عام... وعادي اي حد يشوفهم.. على طول سحبت ايد غزلان ومشوا .. وخالد حزن يوم مشت.. تم ينادي بس ما ردوا عليه..
وصلت غزلان عند خواتها.. وعلى طول نشوا عشان يروحون الباركينات ويظهرن.. وخالد تم يلحقهم.. وتوهم بيظهرون من الباب.. وكان خالد على الدري الكهربائي ويا علي وعبدالله تم يصرخ بصوت عالي: أحبج والله..
الكل سمع وصد صوب خالد.. ويضحكون.. وغزلان من الخوف والربكه شردت بسرعه من الباب.. خافت لا يكون اخوها ولا وداد سمعوه وعرفوا ان هالكلام لها.. علي وعبدالله شردوا عنه بسرعه ودخلوا صوب الصالات.. من الفشيله.. وخالد ما انتبه لهم.. لأنه كان سرحان في غزلان.. يتذكر نظرات الخجل والخوف الي كانوا في عيونها.. يتذكر الرجفه الي كان يشوفها على ايديها..ويتذكر صوتها.. همسها.. والله مب معقوله هالبنت .. خبلت فيني.. ماروم اصبر.. شاف عمره بسرعه نازل من الدري وساير صوب الباركينات.. وكان موقف موتره عند البوابه.. بسرعه ركب الموتر.. وتوهم كانوا بيظهرون من الباركينات وداد وخواتها.. بسرعه لحق موترهم.. لاحظت غزلان ان في حد يلحقهم.. زاد خوفها.. عن يحس حد من اهلها فيه..

====
في السينما
====
علي: طاع الخاين.. طلع من السينما..
عبدالله: خله ها متخبل مادري شو ياه.. عاشق مستوي لنا.. بس فضحنا..
علي: لا بالعكس.. هذا الي يسمونه الحب.. يسوي اي شي عشان يثبت حبه.. ما همه شي..
عبدالله: علي.. هالشي هناك.. في ايرلندا.. مب في الإمارات.. مانعترف بشي اسمه حب هني..
علي: الحب غريزه في الإنسان.. تطلع منه من يوم ما ينولد.. وكل يوم يزداد..
عبدالله: صح.. بس مب جيه..
علي: بييك يوم وبتحس؟
عبدالله: لا يكون انت بعد اتحب؟؟
علي: لا .. انا عمري ما فكرت احب لي وحده في ايرلندا.. حتى لو كانت عربيه.. مب شرط اجنبيه.. انا اذا بحب.. بحب وحده من بنات ارضي.. هالتراب الي تربيت عليه..
عبدالله: اتحرى بعد..
علي: هههههه.. يلا بيبدأ الفلم..
عبدالله: بس مب شي من غير خالد
علي: ماعليه انا بعوض مكانه..
عبدالله: انت الخير والبركه..
----
وصلت وداد مطعم جيليز.. ونزلوا كلهم عشان يتعشون وكان خالد موقف موتره شوي بعيد عشان ما يحسون به... ونزل ولحقهم.. ما قدر يقعد الصوب الي هم فيه... لأنه قسم عائلات.. فقعد بروحه .. بس كان يقدر يشوفها من الزجاج الي حاطينه كحاجز.. طول الوقت عينه عليها.. غزلان ما كانت منتبهه له.. كانت ناسيه سالفته من كثر ما اتسولف..
غزلان: تعالي صدق انتي ما قلتي لي ليش قافله تليفونج؟؟
حصه: الأخ عادل شايل رقمي من عند امه شكله.. ويطرش مسجات.. وانا عاد مابا اعطيه ويه فاره مبايلي وغالقتنه.. خل يحترق..
غزلان: هههههه.. زين اتسوين فيه من البدايه راويه العين الحمرا
هادف: انتي ايه.. يالسوسه.. لا تخربين البنت من احين.. اتعلمينها سواتج؟؟
حصه: ههههه.. هي صدقه اخوج.. لا تخربيني..
هادف: يا سبحان الله.. مسرع ما غيرتي رايج فيني.. وهاي اول مره اتأيديني في شي..
حصه: ههههه..
غزلان: انا اراويك احين غزووول الحلوه سوسه.. ؟؟
هند: هادف.. تعال وياي خل نطلب..
غزلان: طاع شرد..
حصه: خلج منه.. خبريني.. شو الي بتقولينه لي عشان اقوله لأخوي؟؟
غزلان: اوه.. انتي تذكرين.. ؟
حصه: مستحيل انسى شي اخوي طالبنه مني..
غزلان: هيييه.. عاشووو..
حصه: يلا قولي لا تغيرين السالفه.. قبل لا ايون خواتج..
غزلان: شوفي.. قوليله غزلان ما ودها اتعاملك جيه.. وما يهون عليها اتزعلك.. واتعزك.. بس غصبن عنها.. لأنها ما تباك تتعلق فيها.. لأني انا بإختصار احس به شرات اخوي.. وما اقدر اكثر من جيه.. والله حاولت ياما وياما.. بس مارمت يا حصه.. انتي ربيعتي وفاهمتني.. بليز فهميه.. وقولي له.. هو مافيه اي عيب.. واي بنت في الدنيا تتمناه.. وبيلقى الي احسن عني صدقيني.. بس انا ماروم احبه.. لأني تعودت من صغري انه يكون اخوي.. وخلاص هالشي تم فيني.
حصه: حاولي غزلان.. حراام.. والله انه يحبج يموووت فيج.. انا ما اتمنى غير انج اتصيرين انتي مرته.. لأني اعرف اخوي ما بيستانس غير وياج؟؟
غزلان: وانا.. ما فكرتي اذا بستانس ولا لا؟؟ .. اصلا هو اذا خذاني بيتعذب زود.. لأني مابقدر ابادله نفس الشعور..
حصه: ماقدر اجبرج.. انا بقول له.. ويلا صخي عن السالفه لأنهم وصلو..
وداد: هاااا.. عن شو ترمسون؟؟
غزلان: اسرار.. اشله رازه بفيسج؟؟
وداد: انا اتقولين لي هالرمسه.. اراويج والله اراويج..
غزلان: فدييييييت روح ودادي انا..
نشت من مكانها وحضنتها وتمت اتبوسها.. وداد: فضحتينا بس..
خالد مل من القعده روحه.. وغزلان مب حاسه بوجوده.. طلع من المطعم واتصل في عبدالله عرف مكانهم وراح لهم.. طبعا عند البحر.. عالممزر..
علي وعبدالله كانوا قاعدين عالكراسي الي مجابله البحر ويسولفون.. ووصل خالد..
عبدالله: ها بشر؟؟ شو سويت؟؟
خالد: اسكت عني.. والله تبهدلت.. نصيحه لا تحبون..
علي: بالعكس.. حلات الحب بعذابه..
عبدالله: صخوا دخيلكم.. المهم باجر بنسير مزرعه قوم عموور عازمينه هناك..
خالد:لا دخيلك انا مب ياي.. تعبان..
عبدالله: اشفيك انت.. من حبيت نسيت ربعك؟؟
خالد: حرام عليك.. اذا هذا رايك.. بيي..
وهني رن تليفون علي.. تم يطالع الرقم استغرب ان الرقم غريب.. رد: الوو..
كانت الي متصله هي ساره.. كانت منعمه صوتها.. وتتميع في الكلام: مرحبااا..
علي: نعم اختي في شي؟
ساره: اشيااااء.. ياريت لو شي واحد بس؟؟
علي: نعم.. !!..
ساره: اشفييييك؟؟
عبدالله وبصوت واطي: ههه.. ويقول انا ما احب.. ما وحى له وصل وعنده ربيعه..
علي نزل السماعه وهو مغطنها بإيده: والله حلفت ماعرفها.. تستهبل شكلها.. بساير وبشوف اخرتها..
علي: الو..
ساره: اشفيك.. ارمس ما ترد علي؟؟
علي: اسف.. شو قلتي؟؟
ساره: ما قلت شي؟؟
علي: عيل ليش متصله؟؟
ساره: عشان اقول شي؟؟
علي: شو تتريين قولي؟؟ ولا تبيني انا اعلمج شو اتقولين؟؟
ساره: علمني الي تباه.. انا مستعده اتعلم..
علي: اخبرج.. انتي شفيج؟؟ مب صاحيه؟؟ .. قولي شعندج وفكينا؟؟
ساره: بل بل بل.. ليش جيه محرج.. هدي اعصابك.. يعني كل هذا وانت تسمع صوتي ومب مرتاح؟؟
علي: مادري ارمس منو.. عشان ارتاح؟؟
ساره: يكفي انك اترمس سارووونه؟؟
علي: ومنو تطلع ساروونه.. شو تشتغل.. سيلانيتكم هاي؟؟
ساره وهي محرجه: شو قله الأدب هذي؟؟
علي: وشو اتسمين الي انتي اتسوينه؟؟ أدب؟؟
ساره: لا.. انا قاعده اسولف.. لزوم التعارف..
علي وبإستغراب: تعارف!!!.. ماعرفج انا..
ساره: ترا يوم بنتعارف.. بتعرفني؟؟
علي: وبعدين يعني.. انتي منو؟؟
ساره: انا وحده.. معجبه فيك وااااايد.. بس انت مب حاس بوجودي.. من وقت ما شفــ..
علي وهو يقاطع كلامها: لا والله.. مب حاس بوجودج؟؟ مادري منو انتي عشان احس فيج؟؟
ساره: لا تقاطعني.. بدلع.. خلني اكمل.. ؟؟ انا اصلا من شفتك مارمت.. قلت هذا هو الي أسر قلبي.
علي: اووه.. ماشاء الله هذا كله بس يوم شفتيني؟؟ .. ووين شفتيني.. ؟؟
ساره يوم شافته يسايرها.. حطت في بالها انه صيده سهله.. وراح تمتلكه بسرعه.. فتمت ترمس بكل ثقه.. كأنها واثقه انه فعلا عيبته.. والواقع عكس: انا في الوزاره...
علي يوم سمع اسم الوزاره يت في باله وداد.. استغرب.. هالبنت المحتشمه الرزينه.. يطلع منها كل هذا.. معقووله.. ياما تحت السواهي دواهي..: لا والله.. وبأي حق تتصلين؟؟
ساره: بحق اني معجبه.. وامووووت عليك..
علي: انزين اقول.. احين انا مشغول .. بييج باجر الوزاره..
ساره استانست.. واخيرا.. صدق؟؟ .. بشوفه.. بييني؟؟ .. رمت عليه .: ها.. شو.. خلاص.. اترياك باجر؟؟
علي: يلا مع السلامه..
ساره: مع السلامه.. حط بالك على عمرك حبيبي..
علي: حبيبج؟؟ .. مسرع.. بإستهزاء كان يقولها.. .. يلا باي..
بند الخط.. وتم يضحك.. استغربوا كل من خالد وعبدالله..
علي: والله حاله.. توه ماصارت دقايق اترمسني.. صرت حبيبها.. ولا بعد.. اتمووت علي.. هههه.. والله حاله..
عبدالله: منو قدك.. يتك وحده لعندك.. لا ترفس النعمه؟؟
علي: شوووو.. نعمه.. عبدالله.. صح انا عشت برع ومرن علي اشكال واصناف شرات هاي وألعن.. بس في حياتي ما فكرت فيهن.. مستحيل اصلا.. انا اذا بفكر في وحده.. وبحبها.. لأنها محترمه.. لأنها رزينه.. مب هاي.. مثلا الي يحبها خالد.. شوف ثقلها.. ما حاولت ترفع عينها واتم تتطالع خالد.. بذمتك خالد يوم كلمتها قالت شي؟؟
خالد: لا حشى.. بالعكس.. كانت اتصدني..
علي: عبدالله.. هاي الأشكال الي انا بفكر احبها.. بس والله هاي دواها عندي.. باجر بروح لها المكان الي هي فيه وبغسل شراعها..
عبدالله: يعني اتعرفها؟؟
علي: اليوم شفتها في الوزاره.. قالت لي انها شافتني في الوزاره.. ومحد شافني غيرها.. ومحد عنده بياناتي غيرها..
خالد: شو بتسوي؟؟
علي : بأدبها.. بخليها تندم عالساعه الي فكرت فيها اتدق على رقمي..
خالد: انزين يا جماعه انا ماقدر اطول.. لأن امي داقه علي 20 مره وتباني ارد البيت..
عبدالله: ونحن بعد بنرد الشقه.. وراي دوام وتعبان..
علي: يلا عيل.. نشوفك باجر.. يا عاشق..
خالد: هههههه.. بييك يوم..
كل واحد فيهم راح.. عبدالله وعلي في موتر لأنهم ساكنين سوى.. وخالد راح بروحه بموتره..
..
طبعا وداد ردت البيت ومن وصلت من التعب الي هي فيه رقدت على طول.. ونفس الشي غزلان وهادف.. هند ماياها نوم.. راحت وقعدت على المسنجر على امل اتشوف علي.. واتسولف وياه.. ما كان اون لاين.. وتمت تجلب في المواقع وتتطالع..
..
في بيت إبراهيم..
ابراهيم ما ياه نوم لأنه كان ينتظر حصه.. ويبي يعرف منها الأخبار.. من دشت حصه البيت ابراهيم بسرعه ربع عندها: ها.. شو قالت؟؟
حصه: السلام عليكم اول شي..
ابراهيم: وعليكم السلام.. يلا انطقي؟؟
حصه: اشفييييك توني يايه.. تعبانه وابا انام.. باجر باجر..
ابراهيم: لا.. ماشي.. احين يعني احين..
حصه: اففف.. ادريبك بتقعد بتزن على راسي لين ما اقول.. اقعد خل اقول لك.. اسمع يا ابراهيم.. وفتح اذونك زين.. ولا تزعل من الي بقوله.. لأنها هي الي قالت جيه مب انا..
وحصه قالت له كلام غزلان بالتفصيل.. ومن عرف رايها تم حزين ومنزل راسه يفكر.. ليش ها حظي.. شو ذنبي يوم كنا صغر نتعامل اننا اخوان.. بس كبرنا سوى.. ماقدر اني اتصور انها مب لي..؟؟ ..
ابراهيم: وانا ناقصني شي؟؟
حصه: اشفيك.. قالت لي بنفسها.. مب ناقصه شي.. وانها اتعزك وااايد.. بس كأخ.. البنت حاولت مارامت.. وانا ماقدر اضغط عليها واجبرها..
ابراهيم: خلها على راحتها.. بس بييها يوم صدقيني.. بينكسر قلبها.. وبتعرف ان مافي حد في الدنيا يحبها كثري وشراتي ..
حصه توها بترمس بس ابراهيم ما عطاها مجال ومشى بسرعه عنها وراح صوب غرفته وهو حزين.. وافكاره تتضارب في راسه.. عقب هالحب كله.. ما تحبني.. بس بتعرفين الحب ومعناته.. وبينكسر قلبج مثل ما كسرتي قلبي يا غزلان.. الله يسامحج.. حصه نشت وراحت حجرتها لأنها بعد تعبانه..
===
في غرفه الكمبيوتر في بيت خليفه
==
كانت هند بعدها تتريا علي يدخل.. فعلا دخل علي النت.. ومن شافته ما صبرت فتحت المحادثه وياه..
دمعه منسيه:
السلام عليكم.. مرحبا الساع
الغريب المهاجر:
هلا والله.. اشحالج دمعووووو؟؟ اشتقت لج والله..
دمعه منسيه:
لا والله.. ليش عاد؟؟ شو السر؟؟
الغريب المهاجر:
مادري بس لأني احس اني جريب منج زود احين.. لأني في نفس الأرض الي انتي فيه..
هند تمت سرحانه .. واتقول في خاطرها.. هي والله.. كنا قراب من بعض وااايد وانشوف بعض وانت مب حاس..
دمعه منسيه:
انزين.. ما قلت لي. طلعت ؟؟ رحت مكان في الإمارات؟؟
الغريب المهاجر:
هيه رحت ويا ربعي سينما جراند.. والله صدق تطورت الإمارت.. الله يخلي زايد والحكام
سرحت هند.. وتأكدت لحظتها انه هو فعلا.. هو علي الي شافته وداد ورمست عنه.. اااااه يا علي كنا جراب.. شفتك وما حسيت فيني..
دمعه منسيه:
هي والله صدقك.. الله يخليهم لنا ذخر..
الغريب المهاجر:
انزين الغاليه.. انا بظهر احين .. لأني تعبان حدي.. باجر لازم اروح الوزاره عشان التعيين.. تامريني على شي..
دمعه منسيه:
لا سلامتك.. وتصبح على خير..
الغريب المهاجر:
وانتي من اهله..

طلع علي من المسنجر.. وتمت هند تايهه بأفكارها.. باجر بيروح لوداد... اكيد وداد بترمسه.. وبتقول له.. لا .. لازم اكون موجوده.. لازم ارمسه.. ما يخصني.. لازم اكون موجوده ذيج اللحظه..
وبندت كل شي .. ونامت وهي كل تفكيرها في علي..

يا ترى علي بيروح الوزاره.. شو بيصير هناك؟؟
هند.. شو بتقول؟؟
الخطوبه عادل وحصه؟؟
خالد.. ونهايه قصته ويا غزلان؟؟
ساره شو مصيرها؟؟