الفصل الأول
يلست تقلب صفحات من أجمل ذكرياتها... روحها وفي غرفتها تسترجع ماضي مدينة بوظبي اللي عاشت طفولتها فيها وعاشت أيام ماراح أبداً تنساها...
لي حبيب حيل حبيته***وصار عمري وسيد خلاني
أنســـــى همي لو انا يته***وفــــــــــز قلبي لو تلاقاني
كــــم أنا من الحب عطيته***وكـــــــم ياهو كم تفداني
وكــــــم أنا بالشوق خصيته***ذابحني بسود العــــــياني
في مدينة العين الرائعه مدينة كل إنسان فيها يحب يعيش الماضي والحاضر في وقت واحد... وفي أحد بيوت منطقة هيلي وبالضبط في بيت سعيد سلطان دخلت الأم وفي أيدها الدلة (ذاك الزعفران والهيل يفوح من دلة القهوة)
بيت سعيد سلطان... أبطالها هم
الأب سعيد(بوسلطان) رب الأسرة
الأم (أم سلطان) الزوجة
سلطان..الأبن الأكبر.... عمره 28
سهيل..الأبن الثاني.... عمره 25
عفراء ... عمرها 23
هند...عمرها 20 (دلوعة البيت كله)
في صباح يوم مشرق ظهروا الكل من غرفهم للسعي وراء الحياة الروتينه حالهم حال كل أسرة لكن لكل شخص راح تصادفه أشياء يتحرها حالها حال أي يوم يمر من دون أي تغير لكن دوام الحال من المحال تمر علينا أحياناً ظروف تكسر كل قواعد البيت من أوله إلى آخره وتغيره بشكل جذري من دون مانحس..... أم سلطان تدخل الصالة وتزجر عيالها اللي تكحل عيونها بشوفتهم قبل لا يظهرون....
نزل سلطان....
سلطان: صباح الخير يا أعز وأغلى الناس عندي (يبوس أمه على راسها)
أم سلطان....حبتك العافية يا ولديه شو أصبحت يعلني أفداك؟
سلطان: بخير دامج بخير يالغالية...ماعليج مني مهر
أم سلطان: قالي أخوك البارح كنت ميهود شو ياك؟
سلطان: لا أميه... هذا لسانه يبا قص مافيني شي بس كنت مصدع لأنه عندي قضية شاغله بالي وايد هالأيام وربج كريم لا تستهمين.
أم سلطان: عساك الخير والعافية يارب والله يوفقك ما يسوى علينا يوم صرت وكيل نيابة وهالقضايا في البلاد تشيب الشعر مابقى نص من حالك من اشتغلت؟
سلطان: والله ...؟ أفا يا أم سلطان يعني الحينه .. استويت شيبه خلاص ما أنفع الله يازمن عيل دام الغالية تقول جذي مالوم حد من هالمزيونات إذا مابغني باجر هههههه...
أم سلطان: لا تسويلي حركاتك من صباح الله خير ...ربي يحفظلك شبابك دوم
سلطان: مبا شي في الدنيا غير رضاج عليه؟
أم سلطان: راضيه عليك دنيا وآخره فديتك ياسلطان عمري ما سمعت منك كلمة على القلب تجرح.
دخل بو سلطان ...
أبو سلطان: منو هذا اللي تتفدينه قبلي من صباح الله خير ما غيره سلطان ماخذ مكاني....
بصوت يملأه التعب أم سلطان وسلطان يضحكون.
سلطان: أفا عليك بو سلطان ما عاش اللي ياخذ مكانك أنا اللا ورقة منك؟
أم سلطان: الله يخليكم لي يارب يا عزوتي وناسي
بو سلطان: لا أسمحيلي حددي منو أنا ولا سلطان...؟
يضحكون كلهم وي بعض وترد أم سلطان وهي مستحية...
أم سلطان: سد وذخر يا بوسلطان أفا منو قال اللي ياخذ مكانك وأنت عارف
سلطان: أقولكم متفيجين جدامي ترمسون جذي...؟ شو ها عطوني فرصة أثبت وجودي....
تدخل هند...
هند: هاي شحالهم الجميع
تغير ويه سلطان ويرد بتوتر....
سلطان : هاي ورحمة الله ... شو الجامعة جذي تعلمكم تسلمون يوم تشوفون أهلكم؟
هند: ياربي انت كل شي أنا أقوله مايعيبك؟
أبو سلطان: يابنتي صدقه أخوج عيب شو هاي... وين يالسه أنتي؟ نحن قبايل وبدو علمناكم سلام الدين والرحمه حتى ربج بيبارك في المكان اللي تسلمين فيه.
سلطان: لا ما تعرف يحليلها بعده ما طرحوا السلام عندهم في المقرر؟
أم سلطان: تعالي فديتج شو بلاكم على البنيه ماسوت شي
هند: شو بلاكم؟ أستلموتني كل ماشفتوني لازم تنغزوني بالرمسه ؟
سلطان:لأنه أسلوبج من دخلت الجامعة مب عايبني لا أنا ولا أبوي ولا أي حد في البيت لا لبس محشم ولا ستر حاطه بويهج هالخرابيط وهالشنطة اللي يشوفج يقول رئيسة عصابة شو ها؟
هند: شوف هذه أشياء أنت ما تعرفها بس نحن البنات نفهم بعض شرات ما أنتو الشباب عليكم سوالف...وعفكرة تراني ساكته محشمة الأهل ولا برد عليك؟
سلطان: قصورج بعد.... يهال آخر زمن يردون عليه؟
بو سلطان: هند أباح تعدلين تصرفاتج اللي تسوينها في عمرج.... مب حالة منقود يابنتي عيب.... وبعدين أخوج ما قال شي غلط عسب انتي تردين عليه..... يالله اشوف تريقوا وتيسروا على مشاوريكم.
تدخل عفراء (بطلة قصتنا) وكانت قمة في الذوق والحلا وكل شي وغير عن أختها هند في كل شي من الألف إلى الياء...
عفراء: السلام عليكم لا خليت منكم ...
الجميع يرد..وعليج السلام والرحمه...
عفراء: شحالهم شوابنا....
أم سلطان وأبو سلطان: بخير يسرج الحال
سلطان: أنا بعدني ههههههه
عفراء بدلع: شحالك بومايد؟
سلطان :آآه فيه ناس ترفع المعنويات على الصبح يا ويل حالي بخير لا خليت منج ولا من هالويه الحلو.
هند: عيل أنا محد رحب فيني تراحيبكم هذه لعفروه ولا لأنها (vip) وأنا بنت البطة السوداء مهازب من الصبح؟
أم سلطان: بدينا سوالفكم هذه.... يابوي كلكم غلاتكم وحده في قلوبنا محد أحسن عن حد
عفراء تغمز لسطان: نحن الكبار معزتنا غير عن الباقين صح سلطون؟
سلطان:سلطون في عينج حشمي شو أصغر عيالج أنا أسمي سلطان ولو حصل وبغيتي دلعيني قوليلي بو مايد.. احم ... بس نحن غيرشرات ما قالت عفاري
هند : ليش انولدتو وعلى راسكم ريشة؟
سلطان وعفراء يضحكون بصوت عالي ...... وأم سلطان وأبو سلطان يراقبون بصمت
هند وهي زعلانه: ضحكتوا بلا ضروس ... أنا قلت نكته الحينه عشان تصاقعون انت وياها...
سلطان رجعت له ملامح الجدية ورد على هند: أنتي لو تحشمين الناس وتعرفين تحترمين اللي أكبر منج كان وضعج تغير وياي وي الكل
هند: لا دخل الكل أخواني وأمي وأبوي محد يعاملني جذي غيرك انته
سلطان: يعني عارفه نفسج في شو غلطانه وشو الي يضايقني منج؟...خلاص عيل عدلي تصرفاتج وعقب بتتغير معاملتي لج.
هند وبحزن حاولت تخفيه عن الحضور: أنا أدري انك تكرهني من زمان ولا عمرك قلت لي كلمة طيبه ومالي مكانه عندك .
نشت هند وتحاول تخفي دمعه ساخنه في عيونها وخذت كتبها وظهرت
تضايق سلطان لأنه ما كان يعرف شو اللي يدور في خاطر هند ولا كان يتوقع أنه ماخذه عنه هالفكرة ...
أم سلطان: شوفيكم دومكم حاطين دوبكم وي هند هذه أختكم وأصغر وحده فيكم وتحبكم الله يهداكم بس ...
سلطان تسمر في مكانه لأنه ما توقع ردة فعل هند واللي أول مرة يشوف هالحزن اللي أرتسم في ويها نش وأستأذن من أبوه وسلم على امه وسار الدوام
عفراء حز في نفسها الكلام اللي هند قالته لسلطان لأنه علاقتها وي سلطان قوية وحست انه سلطان تضايق من رمست هند واللي محد كان يتوقعها أبداً
أبو سلطان: هند تضايجت تراها من حشرتكم و تراني ما يعيبني عليها يوم بترد رمسي أختج وخبريها انه الكل في البيت يحبها وخاصة سلطان
عفراء: إن شاء الله...
ظهرت عفراء وسارت الدوام( إخصائية إجتماعية بمدرسة)
أم سلطان: ياربي سهيل مافته اليوم يا ويل قلبي لا يكون مريض ومحد داري عنه؟
أم سلطان تركض صوب حجرة سهيل ودق الباب بقو...
أم سلطان: سهيل ؟؟ سهيل!!
سهيل كان الشيخ راقد في سابع نومه لأنه راد متأخر البيت وعليه دوام في الشرطة ولا عنده خبر من الدنيا في شي
أم سلطان: سهيل!!!!!! بصوت عالي
سهيل نقز عباله صار شي فتح الباب بسرعة
سهيل: شو صار أميه حد صارله شي؟؟
أم سلطان : لا فديتك شو هالطبة عندك أنته أونك إنسان عسكري متأخر عن دوامك لين الحين ما تستحي في الشرطة لو أنا هناك وأتأخرت جذي بدبلك؟
سهيل يضحك بصوت عالي ويلوي لى امه ياويلي على اللي يدبلني سيري انتي هنام بس وبلبسج دريس عقياسج وبدوام كل يوم
أم سلطان: لاتقردني ليش ما سرت الدوام للحين شو عندك تتحرة عمرك معرس نايم للساعة 8.30 بيفنشوك ؟
سهيل: شو يفنشوني اميه الله يهداج الدنيا فوضة بعدين وين سلطان أنا موصينه امس قبل لا يحدر غرفته أو ما ينش يقعدني يعني هب مني سيري اهزبي سلطان؟
أم سلطان : عن اللقافه سير اتسبح وجابل دوامك الله يهديم يا سيهل ياولد سعيد
سهيل وهو يضحك: عاد هو العوق هب في سهيل في سعيد هههههههههه
أم سلطان تيود سهيل من أذنه : عن المصخره الزايده وأخلص عسب ما تتأخر لا حوووول
سهيل : فالج طيب من عيوني
لبس سهيل وراح دوامه وطبعاً أتهزأ في شغله لأنه تأخر وايد على الدوام ...
سلطان في الدوام يفكر وايد في أخته هند ويحاول ينسى السالفة بس مب قادر لأنه في قرارة نفسه يحب أخته هند وايد لأنه أكثر واحد دلعها يوم كانت صغيرة ما تحمل فكرة أنه أخته حاطه في خاطرها عليه بس لأنه في لحظة خاف عليها وحب ينصحها؟
هند في الجامعة.... سرحانه مول مالها خاطر لا في الكلاس ولا وي سوالف البنات
سارت الكوفي ويلست روحها وكانت تصارع نفسها وتسأل نفسها (ليش سلطان قاسي ويايه ليش يعاملني غير وعفراء غير؟ أنا أحبه وفخورة انا عندي اخو شراته...ياترى لهدرجة أنا اسوي اشياء هب زينه عسب سلطان ياخذ مني هالموقف ويكرهني؟
يات صوبها ربيعتها الروح بالروح...موزة
موزة : مرحبا هند شحالج الغالية؟
هند بنفس ضايجة: مراحب والله هلا مواز بخير يعلج الخير
موزة: يالسه ادورج وأنتي يالسه هني قوليلي عسب اخاويج على الأقل؟
هند: ماعليه مواز حبيت أيلس روحي شوي؟
موزة : شو فيلم عربي تيلسين روحج خير شو فيج؟
هند: ماشي
موزة: أقولج عن الإستهبال هب عليه هالحركات صدق شكلج مستهمه وايد شوفيج عاد؟
هند: تصدقين موزة عمري ما حسيت بيوم انه حد يمكن ياخذ مني موقف لأسباب تافهه
موزة وهي مستغربة: منو تقصدين؟
هند: مدري أحس بغصة بقلبي ..!! ودمعت عيون هند وتحاول تكابر عسب ما تصيح؟
موزة تيلس حذال هند وتلوي عليها...هند يعلني أفداج شو صاير شو حل عليج...؟
هند ... سمحت لنفسها تصيح جدام أغلى ربيعاتها بس بهدوء
موزة تمسك أيد هند... بتقولين ولا أتصل في عفراء استخبر منها شو صاير...؟
هند: لا مباها تعرف اصلا لأني متأكدة أنها حست بغلطتها...
موزة: هند حرام عليج عفراء أختج ومستحيل تسوي شي يمكن يضايقج
هند ترد بعصبية: لا تسوي بس عسب تفوز بقلب أخوي سلطان أنا أدري محد غيرها يشرش سلطان ضدي ولا عيل شو دراه بلبسي وسوالف الجامعة؟
موزة: ليش سلطان علق عليج في شي ؟
هند: اونه مب عايبنه شكلي ولا كشختي ولا أي شي من تصرفاتي من دخلت الجامعه؟
موزة: تعرفين الشباب وخاصة خوانا يخافون علينا
هند: فيه فرق بين الخوف والكره ...بعدين لو هو يخاف عليه مابيكلمني بهالأسلوب خلاني أحس أني أبداً مب أخته ...
نزلت هند راسها وغطت ويها بأيدها ويلس تصيح موزة حاولت تخفف عليها وأقنعتها تغسل ويها ويسيرون المحاضرة
الفصل الثاني)
مرحبا فيكم ملايين وهذه الوصله للشلة والقصيدة اللي ألهمتني أكتب لكم هالقصة أتمنى تعجبكم وقت ممتع في قصتي الأولى.......
حب غيره ما تمنيته *** والله أني فيه هيماني
ويل حالي يوم لاقيته***خزني بالعين وأرماني
القلب والروح أهديته***مثل ما هو حبه أهداني
الساعة 1 الظهر ترجع هند مع الدريول من الجامعة برفقة صديقتها موزة وفي الطريج
موزة: هند شو الحينه أحسن؟
هند:- اوكيه طنش تعش والله يامويز لو مب سلطان أخوي بالنسبة لي أخوي الكبير كان صار شي ما تتوقعينه.....
موزة: لا حووول يابنت الحلال شو بلاج ماخذه منه موقف حطي نفسج مكانه يغار عليج أنتي مهما كان أخوج يمكن هو يشوف شي أنتي ما تشوفينه!!!
هند : لدرجة يفر رمسه مايفكر شو تسوي فيني لا موزوه أخوي سلطان وأعرفه زين يحب يمثل علينا دور وكيل النيابه في البيت ومب أنا بس يبا يظهر فيني كل شي مب زين جدام أمي وأبوي وانه صح ونحن غلط ما ادري اختي عفاري تحبه وايد... ليش وعشو أصلاً؟
موزه: مالج حق هند عنبو شاله في خاطرج لهدرجة خلاص انسي السالفة..
هند في خاطرها تقول نشوف ياسلطان رمسة منو اللي بتمشي
هند: موزة تغدي وياي اليوم مالي خاطر أيلس عند حد في البيت دخيلج قولي هيه بتمين ويايه...؟
موزة : أقولج متفيجة أنتي شو غدى أنا يوعانه رقاد أبا أسير البيت وانخمد وراي بريزنتشين نسيتي دوري الحينه
هند: أنا بساعدج شو الراي؟
موزة: شو رشوة يعني عسب أقبل العزيمة؟
هند: منو قالج عزومه شو عبالج أنا أتغدى شراتهم هذيل عيوش ولحوم ومدري شو لا فديتج سندويشات كلوب وعصير فريش؟
موزة: صدق ما عندج سنة شو سندويشات مبا عيل
هند: يابوي ذليتني خلاص تعالي بس مبا أيلس روحي اليوم بس الظهر عقب بوصلج انا والدرويل بيتكم...ها شوقلتي؟
موزة: خلاص بس أخبر العيوز لا تزعل عليه مافينا بعد؟
تتصل موزة بأمها وتخبرها انه بتيلس عند هند فترة الظهر والعصر بترد البيت طبعا لأنه أم موزة تعرف أهل هند وافقت
************
عفراء في المدرسة بعدها تتريا شوية في المدرسة وكانت الساعة 1.30 الظهر وتتريا الدريول ياخذها
ميثا ربيعة عفراء : عفراء شو مابتسيرين البيت ؟
عفراء : بسير بس الدريول تأخرمدري شو عنده...أحاول ادقله مايمسك وياي الخط..؟
ميثا: تعالي زين انا بوصلج ترى الدرب وحده؟
ميثا أقرب إنسانه لعفراء تعتبرها أختها وصديقتها وهم يقربون لبعض بس من بعيد من طرف أم عفراء
عفراء: مبا أعبل عليج كل مرة يتأخرون انتي تتعبلين فيني والله قفطة
ميثا: أونج عاد شو هالرمسه نحن خوات ونشتغل في مدرسة وحده أنا ماييني قلب أسير قبل لا أتأكد أنج سيرتي
عفراء: عساني ماخلامنج يالله عيل تراني صدق تعبانه
يسيرون صوب سيارة ميثا ركبوا وفي الطريج........
ميثا: عفاري مافكرتي تاخذين ليسن ؟
عفراء: لادخيلج وأخوي سلطان موجود ماظنتي؟
ميثا: عفانا الله ليش ؟ عيل زينه حالتج كل يوم والثاني متأخرين عليج ؟ مسكين هالدريول متلته بين أمج وأختج عاد أختج هند بروحها يبالها دريول من حدرت الجامعه والدريول وراها
عفراء: عاد هذه القلب يا ميثوه عند الشياب ما يطيعون عليها وانا على قولتهم الكبيرة وأدبر عمري
ميثا: ولو يعني أنا أحتمال أنتقل مدرسة ثانية أنتي عارفه سوالف النقل اللي دايره على المدارس هالأيام
عفراء وهي مستغربه: في ذمتج اسمج موجود وياهم؟
ميثا: والله مدري بس الوكيله تلمح لي مدري شو عندها تباها من الله اذلف عن ويها
عفراء نزلت راسها وسكتت من دون تعليق لأنه ميثا كان لها دور في إدارة المدرسة وشخصية قوية ومحبوبه في طاقم الهيئة التدريسية وخاصة لقلب عفراء
ميثا: عفراء فديتج لا تتحرين حتى لو انتقلت لمدرسة ثانية أني مابكون وياج أنتي تعرفين نحن من متى وي بعض وأتعرفين مالي حد في هالدنيا أخت غيرج
عفراء : أدري ميثا وأنتي بعد تعرفين أنج غالية عليه وبتأثر وايد إذا سرتي عني؟
ميثا: أقولج لا طولينها وهي قصيرة وتسولينا مأساة إن شاء الله ماينقلوني وبتم على قلبج أنتي وأبله بدرية ههههههههههه
وتضحك عفراء وياها وصلت ميثا البيت ونزلت شوي عسب تسلم على أم عفراء لأنها وايد تحب ميثا...
عفراء تحدر الصالة وتسلم على أمها وحدرت ميثا وراها وسلمت على أم عفراء وعزمتها على الغداء بس ميثا طبعا بتتأخر على البيت وتبا تروح عسب يمديها توصل البيت
ميثا ظهرت وطلعت عفراء توصلها لين عند السيارة....فجأة تصفط سيارة سلطان ورى سيارة ميثا وينزل ....ويلاحظ عفراء وياها بنت أول مرة يشوفها ويلس يطالع مع انه مب من النوع اللي ييلس يتمقل في البنات ارتبكت ميثا وسلمت بسرعة على عفراء وركبت سياراتها وسلطان ما شل عينه من عليها وفي نفس الوقت ترتسم في ويهه معالم الجديه
مشى سلطان لين ما وصل عند عفراء وسلم عليها
سلطان: مرحبا عفراء شحالج؟
عفراء : يسرك الحال شحالك أنت ؟
سلطان : بخير دامج بخير..أتخبرج منو هذه أول مرة أشوفها بيتنا
عفراء: لا والله وأنت من متى تنشد عن البنات اللي يون البيت هب عاداتك يعني!
سلطان وهو يحاول يغطي: لا والله متعيب الحينه كلش كلوديا شيفر اللي شفتها مالت عليكم
تضحك عفراء: سلطان حلوة صح شفت عيونك لو أنك لابس النظارة بس كنت تتطالع أول مرة؟
سلطان وشكله تضايج: عنبو مايسوى علينا يوم نسأل؟
تضحك عفراء : خلاص انزين اونه يسوي عمره عادي يالله مب مشكلة عالعموم هذه ربيعتي ميثا وأغلى وحده عندي في المدرسة
سلطان بكبرياء : انزين شو يعني..الله يهنيج فيها
عفراء: سلطان شورايك أسوق سيارة؟
سلطان صد صوب عفراء وهو معصب : شو ما أسمع عيدي شو قلتي؟
عفراء وهي تبتسم وزايغه تقول: ماشي خلاص قلت يعني عسب ما أيلس أعبل على البنت كل يوم والثاني يتأخر عليه الدريول قلت آخذ ليسن وأسوق؟
سلطان: أقولج أشوفكم بديتوا تسون روس في هالبيت شو لج باليسن وعوار الراس اللي يبا يسوق منه والدرب
عفراء: حرام عليك سلطان ربيعاتي في المدرسة كلهم عندهم سياير شو فيها لو خذت ليسن وظهرت لي سيارة حلوة بناتيه؟
سلطان خلاص وهو مفول عليها.....عفراء تحمدي العافية واجلبي ويهج تراني ياي و160 شيطان جدام ويهي
عفراء: خلاص انزين عفانا الله اضطهاد هذا... حشا؟
دخلوا البيت الجميع ودخلوا على أم سلطان وسلموا عليها
دخلت هند و شافت سلطان يالس.... طالعته نظرة طويله وهو حس بنظرتها هذه بس صد صوب عفراء
هند : السلام عليكم
الجميع ...عليج السلام
عفراء: هلا هند قربي فديتج شو الجامعة
هند : بخير شرات كل يوم اسمحولي انا بسير أساعد ربيعتي يايه وياي
سلطان تغيرت ملامح ويهه للضيق وعفراء نفس الشي
أم سلطان: برايج وإذا بغيتوا شي خبري البشكاره
هند: خلاص اوكيه أبوي وصل ولا بعده
عفراء: لابعده
هند تجاهلت كلام عفراء متعمده ولا كأنها ترمسها صدت صوب أمها
هند: اميه فديتج إذا وصل ابوي أزجريني عسب اشوفه وأسلم عليه
أم سلطان: إن شاء الله فديتج
وجهت نظرة أخيرة لأخوها سلطان وكلها عتب وردت غرفتها
أم سلطان: شو بلاها هند تطالعكم جذي لا تكون هذه من صدق شلت في خاطرها عليكم عسب رمست الصبح؟
سلطان: مدري اسمحولي انا بسير أتسبح وأبدل ملابسي وأخمد شوي
أم سلطان: شو عكيفك والغداء؟
سلطان وهو يضحك: الغداء مجبوس ومحد غير أبويه يحب المجابيس هب لسواد عيون سلطان
ويضحكون كلهم
أم سلطان: هب منكم من اللي يطبخ لكم
سلطان: لا فديتج أسولف وياج بس مالي خاطر تعباااان وأبا ارقد
عفراء تمسك أيد سلطان : أبا أرمسك
سلطان وكأنه ماصدق انه عفراء تبا ترمسه : تعالي حجرتي بنرمس هناك
عفراء : اميه اسمحيلنا
أم سلطان: برايكم مسوين راس وراسين مابينكم
سلطان وعفراء يضحكون ظهروا وساروا حجرة سلطان دخل سلطان وحدرت عفراء
عفراء: سلطان شوفيك ضايج ؟
سلطان: عفراء بسألج أنا قلت شي غلط لهند عسب هي تتضايج مني؟
عفراء: لا عادي بس انت صريح وايد بطريقة تعور شوي؟
سلطان: أقولج لا تتفلسفين عليه اونج إخصائية شجايل بعد صريح بطريقة تعور شو شال عصا انا واضرب؟
عفراء وهي تبتسم وتحاول تهدئ أعصاب سلطان : سلطان فديتك أنت اخونا الكبير ولك أحترامك وكل شي تقوله على عيني وراسي بس الأسلوب اللي تتنقد فيه دفش....
سلطان يفتح عيونه مستغرب: أنا دفش الله يسامحج عفروه؟
عفراء تيود سفرة أخوها وترتب الغرفة وتكمل كلامها: أقصد يعني هذا الجيل شرات أختي هند يفسر النصايح على كيفهم يبالهم مسايس مايبالهم الأسلوب مالك هذا مال مجرمين اللي يهداك؟
سلطان وهو ماسك نفسه يبا يضحك..الحين في ذمتج أنتي قصدج أني اتهم وانصح بطريقة شغلي ؟؟ هذا اللي تقصدينه ؟
عفراء: هيه يعني حاول تفصل اسلوب كلامك في الشغل عن البيت نحن شو ما كنا أخوانك ولنا الحق انك ترمسنا بأسلوب حلو وسلس شوي
سلطان : بس أشهدعليج ربج راضية على تصرفات هند في كل شي من رمستها لين أصغر شي في تصرفاتها؟
عفراء : لا مب راضية وأنا نصحتها كذا مرة بس هي تتحراني أغار منها
سلطان يضحك بصوت عالي...ضحكتي سلطان في يوم مايبا يضحك فيه بالله عليج حد يغار من هند
عفراء بجدية: ... سلطان انت وايد ماسك على هند يعني حتى أنا اللي مايخصني أحسك تتريا عليها الوحده عسب تتنقدها وتظهرها وخاصة جدام أمي وأبوي انها مب اوكيه وهالشي بيخليها تتخذ موقف منك وتتصرف معاك بعدوانية وعناد
سلطان: عناد!!!! والله عقالي حاضر بخليها يبب على ظهرها وبشوف العناد هذا وين بيوصلها؟
عفراء: سلطان نصيحة مني خفف السرعة شوي وي هند العناد مع البنات مب زين
سلطان: عفاري؟
عفراء: عونك
سلطان: بسج كلام لوعتي جبدي يا حبكم للتفاصيل انتو البنات والهذره الزايدة سيري جابلي أمج وساعديها يالله برع
عفراء: افا صدق ما عندك مذهب .... عيب يالسه ارتب حجرتك يا الفوضوي
سلطان: ياويلي عليج تتمنين انتي تدخلينها
عفراء: لا كلش عاد أنا اللي مطيحه عند باب الحجرة وي راسك
يضحك سلطان وتظهر عفراء من عنده وسارت صوب امها ويلست تسولف ويها
دخل سهيل وأبو سلطان رباعه وتغدوا الجميع وعقب الغداء ظهرت أم سلطان تزجر هند عشان تسلم على أبوها شرات ما وصتها ونزلت هند وسلمت ويلست حذال أبوها اللي أكثر واحد تحبه في البيت وعقب أخوها سيهل جريب منها وايد ويلسوا سولفوا شويه وعقب كل واحد سار غرفته........
(الفصل الثالث)
الساعة 9 بالليل في منزل ميثا تفكر في عفراء واللي شافته في بيتهم....ان شخصية هيبه محيا صح يخوف شوي بس غرشوب ... تبتسم مع نفسها وهي تفكر وي نفسها أنا شو يالسه أقول هذا على رمسة عفراء يحليلها مستحيل بيوم يفكر بقلبه شو ها نحن الحريم مشكلة صدق إنا من ضلع أعوي...فجأة يصيح تليفون ميثا... نغمة حربي العامري
ويلي ياويلي يا ويلي ...أنا ياويلي ورا اح القمر من ليلي ميثا تترقص وهي تسوي اوكي
ميثا: مرحبا عفاري
عفراء: هلابج الغلا
ميثا: توني يالسه افكر فيج تصدقين؟
عفراء وهي تضحك: اقولج عن الواته في ذمتج فيني أنا بالضبط ولا في حد ثاني ؟
ميثا ترد وهي منحرجة وتحاول تغير السالفة: لا في أبلة بدرية اللي في المدرسة هههههههههه
عفراء: بايخة لا تغطين مشكلتج أني فاهمتنج عدل
ميثا: عفروه صح بسألج منو اللي كان ياي بيتكم؟
عفراء تضحك بصوت عالي: انزين ادخلي على طول في الموضوع وأسألي اونه افكر فيج ما أفكر وي ويهج
يضحكون وي بعض وترد ميثا سؤالها... : لا صدق منو ؟
عفراء: هذا طويلة العمر وكيل النيابة
ميثا: ايووووه الحينه هذا سلطان
عفراء: انتو البنات الأستهبال عندكم ببلاش هيه سلطان اونج ما تعرفين!!!
ميثا تضحك: تعرفين هب منج من اللي يسألج
عفراء: ياختي السموحة أسألي ولا أقولج أنا بخبرج هذا أخوي سلطان الكبير وأقرب واحد من أخواني عندي عمره 28 يشتغل وكيل نيابة وهو من النوع اللي صعب وايد اوكيه اقولج من الحينه عقب ما تقولين ياريت اللي جرى ما كان هههههههه
ميثا : خلاص مالج خص انتي شو تبين داقه
عفراء: ميثا أنا متوهقه مع تقارير البنات ومصدعه وأباج تساعديني مقدر 28 تقرير مشاكل هالبنات عفانا الله؟
ميثا: أفا عليج عفاري مسافة الطريج وبيي عندج تبين شي وأنا يايه؟
عفراء وهي فرحانه: تسلمين غناتي والله انج نشمية مبا شي فديتج تعالي وساعديني بس
ميثا: خلاص اوكيه باي
عفراء : بباي
******************
هند تسولف وي سهيل عن ربيعاتها في الجامعة اللي ما تحبهم
سهيل : والعثرة حشا مب بنات في جامعة جبهة قتالية عبنو كل وحده تتربص بالثانية
تضحك هند: عيل ماشفت شي شو يسون وهذه تشوف بنت حلوه تحجزها وتضارب البنات
سهيل وهو مستغرب: شو يحجزونها سيارة هي عنبوكن زاد شو وين تبن؟
هند مايته من الضحك على ويه سهيل وهو مستغرب: لا يالمخ أنته يتضاربون يحجزون البنات الغاويات لأخوانهم يعني يخطوبهم
سهيل نقع من الضحك: قسم بالله أنتو البنات مصخره
هند تضرب سهيل على كتفه: مصخره في عينك
سهيل: مصدقين عماركم وأنا أقول كل وحده تشكخ ساعة جدام المنظرة ومدري شو وحركات بس عشان البنات اللي يخطبون ايوووه .... والريال يبتلش عقب ههههههههه
هند معصبة وتنش: سخيف انته محد يقولك شي...
سارت وظهرت صوب حجرتها نزل سلطان ويات عينه في عين هند وهو نازل
سلطان: شحالج حبوبه
هند مستغربه : بخير يعلك الخير
وقفت هند و طالعت سلطان لين ما غاب عن عينها وظهرت غرفتها حست في نفسها أنها غير الكلمة الطيبه لو كلمة وحده مب نثر ولا شعر ولا غيره تأثر في النفس وترفع معنوياته ويمكن تخلينا نغير فكرة ظالمة ساكنه في نفوسنا من ناحية طرف غالي علينا ونتمنى أنه يستمر في تعامله ويانا في هالطريقة .... المهم ظهرت هند بعد عسب توصل موزة بيتهم وردت البيت بسرعة لأنه تبا تذاكر ...
وصلت ميثا..... دقت الباب لكن تفاجأته أنه هب عفراء اللي فتحت الباب... سلطان كان ظاهر وفتح الباب بسرعة...
سلطان وقف: سلام عليج
ميثا تخفي ابتسامة سعادة.... عليك السلام هلا سلطان
سلطان وهو مستغرب: تعرفين أسمي... ياااااااا......ميثا على ما أعتقد صح؟
ميثا قفط ويها: هيه عفراء هني ولا ظهرت...؟
سلطان وهو يمسك نفسه لا يضحك لما لاحظ انه ميثا أنحرجت: هيه حياج قربي نور البيت
ميثا انقبض قلبه يوم قال هالرمسه
عفراء يات تركض : اويه ميثا اسمحيلي قربي حياج
سلطان وكأنه فيه شي يديد تغير: تفضلي ميثا ترانا أهل
عفراء تخزسلطان بعينها: دخلي ميثا بسرعة
حدروا وسلطان تم واقف والباب مفتوح يشوفهم لين ما ظهروا فوق
فجأة سلطان تغيرت ملامح ويهه وقال لنفسه أنا الحين شو يالس اسوي والله أني تخبلت من يوم شفت هالبنت وانا حالي منجلب مايسوى علينا يوم نبا هالقلب يدق بعد ماسكن الموت الف مرة
ظهر سلطان وهو منشغل باله في جمال ميثا ....ومنطوقها وذوقها ورقتها وقوة شخصيتها اللي فارضه نفسها على الكل آآآه صدق عبد المجيد يوم قال الزين يفرض نفسه....
سلطان: اف شو هالحالة استغفر الله أنا أفكر هالشكل وفي منو هالبنات قسم بالله بيظهرون لي شعر أبيض في راسي
وهو ماشي حط F.m
حياتي وموتي بذيك الخدود***ورمشه وعينه تساوي بلاد
أنا له محبا يداري العهود.....أحبه محبه بليا حدود تمكن وداده في لب الفؤاد...
سلطان ريح على الكرسي ويلس روحه يفكر وأنه لازم يغير أسلوب حياته وقعد يتبسم ويسمع اف ام وكأنه الأغاني هذه يسمعها لأول مرة....
في بيت قوم عفراء.......
ميثا معصبه : الله يسامحج يعني عسب سألتج عن سلطان اليوم تخليه هو يبطل الباب....
عفراء وهي ميته ضحك: والله ماخبرته شي أصلا أنا روحي مستغربه انه هو اللي فتح الباب بعدين لا يروح فكرج بعيد سلطان كان ظاهر وتمسى بويهج الحلو ..
ميثا:يعني تبين تقولين انج ماقلتي شي لسلطان عني أبداً عيل ليش وقف وسلم عليه ورمس وياي ها قولي؟
عفراء فاتحة عيونه مستعيبه: فذمتج سلطان سلم عليج ورمسج اوووويه ميثا يالبايخه ضويتي رأس هالعنيد شو قلتي يالله قولي بسرعة شو قالج قولي كل شي؟
ميثا وهي تنفي: الريال سلم بس وقالي تفضلي بعدين أنا تضايقت يوم أنتي تأخرتي خليتني ناقعه عند الباب وأخوج يرمسني
عفراء وهي تضحك : كذووووب أنتي متشققه ويهج كان أحمر يوم أنا واصله ومنزلة راسج فرحانه المطلوب هو اللي فتح الباب هههههههههههههه لا وبعد كاشخه بالقو يحليله أخوي
ماااات ههههههههههههههه
ميثا تضرب عفراء: سخيفة عن الهذرة الزايدة خلينا نبدأ شغل مبا أتأخر بسرعة
************
سلطان خلص شغله ويلس ولأول مرة يتمشى في العين ... وهو مسهم (الله يعينه)
ويفكر في اللي شغل فكره وقلبه......
دق على تليفون عفراء.....
عفراء: مرحبا بو مايد
سلطان: هلا عفروه بتخبرج بس لا ترمسين...جدام البنيه قولي هيه ولا لأ بس
عفراء وهي تضحك: قول يعلني ما خلا منك قول
سلطان : جب... المهم سارت ميثا ولا بعده في البيت؟
عفراء: لأااااااااا شو عندك؟
سلطان: الله يفضحج اسكتي .... انزين أقول ماتبون أيبليكم عشاء شي في خاطركم وأنا راد البيت....
عفراء تظهر من حجرتها وتكمل رمسه....وكاتمه في نفسها تبا تضحك بصوت عالي بس عسب ميثا ما تحس.... وأول ما حست انها شوي بعيد عن الحجرة ضحكت بصوت عالي
سلطان وهو معصب: ضحكتي بلا ضروس مب منج غلطان أنا داق وي راسج
عفراء : فديت روحك سلطان والله ظهرت برى الحجرة
سلطان: اوووف روعتيني عبالي جدام البنيه ترى تعرفين اخوج ما احب هالسوالف
ولا تتحرين يعني أسألج عنها اوكيه....
عفراء بدلع : انزين يابويه لا دز على هونك ما نبا شي لا تعب نفسك يابوي مايد البنت الحين بتظهر خلاص ....فاتك ههههههههه
سلطان ومعصب: أقولج اجلبي ويهج تسير ماتسير أنا شلي بااااااااي
عفراء: بااااااااايات
سلطان رغم عنه يضحك وهو يقول: صدق بنات ماينعطون ويه.....
***********
سهيل.... ساير العزبة ويا عيال عمه وعازم ربعه الباقين يتلاقون هناك....
سهيل: أقولكم شباب شو الراي اليوم تحدي ترى بين عيال بن مترف واحد من عيال راشد بن سيف في الشلات نبا ندخل وياهم يعني مايستوي نحن عيلة وحده نبا نغسلهم شوي...؟؟
فهدولد عم سهيل: حاضرين للطيبين
سهيل: شو حاضرين من زين صوتك الحينه أرمس صدق يابويه شوفيك؟
علي ولد عمه الثاني: هاسهيل شو الراي أبدأ أنا وياهم وعقب أنته؟
سهيل: ياخي مشكلة ما حضرة شي عسب اني أقوله جدامهم ...أتخبرك أسمع هذه شو رايك
علي وفهد : يحليله ياحافظ عليك ...صح لسانك...
سهيل : احم ومن قال سالم انا أبا أعطيهم فرصة يعني حرام تعرف ضيوفنا وجذي
علي وفهد وسهيل يضحكون رباعه
وصلوا الشباب... وكان سهيل متميز بينهم في كل شي خفة دمه نشامته تكريمه للضيوفه واستانسوا.........
وأتصل البيت وخبر أهله أنه بيبات في العزبه وبيرد بالباجر.. وعقب فترة وقبل لا يبدا التحدي أتصل سهيل بهند وخبرها شو السالفة... هند استانست لأنها تحب الشعر والشلات
هند: دخيلك سهيل فديت روحك خلني أسمع شوي عشاني؟
سهيل : والله غالي والطلب رخيص بس بشرط مبا نفس واحد يعني من أخلص ببند في ويهج
عسب ما يحسون بشي اوكيك؟
هند: ياويلي خلاص تم فالك طيب
سهيل : عيل انطبي من الحينه ..
هند بسرعة: سهيل؟
سهيل: لبيه
هند : أحبك وعساني ما خلا منك
سهيل وهو يتمصخر: حبتج تاوة حارة تقليج اسمعي بس
وبدت السهرة وخلصوا الشباب وبند سهيل واستانست هند لأنه حست أخوها سيهيل مهتم بالأشياء اللي يمكن في نظر سلطان تافهه ومب مهمه لكن سهيل بالنسبة لها يفهمها ويقدرها أكثر رغم أنه في البيت الواحد أكثر من أخو لكن تفاوتهم لفهم الأشياء وخاصة وي خواتهم يختلف من واحد للثاني.....
****************
رجع سلطان بسرعة البيت تقريبا على الساعة 9.30 بالليل ولاحظ سيارة ميثا بعدها موجودة ونزل الجامة اللي صوب البيت يطالع فيه حد واقف ويلس في السيارة وهو يفكر ... وتذكر شريط عزيز عليه ويحب يسمعه في خلوته... وشغل شريط شلات وفجأة وه وهويشغل الشريط ظهرت ميثا وعفراء وصوت التسجيل كان عالي ولاحظة عفراء وميثا أنه سلطان واقف بالمرة ورى سيارة ميثا... بس تجاهلوا وسلمت عليها وهي تنزل بتسير سيارتها تسمع من سيارة سلطان الشلة وتقول.......... وين ساري يا بعد عمري... ماقدرت ميثا تيود نفسها وابتسمت وركض على السيارة.....
هني سلطان تمنى الأرض تنشق وتبلعه من الإحراج... وعفراء تطالع سلطان وميوده نفسها تبا تضحك بس عارفه عمرها لو ضحكت سلطان بيقطعها.... بنفس الوقت سلطان حس نفسه مشلول مب عارف شجايل يتصرف رد سيارته ورى عسب يسوي مجال لميثا .....
وميثا توهقت ما عرفت حتى تسير جدام ولا ترد ورى من كثر ماهي مرتبكة المهم البنيه ظهرت وسلطان تم في السيارة ... يسمع الشلة اللي يات كأنه قاصد يهديها لميثا
نزلت بسرعة عفراء وهي مستغربه.....
عفراء : سلطان الله يهداك شو هالحركات .....وقبل لا تكمل عصب سلطان وكأنه فاهم شو أخته يايه تقول؟
سلطان: سمعي عفراء والله أني ما كنت أتريا حد وأنتو ظاهرين أنا توني واصل وبالصدفة كنت مشغل الشريط لا تتحرين يالس أسوي حركات الشباب البطالية يوم يشوفون بنيه حلوة مايصدقون...
عفراء في ذاتها حست سلطان هب من النوع هذا... ومنحرج فكسر خاطرها وقالت:سلطان ماصار شي الغالي المهم احدر امي تنشد عنك سير نرمس وياها أبوي من صلى المغرب ظاهر عنها مارد
سلطان وكأنه من الله بغها تغير الموضوع: يالله يعلني افداها أقولج بسير أنا وياها وسير المطبخ يبي قهوه بنسولف وياها....
